Efesu5
1Mani oni, byoni ala wayi ko Owuso moshi ni, ala takirikwu shala lema byanu.2Imu na kpogwu ko oyagye kala, byoni Okristi yimu kaha kweyi zolayi nu ikweyi kaha weshi kpehe ni ayi peshi sho Owuso otu ni.3Byoni ala wase ko Owuso ni, ana ka pwela ke eba boba, kwa agbaza, kwafu yoya ipu kala lo.4Mamani ala ka kela kebi kwela ka arugbetu kwela kigiga susu lo. Abishi koni ala shotunehe do Owuso.5Ala gye kamo, ase ni ya beba, kwa agbaza, kwino yafu ya gbabo ipu ko Obula ko Okristi kpo Owuso lo. Koni afu yoya wowe ko geyagye deka la.6Ashishe na ka gyalegya kpela yeye lo; ikweyi kawoza mani pini anya ko Owuso ya wa sa ikweyi kase ni tawa ko geyagye da nu ni la.7Ni olemani oni ala ka rema wa lo.8Koni ishi oye ala abiyikala bebe dibu, nabani ala ke wase ka Adole ni, ala bebe yoyu. Mani oni owotiri shini ala bagye byawase ni wa kebe yoyu ni,9koni oyoyu pini ya medo koza kpiri ni shoshi ni la, kpo yagye neshi, kpo okwokwoshi.10Ala takirikwu shala gyoza ni ya sha Adole otu ni.11Ala ka gbabo ipu koza bibi ni ase ba ya ipu kebe dibu ni lo. Ala ke yo otuwa tese.12Owo oza ki iweyi ko koza ni ase ba ya teba ni.13Ishini ayo ojoji ni aba ya ni yi tese, otu wa ya tese kya;14koni oyoyu pini yaha ba mojoji kpiri la. Oza ni ya ni ase ba kamo,<<Ala nyiso, awogbola,ala nyiso bwi ikwu,kweyi ola Okristi ya yu ipu kala.>>15Ni olemani oni ala gbera kpo oyagye kala. Ala ka bagye byi ikyo lo, ala ke bagye byase ni ziyi ni.16Ala yoko neneshi kpi ishi kpiri nala gbo ni, ikweyi koni ishi mani wishi bibi.17Ala ka wi ikyo lo, ala ke takirikwu ko gyoza ni Adole ya yimu shala ya ni.18Ala ka gwinyi ya lo, oya yala yishi; abishi koni, ala nwonwu kpo Omaku ko Owuso.19Ala kela diyikala kpa awigye ko Odawuda, kpa awigye ashini, kpa awigye ko omaku; ala wigye kpa awigye ko Odawuda da Adole, ba shaniye ipu kotu kala.20Ipu kiye ka Adole Oyesu Okristi, ala bi shotunehe ikweyi kojoji do Owuso Ada ishi kpiri.21Ala geyagye diyikala ikweyi koni ala ba mo Okristi gyiyi ni.22Anya, ala geyagye da awoba kala, byoni ala ba geyagye da Adole ni.23Koni oba wi ikweyi ko onya nu byoni Okristi wi ikweyi ka awogboso ni; kweyi Okristi abiyinu wo olowoyi ka awogboso, ni wikpiye nu ni.24Mamani anya na ziyiwa kpiri-kpiri dawobu wa byoni awogboso Okristi ba geyagye danu ni.25Ala awoba, ala yimu ka anya kala byoni Okristi yimu ka awogboso kweyi gekwu ikweyi wa ni.26Oya mani shini ona yawo awogboso na kpi inyo shini ana wase sere kweyi ona yuwa do Owuso bwebe kela nu,27shini ona diyinu awogboso sere ni gbepwo lo, ni kyokya lo oke gbinyi kwoje labi lo.28Ni olemani oni awoba na yimu ka anya wa byoni aba yimu ki ikpiye wa ni. Ase ni yimu ko onya nu oyimu kiyinu.29Ashishe ya tela kikpiye nu lo. Abishi koni, ananoho ya di ikpiye nu ozarore kweyi ya kyanutu, byoni Okristi ya ya kpa awogboso ni.30Koni aha wi igo ki ikpiye nu la.31Byoni Okpa ko Owuso ka ni, <<Ikweyi koni Ongo ya sha ada nu kpi inanu bita kweyi ya wo oye kponu kpo onya nu, kweyi pepa wa ba wi ikpiye oye kponu.>>32Omani wokwokwoshi ni ayi teba ebe lenu ni la, ami ke ya kela ikweyi ko Okristi kpa awogboso la.33Kwikyikyeni, ananoho kala na yimu ko onya nu byoni oyimu ki iyinu ni, kweyi onya na geyagye do obu nu.
The Word for the World International