AGBÃ25
Solomon Agbã Mama
1Agbã wagbe ɖe Solomon are ana. Yuda igara Xezekia maturi ɔledza itsɛrɛ.2Iɖe kuwarɛ kutã Ɣaa sɔ ɔsɛ ɔkɔla ira;ɣɛɛ magara kuwarɛ nɖe sɔ mafafarɛ ira ame.3Lɛ kumɛgɔ boibawo kuɖokpo kukɔlɛme gu karɔ̃ kuwodorome ɔtsue ne,ngbɔ ame boibawo magara adzuni ɔtsue ne.4Ɖi anyini i sikãfudza ame,iyɔ sikãfudzatorese aana karabara ira.5Ɖi ɔtilese i igara anɔmi ame,iyɔ ɔ̃ sigaraiyara to iaya teteree i ara bɔlɔlɔa ibara ame.6Daakɔlɛ so kato i igara anɔ,fiɛ daabie sɔ aasɛ i maturi nyaa kasɛkɔ̃.7Ilɛ sɔ ɔ̃aɣere-ɔ sɔ, "Ba sɛ i kakɔlɛkɔ̃ i ngbe,"iɖo sɔ ɔ̃apia-ɔ kunuarɛ i makpakpaturi anɔmi ame.Ira nɛ anya ku fɔ anɔmi ne,8daayasoiso asu nnɛ anya akɛlɛgu i atɔ̃mekaɣɛkɔ̃.Be ato aabara ku ɔwi kama si fɔ ɔnyii ɔba ɔ̃apia-ɔ kunuarɛ?9Si ato akpadzɛ̃ itɔ̃me ku fɔ ɔnyii ne;daaɖi ɔturi mama iwɛrɛra aɣɛ,10si nwɔ lonɔ aapia-ɔ kunuarɛ,fiɛ fɔ iyere lalaa aba iafɔ karɔ̃ isɛ.11Itɔ̃me nɛ maɣɛ i ne ɔwi iso ne,ise lɛ sikãrɛtɛa irataa i sikãfudza ira iso awe.12Ɔturi wolai kuka, se lɛ sikãrɛtɛa itsuebi ɣee ikɛrɛraitã nwɔ nsɛ ɔkã wũ atsue.13Lɛ kumɛgɔ i ndu yululua sɛ miɣɔra ɔturi sosina ku ɔraɖui ɔsɔrɛ̃wi ne,ngbɔ ame i kpabo ɔnukuarese se ɔtã nwɔ lopia wũ katɔ̃me ne,ɔsɛ ɔɣɔra ɔ̃ masate somina.14Ɔturi wɔ nsɛ ɔɣɛ ɔsɛ i karatã iso ɣɛɛ ɔ̃isɛ ɔtã ne,ɔse lɛ adɔdɔ gu ɔwiri wa loisɛ apɛ kado.15Iɣaraso nsɛ ifɔ ira i igara kɔrɛ,fiɛ ɔnyagɛmi pɔkɔsɔa nsɛ ɔwo ikui ɔbiɛ.16Si anya maɣendu ne, nɛ kɛkɛɛkɛ kere -si anɛ gbodzoo aɖodza ne, ɔra kere ara.17Daala ɔɔsɛ fɔ ɔnyii iyo malamala -si ka ato asɛ malamala ne ato aapa ɔmɛrɛ̃ fiɛ ɔ̃atsiri-ɔ.18Ɔturi wɔ nsɛ ɔɖe mila aɖansiɛ i ɔ̃ ɔnyii iso ne,ɔse lɛ ikpo ɣee itekpe ɣee kuta sirɛ̃ awe.19Iti isia i ɔturi wɔ nna ɔnukuare iso ku ɔmɔrɛ̃wi,se lɛ inyɛbɔ ɣee kukpasɛa iso awe.20Ɔturi wɔ nto ɔka kuka ɔtã ɔtu wɔ nto ɔmararã sose lɛ ɔturi wɔ loɖi ɔkati ɔsɛ ku ɔyuwi,ɣee lɛ ndãbea mafere i iyɛi ame.21Si kukã to fɔ tsirise ne, tã wũ aɖera si ɔɖe;si ɔme to ɔkore wũ ne, tã wũ ndu si ɔnɛ.22Si abara nnɛgbe ne, ise lɛ atɔgirĩ asu afere wũ i iti,fiɛ Bosate to ɔ̃atã-ɔ ne kuso.23Kato ɔwiri sɛ ɔbɔ kado,fiɛ ituriraiɣɛ ɔnyagɛmi sɛ ɔtã mana sikpã gu adaa anɔ.24Iyo isã ɔɣokã iso isɛ lɛ iɖoiyo kame iwegu kalɔdze ɔrɔ̃go.25Itɔ̃me bielea ifɔ ibɔrɛgu i kadzorokɔ̃,se lɛ ndu yululua awe mitã ɔturi wɔ ɔme to ɔkore.26Si ɔturi bɔlɔlɔa ɔbara iranyanyariã i ɔtilese anɔmi ame ne,ngbɔ kere ise lɛ ndu godɛã mɛ malupu iba ɣee itubiɔ ndu mɛ loɣɛ awe.27Maɣendu gbodzoo inɛ iilɛ,fiɛ iilɛ sɔ aabie kuwarɛ gbodzoo ata so.28Ɔturi wɔ loisɛ ɔɖesoiso ne,ɔse lɛ ɔmagɛ̃siare wɔ mabiɛ ibere maɖi masɛ.The Seed Company