AGBÃ1
Kumɛgɔ I Agbã Ɔfɔ Kuɣa
1Israel igara David ɔbibirɛrɛĩ, Solomon iwola agbã i ngbe ne:2Wã nsɛ atã ɔturi ɔtsue iwola fiɛ ɔsɛ ɔna ikpadzɛ̃;asɛ atã ɔturi karɔ̃inɔ i atɔ̃me wa lowodoro ame.3Asɛ atã ɔturi ɔna ikpadzɛ̃ fiɛ ɔsɛ ɔsɛ ngbã sɛɛ,ɔbara nnɛ nlɛ fiɛ iya gu i ɔri iso.4Asɛ ate ɔturi wɔ loinya kayi ame inɔkpa gu ikososo,fiɛ asɛ abara makoso manya ara maɖiite gu mma losɛ iti ame.5Mitã kawolai si ɔkã atsue si ɔsu ɔbua i nwa ɔto ɔsuã isosi nwɔ nsɛ ɔnya ara ɔɖiite si ɔna kuka -6gɔ ɔ̃atsue agbã, agbã ipɛ,simai gu adzolo karɔ̃.Kuka Kutã Makoso
7Bosate kunigã nɖe inɔkpa karɔ̃isɛ,ɣɛɛ madzunisɛĩ sɛ manyɔ iwola gu ikpadzɛ̃ pupurii.8Wũ ɔbi, kã fɔ ɔse iturikpadzɛ̃ atsue,si adaanyua fɔ ɔnyi araite apɛyu.9Ato aaɖe itinyira nɛ nto ilɛnyɔ i fɔ iti,gu kusanya gɔ loakɛrɛ fɔ ɔme.10Wũ ɔbi, si makpibaradze to masɔsɔla-ɔ ku kanyamɛrɛ̃ ne,daatɔrã asia iso.11Tã bosu lɛ maɣɛ sɔ, "Ba bokɛlɛ,si bosɛ boawɛrɛ bosia, boɖoe ɔturi.Tã bobo ɔrere wɔ loiɣɛrɛ iso siefe kere.12Boawɔra ma boɖi pelepele fiɛ maisibawe.Maabiara ma lɛ kumɛgɔ i makpise sɛ makɛlɛ iwo ame pelepele.13Boto boana karana sɛɛ agbãagbãbosu kakpãramɔɛã boyira bo ayo ame.14Ba baragu bo mawɛ̃,sikã kakotoi kawɛ̃ awe katã bo ɔɖuɖu."15Wũ ɔbi, daasɛgu ma,daasia kukpa i ma siri iso.16Alasɔ masɛ makarara i ira lalaa ibara itifiɛ ima ifere i karɔ̃ iti mato mapɛsiwa.17Siefe kere magbere asabu masɛi kurodzai ɔɖuɖu anɔmi ame!18Marɛrɛ̃ magbe sɛ mawɛrɛ masia ma mɔmɔ ima;masɛ magbere kere masia so!19Ngbɔ i mma ɔɖuɖu nsɛ masu ɔtile mabie kusia kawirikɔ̃ se ne;mma nsɛ mana kusia ne, kɔ̃ nsɛ kuwɔra ma ngbã.Iwola Kulu I Ɔvurã Iso
20Iwola to kulu teteree i ɔvurã iso,ɔsɛ ɔkɔlɛ silɔ kato i itiri.21Ɔto ɔkpere maturi i sivurã iso i ngbegɔ maturi ɔsi ku kulu,ɔɣɛ i ɔmagɛ̃siare kubɔrɛnya ɔto ɔɖeika.22Ɔto ɔɣɛ sɔ, "Madzunisɛĩ, iɖe ɔwi wɔ mianyua mi adzunisɛ̃ra iɖɔɛ?Maɣiãrase, iɖe ɔwi wɔ mianyua aɣiãra ibara?Mma loikpa anɔ, iɖe ɔwi wɔ mianyua inɔkpa itsiri?23Si ɔkã mikã wũ iyira atsue ne,tee lobusi wũ ɔtu lotã mi,lotã mitsue wũ adzuni.24Ɣɛɛ ɔwi wɔ lokpere ne misɛ̃ mefiɛ gɔ loɖi wũ kɔrɔ̃ losɔ̃ ne, kuwɛ̃ iikpa anya.25Alasɔ misɛ̃ wũ kuka ɔɖuɖufiɛ misɛ̃ wũ iyira.26Ne ɔso mme wũ loama mi si kukpakpi ɔba i mi iso.Loabara mi aɣiãra si inyɛwe ɔba i mi iso -27si ifu mi iso lɛ awɛ awefiɛ ipɛ ifere mi lɛ kagbadadururu awe,ne isoma gu imɔrɛ̃ ɔba mi iso.28"Iyɔ mato maakpere me ɣɛɛ loibatɔrã;mato maanyɔnyɔ me ɣɛɛ maibanya me ɖa.29Gɔ matsiri inɔkpafiɛ masɛ̃ maisu Bosate kunigã,30gɔ masɛ̃ wũ kukafiɛ manyɔ wũ iyira pupurii,31iyɔ mato maaɖe ma nsɛgbai adziribifiɛ mamigu ma siriita adziribi.32Alasɔ madzunisɛĩ ne iturikpadzɛ̃ kuka atsue idaakã nsɛ iɖoe ma;fiɛ mma loikpa anɔ ne, iti isiasoiso nsɛ iwɔra ma.33Ɣɛɛ ɔturi wɔ lokã me atsue aasɛ ngbã i kaɣɔ amefiɛ ɔsɛ ɔwe fala, ɔ̃isɛ ɔnigã iraboa."The Seed Company