AGBÃ2
Iwola Kusia
1Wũ ɔbi, si afɔ wũ atɔ̃mefiɛ amɔɛ̃ wũ mmara mɛ losi-ɔ ala,2fiɛ akã iwola atsueasu fɔ ɔtu asia ne iso, anɔkarɔ̃ ne,3si abie iwola wodoroa ku kulu,fiɛ akɔlɛ silɔ kato akpere karɔ̃inɔ,4si abie ne lɛ sikãfudza awefiɛ anyɔnyɔ ne lɛ karana ga masu makɔla awe ne,5iyɔ ato aanɔ Bosate kunigã karɔ̃fiɛ ana isaruɛ i Ɣaa itsue ame.6Alasɔ Bosate nsɛ ɔtã iwola,fiɛ ɔ̃ kanya ame i inɔkpa gu karɔ̃inɔ sɛ abɔrɛ.7Ɔsɛ ɔsu iɖeiso ɔsɛ maturi bɔlɔlɔa,ɔɖe akpiraifɔra ɔtã mma ɔsɛ nna iɣɛrɛ.8Ala ɔsɛ ɔdzuɛ̃ maturi ma nsɛ masiai itɔ̃me tɔrɔrɔa,fiɛ ɔsɛ ɔnyɔ ɔ̃ manukuarese iso.9Iyɔ ne ato aana karɔ̃inɔ i nnɛ nɖe sibɔlɔlɔ gu itɔ̃meyaagu itɔ̃meiɖaɛ ikate gu ngbã sɛɛ biara isɛ iso.10Alasɔ iwola to iabo-ɔ i ɔtu ame,fiɛ inɔkpa to iawe fɔ ɔkala ɔmɛrɛ̃.11Ara ibara ku iwola aanyɔ-ɔ isofiɛ karɔ̃inɔ aadzuɛ̃-ɔ.12Iwola to iaɖi-ɔ ibɔrɛgu i maturi nyanyariã ɔri lalaa iso,gu ito iaɖi-ɔ i maturi atɔ̃me wa logɔgɔlɔ kɔrɛ,13mmagbe sɛ masɛ̃ siri sɛɛ,masɛ masɛ ngbã i idududu siri ame,14masɛ mana isoɣɔ i ara lalaa ibara amefiɛ so sɛ siɣɔ ma i aranyanyariã siri dzɛ logɔgɔlɔ ame,15mma siri nse gɔdɔrɔ,fiɛ kasɔla ɔyi i sɛ̃ iso.16Iwola to iaɖi-ɔ ibɔrɛgu i rãrɔdze ame ana,iɖi-ɔ i ɔre wɔ loɔsu so rãrɔdze wɔ nsɛ ɔsu atɔ̃me mɛrɛ̃mɛrɛã nrɔɔ̃ ame,17nwɔ loɔrui i ɔ̃ sibitɛ ame kurã kɔrɛfiɛ ɔsɛ ɔsɛ̃ ndamu mɛ ɔbara i Ɣaa anɔ.18Ala ɔrɔ̃go wɔgbe iyo ikɛlɛ, ɖe kukpi ɔri iso,mmɔ isɛ se lɛ kukpi aɖe ikɛlɛ.19Kuwɛ̃ iisɛ ɔsɛ ɔ̃ kɔrɛ ɔkpeseɣee ɔkpese ɔba ɔ̃anya ngbã ɔri.20Ne ɔso sɛ i maturi sɛɛ siri iso,si asɛ i maturi bɔlɔlɔa kunenekɔ̃.21Alasɔ maturi sɛɛ loawe i karɔ̃ isofiɛ maturi ma nna iɣɛrɛ loakuti i kã iso.22Ɣɛɛ maawɔra matilese i karɔ̃ iso,fiɛ maarui makpibaradze ku siɖu maɖi i kã iso.The Seed Company