Luka2
Yesu fɔmi
1Jamɛ a be ɔ mi nɔuu nɛ Roma Nɔyelɔ nɛ ji Kaisare Augusto gbi ba kaa a kane zugba a mi nimli ɔmɛ tsuo nɛ a le a yi bɔ.2A pee ma nimli a kanemi nɛ ɔ benɛ Kirenio ngɛ amlaalo yee ngɛ Siria.3Nɛ a ha lemi kaa nɔ tsuaa nɔ nɛ e ya e ma mi he nɛ e je ɔ nɛ e ya ngma e biɛ ngɛ lejɛ ɔ.4Akɛnɛ Yosef je Matsɛ David weku ɔ mi he je ɔ, e ba mi kaa e hia blɔ kɛ je Nazaret ngɛ Galilea kɛ ho Betlehem nɛ ji Matsɛ David ma a mi ya ngɛ Yudea nɛ e ya ngma e biɛ ngɛ lejɛ ɔ.5E kɛ Maria nɛ e bi e si nɛ e maa ngɔ, nɛ jamɛ a be ɔ mi e hɔ wa a nɛ a hia blɔ ɔ nɛ.6Benɛ a ngɛ Betlehem ɔ, Maria be su,7nɛ e fɔ e kekle binyumu; nɛ e wo tako kɛ blaa e he nɛ e wo lɛ ngɔ wluɔ lohwehi a niye ni nɔ́ mi, ejakaa a nɛ blɔ ngɛ nibwɔhi a to he ɔ.8Jamɛ a nyɔ ɔ mi ɔ, to hyɛli komɛ ngɛ a tohi hwɔe ngɛ Betlehem nga a nɔ.9Si kake too nɛ a maa hyɛ ɔ, Nutsɔ ɔ bɔfo ko ji nɛ ngɛ a kpɛti. Nɛ Nutsɔ ɔ anunyami ɔ kpɛ kɛ bɔle mɛ nɛ a hɛli si nɛ a ye gbeye.10Se bɔfo ɔ ha mɛ tsui nɛ e de ke, “Nyɛ tsui nɛ ko po, ejakaa i ma nyɛ manye kɛ bua jɔmi munyu titli ko nɛ hine je ɔ tsuo nɔ́ demi.11Kaa mwɔnɛ ɔ, a fɔ Mesia, Yiwamihelɔ nɛ ji Kristo Nutsɔ ɔ ngɛ Betlehem.12Nɛ bɔ nɛ nyɛ maa pee kɛ le e mi tso ji, nyɛ maa na bimwɔyo ɔ nɛ a wo tako ngɔ blaa e he nɛ a wluɔ lɛ si ngɛ lohwehi a niye ni nɔ́ mi.”13E nya nɔɛ si nɛ hiɔwe bɔfohi fuu ba piɛ e he nɛ a ngɛ lae kɛ ngɛ Mawu yi jee ke,14“Anunyami ha Mawu ngɛ hiɔwe lokoo, nɛ tue mi jɔmi nɛ ba zugba a nɔ ha nihi nɛ a ni peemi ni sa e hɛ mi ɔ.”15Benɛ bɔfo ɔmɛ kpale kɛ ho hiɔwe ya a, to hyɛli ɔmɛ de a bi ke, “Nyɛ ha waa ho Betlehem ya ko nɛ wa ya hyɛ nyakpɛ ni nɛ ba nɛ Nutsɔ ɔ ha a ba bɔ wɔ ɔ kɛ wɔ nitsɛmɛ wa hɛ ngmɛ.”16A sa fo kɛ ho ma a mi ya nɛ a ya na Maria kɛ Yosef kɛ bimwɔyo ɔ nɛ hwɔɔ si ngɛ lohwehi a niye ni nɔ́ mi.17To hyɛli ɔmɛ bɔ nɔ tsuaa nɔ nɔ nɛ ba ngɛ nga a nɔ ɔ kɛ nɔ́ nɛ bɔfo ɔ de mɛ ngɛ bi ɔ he ɔ.18Anɔkuale ji kaa, to hyɛli ɔmɛ a munyu ɔ pee nɔ tsuaa nɔ nyakpɛ kɛ gbeye.19Se Maria lɛɛ e wo munyu ɔmɛ kɛ wo e tsui mi nɛ e hii he susue.20Enɛ ɔ se