Luka3
Yohane je e ni tsumi sisi
1Ngɛ Matsɛ Ngua Kaisare Tiberio jeha nɛ ji nyɔngma kɛ enuɔ ngɛ sɛ ɔ nɔ mi ɔ, Zakaria bi Yohane na Mawu sɛ titli ko ngɛ nga a nɔ. Jamɛ a be ɔ mi ɔ, Pilato nɛ ngɛ amlaalo yee ngɛ Yudea; nɛ Herode ngɛ Galilea nɔ yee, nɛ e nyɛmi Filipo hu ngɛ Iturea kɛ Trakoniti nɔ yee, nɛ Lisania ngɛ Abilene nɔ yee.2Hana kɛ Kaiafa ji Osɔfo Nikɔtɔmahi nɛ daa si ngɛ Yuda bi ɔmɛ a nya jamɛ a be ɔ mi.3Nɛ Yohane ngɛ Yordan Pa a e kpo he hiɛ kɛ hiɛ tsuo kpae ngɛ fiɛe ke nɔ tsuaa nɔ nɛ ha nɛ a baptisi lɛ, nɛ lɔ ɔ maa tsɔɔ kaa e ba Mawu ngɔ, nɛ e kpale ngɛ e he yayami ɔmɛ a se, konɛ a ngɔ kɛ pa lɛ.4Kaa bɔ nɛ Gbalɔ Yesaia gba be ko mi lokoo nɛ e de ke, “Gbi ko ngɛ pɛe ngɛ nga a nɔ nɛ e ngɛ dee ke, ‘Nyɛ dla Nutsɔ ɔ blɔ ɔ kɛ ha lɛ nɛ e nyɛɛ nɔ. Nyɛɛ je blɔ dadɛ gbajaa ha lɛ.5Nyɛɛ gbɛ yoku ɔmɛ nɛ nyɛɛ tsi muɔ tsuaa muɔ nɛ blɔ ɔ hɛ mi nɛ da nɛ kɔtɔ nɛ ko hi he ko.6Kɛkɛ ɔ, je ɔ tsuo maa na Yiwamihelɔ ɔ nɛ je Mawu ngɔ kɛ ba a.’ ”7Bɔ nɛ Yohane fiɛ ha nimli asafo nɛ ba e ngɔ nɛ e baptisi mɛ ɔ ji, “Sinɔhi a bimɛ, mɛnɔ de nyɛ ke nyɛɛ tu tue gblami nɛ ma a nya fo?8Ke nyɛ hla we nɛ nyɛɛ ya abosiamihi a je ɔ, lɛɛ nyɛ ha nɛ nyɛ si himi kɛ subai nɛ tsɔɔ kaa nyɛ tsake nyɛ tsui. Nɛ e ko pee nyɛ kaa Abraham bibimibimɛ ji nyɛ mo, nɛ lɔ ɔ he je ɔ nyɛ ye nyɛ he. Lɔ ɔ kɛkɛ hiɛ́. Mawu ma nyɛ bɔ bimɛ kɛ je tɛ nɛ ɔmɛ a mi ngɔ ha Abraham.9Nyɛ nɛ, tue gblami gbiɛ ɔ fɔɔ si ngɛ nyɛ nɔ momo, nɛ a maa poo nyɛ kɛ nyɛ sipoku ɔmɛ ngɔ pue si. Anɔkuale ji kaa tso tsuaa tso nɛ wui yiblii kpakpa a, a maa hɛ lɛ ngɔ fɔ si nɛ a ma sake lɛ kɛ fɔ la mi.”10Ni ɔmɛ ha heto nɛ a bi ke, “Mɛni o ngɛ hlae nɛ waa pee?”11E ha mɛ heto nɛ e de ke, “Ke mo nɔ ko o ngɛ hiɔwe tade enyɔ ɔ, moo ngɔ kake ke ha ohiafo nɛ be eko ɔ; nɛ ke o ngɛ niye ni bɔ nɛ o be nyɛe maa ye ɔ, moo ngɔ eko kɛ ha nɔ nɛ hwɔ ngɛ lɛ yee ɔ.”12Nɛ jua kɛ ma sika tsuli nɛ ji juli kɛ ojo fiali ɔmɛ hu ba Yohane ngɔ nɛ e baptisi mɛ; nɛ a bi lɛ ke, “Kɛ wa maa pee kɛ tsɔɔ kaa wa ngmɛɛ wa yayami ɔmɛ a he kɛɛ?”13E ha mɛ heto nɛ e de mɛ ke, “Nyɛɛ ye anɔkuale; nyɛ ko he sika a pe nɔ nɛ Roma amlaalo ɔ tsɔɔ kaa nyɛ he ɔ.”14Nɛ soja komɛ hu ba Yohane ngɔ nɛ a ba bi lɛ ke, “Nɛ wɔ hu nɛɛ?” Yohane ha heto nɛ e de mɛ ke, “Nyɛ ko fia ojo, nyɛ ko wo he gbeye womi kɛ basabasa peemi kɛ kpɔ sika ngɛ nihi a dɛ. Nɛ nyɛ ko po munyu ngɔ fɔ nɔ ko nɔ; nɛ nyɛ bua nɛ jɔ nyɛ hiɔwo he.”15Jamɛ a be ɔ mi ɔ, nɔ tsuaa nɔ ngɛ Mesia a blɔ hyɛe, nɛ lɔ ɔ he je ɔ, nɔ tsuaa nɔ ngɛ susue nɛ a ngɛ bie ke, “Nɔmlɔ nɛ wa ngɛ blɔ hyɛe ɔ nɛɛ, tsa pi lɛ ji nɛ ɔ lo?”16Yohane ha a sane ɔ heto nɛ e de mɛ ke, “Ami lɛɛ nyu kɛkɛ nɛ i kɛ ngɛ nyɛ baptisie, se nɔ ko ma piɔ nɛ e ngɛ he wami kɛ blɔ nya kulaa pe nɔ nɛ i ngɛ ɔ. Anɔkuale ji kaa i sɛ e tokota nya kpa pinelɔ pohu. Jamɛ a nɔ ɔ lɛɛ la kɛ Mumi Klɔuklɔu ɔ e kɛ maa baptisi nyɛ.17E maa sa ngma a mi nɛ e ma bua niye ni ɔ nya kɛ wo ngmato he ɔ, nɛ e maa sa toto kɛ dudusa a kɛ la nɛ be gboe ligbi ɔ ko.”18Nɛ bɔ nɛ Yohane plɛ kɛ fiɛ Manye Munyu ɔ kɛ wo ni ɔmɛ si ha ji nɛ ɔ nɛ.19Benɛ Yohane ka Herode nɛ ji Galilea amlaalo ɔ hɛ mi ngɛ ma hɛ mi ngɛ e senɔ yo Herodia nɛ e wo ngɔ ɔ, kɛ tɔmi kpahi fuu nɛ e pee ɔ he ɔ, Herode ha nɛ a nu Yohane kɛ wo tsu mi.20Enɛ ɔ hu pee tɔmi kpa nɛ e pee kɛ piɛ e tɔmi ɔmɛ a he.21Ligbi ɔ ko benɛ Yohane baptisi ni ɔmɛ ta a, e baptisi Yesu nitsɛ hu. Nɛ benɛ e ngɛ sɔlee ɔ, kɛkɛ nɛ hiɔwe nya bli,22nɛ Mumi Klɔuklɔu ɔ kple si kaa balahuɛ kɛ ba ma e yi kpɛti nɛ gbi ko de kɛ je hiɔwe ke, “Mo ji ye Binyumu nɛ i suɔ saminya a nɛ, Mo nɛ ye tsui suɔ.”Yesu weku
23Yesu ye maa pee jeha nyingmi etɛ nɛ e bɔni e ni tsumi. A le Yesu kaa Yosef bi, nɛ Yosef tsɛ ji Heli.24Heli tsɛ ji Matat; Matat tsɛ ji Levi; Levi tsɛ ji Melki; Melki tsɛ ji Yanai;Yanai tsɛ ji Yosef.25Yosef tsɛ ji Matatia; Matatia tsɛ ji Amos; Amos tsɛ ji Nahum; Nahum tsɛ ji Esli; Esli tsɛ ji Nagai; Nagai tsɛ ji Maat; Maat tsɛ ji Matatia; Matatia tsɛ ji Semein; Semein tsɛ ji Yosek; Yosek tsɛ ji Yoda; Yoda tsɛ ji Yohanan.27Yohanan tsɛ ji Resa; Resa tsɛ ji Zerubabel; Zerubabel tsɛ ji Shealtiel; Shealtiel tsɛ ji Neri.28Neri tsɛ ji Melki; Melki tsɛ ji Adi; Adi tsɛ ji Kosam; Kosam tsɛ ji Elmadam.29Elmadam tsɛ ji Er; Er tsɛ ji Yoshua; Yoshua tsɛ ji Eliezer; Eliezer tsɛ ji Yorim; Yorim tsɛ ji Matat; Matat tsɛ ji Levi.30Levi tsɛ ji Simeon; Simeon tsɛ ji Yuda; Yuda tsɛ ji Yosef; Yosef tsɛ ji Yonam.31Yonam tsɛ ji Eliakim; Eliakim tsɛ ji Melea; Melea tsɛ ji Mena; Mena tsɛ ji Matata; Matata tsɛ ji Natan; Natan tsɛ ji David.32David tsɛ ji Isai; Isai tsɛ ji Obed; Obed tsɛ ji Boaz; Boaz tsɛ ji Salmon.33Salmon tsɛ ji Nahashon; Nahashon tsɛ ji Aminadab; Aminadab tsɛ ji Admin; Admin tsɛ ji Arni; Arni tsɛ ji Hezron; Hezron tsɛ ji Perez; Perez tsɛ ji Yuda.34Yuda tsɛ ji Yakob; Yakob tsɛ ji Isak; Isak tsɛ ji Abraham; Abraham tsɛ ji Tera; Tera tsɛ ji Nahor.35Nahor tsɛ ji Serug; Serug tsɛ ji Reu; Reu tsɛ ji Peleg; Peleg tsɛ ji Eber; Eber tsɛ ji Shela.36Shela tsɛ ji Kainan; Kainan tsɛ ji Arpakshad; Arpakshad tsɛ ji Shem; Shem tsɛ ji Noa; Noa tsɛ ji Lamek.37Lamek tsɛ ji Metusela; Metusela tsɛ ji Henok; Henok tsɛ ji Yared; Yared tsɛ ji Mahalalel.38Mahalalel tsɛ ji Kainan; Kainan tsɛ ji Enos; Enos tsɛ ji Set; Set tsɛ ji Adam; Adam tsɛ ji Mawu.Biblica, Inc.