YESAYA59
Ɣaa Kanyaɖidze Ɔtã Maturi Ipɔ I Akpi Iti
1Gbaã ne, Bosate kɔrɔ̃ iikurukutu kaɖu sɔ ɔ̃ibawo ɔturi ɔfɔ,ɔ̃ kutsue iitɛ̃ sɔ ɔ̃ibawo ɔnɔ.2Ɣɛɛ mi aɣɛrɛ losamerami gu mi Ɣaa ndɛ̃.Mi akpi lotã ɔwɛrɛ ɔ̃ katɔ̃ i mi iso,sɔ ɔ̃ibanɔ.3Alasɔ mi nrɔɔ̃ ɔpɛ ima,fiɛ aɣɛrɛ sia i mi arɔĩ iso.Mi sinyako ɔla mila,fiɛ mi sinyagɛmi ɔɣɛ aranyanyariã.4Kuwɛ̃ iisɛ ɔbara ɔ̃ ɔnyii itɔ̃me i kumɛgɔ ɔ̃ mɔmɔ ɔkpɛ ɔya ɔso,ɣee ɔ̃isɛ ɔsɛ mmara kɔrɛ ku ɔnukuare.Ɔnukuare iɖe kuwɛ̃ iisɛ ɔwe i ma atɔ̃me ikpadzɛ̃ ame mila masɛ mala.Masɛ mabara adzuni lalaa i ɔturi iso, fiɛ masɛ mabara wũ iranyanyariã.5Masɛ mabiɛ kubɛku aɣɔfiɛ masɛ mase lɛ nati wɔ lowe ɔ̃ natikuma.Ɔturi ɔrere wɔ loɖe ma aɣɔ to ɔ̃akpi,fiɛ si mabiɛ iɣɔ ne ɣɛreba nsɛ ɔbɔrɛ i kame.6Ma natikuma ɖe ira siefe nɛ ɔturi aapia,maibawo nnɛ mawe ɔfu so.Ma arabarara ɖe aranyanyariã,fiɛ ɔtile ara ibara ɔyi i ma nrɔɔ̃ ame.7Ma ngba sɛ mitere ise ala iranyanyariã ibara iti;fiɛ mato mapɛsiwa si maɖoe mma loiɣɛrɛ.Ma adzuni ɔnyanyarĩ.Masɛ manina ara, mawɔra ara i ɔri siare wɔ iso masɛ masɛ.8Maiɣe isobuɛ ɔri kɔraa;maisɛ mabara ira nɛ loya kuiwɛ̃.Maɔɖi siri gu nsɛgbai gɔdɔrɔa;fiɛ ɔbiara wɔ nsɛ ɔki i sɛ̃ iso iisɛ ɔna isobuɛ.Maturi Ɔɖi Ma Akpi Maɣɛ
9Ne ɔso atɔ̃meiɣɛ i ɔri iso ɔdzorogu bo,fiɛ ara bɔlɔlɔa ibara iisɛ ibore ibo bo.Boto bonyɔ ɔri botã ɔtɔ, ɣɛɛ idududu sɔɔ̃ iɖe.Boto bonyɔ ɔri botã kayi ame ikpa, ɣɛɛ bosɛ i idududu kpirikpiria ame.10Bosɛ boɖiɖi nrɔɔ̃ bomɔɛ̃ ibere si bosɛ lɛ manɔbiɛdze awe,fiɛ boto bolala nrɔɔ̃ lɛ mma nna anɔmi awe.Bosɛ botura ku kakɔme lɛ iɣɛ̃kɛlɛ iɖe awe,bopia i magbanadze ame lɛ makpise boɖe awe.11Bo ɔɖuɖu sɛ bowũti lɛ aketeke awe;fiɛ bosɛ bobiɛ i isoma ame lɛ mabɔrɔnuma awe.Bosɛ bonyɔ ɔri botã itɔ̃meiɣɛ i ɔri iso ɣɛɛ kuiwɛ̃ na.Bonyɔ ɔri botã iɖi ɣɛɛ iɣɛ dzoroo i bo kɔrɛ.12Alasɔ bo aɣɛrɛ ɔsi gbodzoo i fɔ anɔmi ame,fiɛ bo akpi to aɖe aɖansiɛ i bo iso.Bo aɣɛrɛ sia i bo iso,fiɛ boɣe bo akpi.13Bota boya i Bosate iso fiɛ boiɖe ɔnukuare bota wũ ana.Bopɛ kama bofirikira botã bo Ɣaa.Bopia ɔtɔ i maturi iyika ibɔ karɔ̃ fiɛ bota boya i Ɣaa iso.Bosɛ bobara adzuni i mila iso fiɛ bosɛ boɖi boɣɛ.14Ne ɔso maɔsa itɔ̃meiɖaɛ i ɔri iso makɛlɛgu kama,fiɛ ara bɔlɔlɔa ibara ɣɛ dzoroo.Ɔnukuare to ɔtura i sivurã iso,fiɛ ɔnukuareiɖe iibawo ɔmagɛ̃ ame ɔbo.15Ɔnukuare na maanya kukakɔi,fiɛ ɔturi ɔrere wɔ nsɛ ɔsɛ̃ iranyanyariã ɔɔkpese bɔi wɔ maamɔɛ̃.Bosate ɔnyɔ fiɛ iiɣɔ wũ anɔsɔ atɔ̃meiɣɛ i ɔri iso kuwɛ̃ na.16Ɔnya sɔ kuwɛ̃ na,situe ɔbɔrɛ wũ sɔ kpuradze kuwɛ̃ na.Ɣɛɛ ɔ̃ mɔmɔ kɔrɔ̃ ɔkpadzɛ̃ iɖeiso ibɔ wũ,ɔ̃ mɔmɔ ara bɔlɔlɔa ibara lola wũ.17Ɔpia ara bɔlɔlɔa ibara lɛ igbegbekpirafɔra,fiɛ ɔtɔme iɖi lɛ ibɔraikoto i iti iso.Ɔpia itikuso arapiafiɛ ɔmini so ku ɔdzini lɛ awu wa nsɛ mafu i arapia iso.18Ɔto ɔ̃atã ma kusoi ɔbiara arabarara kanya.Ɔ̃ matsirise ɔkpɛ nɖe sikpã teterea;ɔ̃ makpɛ̃guse ne ɔ̃akpadzɛ̃ ma kutsue teteree,fiɛ ɔ̃atã ndukilɔnrɔ̃ kuso i nnɛ mabara kanya.19Maturi ma i kuɣɛ̃iyokabokɔ̃ aanigã Bosate iyere,kuɣɛ̃kabɔrɛkɔ̃ isɛ maturi aawarɛ ɔ̃ ikpawaĩ.Alasɔ ɔto ɔ̃aba lɛ ɔwore wɔ ntere tetereenwɔ i Bosate awɛ sore awe.20"Ɖidze to ɔ̃aba Zion,fiɛ ɔ̃aɖi maturi ma lofiriki mabɔrɛ i ma akpi ame i Yakob ana."Bosate loɣɛ.21Bosate sɔ, "Mme ne, ndamu mɛ lobaragu-ɔ nɖe sɔ, wũ siwarã dzɛ losu losia-ɔ iso gu wũ atɔ̃me wa losu lopia-ɔ i kanya iibare kama i fɔ kanya ɣee are kama i fɔ mabi kanya ɣee are kama i fɔ mabi mabi kanya, ita i kiniɔ ito ikɛlɛ ku ɔwi daaro."The Seed Company