ɔ, to hyɛli ɔmɛ kpale kɛ ho a lohwe ɔmɛ a he ya ngɛ nga a nɔ kɛ Mawu yi jemi kɛ bua jɔmi ngɛ bɔfo ɔmɛ a he si nɛ a ba je ngɔ tsɔɔ mɛ kɛ bi ɔ hu nɛ a ya na kaa bɔ nɛ bɔfo ɔ ba de mɛ ɔ he.21E nɔ otsi ligbi nɛ ji kpaanyɔ ɔ, a wo bi ɔ nyumu mi nɛ a wo lɛ biɛ ke Yesu; lɔ ɔ ji biɛ nɛ bɔfo ɔ tsɔɔ nɛ a wo lɛ ngɛ e fɔmi he si womi be ɔ mi.22Benɛ Maria fɔmi tsu mi jemi kɛ he tsumi ngɛ Sɔlemi We ɔ be ɔ su ɔ, fɔli ɔmɛ wo bi ɔ kɛ ho Yerusalem ya konɛ a ya sã bɔ, kaa bɔ nɛ Mose mlaa a tsɔɔ kaa a pee ɔ, konɛ a wo bi ɔ kɛ ha Nutsɔ ɔ.23Mawu dɛ ngɛ mlaa nɛ ɔmɛ a mi ke, “Binyumu tsuaa binyumu nɛ ma bli yo muklii mi nya a, a maa jɔɔ e nɔ ngɔ ha Nutsɔ ɔ.”24Jamɛ a be ɔ mi nɔuu nɛ Yesu fɔli ɔmɛ wo a he tsukɔmi bɔ sami nɔ́ ɔmɛ nɛ ji okponyɛhi enyɔ loo obleku lahuɛ bimɛ enyɔ ɔ ngɛ mlaa a nya a ya ngɔ ha.25Jamɛ a ligbi ɔ, Yerusalem no ko nɛ a tsɛɛ lɛ ke Simeon, nɛ e ji dalɔ nɛ yee Mawu gbeye ɔ ngɛ Sɔlemi We ɔ. E ji nɔ ko nɛ Mumi Klɔuklɔu ɔ hyi lɛ tɔ nɛ e ngɛ Mesia a blɔ hyɛe daa nɛ.26Ejakaa Mumi Klɔuklɔu ɔ je ngɔ tsɔɔ lɛ kaa e maa na Matsɛ nɛ Mawu pɔ lɛ nu ɔ loko ji e ma si je mi.27Jamɛ a ligbi ɔ, Mumi Klɔuklɔu ɔ yi Simeon nɔ kaa e ya Sɔlemi We ɔ. Nɛ lɔ ɔ he je ɔ, benɛ Yosef kɛ Maria ba nɛ a ba wo bi ɔ ngɔ ha Nutsɔ ɔ ngɛ mlaa a nya a,28Simeon ngɛ lejɛ ɔ nɛ e wo bi ɔ nɛ e je Mawu yi nɛ e de ke,29“Nutsɔ, jehanɛ ɔ, mo ha nɛ o tsɔlɔ ɔ nɛ e ya ngɛ he jɔmi mi ngɛ o si womi ɔ nya.30Ejakaa i na Yiwamihelɔ ɔ,31nɔ nɛ o kɛ ha je ɔ kɛ ami nitsɛ ye hɛ ngmɛ kaa bɔ nɛ o wo mi si kaa i ma na lɛ ɔ.32Nɛ lɛ ji la nɛ ma kpɛ kɛ ha je ɔ, nɛ e maa pee Israel nɛ ji o nimli ɔmɛ a anunyami.”33Yosef kɛ Maria daa si ngɛ nyakpɛ munyu nɛ ɔmɛ nɛ a ngɛ tue ngɛ bi ɔ he ɔ nue nɛ a hɛ mi pee mɛ yaa.34Simeon gbaa fɔli ɔmɛ nɛ e de bi ɔ nyɛ ɔ ke, “A maa gbɔ o tsui mi ha nɛ o maa hao ngɛ o mumi mi tɔɔ ngɛ bi nɛ ɔ he.35Ejakaa nihi fuu ngɛ Israel ma kua lɛ, nɛ enɛ ɔ kɛ a hɛ mi kpatami maa ba. Se lɛ kɛ nɛ e ma ha nihi fuu hu ma na bua jɔmi nɛ pe kulaa. Nɛ kɛ gu e nɔ ɔ, tsui mi laami nihi fuu maa je kpo.”36Gbalɔ yo