Mateo12
Hejɔɔmi Ligbi ɔ he sane
1Jamɛ a be ɔ mi ɔ, Yesu kɛ e kaseli ɔmɛ ya gu blɛfo ngmɔ komɛ a mi ngɛ Hejɔɔmi Ligbi ɔ nɔ. Hwɔ ngɛ e kaseli ɔmɛ yee nɛ a bɔni blɛfo ɔmɛ kpɔmi ngɛ kpee.2Benɛ Farisi bi ɔmɛ a kpɛti ni komɛ na mɛ ɔ, a bua jɔɛ nɛ a de Yesu ke, “O nɛ, o kaseli ɔmɛ ngɛ mlaa a nɔ tɔe. A ngɛ ni kpae ngɛ Hejɔɔmi Ligbi ɔ nɔ.”3Se Yesu ha mɛ heto ke, “Anɛ nyɛ kane we nɔ nɛ Matsɛ David pee benɛ hwɔ ngɛ e kɛ e huɛ ɔmɛ yee ɔ lo?4Bɔ nɛ e sɛ Mawu we ɔ nɛ e kɛ e huɛ ɔmɛ ya ye abolo nɛ a kɛ sã bɔ ha Mawu, nɛ e dɛ blɔ kaa nɔ ko yeɔ, ja osɔfo ɔmɛ pɛ ɔ? David hu pee nɔ nɛ dɛ blɔ.5Aloo nyɛ kane we ngɛ Mose mlaa amɛ a mi kaa osɔfo nɛ ngɛ sɔmɔe ngɛ Sɔlemi We ɔ tsuɔ ni ngɛ Hejɔɔmi Ligbi ɔ nɔ lo?6Anɔkuale nɛ i ngɛ nyɛ dee ke, nɔ ko ngɛ hiɛ ɔ nɛ pa Sɔlemi We ɔ.7E ji nyɛ nu Mawu Munyu ɔ nɛ deɔ ke, ‘Mɔbɔ nɛ nyɛ maa na nihi ɔ he hia mi pe nyɛ bɔ sami’ ɔ sisi jinɛ nyɛ be nihi nɛ pee we fɔ yemi nɔ ko ɔ fɔ bue.8Ejakaa Nɔmlɔ Bi ɔ ngɛ Hejɔɔmi Ligbi ɔ tete nɔ he wami.”9Jehanɛ ɔ Yesu ya sɛ kpe he ɔ,10nɛ e na nyumu ko nɛ e nine kake gbo. Kɛkɛ nɛ Farisi bi ɔmɛ bi lɛ ke, “Anɛ e da blɔ kaa a tsaa hiɔtsɛ ngɛ Hejɔɔmi Ligbi ɔ nɔ?” A bi lɛ enɛ ɔ, ejakaa a le kaa Yesu maa kplɛɛ nɔ konɛ a da nɔ kɛ po e nya.11Se Yesu na a susumi ɔ nɛ e bi mɛ ke, “Ke nyɛ ti nɔ ko ngɛ to kake too, nɛ e ya nɔ vu mi ngɛ Hejɔɔmi Ligbi ɔ nɔ ɔ, anɛ e ya be lɛ jee ngɛ jamɛ a ligbi ɔ nɔ lo?12Anɛ nɔmlɔ he jua wɛ pi to lo? E da kaa a peeɔ kpakpa ngɛ Hejɔɔmi Ligbi ɔ nɔ.”13Kɛkɛ nɛ e de hiɔtsɛ ɔ ke, “Mo kpa o nine ɔ mi!” Nɛ benɛ nyumu ɔ kpa e nine ɔ mi ɔ, e na he wami.14Se Farisi bi ɔmɛ na e he abofu, nɛ a tsɛ kpe konɛ a da enɛ ɔ nɔ nɛ a nu lɛ nɛ a gbe lɛ.15Se Yesu le ga nɛ a ngɛ toe ɔ, ja a he je ɔ, e je kpe he ɔ nɛ nihi fuu nyɛɛ e se; nɛ e tsa hiɔtsɛhi kulaa nɛ ngɛ a kpɛti ɔ.16Nɛ e bɔ mɛ kɔkɔ ke a ko ha nɛ nɔ ko nɛ nu e nyakpɛ ni tsumi ɔmɛ a he.17Nɛ enɛ ɔ ba mi kaa bɔ nɛ Gbalɔ Yesaia de ɔ ke,18“O nɛ, ye tsɔlɔ nɛ i hla a. Lɛ ji ye suɔmi Bi nɛ i naa e he tsui. Ma ngɔ ye mumi ɔ kɛ wo e mi, nɛ lɛ ji nɔ nɛ maa fiɛ ye kojomi