YESAYA7
Itɔ̃me Nɛ Matã Igara Axaz
1Ɔwi wɔ ame i Axaz wɔ nɖe Yotam ɔbibirɛrɛĩ fiɛ ɔɖe Uziya ɔwabirɛrɛĩ to ɔɖe sigara i Yuda ne, Rezin wɔ loɖe Aram igara gu Peka wɔ nɖe Remaliya ɔbibirɛrɛĩ fiɛ ɔɖe Israel igara ɔta kakpã i Yerusalem iso, ɣɛɛ maiwo Yerusalem ɔɖeiso.2Gɔ maba maaɣere David iyo sɔ, "Aram makpakpɛ̃dze ɔɔbara kanya kawɛ̃ ku Efrayim" ne, ɔtu ɔkpa Axaz gu kaɖe ɔɖuɖu mati makpakpa lɛ ɔwiri lobo ipo adziri ame.3Kere ne Bosate ɔɣere Yesaya sɔ, "Kɔ fɔ ɔbibirɛrɛĩ Sear-Yasub si misɛ miasarɛgu Axaz i Kakpagɛkɔ̃ Ibu kanya i ɔri wɔ nkpa Raforedze kakpɛkɔ̃ kuruɛ.4Ɣere wũ sɔ, 'Nyɔ so, na ɔtu ne daanigã. Ɔtu si ɔdaakpa-ɔ ala Rezin gu ma Aramse gu Remaliya ɔbibirɛrɛĩ sikpã dzɛ mato mana ɔso, mase kere lɛ kutɔrɛ̃kui kunyɔ gɔ nto kubɔrɛ kuyɔ.5Aram gu Efrayim gu Remaliya ɔbi ɔɖo ikpi i fɔ iso maɣɛ sɔ,6"Mitã bota kakpã i Yuda iso, bokɛkɛ ma karɔ̃ boɣɛ so si bosɛra Tabeal ɔbibirɛrɛĩ sigara i ma iso"7Ɣɛɛ Bosate to ɔɣɛ sɔ," 'Adzuni wagbe iibakotefiɛ iibaba ngbɔ.8Alasɔ Aram ɔmagɛ̃kpakpa nɖe Damasko,fiɛ Rezin ɖe Damasko igara kere.I akɔ sikuɔ-iru wa nto aba ame ne,Efrayim kalɛ aawasa sɔ maisibaɖe kalɛ.9Efrayim ɔmagɛ̃kpakpa nɖe Samaria,fiɛ Remaliya ɔbirɛrɛĩ nɖe Samaria igara.Si aiya teteree i fɔ kafɔkaɖe ame ne,iyɔ aibaɖeiso ɖuɖuuɖu.' "10Ne Bosate ɔledza Axaz iɣere sɔ,11"Karɛ Bosate wɔ nɖe fɔ Ɣaa ikparĩ, si ta karɔ̃ ame karɔ̃, ɣee ta kato ame kato."12Ɣɛɛ Axaz ɔɣɛ sɔ, "Loibakarɛ ikparĩ lola Bosate lonyɔ."13Ne Yesaya ɔɣɛ sɔ, "David ɔkparɛ, mikã atsue si minɔ! Miɔtã mi maturi ɔɣara so iɖa ma, mibie sɔ Ɣaa ɔ̃ wũ ɔɣara so ɔtã mi iɖa wũ?14Ne ɔso Bosate mɔmɔ to ɔ̃atã mi ikparĩ. Minyɔ! Ɔbitɛ to ɔ̃ala kayiri ɔɣe ɔbibirɛrɛĩ ɔtã wũ iyere sɔ Imanuel.15Si ɔ̃ɔmɔ ɔtsue isɛɛ gu ilalaa ne, ɔ̃ araɖea loaɖe inyɛndu nɛ lonyi gu maɣendu.16Ɣɛɛ si ɔbibirɛrɛĩ aatsue ikpaki i isɛɛ gu ilala ndɛ̃ ne, magara inyɔ ma ato anigã karɔ̃ to kaawɔ.17Bosate to ɔ̃atã sɔ nnɛ loiba inya ita i ɔwi wɔ i Efrayim ɔbɛse ɔbɔrɛ i Yuda iso ɔbara mi, ara ame to aawe ɔle, fiɛ loatã Asiria igara ɔta kakpã i mi iso."18Ɔwi wɔmɔ ame ne, Bosate aafue ɔkpere manidzɔ ɔbɔrɛgu i Nil ɔwore kanya i Egipte ɔfere mi iso, ɔkpere maɣe ɔbɔrɛgu i Asiria ɔfere mi iso.19Ma ɔɖuɖu aaba maafu i mi kuworenya kuwɛla gu atawo ame, kuposɛ̃ gu ndu atawo ɔɖuɖu ame.20Iyi nɛmɔ ne, Bosate to ɔ̃awanyi ma Asiriase ma lobɔrɛ i Frat ɔwore kama igara lɛ ipɛmi nɛ masɛ makparɛ̃ ala iti ɔfiɛ mi ati ɔkparɛ̃ mi ngba iso siwɛrɛ̃, ɔkparɛ̃ mi sikore ana.21Iyi nɛmɔ iso ne, ɔturi to ɔ̃aɣedza inantsuĩbi gu kutepuĩ kunyɔ.22Inyɛndu gbodzoo nɛ i mabɔi magbe aatã ɔso ne, maɣedzase to ɔ̃ana inyɛndu nyia ɔnɛ. Mma ɔɖuɖu lokuti mawe i karɔ̃ iso aanɛ inyɛndu gu maɣendu.23Iyi nɛmɔ ne, wainkakpɛkɔ̃ ga ame i adziri kakpi kawɛ̃ pia fiɛ kaafɔ sikãfudza kakpi kawɛ̃ ne, kaakpese akora gu kuposɛ̃.24Marɛrɛ̃ to maakɛlɛ mmɔ ku kuta gu mirɛ̃ alasɔ akora gu miyu to miafɔ karɔ̃ ɔɖuɖu iso.25Akora gu miyu aafɔ kubemi ɔɖuɖu gɔ iso mala maɔpia araɖea ku ikpuã ku ɔwiɔ sɔ mianigã mmɔ isɛ. Manantsuĩ gu masɛrɛ ka loala maɔɖe ara i mmɔ.The Seed Company