AGBÃ8
Iwola Ile
1Iwola iisɛ ɔkperegu, kulu ɣɛɛ?Karɔ̃inɔ iisɛ ikɔlɛ silɔ kato ɣɛɛ?2Ɔta ɔɣɛ i kubemi iso i ɔri kuruɛ,ɔɖi kayakɔ̃ i irikpasa.3Ɔɣɛ i kuyogodɔ̃ kuruɛ, to ikɛlɛ ɔmagɛ̃siare ame,i kubɔrɛnya ne ɔto ɔɣɛ teteree sɔ,4"Maturi awune, mi nto lokpere lo.Maturi awune mabi ɔɖuɖu, mi nto lokɔlɛ silɔ kato lokpere.5Mi ma nɖe makoso, mitsɛ iwola itsue gu ikososo.Mi madzunisɛĩ minɔ ara karɔ̃.6Mikã atsue, alasɔ atɔ̃me nyaa loaɣere mi.Nnɛ loya, ilɛ loabusi kanya loɣɛ.7Loto lobusi kanya loɣɛ ɔnukuare,alasɔ wũ kanya ɔtsiri mila.8Wũ kanya ame atɔ̃me ɔɖuɖu ɔya;kasɔla gu mila na i wã kuiwɛ̃ ame.9Wã ɔɖuɖu ame ɔkpa nwɔ nsɛ ɔnɔ ara karɔ̃,asɛ akote nwɔ mba inɔkpa.10Miɖi wũ araite i sikãfudza kanya,miɖi inɔkpa i sikãrɛtɛa sɛɛ kanya.11Alasɔ iwola lɛ iɖo ikɛrɛra sɛɛ,kuira na aabie sɔ iakategu ne.12"Mme iwola, lopiagu anɔibe losakanya;loba inɔkpa gu inyaiɖiite.13Bosate kunigã nɖe iranyanyariã itsiri.Lotsiri iteso gu katoikɔlɛso.Lotsiri nsɛgbai nyanyariã gu mila atɔ̃me iɣɛ.14Kuka gu iwola ɖe wũ are;loba karɔ̃inɔ fiɛ loba ɔle.15Wũ iso i magara sɛ maki maɖe sigarafiɛ wũ iso maɖeisoi sɛ maki mabara mmara mɛ loya.16Wũ iso i maɖeisoi sɛ maki maɖeiso,fiɛ wũ iso i makpakpaturi ɔɖuɖu sɛ maɖeiso i karɔ̃ iso.17Nsɛ loɖɔɛ mma nsɛ maɖɔɛ mefiɛ mma nsɛ mabie me teteree sɛ manya me.18Karana gu kuwarɛ se me;karana gu ara bɔlɔlɔa ibara wa loasɛ pia i wũ kɔrɛ.19Wũ idziribi lɛ iɖo sikãrɛtɛa sɛɛ.Wũ kusia ɔfɔ kuɣa kuɖo sikãfudza sɛɛ.20Ara bɔlɔlɔa ibara i ɔri iso nsɛ losɛ,fiɛ itɔ̃me nɛ loya ɔri iso nsɛ loki,21sɔ si loɣɛ karana lotã maturi ma loɖɔɛ me,si lotã ma ara si ayi ma ara kakɔlakɔ̃.22"Mme nɖe ira ɖeakatɔ̃ nɛ i Bosate ɔbara ku ɔwi wɔ ɔsɛ ɔ̃ karabara karɔ̃,fiɛ ka ɔbara ɔ̃ kokowi ara.23Ɔɖi me ɔsɛ kokooko,ita karɔ̃kasɛkɔ̃ fiɛ kayiiso ɔba kaare kaya.24Maɔɣe me ku ɔwi wɔ sipo na,loɖe siwore kugodɛkɔ̃ ngbegɔ i ndu ɔyi pelepele katɔ̃.25Fiɛ maasɛra abe i karɔ̃,si abemi aaba ne, maɔɣe me koko.26Maɔɣe me mpia fiɛ mabara karɔ̃, kã adziri gu sikua,ɣee fiɛ mabara kayiiso sise sirere ana.27Lopia fiɛ Bosate ɔsɛra kato i kã kasɛkɔ̃,fiɛ ɔsia igbado ɔkpɛ giligilia i ndu kuwodorokɔ̃ iso.28Ka mpia ku ɔwi wɔ ɔsɛra adɔdɔ i kato,fiɛ ɔɣedza kuwodorokɔ̃ ndu kugodɛkɔ̃ i karɔ̃.29Ka mpia ku ɔwi wɔ ɔsɛ ame ɔtã ɔposɔ ndu iibatu ɔ̃ mmaraisi,ka mpia fiɛ ɔsɛra sikaĩ ɔtã karɔ̃.30Iyɔ ne mme loɖe kusɛ̃baradze i ɔ̃ kɔrɛ.Loyigu isoɣɔ ku ikpɛnɛ biara.Nsɛ lona isoɣɔ i ɔ̃ anɔmi ame ɔwi biara.31Nsɛ lona isoɣɔ i ɔ̃ kayiiso ɔɖuɖu isofiɛ so sɛ siɣɔ me i maturi awune iso.32"Wũ mabi, kiniɔ ne, ka mikã me atsue.So aaɣɔ mma nsɛ maki i wũ siri iso.33Mikã wũ araite atsue si mitsue iwola.Midaasɛ̃ ne.34So aaɣɔ ɔturi wɔ nsɛ ɔkã me atsue,fiɛ ɔto ɔnyɔ tuee i wũ kuyogodɔ̃ iyi biara,fiɛ ɔɣɛ ɔsia i wũ kukui kanya.35Alasɔ ɔturi wɔ nsɛ ɔnya me ne, ɔsɛ ɔna ngbã,fiɛ Bosate sɛ ɔnyɔ wũ nnya.36Ɣɛɛ ɔturi wɔ loisɛ ɔnya me sɛ ɔbara so kako;mma ɔɖuɖu lotsiri me ne, kukpi masɛ maɖɔɛ."The Seed Company