YESAYA8
Yesaya Ɔbibirɛrɛĩ Aaɖe Ikparĩ Ɔtã Kaɖe
1Ne Bosate ɔɣere me sɔ, "Su ita siare nɛ iso masɛ matsɛrɛ ara masia si asu balai si atsɛrɛ kumɛgɔ ialɛ ɔka sɔ, "Maxer Salal Xas-Baz! '2Loakpere sɔrɛdze Uriya gu Zekariya wɔ nɖe Yeberekiya ɔbibirɛrɛĩ sɔ maaɖe ma aɖansiɛ ma lofɔ loɖe."3Ne lorɛgu wũ ɔre wɔ nɖe Ɣaa Kanyaɖidzerɔ̃go fiɛ ɔla kayiri ɔɣe ɔbibirɛrɛĩ ne. Bosate ɔɣere me sɔ, "Tã wũ iyere sɔ, 'Maxer Salal Xas-Baz!'4Si kabirɛrɛĩ aatsue kumɛgɔ masɛ maɣɛ sɔ 'Tete', ɣee 'Mmã' ne, Asiria igara to ɔ̃asore Damasko karana gu Samaria kakpãramɔɛã wa matã ɔruigu."5Bosate ɔɣere me ana sɔ:6"Gɔ kaɖe gagbe ɔsɛ̃Siloa ndu mɛ nto mibore pɔkɔsɔɔ,ɣɛɛ so ɔɣɔ ma i Rezingu Remaliya ɔbibirɛrɛĩ iso ne,7ne ɔso Bosate to ɔ̃atã Asiria igaraɔtere ɔbo ma iso lɛ Frat ɔwore siareloyi ɔ̃ kuworenya ɔɖuɖu,ɔyi ɔbiɛ ɔwiriɔwara ɔ̃ sikpokpo ɔɖuɖu8ɔtere ɔbo Yuda iso, ɔwarã karɔ̃ɔyi karɔ̃ ɔɖuɖu iso ɔbo ma i ɔmeɔ̃ abue wa ɔwarɛ ɔɣa afɔ karɔ̃,O Immanuel!"9Nɖebi, mirɔ kakpã; ifɔ̃ si imɔɛ̃ mi.Mikã atsue, mi nrɔ̃ mɛ mpia dzoroo.Miledza so mitã kakpã, ifɔ̃ si imɔɛ̃ mi!Miledza so mitã kakpã, ifɔ̃ si imɔɛ̃ mi!10Mibara adzuni, ɣɛɛ maanina wã:mibɔ adzuni, ɣɛɛ aibaya,alasɔ Ɣaa piagu bo.Ɣaa Ɔka Kanyaɖidze.
11Ne Bosate ɔɖegu me ika ku ɔwi wɔ i ɔ̃ kɔrɔ̃ sia me iso teteree sɔ lodaasiai maturi magbe siri. Ɔɣere me sɔ:12"Irabiara nɛ i mmagbe sɛ makpere sɔ iraɖoa ne,daakpere ne sɔ iraɖoa.Daanigã nnɛ mato manigã,fiɛ ifɔ̃ si idaakpɛ̃-ɔ i ne iso.13Bosate Ɔlesate nɖe nwɔ aanyɔ sɔ ɔse sekelee.Ɔ̃ ikote sɔ aanigã,fiɛ ɔ̃ ifɔ̃ si iwe i fɔ ame ne.14Ɔ̃ nto ɔ̃aɖe mi kasekelekɔ̃;ɣɛɛ Israel nlɛ minyɔ ɔɖuɖu ne, ɔ̃aɖeita nɛ nsɛ itã maturi ɔturagu itasiare nɛ loatã maturi ɔrɔ̃fiɛ Yerusalem maturi ne, ɔ̃aɖeiyebi nɛ magbere gu kuma gɔ masɛ.15Magbodzoo to maatura;maabɔrɛ marɔ̃ mafɛfɛ̃,kuma aaɖi ma mamɔɛ̃ ma."16Ledza wũ itɔ̃me sɛsi atɛ̃ wu mmara apia i wũ marasuãdze ndɛ̃.17Loaya losia Bosatewɔ lokɔla ɔ̃ katɔ̃ i Yakob iyo kɔrɛ,mme loasiaiti i ɔ̃ iso.18Nya mme i ngbe, gu mabi ma i Bosate ɔtã me. Boɖe ara wa masɛ ikpo gu ikparĩ i Israel, bobɔrɛ i Bosate Ɔlesate wɔ nsi i Zion Kube iso kɔrɛ.19Si maɣere mi sɔ minya sibɔmapɛdze gu mawase ma nsɛ maɣɛ siwɔwɔi maɣɛ kaɣɔdɛ̃ ne, miibakarɛ mi Ɣaa iti ɣɛɛ? Be ɔso mito mikarɛ makpise ara i magbanadze kanya?20Minyɔ wũ ara ite gu wũ itɔ̃me ame sɔ aite ara wagbe! Mma loisɛ maɖe ika i ɔ̃ itɔ̃me nɛgbe kanya ne, ɔɖesɛrã iibatu ma.21So aatu ma kukã ɔkpɛ̃ ma, mawe maki i karɔ̃ iso, si kukã ɔɔɖoe ma ne, sikpã aamɔɛ̃ ma makɔlɛ anɔ kato magbarĩ ma igara gu ma Ɣaa.22Iyɔ maabɔ anɔ karɔ̃ manyɔ karɔ̃, ɣɛɛ isoma gu idududu gu ifɔ̃ nɛ lowodoro maanya fiɛ maatɛ̃ so mapia i idududu kpirikpiria ame.The Seed Company