YESAYA60
Ikpawaĩ Nɛ Nto Iba I Yerusalem
1"Ta Yerusalem si afiɛ, alasɔ fɔ ɔtɔ ɔɔba,fiɛ Bosate ikpawaĩ to ifiɛ ifere-ɔ.2Nyɔ, idududu ɔfɔ karɔ̃ isofiɛ idududu kpirikpiria fu i maturi iso.Ɣɛɛ fɔ ne, Bosate to ɔfiɛ ɔfere-ɔfiɛ ɔ̃ ikpawaĩ ɔɖusi ifere-ɔ iso.3Nɖebi to maaba i fɔ ɔtɔ ame,fiɛ magara to maasɛ maba i fɔ ɔɖesɛrã ikpawaĩ nɛ lobɔrɛ ame.4"Kɔlɛ anɔ kato si anyɔ ara aki alɔ so.Ma ɔɖuɖu ɔɔsakanya mato maba i fɔ kɔrɛ.Fɔ mabibirɛrɛĩ ɔbɔrɛ i kadzorokɔ̃ mato maba,fiɛ mamɔɛ̃ fɔ mabibirɔ̃gomi i nrɔɔ̃ ame mato mabɔ.5Iyɔ ato aanyɔ ne, so aaɣɔ-ɔ,ɔtu to ɔ̃apɛ-ɔ malamala fiɛ ɔ̃amɔ ku isoɣɔ,alasɔ maasu karana ga i ɔpo iso mabɔ-ɔ,nɖebi karana to kaaba i fɔ kɔrɛ.6Kapuapɔngɔ akuri aayi i fɔ karɔ̃ iso.Kapuapɔngɔ abi akuri aabɔrɛ i Midian gu Efa.Mma ɔɖuɖu lobɔrɛ i Seba ana to maaba.Maasu sikãrɛtɛa gu kuakɔrɔ̃kɔrɔã mabɔ-ɔfiɛ maapɛ Bosate ile imomo.7Maakɔ masɛrɛ akuri ɔɖuɖu wa mpia i Kedar mabɔ-ɔ,fiɛ akpalasa wa lobɔrɛ i Nebayot aasumu-ɔ.Maafɔ wã masu masɔrɛ i wũ isɔrɛkasege iso,fiɛ loakɛrɛ wũ kuwarɛ isɔrɛyo ilɛnyɔ gbaã.8"Mabe maɖe i ngbe nto mafɛrɛrɛ makɛlɛ lɛ adɔdɔ awe?Mase lɛ mabɔrɔnuma nto mafɛrɛrɛ makɛlɛ ma kawekɔ̃.9Gbaã ne ndukilɔnrɔ̃ sɛ manyɔ me ɔri.Nduisoabuɛ wa lobɔrɛ i Tarsis nɖe katɔ̃,gɔ makɔ fɔ mabibirɛrɛĩ mabɔrɛgu i kadzorokɔ̃ mato mabɔ.Masu ma sikãrɛtɛa gu sikãfudza mabuasi maasu mapia Bosate fɔ Ɣaa,Israel Ɔsekelea kuwarɛ,nwɔ lotã-ɔ kuwarɛ.10"Mafɔ to maaledza fɔ abere itsue,fiɛ ma magara aasumu-ɔ.Atoasɔ lopɛ-ɔ gɔ lona sikpã ne,i abualɛra ame loanyɔ-ɔ nnya.11Fɔ kuyogodɔ̃ to kuabusi kuse ɔwi biara,maibasɛ̃ kɔ̃ ku ikpɛnɛ ɣee ku kasɛ̃,si maturi aasu nɖebi karana mabɔ-ɔ -ma magara maakɔ i iɖeiso ngbaɖiɔsɛ ame.12Alasɔ kaɖe ɣee sigarakaɖekɔ̃ ga loibasumu-ɔ maawɔra,mato maawɔra ne pelepele.13Lebanon ikɛrɛra to iaba i fɔ kɔrɛne nɖe "Sɛsɛi, ɔvɛi gu besibe masakanya,sɔ aasu wã akɛrɛ wũ isɔrɛyo;sɔ loapia ngbegɔ nsɛ lowe kuwarɛ.14Maturi ma lowedza-ɔ anyɛ mabi to maaba maabɔ ati karɔ̃ masumu-ɔ.Mma ɔɖuɖu lonyɔ-ɔ pupurii to maaba maabɔ ati karɔ̃ i fɔ ngbatɔ̃.Ne mato maakpere-ɔ sɔ Bosate ɔmagɛ̃siare,Israel Ɔsekelea Zion.15"Atoasɔ maɔnyua-ɔ masɛ fiɛ matsiri-ɔ,gɔ kuwɛ̃ iisisɛ ɔki i fɔ ame ɔkɛlɛ ne,loatã kuwarɛ ɔba i fɔ iso ɔwi daaro.Aaɖe isoɣɔ atã ɔɣekparɛ ikɛlɛ ɔɣekparɛ.16Ato aanɛ nɖebi inyɛndufiɛ maakararã-ɔ ku magara aɖera.Iyɔ ato aatsue sɔ Mme, nɖe Bosate, fɔ Ɖidze,Yakob Ɔlesatere, fɔ Fɔdze.17Loabɔ-ɔ sikãrɛtɛa i ayiwa kanya,i ibɔrata kanya ne loabɔ-ɔ sikãfudza.I kudziri kanya ne loabɔ-ɔ ayiwa,fiɛ i ata kanya ne loabɔ-ɔ ibɔrata.Loasu isobuɛ lobara fɔ nyɔisosefiɛ ara bɔlɔlɔa ibara to aaɖe fɔ ɖeisose.18Aisibanɔ ɔtile iyere i fɔ karɔ̃ iso kini,maisibanina ɣee mawɔra kuira i fɔ karɔ̃ ame,ɣɛɛ ato aakpere fɔ abere sɔ Iɖifiɛ aakpere fɔ kuyogodɔ̃ sɔ Ile.19Kuɣɛ̃ iisibaɖe ɔtɔ kutã-ɔ i ikpɛnɛ ame,fiɛ ɔgbaleti ifiɛ iisibasa ifere-ɔ iso,alasɔ Bosate loaɖe fɔ ɔtɔ daaro,fiɛ fɔ Ɣaa aɖe fɔ ikpawaĩ.20Fɔ kuɣɛ̃ iisibabo iyo kuiyikuiyi ana,fiɛ fɔ ɔgbaleti iisibabo iyo.Bosate loaɖe fɔ ɔtɔ ɔwi daaro,fiɛ fɔ isoma ayi aatuĩ.21Iyɔ fɔ kaɖemabi ɔɖuɖu aaɖe ara bɔlɔlɔa mabaradzefiɛ karɔ̃ to kaaɖe ma kare ɔwi daaro.Ma nɖe ɔɖu wɔ lopia,wũ nrɔɔ̃ losu lobara ma,si iki ne iso si wũ kuwarɛ aabɔrɛ kayi.22Fɔ iturikuri kosoi to iakpese kakpi,fiɛ karɔ̃ tɛmi aakpese kaɖe siare.Mme nɖe Bosate.Loatã iba i kame mala si ɔwi ɔɔɣo."The Seed Company