Efesu6

1Ayi, ala geyagye da ada kala kpe ene kala ipu ka Adole, koni oshoshi ko ya mani.2Ala geyagye da ada kala kpe ene kala omani pini wo ono kikyikyo ni gbo okoyi ni la:3<<shini ona shoshi dawo, shini orese.>>
4Ala awada kpe ene, ala ka yotu kayi kala na bya lo, ala ke byuwa neshi kweyi fuwa ko kono ka Adole.
5Awoshe, ala geyagye da awadole kala kese mani, ala yoshi wa, ala kikweyi agye dawa; kweyi ala geyagye dawa kpotu oye kponu, byala ba ya do Okristi oni.6Ala ka ya ko moma kiyi wa kin shini ana kala lo; ala ke yoza ni Owuso ya yimu ni, byoni ala wo oshe ko Okristi ni.7Ala yoko kala ko oshe kpo otunehe, byala ba yoko da Adole la, wa asuse la lo.8Ala gye ma Adole ya da ananoho kaha abola, ko wo oshe ko wo oshe lo, ikweyi koko neshi ni ananoho ya ya ni.9Awadole, ala ya mamani kpa awo oshe kala kweyi ala ka tuwoshi lo. Ala gye mo kala ka awo oshe kala gba Adole oye kponu ipu ki iso, ni ya kepwo ka ananoho gyogye ni.
10Ko gwejeji, ala hagye loshu ipu ka Adole kpo oshu nu.11Ala shiyo kefu kpiri ko Owuso, shala kpefu kpi ibiri kpi ipya nu.12Ikweyi koni aba kpefu kpebe ni gboyi ni lalo, aba kpefu kpa awoteyi, kpa awase ni oshu yabo wa ni, kpa awoshu kebe dibu kpa awoshu ko omaku bibi ni bole ki iso ni.13Ni olemani oni ala shiyo kefu ko Owuso anani! Shini ishini eno bibi oni wa, ala ba gege ko hagye loshu; kweyi ishini ala yojoji kweyi, ala kyi ba gege ko hagye.
14Ala hagye loshu, okwokwoshi na wo ogbogbo ko gbo ogbeyi kala, oneshi na wo oshiye kogye kala,15kweyi imu ko tono ko Oshu Neshi ko omene na wo okpabawu kikpo kala.16Ipu kishi kpiri ala byo otuse na wo okpawu kala; shala yiyita kibiri ni ya shola ni myi kpanu.17Ala lo ozakeyi kogye ni wolayi ni Owuso dala ni, kpe ewakpa ko Omaku, ni we ela ko Owuso ni.18Ala tinarigwu ipu ko Omaku ishi kpiri, ala bo Owuso shona talabo. Ala wiyikala shu kweyi ala ka gbo otu lo; ala tinarigwu dase ko Owuso kpiri.19Ala tinarigwu dami mamani, shini Owuso na dami ela ko koka ishi kpiri ni ngwo okwunu ko tono koza teba ko oshu neshi, gboshi yoya lo.20Ikweyi ko ono totu mani pini nwwo oyoleho la, anani ke ayun shetu. Ala tinarigwu dami shini naka yoshi ko tono nu byoni nshu ko tu ni lo.
21Otayikyikwus, oyene kaha moshi ni wo oyole ko kwokwoshi ipu koko ka Adole ni, ya koshu kpiri dala shala gyoza ni ya gbodagye kpami kpoza ni nyya ya ni.22Oza ni ya ni nyya toleho ebe kala ni oma, shala gyoza ni abanu ni kweyi ona tala otugbagba.
23Owuso Ada kpa Adole Oyesu Okristi na da awogboso kpiri omene kpi imu kpo otuse.24Nyya beshi ko Owuso na yo kpase kpiri ni ba yimu ka Adole kaha Oyesu Okristi kpi imu ni ya kweyi lo ni.

The Word for the World International

https://app.library.bible/content/5762b83c586abca6