ɔ ha je ɔ tsuo.19E be pɛe nɛ e be ngmlaa kpae hulɔ, nɛ nɔ ko be e gbi nue ngɛ magbɛ nɔ.20E be gbɔjɔlɔ ɔ hɛ mi kpatae; e be hɛ nɔ kami bɔbɔyoo gbee; nɛ e kɛ e nyagbe kunimi yemi ɔ maa gu nya tsɔmihi kulaa.21Nɛ e biɛ ɔ maa pee hɛ nɔ kami nɔ kɛ ha je ɔ tsuo.”22Kɛkɛ nɛ a kɛ nyumu ko nɛ mumi yayami ngɛ e mi nɛ e hyɛ we nɔ nɛ e tui munyu hulɔ ba Yesu ngɔ nɛ e tsa lɛ, nɛ e bɔni nɔ hyɛmi kɛ munyu tumi.23Nɛ ma asafo nɛ ngɛ lejɛ ɔ nya kpɛ a he nɛ a bi ke, “Anɛ tsa pi David bi ɔ ji nɛ ɔ lo?”24Se benɛ Farisi bi ɔmɛ nu nyakpɛ hiɔ tsami nɛ ɔ he ɔ, a de ke, “E hiaa mumi yayami ngɛ nihi a mi ejakaa mumi yayami ɔmɛ a tsɛ ji lɛ nitsɛ.”25Se akɛnɛ Yesu na a juɛmi ɔmɛ he je ɔ, e de mɛ ke, “Matsɛ yemi fɛɛ matsɛ yemi nɛ tee si kɛ woɔ lɛ nitsɛ e he ɔ, e ywiaa; ja a nɔuu nɛ ma tsuaa ma loo we tsuaa we nɛ tee si kɛ woɔ lɛ nitsɛ e he ɔ, e bɔɛ.26Nɛ ke Abosiami hia Abosiami ɔ, lɛɛ e gba ta kɛ wo lɛ nitsɛ e he nɛ e matsɛ yemi ɔ be si dae.27Ja a he je ɔ, ke Abosiami he wami nya i hiaa mumi yayami ngɛ ɔ, lɛɛ mɛni he wami nyɛ nyɛmi ɔmɛ kɛ hiaa mɛ mɔ? Nyɛ bi mɛ nɛ a ha nyɛ nya pomi nɛ ɔ heto.28Se ke Mawu Mumi ɔ he wami nya i hiaa mumi yayami ɔmɛ ngɛ ɔ, lɛɛ Mawu Matsɛyemi ɔ ba su nyɛ ngɔ.29Nɔ ko be he walɔ we mi nyɛe maa sɛ nɛ e ya ju e níhi, ja e fi he walɔ ɔ kekle loko e ma nyɛ e we ɔ mi sɛmi.30Nɔ nɛ be ye blɔ fa mi ɔ, e te si kɛ wo mi, nɛ nɔ nɛ kɛ mi bua we nya a, e ngɛ gbɛe kɛ ngɛ fiae.31I ngɛ nyɛ dee ke nɔ tsuaa nɔ nɛ maa pee yayami ko aloo e maa tu musu bɔmi munyu ko kɛ si Nɔmlɔ Bi ɔ, a ma ngɔ ke lɛ,32se nɔ nɛ maa tu musu bɔmi munyu ko kɛ si Mumi Klɔuklɔu ɔ, lɛɛ a kɛ be lɛ kɛ e ngɛ je nɛ ɔ mi aloo je nɛ maa ba a mi.33Tso kpakpa woɔ yiblii kpakpa, nɛ tso yaya hu woɔ yiblii yaya, ejakaa tso e yiblii nɛ a kɛ leɔ e mi tso.34Nyɛ sinɔhi a bimɛ! Kɛ maa pee kɛɛ nɛ nyɛ nɛ nyɛ ji yayami peeli ɔ, nyɛ maa tu munyu kpakpa kɛɛ? Ejakaa bɔ nɛ nɔmlɔ tsui ngɛ ha a, ja nɛ e munyu tumi hu ngɛ.35Nɔmlɔ kpakpa tuɔ munyu kɛ jeɔ juɛmi kpakpahi nɛ ngɛ e tsui mi kpo, nɛ nɔmlɔ yayami hu tuɔ munyu yaya kɛ jee e tsui yaya a mi.36Nɛ i ngɛ nyɛ dee ke, nyɛ maa bu yaka munyu tsuaa yaka munyu nɛ nyɛ tuɔ ɔ he akɔtaa ngɛ Kojomi Ligbi ɔ nɔ.37Enɛ ɔ he je ɔ, nyɛ munyu tumi ɔmɛ tsɔɔ kojomi nɛ nyɛ ma na hwɔɔ se, kaa a maa bu nyɛ bemi aloo a maa bu nyɛ fɔ.”Farisi bi ɔmɛ ngɛ okadi hlae
