Mateo11
Yesu wo Yohane he wami
1Benɛ Yesu to e kaseli nyɔngma kɛ enyɔ ɔmɛ blɔ nya ta a, e je lejɛ ɔ ya tsɔɔ ni nɛ e fiɛ ngɛ ma amɛ a mi.2Jamɛ a be ɔ mi ɔ, Yohane Baptisilɔ ɔ ngɛ tsu mi, se benɛ e nu nyakpɛ ni tsumihi nɛ Yesu ngɛ tsue ɔ, e tsɔ e kaseli ɔmɛ kɛ ba Yesu ngɔ nɛ a ba bi lɛ ke,3“Anɛ mo ji nɔ nɛ ma a, aloo waa hyɛ nɔ kpa blɔ?”4Nɛ Yesu ha tsɔli ɔmɛ heto ke, “Nyɛɛ kpale nɛ nyɛ ya de Yohane nyakpɛ níhi nɛ nyɛ ba na nɛ i ngɛ pee ɔ. Lɔ ɔ ji kaa,5nihi nɛ a hɛ yu ɔ ngɛ nɔ hyɛe, nihi nɛ ku pue si ɔ ngɛ nyɛɛe; kpititsɛmɛ a he ngɛ tsɔe, tue kpokutsɛmɛ ngɛ nɔ nue, nɛ ni gbogboehi ngɛ si tee; nɛ nyɛ de lɛ hu kaa i ngɛ Manye Munyu ɔ fiɛe kɛ ngɛ ohiafohi tsɔɔe.6A gbaa nɔ tsuaa nɔ nɛ e juɛmi pee we lɛ sikɔsikɔ ngɛ ye he ɔ.”Yohane he odase yemi
7Benɛ Yohane kaseli ɔmɛ je se ɔ, Yesu bɔni Yohane he munyu tumi kɛ ngɛ asafo ɔ tsɔɔe. Nɛ e bi mɛ ke, “Benɛ nyɛ ho nɛ nyɛ ya hyɛ Yohane ha ngɛ nga a nɔ ɔ, kɛ nyɛ susu kaa e maa hi kɛɛ? Gla nɛ kɔɔhiɔ ngɛ lɛ fiae lo?8Aloo nyɛ susu nɛ nyɛ maa na nɔ ko nɛ wo tade wuyaa kaa matsɛbi ngɛ matsɛ we mi lo?9Aloo Mawu gbalɔ lo? Ee, i ngɛ nyɛ dee ke, e pe gbalɔ tete.10Ejakaa Yohane ji nɔ nɛ he nɛ a ngma ngɛ ke e maa sɛ ye hlami nɛ e ba fiɛ ye bami ɔ nɛ e dla blɔ ɔ ngɔ to mi ɔ nɛ.11Anɔkuale munyu nɛ i ngɛ nyɛ tue ke, ngɛ nihi nɛ yihi fɔ ɔmɛ a kpɛti ɔ, a ti nɔ ko be nɛ pe Yohane Baptisilɔ ɔ; se kɛ ɔ, nɔ nɛ ji nyafii pe kulaa ngɛ Mawu Matsɛyemi ɔ mi ɔ pe lɛ.12Nɛ kɛ je be nɛ Yohane bɔni fiɛmi kɛ nihi baptisimi kɛ ba si amlɔ nɛ ɔ, nihi babauu bɔni Hiɔwe Matsɛyemi ɔ he pleemi,13ejakaa mlaa amɛ kɛ gbali ɔmɛ tsuo ngɛ Yiwamihelɔ ɔ blɔ hyɛe kɛ ba su be nɛ Yohane ba.14Nɛ ke nyɛ suɔ kaa nyɛ ma he a munyu ɔ ye ɔ, lɛ ji Elia nɔ nɛ gbali ɔmɛ de ke e maa ba a nɛ.15Nɔ nɛ ngɛ tue nɛ e ke maa nu ɔ, e nu.16I li nɔ nɛ he nɛ ma ngɔ yi nɔ bi nɛ ɔmɛ ngɔ to. A ngɛ kaa jokuɛwi nɛ ngɛ fiee ngɛ jua nɔ nɛ a ngɛ huɛmɛ dee ke,17Wa kpa bɛ nɛ wa wo do, se nyɛ dui; wa je ya, se nyɛ fo we.18Ejakaa Yohane Baptisilɔ ɔ ba hi si nɛ e nui da nɛ e hii ngma nɛ nyɛ de ke, Godotsɛ ji lɛ.19Nɔmlɔ Bi ɔ ba nɛ lɛɛ e yeɔ ni nɛ e nuu da nɛ nyɛ de ngɛ e he ke, ‘Ngma yelɔ kɛ da delɔ nɛ kɛ lapoo tsuli kɛ yayami peeli kpanakuhi bɔɔ.’ Se nyɛ nitsɛmɛ nɛ nyɛ ji ni leli ɔ, nyɛ maa na bɔ nɛ nyɛ munyu ɔmɛ be tɛ kake nɔ ha.”Si womihi ke kpeemi
20Kɛkɛ nɛ Yesu bɔni mahi a nɔ he nɛ e kpa nɛ e tsu nyakpɛ ni ɔmɛ ngɛ ɔ a hɛ mi kami, ejakaa a kpale we ngɛ a yayami ɔmɛ a se. E de mɛ ke,21“Kpoo ha mo, Korazin! Due ha mo, Betsaida! Ejakaa nyakpɛ nihi nɛ i tsu ngɛ nyɛ gbɛjegbɛ ɔmɛ a nɔ ɔ, kaa Tiro kɛ Zidon nɛ i tsu ngɛ jinɛ a kpale ngɛ a yayami ɔmɛ a se momoomo kɛ he piami.22Anɔkuale munyu nɛ i ngɛ nyɛ dee ke, e maa fani ha Tiro kɛ Zidon ngɛ Kojomi Ligbi ɔ no pe nyɛ.23Nɛ mo Kapernaum, ma nɛ a wo o hɛ mi nyami pe kulaa a, a maa ba mo si kɛ maa ya gbeje tɔɔ. Ejakaa nyakpɛ ni tsumihi nɛ i tsu ngɛ o mi ɔ, kaa Sodom i tsu ngɛ jinɛ e ngɛ kɛ ba si mwɔnɛ ɔ.24Anɔkuale, ke Kojomi Ligbi ɔ su ɔ, e be wae ha Sodom kaa mo.”25Kɛkɛ nɛ Yesu sɔle nɛ e de ke, “I ngɛ mo si nae Tsaatsɛ, hiɔwe kɛ zugba Nutsɔ, kaa o ngɔ anɔkuale ni nɛ ɔmɛ ngɔ laa ni nɛmɛ nɛ buu a he ni leli, se o je ngɔ tsɔɔ bimwɔwi.26Tsaatsɛ, ja a nɛ e sa o hɛ mi kaa o pee.”27“Tsaatsɛ ngɔ nɔ fɛɛ nɔ ngɔ wo ye dɛ. Tsɛ ɔ pɛ nɛ le Bi ɔ, nɛ nɔ ko li Tsɛ ɔ, ja Bi ɔ pɛ kɛ nihi nɛ Bi ɔ suɔ kaa e je Tsɛ ɔ kpo ngɔ tsɔɔ ɔ.28Nyɛɛ ba ye ngɔ nyɛ nihi kulaa nɛ pɔ tɔ nyɛ, nɛ nyɛ tlomihi pa nyɛ ɔ nɛ ma ha nyɛ he jɔmi.29Nyɛɛ kase mi nɛ nyɛɛ ngɔ ye subai, ejakaa ye he jɔ nɛ i baa ye he si, nɛ nyɛ klaa amɛ ma na he jɔmi,30ejakaa ye kasemi wɛ, nɛ ye tlomi ɔ hu jii we.”Biblica, Inc.