Read 1 SAMUEL 14

1 SAMUEL14

Yonatan Gu Ɔ̃ Akpirasarãdze Ɔɖoe Ma Filistise

¹Iyi iwɛ̃ ne Yonatan, Saul ɔbibirɛrɛĩ ɔɣere ɔporoporoi wɔ loɖe ɔ̃ akpirasarãdze sɔ, "Ba si bokɛlɛ ma Filistise kasɛkɔ̃ i kasɛ nyɔare iso." Ɣɛɛ ɔ̃iɣere ɔ̃ ɔse Saul.

²Saul ɔwe i Gibea kabenya i agoa kudziri kayirinɔ i Migron. Makpakpɛ̃dze lɛ alafa akuɔ ɔwegu wũ,³Axiya ɔwe i ma ndɛ̃, nwɔ lopia ɔmearapia. Axiya ɔɖe Ikabod ɔnyiirɛrɛĩ Axitub ɔbibirɛrɛĩ, Axitub ɔɖe Pinexas ɔbibirɛrɛĩ gu Pinexas ɔɖe Eli Bosate sɔrɛdze i Silo ɔbibirɛrɛĩ. Kuwɛ̃ iitsue sɔ Yonatan ɔrui i mmɔ.

⁴Abebodɛ̃ri wɔ i Yonatan ɔbara adzuni sɔ ɔ̃ɔwara fiɛ ɔ̃akɛlɛ ma Filistise kasɛkɔ̃ ne; kuwɛla pia i kusɛ kunyɔ ɔɖuɖu iso. Kawɛ̃ marɔ sɔ Bozez, fiɛ kanyɔare ɔɖe Sene.⁵Kuwala kawɛ̃ pia i kato to ikɛlɛ Mixmas isɛ, fiɛ kunyɔare pia i kala to ikɛlɛ Geba isɛ.

⁶Yonatan ɔɣere kaporoporoi ga nɖe ɔ̃ akpirasarãdze sɔ, "Ba, si bokɛlɛ maɣɔsɔrɛdze mamɔ kasɛkɔ̃ kɔrɛ. Siainyɔ Bosate to ɔ̃abara ira i bo iti. Kuira na iatɛ̃ Bosate ɔri sɔ ɔ̃atã iɖi, iki i maturi gbodzoo ɣee kɛkɛĩ kere iso."

⁷"Akpirasarãdze ɔtã mmuai sɔ, "Bara nnɛ ɔɖuɖu abu sɔ iɖe isɛɛ itã bo; sɔgu i katɔ̃, loabuai-ɔ iso."

⁸Yonatan ɔɣɛ sɔ, "Iyɔ ba; boasɛ bofe kagbolomi bokɛlɛ ngbegɔ i ma Filistise makpakpɛ̃dze pia isɛ, si manya bo.⁹Si maɣere bo sɔ, 'Mituĩ miya i mmɔ gbɔgbɔɔgbɔ boba i mi kɔrɛ,' ne boaya i ngbegɔ boɣɛ fiɛ boibakɛlɛ ma kɔrɛ.¹⁰Ɣɛɛ si maɣɛ sɔ, 'Miya miba bo kɔrɛ,' ne boaya bokɛlɛ, alasɔ ne loaɖe ikparĩ sɔ Bosate ɔɔsu ma ɔpia i bo nrɔɔ̃ ame ne."

¹¹Ne ɔso ma inyɔ ɔɖuɖu ɔtã ma Filistise makpakpɛ̃dze i kasɛkɔ̃ ɔnya ma. Ne ma Filistise ɔɣɛ sɔ, "Nyɔ, ma Hebrise to makpɛ̃ i karɔ̃ mabɔrɛ i awo wa ame mawɛrɛ."¹²Ne ma Filitise makpakpɛ̃dze i kasɛkɔ̃ ɔkpere Yonatan gu ɔ̃ akpirasarãdze sɔ, 'Miya miba i bo kɔrɛ si boate mi iwola."
Ne ɔso Yonatan ɔɣere ɔ̃ akpirasarãdze sɔ, "Ya ba siai me i kama lo; Bosate ɔɔsu ma ɔpia i Israel nrɔɔ̃ ame."

