AGBÃ26
1Lɛ ɔyu ku kusɛ ame awe ɣee kado ku ɔraɖui ɔsɔrɛ̃wi awe ne,ngbɔ i kuwarɛ iikote kutã kadzunisɛĩ ne.2Lɛ kumɛgɔ i kanagini sɛ kafɛrɛrɛ ne, ɣee iɣororo sɛ ifɛrɛrɛ iki ne,ngbɔ i sigbarĩ dzɛ loikote sɛ sikɛlɛ kukakɔi ne.3Bosɛ bosu ɔdziri i ipɔngɔ iso, ne masɛ mapia kukomisɛi i ɔfirimu ɔpu iso, sɔ mabara nnɛ bobie,fiɛ ɔdziri se ɔtã madzunisɛĩ mi kama.4Daatã kadzunisɛĩ itɔ̃me mmuai i ɔ̃ adzunisɛ̃ra kanya,si iiɖe ngbɔ fɔ wũ ne ato aaba aase lɛ ɔ̃ awe.5Tã kadzunisɛĩ itɔ̃me mmuai i ɔ̃ adzunisɛ̃ra kanya,si iiɖe ngbɔ ne ɔto ɔ̃anyɔ so sɔ ɔɣe iwola.6Ɔturi wɔ nsɛ ɔpia kadzunisɛĩ katɔme ne,ise lɛ ɔsɛ ɔtu ɔ̃ mɔmɔ kukpa ɣee ɔsɛ ɔbara so ɔtile.7Lɛ kumɛgɔ i ɔle na bafã akpabɔ iso ne,ngbɔ i igbã se i kadzunisɛĩ kanya ame ne.8Ɔturi wɔ nsɛ ɔpia kadzunisɛĩ kuwarɛ ne,ɔse lɛ ɔturi wɔ lonyi ita ɔpia i iwɛĩ ame awe.9Kumɛgɔ i siyu se i tarɛ̃dze kɔrɔ̃ ame ne,ngbɔ i igbã se i kadzunisɛĩ kanya ame ne.10Kumɛgɔ i kutapɛdze sɛ ɔpia ɔturi ɔrere igbɛ ne,ngbɔ ame kere ɔturi wɔ losu kadzunisɛĩ ɣee ɔrere wɔ nto ɔfe ɔpaa ne.11Lɛ kumɛgɔ i kpɛkpɛ sɛ ɔkpese ɔkɛlɛ ɔ̃ mɔmɔ kura kɔrɛ ne,ngbɔ ame i kadzunisɛĩ sɛ ɔkpese ɔkɛlɛ ɔ̃ mɔmɔ adzunisɛ̃ra kɔrɛ ne.12Ɔriinyɔ pia kadzunisɛĩ ɔɖoɔturi wɔ nsɛ ɔbu so kawolai.13Dãdze sɛ ɔɣɛ sɔ, "Dzata pia i ɔri iso,dzata to ɔkiki i itiri!"14Kumɛgɔ i kukui sɛ kukidza i kɔ̃ kubɔrai ame ne,ngbɔ i dãdze sɛ ɔkidza so i ɔ̃ karɛkɔ̃ iso ne.15Si dãdze ɔpia kɔrɔ̃ i irɔi ame ne, ɔ̃ibaɖi kɔ̃;kɔ̃ iɖi isu ipia i kanya ame sɛ iwe wũ ndã gbaã.16Dãdze sɛ ɔbu so kawolaiɔɖo maturi ikɔdzɛ ma nsɛ matã itɔ̃me mmuai ku adzuni sɛɛ.17Ɔturi wɔ nsɛ ɔpia kanya i kulu gɔ loipɛgu wũ amese kere lɛ ɔturi wɔ nsɛ ɔmɔɛ̃ kpɛkpɛ atsue.18Lɛ kumɛgɔ i lalase sɛ ɔwɛrɛ̃kaka mɔɛã ɣee ɔpɛ mirɛ̃ ne,19ngbɔ nɖe ɔturi wɔ nsɛ ɔsɔsɔla ɔ̃ ɔnyiiɔɣɛ sɔ, "Kuɛrɛ kere nto lopia lo!"20Si katɔrɛ̃ ɔro ne, ɔtɔ sɛ ɔnyi;si ituriraiɣɛ na ne, kulu sɛ kuro.21Lɛ kumɛgɔ i akaĩ sɛ atã ɔtɔ ɔwara fiɛ ndɔrɛ̃ sɛ mitã ɔtɔ ɔtsue ne,ngbɔ kere kalɔdze sɛ ɔpia ɔtɔ i kulu ame ne.22Ituriraiɣɛ atɔ̃me se lɛ aɖera wa mba ɔmɛrɛ̃ awe;asɛ abo ta ɔturi mina kame ame.23Lɛ kumɛgɔ makua sise ibui ku sikãfudza wanɛkɛã ne,ngbɔ i itɔ̃me mɛrɛ̃mɛrɛã iɣɛ nɛ ɔtu nyanyariã ɔbua iso se ne.24Kpɛ̃guse sɛ ɔɖeika sɛɛ ɔkɔla so,ɣɛɛ ɔkɔla kasɔla i ɔ̃ ɔtu ame.25Atoasɔ ɔsɛ ɔɖeika sɛɛ ilɛ ɔnɔ ne, daafɔ wũ aɖe,alasɔ amusuora akɔdzɛ pia i ɔ̃ ɔtu ame.26Si itsiri ɔwɛrɛ i ɔ̃ ame ala kasɔla ɔso ne,ɔ̃ inyanyarĩ to iabɔrɛ kayi.27Si ɔturi ɔkuri iwo ne, ɔto ɔ̃akpase ɔbo i ne ame.Si ɔturi ɔmɛlɛdza ita ne ito iamɛlɛ isia wũ iso.28Mila ɔnyagɛmi sɛ ɔtsiri maturi ma ɔnina,fiɛ kanyamɛrɛ̃ atɔ̃me sɛ awɔra ara.
The Seed Company