ko nɛ a tsɛɛ lɛ ke Hana a hu ngɛ Sɔlemi We ɔ jamɛ a ligbi ɔ. Asher wɛtso ɔ mi no ko nɛ e biɛ ji Fanuel ɔ bi ji lɛ. Nɛ e bwɔ kotokoto.37E kɛ e huno hi si jeha kpaago nɛ e huno ɔ gbo kɛ je e he jeha nyingmi kpaanyɔ kɛ eywiɛ ji lɔ ɔ nɛ. Sɔlemi We ɔ kɛkɛ se e ngɛ kɛ sɔlemi kɛ pɛɛ kpami kɛ ngma himi.38Benɛ Simeon kɛ fɔli ɔmɛ ngɛ munyu ɔ tue pɛ nɛ Hana hu ba su lejɛ ɔ. Amlɔ ɔ nɔuu nɛ lɛ hu e bɔni Mawu si nami nɛ e bɔni nɔ tsuaa nɔ nɛ ngɛ Mesia a bami ɔ blɔ hyɛe ngɛ Yerusalem ɔ demi ke Yiwamihelɔ ɔ ba su si.A kpale kɛ ho Nazaret ya
39Benɛ Yesu fɔli ɔmɛ tsu kusumi ɔmɛ tsuo ta ngɛ Sɔlemi We ɔ ngɛ Mawu mlaa a nya a, a kpale kɛ ho Nazaret ya ngɛ Galilea.40Lejɛ ɔ nɛ Yesu wa ngɛ, nɛ nɔ tsuaa nɔ ye e he odase kaa e ji jokuɛ lɛɛ se e ni lemi nya wa saminya; nɛ Mawu jɔɔmi ngɛ e nɔ.41Benɛ Yesu ye jeha nyɔngma kɛ enyɔ ɔ, e kɛ e fɔli ɔmɛ ya Yerusalem kɛ ha Hebemi Jeha a yemi kaa bɔ nɛ a peeɔ daa jeha a.43Benɛ a gbe jeha yemi ɔ nya a, a kpale kɛ yaa Nazaret; se Yesu tlɔ se nɛ e fɔli ɔmɛ li.44Ejakaa a susu kaa e nyɛɛ e huɛhi a se nɛ a ngɛ blɔ hiali kpa amɛ a kpɛti. Se kɛ ya si gbɔkuɛ be mi nɛ loloolo a nɛ lɛ ɔ, a bɔni lɛ hlami kɛ e si bimi ngɛ a wekuli kɛ a huɛmɛ a ngɔ.45Se a nɛ lɛ, nɛ lɔ ɔ he je ɔ, a kpale kɛ ho Yerusalem ya nɛ a ya hla lɛ ngɛ lejɛ ɔ.46Ligbi etɛ se loko ji a ya na lɛ ngɛ Sɔlemi We ɔ nɛ e kɛ mlaa tsɔɔli nikɔtɔma amɛ ngɛ mlaa amɛ a mi munyu nguahi a he sɛsɛe.47Nɛ e nile kɛ e níhi a sisi numi nɛ je kpo ngɛ e munyu bimi kɛ hetohi nɛ e ngɛ hae ɔ pee mɛ nyakpɛ saminya.48Nɛ e fɔli ɔmɛ na lɛ ɔ, a nya mi jɔ. E nyɛ ɔ bi lɛ ke, “Binyumu, kɛ o pee wɔ nɛ ɔ kɛɛ? I kɛ o tsɛ kpa he tsuaa he ngɛ mo hlae.”49Ní nɛ e bi mɛ ji, “Nɛ mɛni hia kaa nyɛ hla mi? Nyɛ kai we kaa i ma hi hiɛmɛ nɛ ɔ ngɛ Sɔlemi We ɔ nɛ ji ye Tsɛ We ɔ lo?”50Se e fɔli ɔmɛ nui nɔ́ nɛ e de nɛ ɔ sisi.51Enɛ ɔ se ɔ, e kɛ mɛ kpale kɛ ho Nazaret ya, nɛ e ya ba e he si ha mɛ. Se e nyɛ ɔ wo sane nɛ ɔmɛ tsuo ngɔ to e yi mi.52Nɛ Yesu wa ngɛ nile kɛ nɔmlɔ tso blɔ fa mi, nɛ nimli kɛ Mawu suɔ e sane.Biblica, Inc.