38Ligbi ko ɔ, Yuda bi ɔmɛ kɛ Farisi bi ɔmɛ a hɛ mi nyɛɛli ɔmɛ a ti ni komɛ ba Yesu ngɔ ba bi lɛ nɛ e pee okadi kɛ tsɔɔ mɛ nɛ a hyɛ.39Se Yesu ha mɛ heto nɛ e de ke, “Yi nɔ bi yayamihi kɛ gba puɛli ngɛ okadi hlae se a be mɛ okadi kpa ko tsɔɔe ja Gbalɔ Yona okadi ɔ pɛ.40Kaa bɔ nɛ Yona hi lo agbo ɔ muklii mi nyɔ kɛ pia ligbi etɛ ɔ, ja a nɔuu nɛ Nɔmlɔ Bi ɔ maa hi zugba a muklii mi nyɔ kɛ pia ligbi etɛ.41Ninive bi ɔmɛ maa te si kɛ wo nyɛ yi nɔ bi nɛ ɔmɛ ngɛ kojomi ɔ mi nɛ a maa bu nyɛ fɔ, ejakaa a bu Yona fiɛmi ɔ tue nɛ a kpale ngɛ a yayami ɔmɛ a se; nɛ o nɛ, nɔ nɛ pe Yona ngɛ hiɛ ɔ amlɔ nɛ ɔ, se nyɛ he we lɛ yi.42Woyi je loo Seba Manyɛ ɔ maa te si kɛ wo nyɛ yi nɔ bi nɛ ɔmɛ ngɛ kojomi ɔ mi nɛ e maa bu nyɛ fɔ, ejakaa e hia blɔ kɛ je tsitsaa lokoo kɛ ba bu Salomo ni lemi ɔ tue; se nɔ nɛ kle pe Salomo ngɛ hiɛ ɔ nɛ nyɛ he we lɛ yi.43Yi nɔ yayami nɛ ɔ ngɛ kaa nɔ ko nɛ mumi yayami ngɛ e mi. Ejakaa ke mumi yayami je nɔ ko mi nɛ e ya nyɛɛ he gbigblihi kɛ hla he jɔɔmi se e nɛ eko ɔ,44e deɔ ke, ‘Ma kpale ye se kɛ ya he nɛ i je ɔ’. Nɛ ke e kpale kɛ ba a, e ba naa kaa nɔ ɔ tsui mi tɛ falefale nɛ nɔ ko be mi.45E yaa nɛ e ya tsɛɔ mumi yayamihi kpaago nɛ pe lɛ ngɔ piɛɔ e he nɛ a ba sɛɔ e mi nɛ a hii lejɛ ɔ, nɛ jamɛ a nɔmlɔ ɔ plɛɔ nɔmlɔ yayami pe kekle ɔ.”46Benɛ Yesu ngɛ asafo ɔ munyu tue ɔ, o nɛ, e nyɛ kɛ e nyɛmimɛ ɔmɛ ba da agbo ɔ nya nɛ a ngɛ hlae nɛ a kɛ lɛ nɛ tu munyu.47Se benɛ nɔ ko ya de lɛ ke e nyɛ kɛ e nyɛmimɛ ɔmɛ daa si ngɛ agbo ɔ nya a,48e he nɔ ke, “Mɛnɔ ji ye nyɛ, nɛ mɛnɔmɛ hu ji ye nyɛmimɛ ɔmɛ?”49Kɛkɛ nɛ e tsɔɔ e kaseli ɔmɛ nine nɛ e de ke, “Hyɛ, ni nɛ ɔmɛ ji ye nyɛ kɛ ye nyɛmimɛ.50Ejakaa nɔ tsuaa nɔ nɛ peeɔ ye Tsɛ nɛ ngɛ hiɔwe ɔ suɔmi nya ni ɔ, lɛ ji ye nyɛminyumu kɛ ye nyɛmiyo kɛ ye nyɛ!”Biblica, Inc.