EZEKIEL16
Yerusalem Maturi Ɔnukuare Idaaɖe
1Bosate itɔ̃me ɔba me sɔ,2"Ɔturi awune ɔbi, nyagalagu Yerusalem maturi ku ma anyanya kubarara3si aɣɛ sɔ, ' Bosate Wɔ Nsiguso to ɔɣere Yerusalem maturi sɔ: Mi mawa mɛrɛ̃ gu mi kagodɛkɔ̃ ɔwe i ma Kanaanse karɔ̃ iso. Mi ɔse ɔɖe Amorise fiɛ mi ɔnyi ɔɖe Xitise.4Iyi nɛ maɣe-ɔ ne maitu-ɔ ikɔ̃, fiɛ maipie-ɔ ndu si asekele ana, fiɛ maisɔla-ɔ mma ɣee maimini-ɔ sikati.5Kuwɛ̃ iinyɔ-ɔ nnya ɣee kuwɛ̃ iiwe nnyainyɔ sɔ ɔ̃abara ara wagbe kuiwɛ̃ ɔtã-ɔ. Ɣɛɛ ne, mafuĩdza-ɔ masese karɔ̃ ndɛ̃, alasɔ manyɔ-ɔ pupurii ku iyi nɛ maɣe-ɔ.6" 'Kere ne lopasa lofe ne lonyɔ-ɔ ato atatara nrɔɔ̃ gu ngba i ima ame. Ne gɔ arɛ i fɔ ima ame i mmɔ ne loɣere-ɔ sɔ, "We ngbã!"7Lobara-ɔ amɔ lɛ ɔraɖui i kakpɛkɔ̃ ame. Amɔ fiɛ ana so ne aba aakpese ikɛrɛra nɛ nto ilɛnyɔ iɖo. Fɔ wɔ losɛ isɔ̃ gu wawe, aba aato anyɛ i igbegbe fiɛ fɔ siwɛrɛ̃ ɔmɔ.8" 'Kama ne lokila lofe, ne gɔ lonyɔ-ɔ fiɛ lonya sɔ ɔɔmɔ akote atã kuɖuɛ ne, lowarɛ wũ arapia ɔyokã isɛ lofu-ɔ iso ne lofu-ɔ isɔ̃ ara. Lokã wũ ndamu lotã-ɔ ne lobaragu-ɔ ndamu ne akpese wũ ira, Bosate Wɔ Nsiguso loɣɛ.9" 'Lopie-ɔ ndu ne lofore ima loɖi-ɔ iso ne losɔla-ɔ nnɔĩ iso.10Lopia-ɔ arapia wa matsue ne lopia-ɔ kakomi ndokota. Lopia-ɔ ɔkati ɖɔbɔrɔa sɛɛ ne ka losu arapia wa lofɔkuɣa lopia-ɔ iso.11Lokɛrɛ-ɔ ku akɛrɛra, lopia-ɔ akpokpo i kɔrɔ̃ ne lopia-ɔ anyi i ɔme,12ne lopia-ɔ kagɔrɔĩ i ɔɣɔ̃, lopia-ɔ atsuebi i atsue ne lotɔmedza-ɔ igarakoto nɛ nto ilɛnyɔ i iti.13Ne ɔso makɛrɛ-ɔ ku sikãrɛtɛa gu sikãfudza. Fɔ arapia ɔɖe ɔkati ɖɔbɔrɔa sɛɛ gu ɔkati wɔ lofɔkuɣa gu ɔkati wɔ matsue. Fɔ aɖera ɔɖe ɔraũ sɛɛ, maɣendu gu nnɔĩ. Aba aalɛnyɔ ne akpese igararɔ̃go.14Ne fɔ iyere ɔre kayi i nɖebi ndɛ̃ ala fɔ kulɛ iti, alasɔ sikɛrɛɖu dzɛ lotã-ɔ ɔbara sɔ fɔ kulɛ ɔyi, Bosate Wɔ Nsiguso loɣɛ.15" 'Ɣɛɛ asiaiti i fɔ kulɛ iso ne asu fɔ iyereifɔ akpesera so sɔrɔ̃ɖedze. Asu so atã ɔrere wɔ loba ɔto ɔfe, ne fɔ kulɛ ɔkpese ɔ̃ kure.16Asu fɔ arapia awɛ̃ abara kusɔrɛkɔ̃ i ngbegɔ abara fɔ asɔrɔ̃ra. Ara wamɔ igbã iibaba, ɣee iikote sɔ aaba ɖuɖuuɖu fiɛ.17Ana ne asu akɛrɛra sɛɛ wa lotã-ɔ, akɛrɛra