YESAYA31
Ɣaa To Ɔ̃adzuɛ̃ Yerusalem
1Ndzo mitã mma nsɛ mabie ibuai mabɔrɛgu i Egipte,mma losiaiti i apɔngɔ iso,mma losiaiti i ma abuɛ wa i apɔngɔ sɛ akpadzɛ̃ kusime isogu ɔle siare wɔ i ma maturi ma nsɛ masɛ i apɔngɔ iso ba,ɣɛɛ maisɛ masiaiti i Israel Ɔsekelea iso,ɣee makarɛ ibuai mabɔrɛgu i Bosate kɔrɛ.2Ɣɛɛ ɔ̃ wũ ɔkpa anɔ fiɛ ɔ̃awo itikpi ɔbɔ;ɔ̃isɛ ɔɣɛ itɔ̃me ɔ̃ikpese ne i kama.Ɔto ɔ̃ata ɔya i matilese iyo iso,mma nsɛ mabuai aranyanyariã mabaradze.3Ɣɛɛ ma Egiptese ne, maturi maɖe ne maiɖe Ɣaa;ma apɔngɔ ne sosina maba ne iiɖe siwarã.Si Bosate ɔnabarã ɔ̃ kɔrɔ̃ ne,nwɔ nto ɔbuai aatura,nwɔ mato mabuai aarɔ̃ma inyɔ ɔɖuɖu aawɔ.4Bosate ɔɣere me sɔ;"Lɛ kumɛgɔ i dzata sɛ ɔwũti,dzata siare i kabɔi ga ɔmɔɛ̃ iso -fiɛ atoasɔ masɛrɛnyɔisose ɔɖuɖuɔsikanya i ɔ̃ iso ne,ma kulu ila iisɛ itidza wũɣee ma ara isa ɔɖaa wũ ne,ngbɔ i Bosate Ɔlesate aaso ɔbaɔ̃akpɛ̃gu ma kakpã i Zion Kube iso gu kɔ̃ atititɛ̃ ne.5Bosate Ɔlesate aadzuɛ̃ Yerusalem,lɛ kurodzai nto kufɛrɛrɛ kuki kulɔ;ɔ̃adzuɛ̃ wũ fiɛ ɔ̃aɖi wũ,ɔ̃ata 'ɔwara wũ' fiɛ ɔ̃aɖi wũ."6Mikpese miba nwɔ mibua mita miya iso kɔrɛ, O Israel kaɖe.7Alasɔ iyi nɛmɔ ne, mi ɔbiara to ɔ̃asɛ̃ sikãrɛtɛa gu sikãfudza aɣɔ wa miɣɛrɛ mibara ala mi nrɔɔ̃.8"Asiria maturi to maakpi ala ipɛmi nɛ loiɖe ɔturi ire;ipɛmi nɛ loiɖe ɔturi awune ire loawɔra ma.Maatere i ipɛmi kanyafiɛ maaɣiɛ ma maporoporoi mabara karabara.9Ma ɔmagɛ̃ wɔ ibere ɔki ilɔ aabiɛ ala ifɔ̃ ɔso;ma makparɛrɛĩ aati makpakpa si manya kakpã kameleɖukui,"ngbɔ i Bosate ɔɣɛ ne,nwɔ ɔtɔ mpia i Zion,nwɔ ɔferewu mpia i Yerusalem.The Seed Company