¹³Yonatan ɔya ala nrɔɔ̃ gu ngba ɔkɛlɛ kato, fiɛ ɔ̃ akpirasarãdze ɔ̃ ɔsiai wũ i kama pɛɛ. Yonatan ɔbo i ma Filistise iso marɔ̃ ne ɔ̃ akpirasarãdze ɔsiai ɔɖoe ma.¹⁴Yonatan gu ɔ̃ akpirasarãdze ɔɖoe ma Filistise mkpakpɛ̃dze sinyɔ i kakpã ɖeakatɔ̃ ame i ngbegɔ loafɔ lɛ iwɛ̃ inyɔ.

¹⁵Ifɔ̃ ɔmɔɛ̃ makpakpɛ̃dze ɔɖuɖu - mma i kasɛkɔ̃ gu mma mpia i karɔ̃ iso, gu mma nto madzuɛ̃ i kasɛkɔ̃ gu akuri wa nto ata abo ayu maturi ara ɔluwɛ̃ - ne karɔ̃ ɔti. Ɣaa losese ifɔ̃ siare nɛgbe.

Israel Mabi Ɔɖe Ma Filitise Iso

¹⁶Saul marɛrɛ̃ ma nto madzuɛ̃ i Gibea i Benyamin karɔ̃ ame ɔnya ma Filistise to matere i iwɛrɛ ame makɛlɛ kasɛ biara isɛ.¹⁷Ne Saul ɔɣere marɛrɛ̃ ma lowegu wũ sɔ, "Mika makpakpɛ̃dze si botsue mma nna i bo kɔrɛ." Gɔ maka ma ne, manya sɔ Yonatan gu ɔ̃ akpirasarãdze na i mmɔ.

¹⁸Saul ɔɣere Axiya sɔ, "Su Ɣaa ndamu aɖaka bɔ." (Ɔwi wɔmɔ ame ne ase i Israel mabi kɔrɛ.)¹⁹Ɔwi wɔ i Saul to ɔɖegu sɔrɛdze ika ne, ma Filistise ikpɔkpɔtɔ ɔkɛlɛ katɔ̃ ibua iledza ibua i ma kasɛkɔ̃. Ne ɔso Saul ɔɣere sɔrɛdze sɔ, "Ɖi fɔ kɔrɔ̃ i kame."

²⁰Ne Saul gu ɔ̃ marɛrɛ̃ ɔsakanya fiɛ makɛlɛ kakpã ne. Manya sɔ ma Filistise ɔkpɔkpɔtɔ pelepele, mato maɖoɖoe so ku apɛmi.²¹Ma Hebrise mawɛ̃ ma loɔwegu ma Filistise mafegu fiɛ maɔsiai ma makɛlɛ ma kasɛkɔ̃ ne, mapɛ mafiriki marui makɛlɛ Israel mabi ma mpiagu Saul gu Yonatan kɔrɛ.²²Ɔwi wɔ i Israel mabi ɔɖuɖu ma loɔwɛrɛ i Efrayim kabemi karɔ̃ ame ɔnɔ sɔ ma Filistise ka mato marui matere ne, ma wũ mabua i kakpã ame matere masiai ma Filistise teteree.²³Ne ɔso Bosate ɔɖi Israel kaɖe ku iyi nɛmɔ, makpɛ̃ kakpã isɛ iabo Bet-Aven ɔmagɛ̃ gu kama.

Yonatan Ɔti Maɣendu Ɔɣa

²⁴Kiniɔ ne Israel makpakpɛ̃dze ɔwe i imɔrɛ̃ siare ame ku ikpɛnɛ nɛmɔ, alasɔ Saul ɔɔkã ndamu ɔnyi maturi ɔɣere ma sɔ, "Sigbarĩ si siba ɔrere wɔ loaɖe ara fiɛ kutsuɛ aaɣo, fiɛ loati wũ matsirise kuso!" Ne ɔso Israel makpakpɛ̃dze kuwɛ̃ iiɖe aɖera kuawɛ̃.

²⁵Makpakpɛ̃dze ɔɖuɖu ɔba maabo ipo ame ne manya kuɣesɛi fere i karɔ̃.²⁶Gɔ mabo i ipo ame ne manya maɣendu to mibɔrɛ, ɣɛɛ kuwɛ̃ iiti ɔɣa, alasɔ mato manigã ndamu.²⁷Ɣɛɛ Yonatan iinɔ sɔ ɔ̃ ɔse ɔkã ndamu ɔnyi maturi, ne ɔso ɔsu ɔ̃ ɔsɛdziri inyaĩ ɔpia i kaɣesɛi ame. Ɔsu kɔrɔ̃ ɔnyɛ maɣendu ɔpia i kanya ame, kere ne ɔna ɔle ne.²⁸Kere ne makpakpɛ̃dze ɔwɛ̃ ɔɣere wũ sɔ, "Fɔ ɔse ɔkã ndamu teteree ɔnyi makpakpɛ̃dze ɔɣɛ sɔ, ' Sigbarĩ si siba ɔrere wɔ loaɖe ara nɔme!' Ne ɔso i maturi ɔɔfɛ̃ ne."

²⁹Yonatan ɔɣɛ sɔ, "Tete ɔbɔ imɔrɛ̃ i kaɖe iso. Nyɔ kumɛgɔ lona ɔle gɔ lonɛ maɣendu mɛgbe kɛkɛĩ.³⁰Tee ibua ilɛ iɖo si marɛrɛ̃ ɔɖe maɖe ara wa mamɔɛ̃ i kakpã mabɔrɛgu i ma matsirise kɔrɛ nɔme. Tee maɖoe ma Filistise makpakpɛ̃dze gbodzoo mabua."

³¹Ikpɛnɛ nɛmɔ gɔ Israel mabi ɔɔkpɛ̃ kakpã mata i Mixmas ikɛlɛ Ayalon fiɛ maɔɖe ma Filistise iso ne, so ɔɔtu ma.³²Ne ɔso mata mabo i ara wa mamɔɛ̃ i kakpã ame, masɛsɛ̃ masɛrɛ gu manantsuĩ gu manantsuĩ abi mafere i karɔ̃ fiɛ mawe ma ku ima.³³Ne ɔwɛ̃ ɔɣere Saul sɔ, "Nyɔ, maturi ka mato mabara ikpi i Bosate iso gɔ mato mawe sina dzɛ ame ima pia."
Saul ɔɣɛ sɔ, "Miiɖe ɔnukuare mitã Bosate, mimeledza ita siare mibɔ i ngbe ɔluwɛ̃!"³⁴Ne Saul ɔɣɛ sɔ, "Mikɛlɛ maturi ndɛ̃ si miɣere ma sɔ, 'Mi ɔbiara si ɔsu ɔ̃ masɛrɛ gu manantsuĩ ɔbɔ me, miɖoe ma si miwe ma i ngbe. Midaabara ikpi i Bosate iso gɔ miawe sina dzɛ ima pia i kame.' "
Ne ɔso ɔbiara ɔsu ɔ̃ nantsuĩ ɔbɔ ne maɖoe ku kasɛ̃ gamɔ.³⁵Ne Saul ɔpɛ isɔrɛkasege ɔtã Bosate ne loɖe ɔkpɛ ɖeakatɔ̃ ɔbara kumɛɔ.

³⁶Saul ɔɣere ɔ̃ makpakpɛ̃dze sɔ, "Mitã bokɛlɛ boata kakpã i ma Filistise iso ku kasɛ̃ si bomɔɛ̃ ma ara, boibatã ma kuwɛ̃ ɔkuti ɔwe ngbã."
Matã wũ mmuai sɔ, "Bara nnɛ anya sɔ ilɛ iɖo."
Ɣɛɛ sɔrɛdze ɔɣɛ sɔ, "Mitã bokarɛ Ɣaa bonɔ i ngbe."

³⁷Ne ɔso Saul ɔkarɛ Ɣaa sɔ, "Lota kakpã i ma Filistise iso? Ato aasu ma apia i Israel mabi nrɔɔ̃ ame?" Ɣɛɛ Ɣaa iitã mmuai ku iyi nɛmɔ.

³⁸Ne ɔso Saul ɔɣɛ sɔ, "Mi ma nɖe makpakpɛ̃dze matɔ̃ɖedze ɔɖuɖu ne miba i ngbe, mitã bodzuĩ sɔ mme ikpi ɔrere ɔbara ku nɔme.³⁹Lokã sɔ, ayi kumɛgɔ i Bosate wɔ nsɛ ɔɖi Israel si ngbã ne, nwɔ loɣɛrɛ ne ɔkpi kotoo ɔ̃akpi, nane si wũ ɔbibirɛrɛĩ Yonatan ɔɖe kɔraa ikote sɔ ɔ̃akpi." Ɣɛɛ kuwɛ̃ iiɣɛ kuira.