wa masu wũ sikãrɛtɛa gu sikãfudza mabara, ne abara marɛrɛ̃ kumiamia arapɔa ne abara asɔrɔ̃ra ku wã ne.18Ne asu fɔ arapia wa matsue mapia apia i arapɔa iso, ne asɔrɛ wũ nnɔĩ gu kuakɔrɔ̃kɔrɔã atã wã.19Ana ne asu araɖea wa lotã-ɔ - ɔraũ sɛɛ, nnɔĩ gu maɣendu wa lotã-ɔ sɔ ɖe - asɔrɛ lɛ kuakɔrɔ̃kɔrɔã atã wã. Nnɛgbe loba ne, Bosate Wɔ Nsiguso loɣɛ.20" 'Ne asu fɔ mabibirɛrɛĩ gu mabibirɔ̃gomi ma aɣe atã me asɔrɛ lɛ aɖera atã arapɔa. Fɔ asɔrɔ̃iɖe iisi-ɔ ɣɛɛ?21Aɖue wũ mabi ne asɔrɛ ma atã arapɔa.22I fɔ anyanya kubarara ɔɖuɖu ame gu fɔ asɔrɔ̃iɖe ame ne, ainyigi ɔwi wɔ aɖe ɔkoso, ɔwi wɔ asɛ isɔ̃ gu wawe, akpɛkpɛ̃ i fɔ ima ame.Yerusalem Ɔsɛ Ngbã Lɛ Sɔrɔ̃ɖedze
23" ' Bosate Wɔ Nsiguso nto ɔɣɛ sɔ: Ndzo! Ndzo mitã-ɔ! Isu ibua i fɔ ɔtile ɔɖuɖu ame ne,24atsue kuɣɔka atã so ne abara kusɔrɛkɔ̃ i itiri biara.25Atsue kusɔrɛkɔ̃ i ɔvurã biara iso, ne asopara so ku fɔ kulɛ, asu so atã ɔbiara wɔ loki ɔfe gɔ fɔ asɔrɔĩɖe ɔsɛkatɔ̃.26Aɖe asɔrɔ̃ ku ma Egiptese, fɔ magbamikui ma mpia iledzaso ame gɔ maarɛgu-ɔ, ne apia me sikpã ku fɔ sidzetɔiɖe gbodzoo.27Ne ɔso loɖi wũ kɔrɔ̃ losia i fɔ iso ne lotã fɔ karɔ̃ kusime ɔbakarɔ̃. Losu-ɔ lotã fɔ matsirise ɖeɖei, ma Filistise simagɛ̃ ne sitsue ɔbɔrɛ ma ala fɔ ininaso nsɛgbai ɔso.28Aɖe asɔrɔ̃ ku ma Asiriase ana, alasɔ aimi, ne kama kɔraa ne aikpese ami.29Ne ka abua i fɔ asɔrɔ̃iɖe iso ku ma Babiloniase, kuɣamaɖese karɔ̃, ɣɛɛ ku ne kɔraa ne aimi.30Bosate Wɔ Nsiguso sɔ, " 'Nyɔ kumɛgɔ ɔɔsopara so gɔ abara ara ɔɖuɖu wagbe lɛ sɔrɔ̃ɖedze wɔ nna kunuarɛ!31Atsue nsɛkɔ̃ atã so i ɔvurã biara iso ne abara kusɔrɛkɔ̃ i itiri biara ne. Si maɣɛ ne ɔɔbara so aɖo ɔrɔ̃gosɔrɔ̃ɖedze, alasɔ asɛ̃ sikã ifɔ.32" 'Ɔre sɔrɔ̃ɖedze aɖe fɔ! Asɛ afɔ mafɔ apia aɖo fɔ mɔmɔ kurã!33Sɔrɔ̃ɖedzerɔ̃go biara sɛ ɔfɔ sikã, ɣɛɛ fɔ asɛ atã fɔ ma ɖuɛdze ɔɖuɖu karatã. Asɛ atã ma kawɛrɛra sɔ mabɔrɛ i kakɔi biara maba i fɔ kɔrɛ si maba maaɖegu-ɔ sidzetɔ.34Ne ɔso ne i fɔ asɔrɔĩɖe ame ne aise lɛ marɔ̃gosɔrɔ̃ɖedze mama, kuwɛ̃ iisɛ ɔtere ɔsiai-ɔ ala fɔ sidzetɔiɖe. Fɔ ne abua akpaki, ala asɛ atã kuso ɣɛɛ maisɛ matã-ɔ kukuwɛ̃.Yerusalem Kutsueikpadzɛ̃
