YESAYA3
Ikpɔkpɔtɔ I Yerusalem
1Nyɔ, Bosate,Bosate Ɔlesate,to ɔba ɔ̃amɔɛ̃ ara wa iso masiaiti,ɔɖi i Yerusalem gu Yuda,araɖea ɔɖuɖu gu ndu ɔɖuɖu.2Nwɔ lofɔ iyere gu kpãrɛrɛĩ,atɔ̃meɣɛdze gu kanyaɖidze,sibɔpɛdze gu ɔkpakpa,3kpãrɛrɛĩ gu nwɔ nɖe makpakpɛ̃dze siru katɔ̃,adzunitãdze, kusɛ̃ ɔkpakpa gu wase wɔ mba silɔ.4"Loasu kuporoporoibi lobara ma matɔ̃ɖedze;mabiɛtɛ kere loaɖe ma iso."5Maturi to maabara so ɔtile -ɔnyii aata ɔya i ɔnyii iso, ɔlɛdze ɔta ɔya i ɔlɛdze iso.Mabiɛtɛ to maata maya i makpakpa iso,maturi fefea to maata maya i maturi nyaa iso.6Ɔwi wɔmɔ ame ne, ɔturi aamɔɛ̃ ɔ̃ ɔnyiibii ɔ̃ ɔse iyo ɔɣere wũ sɔ,"Fɔ aba arapia, ne ɔso ɖe bo tɔ̃ɖedze;nyɔ ayoku wagbe iso!"7Ɣɛɛ iyi nɛmɔ ne, ɔ̃ala kulu sɔ,"Loibawo ɔbara.Lona araɖea ɣe arapia i wũ iyo;daasu me abara maturi tɔ̃ɖedze."8Ito isore Yerusalem,Yuda to ɔrɔ̃;ma atɔ̃me gu kurabarara ɔta kuɣɛ i Bosate iso,mata maɣɛ i ɔ̃ ɔle iso.9Ito ite ta ma katɔ̃,maɖi ma ikpi masore lɛ Sodom maturi;maisɛ makɔla ne.Ndzo mitã ma!Maɔkpadzɛ̃ itikpi mabɔ so iso.10Ɣere maturi bɔlɔlɔa sɔ ito ialɛgu ma,alasɔ mato maaɖe ma arɔĩ ame karabara.11Ndzo mitã matilese!Itikpi ɔɔba i ma iso!Mato maatã ma kusoi nnɛ i ma nrɔɔ̃ ɔbara iti.12Maporoporoi to manyɛdɛ̃ wũ maturi,marɔ̃go to maɖe ma iso.O, wũ maturi, mi makɔdze to makɔ mi mayura;mato makɔ mi maɖi i ɔri iso.13Bosate ɔɔsɛ i ɔ̃ iyara ame i atɔ̃mekaɣɛkɔ̃;ɔta ɔto ɔba ɔ̃aɣɛgu ma atɔ̃me.14Bosate ɔɔsɛ i karɔ̃ ɔto ɔɣɛgu ɔ̃ maturi atɔ̃mekaɖe makpakpa gu matɔ̃ɖedze atɔ̃me:"Mi miɖe lowɔra wũ wainkakpɛkɔ̃;ara wa miyu i mawɛrɛba kɔrɛ se i mi ayo.15Be ɔso mito minyɛdɛ̃ wũ maturimimɔɛ̃ mawɛrɛba katɔ̃ mibore i karɔ̃?"Bosate Ɔlesate nto ɔɣɛ ngbɔ.16Bosate sɔ,"Zion marɔ̃go sɛ makɔlɛ so kato,masɛ masɛ manabarã ma simɔmaɖe asɔrɔ̃ ala ma anɔmi,masɛ manyɛdɛ̃ amɔrɛ̃sɛmatidza ara wa masasarã i akpakpokpo.17Ne ɔso Bosate to ɔ̃atã Zion marɔ̃go ɔkpɛ̃ ayɛi i ati iso;Bosate aatã ma ati ɔbɛ."18Iyi nɛmɔ iso ne, Bosate to ɔ̃abɛ ma ara wa masu makɛrɛ so ala: amɔiti akpo, iti amɔɛ̃ra, ɔme ngɔsɔngɔsɔn,19atsuebi gu karɔtɔ̃ akpo, sikati dzɛ masɛ mafu katɔ̃,20agala, ngɔsɔngɔsɔn mɛ mapia i akpakpokpo gu abɔso, ngarãdu abui gu sisɔbɛ,21ikparĩ asukpɛ, kugɔrɔĩ gɔ mapia i ɔɣɔ̃,22awu tagbaraa sɛɛ, akoto gu kato awu, gu akpo23gu aɣɔɣɔɛ, sikati ɖɔbɔrɔa awu, ara wa masɛ manyi ala iti gu nwa masɛ mafu i katɔ̃.24Ifɔrɛ̃ kɔrɔ̃kɔrɔ̃ kanya ne, loatã mafɔrɛ̃ nyanyarĩ,i ɔkati wɔ maanyi i ɔsɔ ame kanya ne, loatã ma siwɛ̃;i siwɛrɛ̃ tagbaraa kanya ne loatã ma iti bɛa;i sikati sɛɛ kanya ne, loatã ma ipundusikoto;i kulɛ kanya ne, loatã ma ipupuri.25Yerusalem marɛrɛ̃ to maarɔ̃ i ipɛmi kanyafɔ makpãrɛrɛĩ aarɔ̃ i kakpã ame.26Zion ɔka aabiɛ ɔwana.Ɔ̃ase lɛ ɔrɔ̃go wɔ irabiara lowɔ fiɛ ɔkpase ɔsi i karɔ̃ kunu.The Seed Company