⁴⁰Ne Saul ɔɣere Israel makpakpɛ̃dze ɔɖuɖu sɔ, "Miya i kasɛ gamɔ isɛ; si bo gu wũ ɔbi Yonatan si boya i kasɛ gagbe."
Ne makpakpɛ̃dze ɔtã wũ mmuai sɔ, "Bara nnɛ anya sɔ ilɛ iɖo."

⁴¹Ne Saul ɔkparamakayi ɔtã Bosate, Israel Ɣaa sɔ, "Tã me mmuai sɛɛ. Kareremi ɔte sɔ Saul gu ɔ̃ ɔbi Yonatan loɣɛrɛ, gɔ makpakpɛ̃dze ɔɖe ibɛ.⁴²Ne Saul ɔɣɛ sɔ, "Mibara kareremi i bo gu wũ ɔbi Yonatan ndɛ̃." Ne kareremi ɔmɔɛ̃ Yonatan ne.

⁴³Ne Saul ɔɣere Yonatan sɔ, "Ɣere me nnɛ abara."
Ne ɔso Yonatan ɔɣere wũ sɔ, "Losu wũ ɔsɛdziri inyaĩ lopia i maɣendu ame lonyɛ kɛkɛĩ loɣa. Ne ikote sɔ ka loakpi kiniɔ?"

⁴⁴Ne Saul ɔɣere wũ sɔ, "Aĩ, Ɣaa si ɔkpadzɛ̃ me kutsue, si ɔkpadzɛ̃ me teteree, si aikpi, Yonatan."

⁴⁵Ɣɛɛ makpakpɛ̃dze ɔɣere Saul sɔ, "Yonatan wɔ lotã Israel iɖi siare nɛgbe aakpi? Kuiyikuiyi! Bokã sɔ ayi kumɛgɔ i Bosate si ngbã ne, nane kawɛrɛĩ iibakpase kabɔrɛ i ɔ̃ iti iso. Alasɔ Ɣaa lobuai wũ i nnɛ ɔbara nɔme ame. Ne ɔso makpakpɛ̃dze ɔfɔ Yonatan gɔ ɔ̃isikpi.

⁴⁶Ne Saul ɔnyua ma Filistise kama iti ne makpese makɛlɛ ma mɔmɔ karɔ̃ ame ne.

Saul Sigaraiɖe

⁴⁷Gɔ Saul ɔkpese Israel igara kama ne, ɔkpɛ̃gu ɔ̃ matsirise i kasɛ biara iso: ma Moabse, ma Amonse, ma Edomse, Zoba magara gu ma Filistise. Kakɔi biara ga ɔkpɛ̃ kakpã ne ɔɖeiso.⁴⁸Ɔkpɛ̃ teteree ɔɖe ma Amalekse iso fiɛ ɔɖi Israel kaɖe ɔbɔrɛgu i mma loɔmɔɛ̃ ma ara mafɔ nrɔɔ̃ ame.

⁴⁹Saul mabibirɛrɛĩ loɖe Yonatan, Isvi gu Malki-Sua. Ɔ̃ ɔbibirɔ̃gomi kpakpare loɖe Merab fiɛ kosore loɖe Mixal.⁵⁰Ɔ̃ ɔre loɖe Axinoam, ɔɖe Aximaz ɔbibirɔ̃gomi. Ɔ̃ makpakpɛ̃dze ɔkpakpa ɔɖe Abner wɔ loɖe Ner ɔbibirɛrɛĩ, Ner loɖe Saul ɔ̃ ɔse ɔnyiibirɛrɛĩ.⁵¹Saul ɔ̃ ɔse Kis gu Abner ɔ̃ ɔse Ner ne, Abiel mabibirɛrɛĩ maɖe.

⁵²Saul ngbã ayi ɔɖuɖu ame ne ɔkpɛ̃gu ma Filistise kakpã teteree. Ne ɔso ɔwi ɔrere wɔ i Saul ɔnya ɔturi wɔ mba ɔle ku kagbegbe ne ɔsɛ ɔfɔ wũ ɔpia i ɔ̃ makpakpɛ̃dze ikuri ame.

The Seed Company

https://app.library.bible/content/86f4bd306e059174