EZEKIEL15
Igbã i Wain Iwɛĩ Iso
1Bosate itɔ̃me ɔba me sɔ:2"Ɔturi awune ɔbi, nda i wain iwɛĩ korea aalɛ iɖo kudziri kurere ikpai i ipo ame?3Masɛ mana katɔrɛ̃ mabɔrɛgu i wain iwɛĩ ame masu mabara ala ira nyaa iwɛ̃? Masɛ masu ne mabara ala ayoi wa masɛ masu masa ara?4Si maɔfuĩdza ne mapia i ɔtɔ ame lɛ katɔrɛ̃ fiɛ ɔtɔ ɔɔtsuedza kuwirikɔ̃ kunyɔ ɔɖuɖu fiɛ ndɛndɛ̃ ana ɔɔpɛ ɔtɔ ne, ikpese ilɛ itã ira iwɛ̃ ibaragu?5Si ɔwi wɔ iɖe iwɔlɔlɔ fiɛ iiwe kusia kukuwɛ̃, iyɔ nda maawo ne ɔsu ɔbara ala ira nyaa si ɔtɔ ɔɔtsuedza ne, iɔpɛ ɔtɔ iisina i kuira ame?6"Ne ɔso nnɛgbe i Bosate Wɔ Nsiguso to ɔɣɛ sɔ: Lɛ kumɛgɔ loɔtã wain iwɛ̃ korea i ipo adziri ndɛ̃ lɛ katɔrɛ̃ itã ɔtɔ ne, ngbɔ nto loabara maturi ma nsi i Yerusalem ne.7Loto loatara wũ anɔ lota loya i ma iso. Atoasɔ maɔbɔrɛ i ɔtɔ ame ne, ɣɛɛ ɔtɔ nto ɔ̃awɔra ma. Ne si lotara wũ anɔ lota loya i ma iso ne, mito miatsue sɔ Mme nɖe Bosate.8Bosate Wɔ Nsiguso to ɔɣɛ sɔ: Loto loabara karɔ̃ ɔkpese ikpakpi alasɔ maiɖe ɔnukuare matã me."The Seed Company