35" 'Ne ɔso, sɔrɔ̃ɖedze, nɔ Bosate itɔ̃me!36Bosate Wɔ Nsiguso sɔ: Ala asa fɔ karana afere fiɛ aɖi so isɔ̃ ku asɔrɔĩɖe ku fɔ maɖuɛdze, ne gu ala fɔ anyanya arapɔa fiɛ asu fɔ mabi ima atã wã ɔso ne,37nto loasa fɔ maɖuɛdze ɔɖuɖu kanya, mma anagu isoɣɔ, mma aɖuɛ gu mma atsiri pelepele. Loasa ma ɔɖuɖu kanya loki lolɔ-ɔ mata maya-ɔ iso. Ne loabɛ ara loɖi-ɔ iso i ma katɔ̃, ne mato maanya fɔ isɔ̃ ɔɖuɖu.38Loto loatã-ɔ ipɔ itã kutsueikpadzɛ̃ lɛ ɔrɔ̃go wɔ lofe kurã kama gu nwɔ loɖue maturi. Ne nto loakpadzɛ̃ wũ sirerɛ sikpã gu ima iti ikarɛ sikpã teterea losia i fɔ iso.39Iyɔ nto loasu-ɔ lopia i fɔ maɖuɛdze nrɔɔ̃ ame, ne mato maabibiɛ fɔ nsɛkɔ̃ mawɔra fɔ kusɔrɛkɔ̃. Mato maabɛ-ɔ arapia iso ne mato maasu fɔ akɛrɛra sɛɛ, ne maanyua-ɔ masɛ wawe gu isɔ̃.40Mato maakɔ maturi gbodzoo mata maya-ɔ iso. Mato maapɛ-ɔ ata fiɛ maakɛkɛ-ɔ mapia i kusɛi ame ku ma apɛmi.41Mato maatsuedza fɔ ayo ne maakpadzɛ̃-ɔ kutsue i marɔ̃go gbodzoo anɔmi ame. Loto loatuĩdza fɔ asɔrɔĩɖe ne aisibatã fɔ maɖuɛdze kuso.42Iyɔ wũ sikpã teterea to siabakarɔ̃ i fɔ iso fiɛ wũ sirerɛ sikpã aarui i fɔ iso. Loto loaɣɔ fiɛ loisibana sikpã.43" 'Ala ainyigi ɔwi wɔ aɖe ɔkoso ɣɛɛ apia me sikpã ku ara ɔɖuɖu wagbe. Nto loakpadzɛ̃ nnɛ abara losia-ɔ i iti iso, Bosate Wɔ Nsiguso loɣɛ. Ala ne abua ininaso nsɛgbai i fɔ anyanya kubarara mama ɔɖuɖu kama.44" 'Ɔbiara wɔ nsɛ ɔpɛ agbã to ɔ̃apɛ igbã nɛgbe i fɔ iso sɔ, "Lɛ ɔnyi, lɛ ɔbibirɔ̃gomi."45Ɔnukuare fɔ ɔnyi ɔbibirɔ̃gomi aɖe, nwɔ lonyɔ ɔ̃ ɔrã gu ɔ̃ mabi pupurii. Ɔnukuare aɖe fɔ manyiiko ame ɔnyiiko, mma lonyɔ ma marã gu ma mabi pupurii. Fɔ ɔnyi ɔɖe Xitise ne fɔ ɔse ɔɖe Amorise.46Fɔ ɔnyiiko kpakpare ɔɖe Samaria, nwɔ losɛ i fɔ katikpe ku ɔ̃ mabibirɔ̃gomi. Ne fɔ ɔnyiiko kosore, nwɔ losɛ i fɔ kagbalɔ ku ɔ̃ mabibirɔ̃gomi ɔɖe Sodom.47Aisɛ i ma siri iso kere fiɛ aisore ma anyanya kubarara, ɣɛɛ i fɔ siri ɔɖuɖu ame ne, aba aanyanyarĩ aɖo ma kɔraa.48Bosate Wɔ Nsiguso nto ɔkã ɔɣɛ sɔ, ayi kumɛgɔ lopia ngbã ne, fɔ ɔnyiiko Sodom gu ɔ̃ mabibirɔ̃gomi iibara nnɛ mi gu fɔ mabibirɔ̃gomi ɔbara ɖuɖuuɖu.49" 'Kiniɔ ne fɔ ɔnyiiko Sodom ikpi i ngbe ne: Ma gu ɔ̃ mabibirɔ̃gomi ɔte so, mafe imi ne maisu kuira gɔ mawe i isobuɛ gu kaɣɔ ame. Ɣɛɛ maibuai mawɛrɛba gu maɣiãni iso.50Manyɔ so ne mabara anyanyara i wũ anɔ. Ne ɔso loɖi ma lofegu lɛ ɔɔnya.51Samaria maturi iibara akpi wa i mi Yerusalem maturi ɔbara kasɛ kawɛ̃. Miɔbara anyanyara miɖo ma, ne miɔtã sɔ mi manyiiko ɔkpɛ ɔnyɔ bɔlɔlɔ iki i ara ɔɖuɖu wa miɔbara i ngbe ame.52Misore mi kunuarɛ, alasɔ miɔtã mi manyiiko ɔnyɔ bɔlɔlɔ. Ala mi akpi ɔsi aɖo ma are, ne miɔtã sɔ ma ɔkpɛ ɔnyɔ bɔlɔlɔ ɔɖo mi ɔre. Ne ɔso iyɔ kunuarɛ si kukpɛ̃ mi, si misore mi isopa ala mitã mi manyiiko ɔkpɛ ɔnyɔ bɔlɔlɔ.Mato Maaledza Sodom Gu Samaria Isɛra
53" 'Ɣɛɛ, nto loasɛra Sodom gu ɔ̃ mabibirɔ̃gomi gu Samaria gu ɔ̃ mabibirɔ̃gomi isaruɛ, gu fɔ Yerusalem isaruɛ ku ma,54si aasore fɔ isopa fiɛ kunuarɛ aamɔɛ̃ mi ala ara ɔɖuɖu wa miɔbara itã ma kaɣɔ iti.55Ne fɔ manyiiko, Sodom ku ɔ̃ mabibirɔ̃gomi gu Samaria ku ɔ̃ mabibirɔ̃gomi, aakpese mase lɛ saa. Ne mi gu fɔ mabibirɔ̃gomi aase lɛ mise saa.56Aito aakpere fɔ ɔnyiiko Sodom iyere kɔraa i fɔ iteso ɔwi ame,57fiɛ maanya fɔ ɔtile ɔbɔrɛ kayi. Edom mabibirɔ̃gomi kɔraa ka mato manyɔ-ɔ pupurii gu ɔ̃ magbamikui ɔɖuɖu gu ma Filistise mabibirɔ̃gomi - mma ɔɖuɖu loki malɔ-ɔ mato manyɔ-ɔ pupurii.58Bosate Wɔ Nsiguso to ɔɣɛ sɔ, ato aatã fɔ ininaso gu anyanya kubarara kuso.Ndamu Mɛ Nna Katuĩ
59" 'Nnɛgbe i Bosate Wɔ Nsiguso to ɔɣɛ ne: Loto loabara-ɔ lotikuso lɛ akote atã, ala ɔɔsɛ wũ ndamu i karɔ̃ iki gɔ atu ndamu ɔso.60Ɣɛɛ nto loanyigi ndamu mɛ lobaragu-ɔ ku ɔwi wɔ aɖe ɔkoso. Ne nto loasɛragu-ɔ ndamu mɛ nna katuĩ .61Iyɔ ato aanyigi nnɛ ɔɔbara fiɛ kunuarɛ aakpɛ-ɔ si afɔ fɔ manyiiko, mma loɔmɔ maɖo-ɔ gu mma ɔɔmɔ aɖo. Loto loasu ma lotã-ɔ lɛ fɔ mabibirɔ̃gomi ɣɛɛ mana i nnɛ lokã i ndamu mɛ lobaragu-ɔ ame.62Ne ɔso loto loasɛragu-ɔ wũ ndamu, ne ato aatsue sɔ Mme nɖe Bosate.63Iyɔ, si lobara ikpikusoisɔrɛ lotã-ɔ i ara ɔɖuɖu wa ɔɔbara iti ne, ato aanyigi fiɛ kunuarɛ aamɔɛ̃-ɔ. Ne aisibabusi kanya aɖeika ala fɔ kunuarɛ iti kuiyikuiyi ana, Bosate Wɔ Nsiguso loɣɛ.' "The Seed Company