EZEKIEL26
Kanyaiɖi Ita Iya i Tiro Iso
1I kuwa iyi ɖeakatɔ̃ i ikɔ iweoɖeakatɔ̃ ame ne, Bosate itɔ̃me ɔba me sɔ,2"Ɔturi awune ɔbi, alasɔ Tiro ɔmagɛ̃siare maturi ɔɔɣɛ i Yerusalem iso sɔ, 'Ɛɣɛɛ̃! Maɔbiɛ kayogodɔ̃ ikɛlɛ nɖebi, ne kã akui ɔɔbusi ase atã me kiniɔ gɔ Yerusalem ɔ̃ɔbiɛ ne, nto loana isaruɛ,'3ne ɔso nnɛgbe i Bosate Wɔ Nsiguso to ɔɣɛ ne: Lota loɣɛ-ɔ iso lo, Tiro, fiɛ nto loatara nɖebi gbodzoo mata maya-ɔ iso lɛ ɔpo nto ɔfuĩdza ɔ̃ sipotutaa kato.4Mato maawɔra Tiro abere fiɛ maabibiɛ ɔ̃ adzarara. Nto loakparɛ̃ ɔ̃ aku loɖi i ɔ̃ iso ɔkpese itasiare nɛ nse kpawee.5Ito iase lɛ ita i ɔpo ame, kakɔi ga i makpɛɖidze sɛ mala ma asabu, alasɔ loɔɖeika, Bosate Wɔ Nsiguso loɣɛ. Tiro to ɔ̃akpese kakpãramɔɛã ɔta nɖebi.6Ne ɔ̃ nsɛkɔ̃ i karɔ̃ mɔmɔ iso to miawɔ i ipɛmi kanya. Iyɔ mato maatsue sɔ Mme nɖe Bosate.7"Ala nnɛgbe i Bosate Wɔ Nsiguso to ɔɣɛ ne: Nto loakpadzɛ̃ Babilon igara Nebukadnezar, magara ame igara, lobɔrɛgu i katikpe isɛ lobɔ i Tiro iso. Ɔto ɔ̃asɛ ɔbagu apɔngɔ gu kubore, pɔngɔmasɛdze gu makpakpɛ̃dze ikuri siare.8Nebukadnezar to ɔ̃awɔra fɔ nsɛkɔ̃ i karɔ̃ mɔmɔ iso ku ipɛmi. Ɔto ɔ̃atsue itɛ̃ipia ara isɛ iabo i fɔ ibere iso fiɛ ɔ̃atara ɔ̃ akpirafɔra ɔsia-ɔ iso.9Ɔto ɔ̃asu ara wa masɛ mabiɛ ata ɔbiɛ fɔ abere fiɛ ɔ̃abiɛ fɔ adzarara ku ɔ̃ akpakpɛ̃ra.10Ɔ̃ apɔngɔ to aasi gɔ iatã sɔ ɔsebu aafu-ɔ iso. Fɔ abere to aatɔrɛ̃ ala kakpã apɔngɔ inene, makeke gu kubore kulu iti, si ɔbo i fɔ kuyogodɔ̃ ame lɛ kumɛgɔ i marɛrɛ̃ sɛ mabo i ɔmagɛ̃siare wɔ abere maɔbibiɛ pelepele ame.11Ɔ̃ apɔngɔ to aanene fɔ sivurã ɔɖuɖu ku apuɛ. Ɔto ɔ̃aɖue fɔ maturi ku ipɛmi fiɛ fɔ akpa wa mba ɔle to aarɔ̃ afere i karɔ̃.12Mato mamɔɛ̃ fɔ karana fiɛ maabɔdza fɔ kuɣaiɖe ara lɛ kakpãramɔɛã. Mato maabibiɛ fɔ abere fiɛ maawɔra fɔ ayo sɛɛ. Ne mato maafuĩdza fɔ ata, sidziri gu sise mafere i ɔpo ame.13Loto loatuĩdza fɔ aka ku kulu wamɔ fiɛ maisibanɔ fɔ siwɛ̃masango silɔ mɛrɛ̃mɛrɛã.14Nto lokpesera-ɔ itasiare wawe fiɛ aakpese kakɔi ga masɛ mawarɛ asabu mala. Maisibaledza-ɔ itsue kuiyikuiyi ala Mme Bosate loɔɖeika, Bosate Wɔ Nsiguso loɣɛ.15"Nnɛgbe i Bosate Wɔ Nsiguso to ɔɣere Tiro maturi ne: Ɔpokpokpo maturi ɔɖuɖu to maati makpakpa ala fɔ irɔ̃ kulu iti, si mma makpira ɔtɔrɛ̃ fiɛ ituriɖue ɔba i fɔ ame.16Iyɔ maɖeisoi i ɔpokpokpo ɔɖuɖu iso to maanyua ma sigaraayara masɛ, masu ma arapia tagbaraa masɛ i kuruɛ fiɛ maaɖi ma arapia wa matsue ara mapia masɛ. Itiikpakpa afɔ ma lɛ arapia, ne mato maakpase masɛ i karɔ̃, mati makpakpa ku ɔwi biara fiɛ sitsue aabɔrɛ ma gɔ manya-ɔ.17Iyɔ mato maapia isomanɔ karɔ̃ i fɔ iso ne mato maaɣɛ sɔ," 'O ɔmagɛ̃siare, fɔ lofɔ iyere, nyɔ ngbɔ maɔwɔra-ɔ,fɔ wɔ ame i marɛrɛ̃ ma nsɛ masɛ ɔpo iso ɔsi i kame!Fɔ lowe ɔle i sipo isomi gu fɔ kaɖemabi.Mitã ifɔ̃ ɔwei mma ɔɖuɖu losɛ i mmɔ ame.18Kiniɔ ne ɔpokpokpo nrɔ̃ to miti mikpakpaku iyi nɛ akpase.Ndukilɔnrɔ̃ mɛ i ɔpo ameto miti mikpakpa gɔ manya fɔ irɔ̃.'19"Nnɛgbe i Bosate Wɔ Nsiguso to ɔɣɛ ne: Si lobara-ɔ ikpakpi ɔmagɛ̃siare ne, lɛ simagɛ̃siare dzɛ ame i maturi iisito masɛ ame ne fiɛ si lokpadzɛ̃ ɔpo ndu lofere-ɔ iso fiɛ ɔ̃ ndu gbodzoo ɔfu-ɔ iso ne,20iyɔ nto loasore-ɔ lokɛlɛgu i karɔ̃ ame, ku mma mato masora mapia i ikpibiɔ ame. Ne ato aakɛlɛ maturi ma ta kokowi kɔrɛ. Loto loatã awe i karɔ̃ ame i kayirinɔ, lɛ kokowi aku, ku mma nsɛ makɛlɛ iwo ame. Iyɔ aisibakpese aba ɣee aba aafɔ fɔ kasɛkɔ̃ i mma mpia ngbã karɔ̃ iso.21Nto loakpadzɛ̃-ɔ lobɔ kawirikɔ̃ nyanyariã iyɔ aisibawe. Mato maabie-ɔ, ɣɛɛ maisibanya-ɔ kuiyikuiyi ana, Bosate Wɔ Nsiguso loɣɛ."The Seed Company