IBURU2
1Kwuwo ngwɔlɛ, la ki rima ngiri mu apula iyi ongbulolo uwu bɔkɔ ki pwa awu kaa la ki lafya la ɔgwuzɛ ongbulolo mo.2Ɛlɔgbulɔ iyi bɔkɔ alɔgbulɔ umba Ukpo o zɛ laa asɔkwu nzu, o zɔ yi tee akwu ongbulolo, akwɛyi onzu uwunawuna uwu bɔkɔ a mbwalu yi mo naa e loyi mo mo, aa na inyashi iyi bɔkɔ i fa te la na.3Kwuwo ngwɔlɛ, i wo la ba ki ma inyashi mo gba ki shi egbo mu isama iyɛku ɛlɛ mo? Ɔkwu mafyiwu gba e to keyi mu anu itama iyi isama ɛlɛ le, akwɛyi umba bɔkɔ ɔ pwa wu, ɔ zɔ nzu tee akwu ongbulolo.4Kwuye kwɔngu tete Ukpo e kyo izɔgɔ wu mbala iyamba mu apula iyi amɛ mbala apula iyi izele iwomo mbala rɛshi ishimo ingyi Kwundu uwu Ukpo mate bɔkɔ i she wu.5Ukpo e shi alɔgbulɔ wu ɛsu iyi kwudu ungwepo ungwu kwu yi mu inyɔma ungwu ki siso ngwu ele mo.6Tetete, kyamate o ka mu riyi ingyifo mu Kwokpo ungwu iso iyi Ukpo tee:<<Ukpo, onzu akwu mbɛ bɔkɔ ŋɔ bi egbo wu te;onzu uwu inyi igyi bi ba ŋɔ yese mbaa wu te?7Ŋɔ shi wu kwunzu ungwu kwu ba ungwu alɔgbulɔ ŋɔ mo kwuye bwɛɛ bi;ŋɔ shi wu inzumbɛku mbala igba,8akwɛyi ŋɔ shi wu ɛsu iyi kiya ingyinangyina.>>Iso iyi Ukpo i zɔ tee <<Ukpo e shi wu ɛsu iyi kiya ingyinangyina>>; ɛlɛ ikyo kiya ingyinangyina. Kinzu ba ki ma wu te akwu ɔsu uwu kiya ingyinangyina kekelele mo.9Kinzu ba ki ma Ɔzhizɔsi, uwu o shi wu kwunzu ungwu kwu ba ungwu alɔgbulɔ umba Ukpo mo iyi kwuye bwɛɛ, kaa kwuwongu esheshi iyi Ukpo, le kpomo kwuwongu uwewe. Kekelele ki ma o shi wu inzumbɛku mbala igba kwuwongu lukwu undu bɔkɔ e kpo.10I sheshi bɔkɔ Ukpo, uwu bɔkɔ e wo akwɛyi a ra la apula iyinayina le awu, tee le shi Ɔzhizɔsi la nyɔlɔma mu ɔgwuzɛ uwu inyashi imama, kaa le bo la enzu gyɔɔ kaa lo fya inzumbɛku wu. Moo akwu Ɔzhizɔsi gba a ka mba la isama le.11Uwu gba a wulu enzu ma sɛsɛsɛ mu ingbomo mbo le. Uwu, uwu bɔkɔ a wulu enzu ma sɛsɛsɛ mbala umba bɔkɔ o wulu mba ma sɛsɛsɛ awu, o yi Ada kyaa. Inyi gba i shi Ɔzhizɔsi e wo lovya iyi a ya mba tee ɛmanyi wu mo le.12A za la Ukpo tee,<<Imi mi so ɛmɛnɛ mi iyi bɔkɔ ŋɔ wo;mii du ŋɔ ma kwuyengwu ɛlikpalama mba.>>13E kyo a zɔ tee, <<Imi mi wɛlɛ mu Ukpo.>> A gba a zɔ kpɔ tee, <<Imi mi ŋɔ le mbala ɛmɛ umba bɔkɔ Ukpo e shi mi.>>14Kwuwongwu enzu umba Ɔzhizɔsi a ya mba ma le akwu umba ivye iyɛnwu mbala ɛnzhi, Ɔzhizɔsi mafyi wu a vindɔ onzu akwɛyi e yi kyamate umba tayi . E wo ɛlɛ te kaa Onzu uwoyi, uwu e yi ekpasu mu lukwu awu, la ngbɛwu ɛdɔ ma,15akwɛyi mu ɔgwuzɛ ɔlɛ, a wa la umba bɔkɔ o yi kyamate enye tayi kwuwongu o wiyi iyi lukwu awu ma.16Moo i ta kwudu ndundu te akwu alɔgbulɔ umba Ukpo gba aa mbwa mba ma le mo, akwu ɛdɔ iyi Aburamu gba aa mbwa mba ma le.17Kwuwo kwɔlɛ, akwu mɛga te le yi kyamate ɛmanyi wu mu ɔgwuzɛ uwunawuna tayi, kaa la kwu Oboshi Uwakɔ mba uwu e yi eyembembyi mbala uwu bɔkɔ o fulo idu ma wu mu ɛduma wu iwomo la Ukpo kaa lo gba la ingbomo iyi enzu lo kpa mba.18Uwu e do te a mbwama la umba bɔkɔ ɔ pwa mba ma, kwuwongu uwu mafyiwu a ma inyashi tete kwuyengwu bɔkɔ o pwa wu ma awu.
The Word for the World International