YESAYA63
Atɔ̃meiɣɛgu Edom Gu Nɖebi Ɔɖuɖu
1Nna ɔɖe mpia awu rɛtɛa ɔbɔrɛi Bozra ɔmagɛ̃ ame i Edom ɔto ɔba?Nna ɔɖe mpia arapia tagbraa kɛrɛa,fiɛ ɔsɛ ɔto ɔnene ku ɔ̃ ɔle siare?"Mme loɖe, mme nto loɖe ika i iɖeiso ame,mba ɔle loaɖi."2Be ɔso fɔ arapia ɔrɛtɛ,lɛ mma nto makã wainabi ɔkpɛ awe?3"Wũ ɔnɔwɛ̃ me lonene wainabi i kakakɔ̃;kuwɛ̃ iibɔrɛ i nɖebi ame ɔbuai me.Lonene ma i wũ sikpã amefiɛ losɛ i ma iso lɛ wainabi i wũ sikpã teterea ame.Ma ima lotatara ifere wũ arapiane wũ awu ɔɖuɖu ɔpie ima ne.4Alasɔ loɔsɛ iyi nɛ loati ma Edomse kuso i wũ ɔtu ame,fiɛ ikɔ nɛ loaɖi wũ maturi ɔɔba iabo.5Lonyɔ pelepele, ɣɛɛ kuwɛ̃ na ɔ̃abuai me,lokpɛ̃ so nnya sɔ kuwɛ̃ na ɔ̃apuãra me.Ne ɔso wũ mɔmɔ kɔrɔ̃ lokpadzɛ̃ iɖeiso ibɔ me,fiɛ wũ mɔmɔ sikpã teterea lola me.6Lonene nɖebi i wũ sikpã ame;lotã marɛ̃ i wũ sikpã teterea amene losu ma ima lowiri i karɔ̃ ne."Bosate Ɔbara Isɛɛ Ɔtã Israel
7Loaka Bosate kayiribielea lote.Loale Bosate i ɔ̃ arabarara,i ara ɔɖuɖu wa ɔ̃ɔbara ɔtã bo kanya.Aĩ, ara sɛɛ gbodzoo ɔ̃ɔbaraɔtã Israel iyo,i ɔ̃ nnyainyɔ gu kayiribielea gbodzoo iti.8Ɔɣɛ sɔ, "Gbaã ne wũ maturi maɖe,mabi ma loibasɔsɔla me maɖe";ne ɔso ɔkpese ma Ɖidze.9I ma anyɛwe ɔɖuɖu ame ne, ɔ̃ wũ ɔwe anyɛ lɛ ma,ne Ɣaa kpabo wɔ lote sɔ ɔpia i ma kɔrɛ ɔɖi ma ne.Ɔfɔ ma iki i ɔ̃ kuɖɔɛ gu ɔ̃ kayiribielea ame.Ɔkɔlɛ ma kato fiɛ ɔsore mai kokowi ayi ɔɖuɖu ame.10Ɣɛɛ mata maya wũ isofiɛ matã ɔ̃ Siwarã Sekelea ɔkpɛ̃ so nnya.Ne ɔso ɔfiriki ɔkpese ma tsirisene ɔ̃ mɔmɔ ɔkpɛ̃gu ma ne.11Kere ne ɔ̃ maturi ɔnyigi kokowi ayi,manyigi Mose gu ɔ̃ maturi ɔwi.Ne makarɛ sɔ, "Lɛ i nwɔ lokɔ Israel ɔkigu i ɔpo ame,ku ɔ̃ masɛrɛrerɔ̃ ikuri kɔdze pia?Lɛ i nwɔ lotã ɔ̃ Siwarã Sekeleaɔwe i ma ndɛ̃ pia?12Nna lotã ɔ̃ kɔrɔ̃ ku ɔle siareɔpia Mose kuɖearɔ̃ ɔle,ɔɣɛ ndu ndɛ̃ i ma katɔ̃,si ɔsu ɔtã so iyere daaro?13Nna lokɔ ma ɔkigu i ndu kuwodorokɔ̃ ame?Mase lɛ ipɔngɔ i karɔ̃ ga nfere kakpa awe,ne maitura i kuira iso ne.14Lɛ manantsuĩ akuri wa loso akɛlɛ kagbolomi ame awe ne,kumɛɔ Bosate Siwarã ɔtã ma mana iwarã ne.Kumɛgɔgbe akɔ fɔ maturisi asu apia fɔ iyere kuwarɛ ne."Kayiikparama Itã Kabuai Gu Kayiribielea
15Ɖi anɔ bɔrɛgu i kato si anyɔ araabɔrɛgu i fɔ sigaraiyara kɔlɛa, sekelea ku kulɛ iso.Lɛ i fɔ ɔdzini gu fɔ ɔle siare pia?Fɔ isoinyɔ gu nnyainyɔ ɔɔre kama i bo kɔrɛ.16Ɣɛɛ fɔ nɖe bo Ɔse,atoasɔ Abraham iiɣe boɣee Israel iinya bo ɔɖiite kɔraa ne;fɔ, Bosate ne, fɔ nɖe bo Ɔse lo,fiɛ fɔ iyere nɖe bo Fɔdze ta kokowi.17Bosate, be ɔso atã bosɛnɛkɛ̃ i fɔ siri iso?Be ɔso atã bo situ ɔgbogboro fiɛ boisito bonigã-ɔ?Ala fɔ maɖabo iti ne, kpese ba,ala fɔ kumele gɔ aɖi sɔ kuɖe fɔ kaɖekɔ̃ ɔso ne kpese ba.18Fɔ maturi ɔfɔ fɔ kasekelekɔ̃ ɔwi kɛkɛĩ kere,ɣɛɛ kiniɔ ne bo matsirise ɔba maanene fɔ isɔrɛyo.19Boɔba boakpese lɛ maturi ma iso aiɖe sigara anya,lɛ mma aikpere ku fɔ iyere iso anya,ɣɛɛ fɔ mare boɖe ta kokowi.The Seed Company