1 SAMUEL13
Samuel Ɔnyagalagu Saul
1Saul ɔfɔ akɔ sitɛ̃ fiɛ ɔkpese igara, ne ɔɖe sigara i Israel akɔ sina-anyɔ.2Ɔwi wɔ i Saul ɔɔɖe sigara akɔ anyɔ i Israel ne ɔɖi marɛrɛ̃ kukpi kutɛ ɔbɔrɛgu i Israel makpakpɛ̃dze ame. Ne maturi kukpi kunyɔ ɔwe i ɔ̃ kɔrɛ i Mixmas i Betel kabemi karɔ̃ iso fiɛ kakpi kawɛ̃ ɔwe i Yonatan kɔrɛ i Gibea i Benyamin karɔ̃ iso. Marɛrɛ̃ tsɔra ne ɔkpesera me ɔsese kaa.3Yonatan ɔta kakpã i ma Filistise makpakpɛ̃dze kasɛkɔ̃ iso i Geba, ne ma Filistise ɔnɔ ne. Ne Saul ɔtã mapɛ kakpã pirindo maki i karɔ̃ iso maɣɛ sɔ, "Mitã ma Hebrise si manɔ!"4Ne ɔso Israel mabi ɔɖuɖu ɔnɔ sɔ, "Saul ɔɔta kakpã i ma Filistise kasɛkɔ̃ iso, fiɛ kiniɔ ne ma Filistise ɔɔtsiri Israel mabi teteree." Ne ɔso maturi ɔta makɛlɛ masɛ maabara mawɛ̃ ku Saul i Gilgal.5Ma Filistise ɔsakanya gɔ maakpɛ̃gu Israel mabi. Ma Filistise ɔwe kubore kukpi kutɛ, kubore makãdze kukpi kukuɔ, fiɛ makpakpɛ̃dze ma nsɛ i ngbã iso ɔsi gbodzoo lɛ iwarĩ awe. Makɛlɛ masɛ maabara kasɛkɔ̃ i Mixmas, i Bet-Aven kuɣɛ̃kabɔrɛkɔ̃ isɛ.6Gɔ Israel makpakpɛ̃dze ɔnya sɔ maɔbo i imɔrɛ̃ nyanyariã ame fiɛ maɔma mapia i kakɔi ne, matere mawɛrɛ i sikpolo gu awiribi gu ata ndɛ̃ gu awo gu atawo ame.7Kɔraa ne, Hebrise mawɛ̃ ɔwara Yordan ɔwore makɛlɛ Gad gu Gilead karɔ̃ iso.Saul ɔkpese ɔwe i Gilgal, makpakpɛ̃dze ɔɖuɖu ma mpiagu wũ ɔla maɔti maɔkpakpa ku ifɔ̃.8Ɔtuĩ ɔya Samuel ayi akɔdzɛ, lɛ kumɛgɔ ɔsɛ wũ ɔwi ɣɛɛ Samuel iiba Gilgal, ne Saul maturi ɔtsɛ isame ne.9Ne ɔso Saul ɔɣɛ sɔ, "Misu araifɛ̃ isɔrɛ gu isobuɛ asɔrɛ mibɔ me." Ne Saul ɔbara araifɛ̃ isɔrɛ ne.10Kumɛgɔ ame ɔna ɔro isɔrɛ ɔbara kere, Samuel ɔba ɔ̃abo, ne Saul ɔbɔrɛ ɔsɛ ɔ̃aya wũ ne.11Samuel ɔkarɛ sɔ, "Be iɖe abara i ngbe?"
Saul ɔtã mmuai sɔ, "Lonya sɔ maturi to masasame, fiɛ aiba aabo i ɔwi wɔ aɣɛ iso, ne kama ma Filistise ka mato masakanya i Mixmas.12Lobara adzuni sɔ, 'Ma Filistise to maata mabo me iso i Gilgal i ngbe, fiɛ loikarɛ Bosate kusɛkusɛ.' Ne ɔso iɣiɛ me sɔ lobara araifɛ̃ isɔrɛ."13Ne Samuel ɔɣere Saul sɔ, "Abara idzimira, aibara i mmara mɛ i Bosate fɔ Ɣaa ɔtã-ɔ iso. Si ɔbara abara i me iso ne, tee Ɣaa aasɛra fɔ sigarakaɖekɔ̃ i Israel kaɖe ame ɔwi ɔɖuɖu ame.14Ɣɛɛ kiniɔ kumɛgɔ aiwarɛ mmara ne, fɔ sigarakaɖekɔ̃ iisibakɛlɛ katɔ̃. Bosate ɔɔbie ɔrɛrɛ̃ wɔ igbã ɔto ɔɖɔɛ ku ɔtu fiɛ ɔ̃ɔsɛra wũ tɔ̃ɖedze ɔtã ɔ̃ kaɖe, alasɔ aibara i Bosate mmara iso."15Ne Samuel ɔrui i Gilgal ɔkɛlɛ Gibea i Benyamin karɔ̃ iso, ne Saul ɔka makpakpɛ̃dze ma mpiagu wũ ne. Ma kusime ɔɖe lɛ alafa akuɔ awe.
Saul Makpakpɛ̃dze Ɔbo I Imɔrɛ̃ Ame
16Saul gu ɔ̃ ɔbibirɛrɛĩ Yonatan gu makpakpɛ̃dze ma mpiagu ma ɔwe i Gibea i Benyamin karɔ̃ ame. Ma Filistise ɔbara kasɛkɔ̃ i Mixmas.17Mayukukpe akuri ɔbɔrɛ i ma Filistise kasɛkɔ̃ i akuri atɛ ame. Ikuri iwɛ̃ ɔɣo ɔri makɛlɛ kato i Ofra ɔmagɛ̃ isɛ i Sual ibuiti ame.18Ikuri mama ɔkɛlɛ Bet-Xoron isɛ, ne itɛare ɔkɛlɛ Israel kume karɔ̃ i Zeboim Kagbolomi kato ito inyɔ fafuĩ ame.19Ɔwi wɔmɔ ame ne, torese kuwɛ̃ iiwe i Israel karɔ̃ ɔɖuɖu iso. Ma Filistise iitã ɔri sɔ matorese si mawe alasɔ manigã maɣɛ sɔ, "Si iiɖe ngbɔ ne ma Hebrise to maabara apɛmi ɣee afele!"20Ne ɔso Israel maturi ɔɖuɖu ɔsu ma akpuã, awoɖikpuã, nɣɛ gu kunyɔĩ, makɛlɛgu ma Filistise ɔruɛ matã ma.21Akpuã gu awoɖikpuã iruɛ kuɣa ɔɖe sikãfudza kukereme gram fafarana fiɛ nɣɛ gu kutsue iruɛ gu ara miɔmiɔ wa masu makã manantsuĩ ɔɖe sikãfudza kukereme gram ina.22Ne ɔso iyi nɛ kakpã ɔtu ɔpɛ ne, Saul gu ɔbibirɛrɛĩ Yonatan pɛ lowe ipɛmi ɣee ifele; makpakpɛ̃dze ma mpiagu Saul gu Yonatan kuwɛ̃ iiwe wã.23Ma Filistise makpakpɛ̃dze ikuri ɔsɛ makɛlɛ maadzuɛ̃ abebodɛ̃ri i Mixmas.The Seed Company