Osayi ko Oyohana12
1Ebeni oyi ki igbashi nyakwu oye bose akpa. Onya oye bose akpa ni sho oshiye ke eno kweyi yi ikpo nu so oya kpo otu ni gbi inyiwo igwepa ni ikweyi nu.2Okwagye koma, kweyi odose kpo owe koma yo sheha.3Oza ki igbashi nyakwu oye ki bose akpa. Egwa nyakwu nowa ni aba yogwu mo <<Odragon ni>> gbi ikweyi ahapa kpa agyi igwo kpo otu ahapa ka awikweyi kpiri.4Opyo oye ipu ko okwu eta ka awinyiwo ni ba akpa ni kpe ewa nu wa shonu ese. Ohagye ohobu ko onya ni kwagye koma ni, shini owoni oya moyi ona yo oyi ni oma ni yi me.5Ebeni onya ni moyi nongo, ni ya wa kpogwu kese ni kpiri kpo oshu. Ake yo oyi mani nusho ga yi do Owuso kpo obe nu.6Onya mani nyinya nu gi ipu ko ododa, ebeni Owuso kyanutu danu ni, ebeni aba yi iyi kwo ke eno okpakwu oye so ogbogbo epa sawihiri ni.7Ebeni efu kpokpo nyiso ipu ki iso. Omakyel kpa ayoleho nu kpefu kpe egwa nyakwu kpa ayole nu mama ni;8efu ke ye egwa nyakwu mani yi re, kweyi kanu ka ayole nu ashuwa bita bi iso kelo.9Ate egwa nyakwu mani gagye, egwa nekye-nekye ni aba yogwu mi Ibiri kwo Obibi ni gye ese kpiri egya ni. Ato gbo okpagye, anu kpa ayole nu.10Ebeni npwo oko nwa bwi iso mo, <<Anani ongmongma ko Owuso wa! Anani Owuso sayi ko oshu nu byo Ose! Anani Omezaya nu sayi ko oshu nu! Koni ase ni hagye obutu ko Owuso ka kweyi ya gbela sa awogboso ke eno ko otu ni ato bwiso wese.11Arogwa ikweyi nu bwebe ko oyi ko Oyi ko Otukpo kpo okwokwoshi ni ato ono ni; kweyi agbi imu ko zo olayi wa shini ana gekwu.12Mani oni iso, kpase ni bipu nu kpiri na shotunehe! Ikweyi koni Ibiri wokpagye wa tala, kweyi onwonwu kpanya, ikweyi koni ogye mo ishi ni ogbo ni shishini nwa kelo.>>13Ishini egwa nyakwu mani gye mo ato gagye ni, okwotu ko sonya ni moyi nongo mani enya.14Adonya mani akya ke eto nyakwu epa ni oyawu gebe ko oyagye nu ipu ko ododa, ebeni aba yiyi kwo ka ashayi eta soya ihiri, shini egwa nyakwu naka yofo lo.15Ebeni egwa nyakwu mani gbagba ki inyo ni kye bwo okwunu nu ko yo onya mani re.16Okpagye ke to onya mani abo; kweyi gwo okwunu yi inyo ni shonu bwo okwunu ke egwa nyakwu mani yi gwa.17Egwa nyakwu mani kyanya kotata kpo onya mani kweyi ga kpefu kpi ipwoma ko onya mani kpiri, kpase kpiri ni geyagye do ono ko Owuso kweyi gbotuse kokwokwoshi ni Oyesu sayi ni.18Kweyi egwa nyakwu hagye ega ki ishu.
The Word for the World International