Efeso6
1Bimɛ, nyɛɛ bu nyɛ fɔli; enɛ ɔ ji nɔ́ nɛ da nɛ e sa kaa nyɛɛ pee, ejakaa Mawu wo nyɛ nɔ hyɛmi he wami ɔ kɛ wo a dɛ.2Mawu Kita Nyɔngma amɛ a kpɛti kekle nɔ́ nɛ si womi piɛ he ɔ deɔ ke, “Moo bu o tsɛ kɛ o nyɛ;3konɛ e hi ha mo, nɛ o se nɛ kɛ ngɛ zugba a nɔ.”4Nɛ nyɛ fɔli ɔmɛ hu, nyɛ ko hi nyɛ bi ɔmɛ a mi mi la woe, se mohu nyɛ tsɔ se mɛ ngɛ suɔmi kɛ ga womi mi kaa bɔ nɛ Nutsɔ ɔ to ɔ.5Nyɛ sɔmɔli ɔmɛ ɔ, nyɛɛ bu nyɛ nutsɔ ɔmɛ nɛ nyɛ sɔmɔ mɛ saminya kɛ gbeye yemi kɛ suɔmi. Nyɛ sɔmɔ mɛ kaa bɔ nɛ nyɛ ma sɔmɔ Kristo ɔ.6Nyɛ ko sɔmɔ mɛ kɛ hɛ mi suɔmi. Nyɛ kpa nyɛ tsui mi kɛ tsu ni ha mɛ be fɛɛ be kaa bɔ nɛ nyɛ maa pee kɛ ha Kristo ɔ, nɛ lɔ ɔ ji Mawu suɔmi nya ni.8Nɛ nyɛ kai kaa Tsɛ ɔ maa wo sɔmɔlɔ kɛ nutsɔ ɔ tsuo hiɔ ngɛ nɔ́ kpakpa ko nɛ mo nɔ o maa pee ɔ he.9Nɛ nyɛ nutsɔ ɔmɛ hu, nyɛɛ hɛɛ nyɛ sɔmɔli ɔmɛ saminya, nɛ nyɛɛ kɛ mɛ nɛ hi si kaa bɔ nɛ i ke a kɛ nyɛ hu nɛ hi si ɔ. Nyɛ ko wo a he gbeye; nɛ nyɛ kai kaa nyɛ hu Kristo sɔmɔli ji nyɛ, nɛ nyɛɛ kɛ mɛ tsuo ngɛ Nutsɔ kake ngɛ hiɔwe, nɛ e hyɛ we nimli a hɛ mi.
Wa he wami ngɛ Mawu dɛ mi
10Nyagbe ɔ, i ngɛ nyɛ kaie kaa nyɛ he wami nami maa je Nutsɔ ɔ he wami nɛ ngɛ nyɛ mi ɔ mi.11Nyɛɛ wo Mawu ta hwumi ni ɔmɛ kulaa konɛ nyɛ nyɛ nɛ nyɛɛ ye Abosiami ga tsɔmi ɔmɛ a nɔ kunimi.12Ejakaa tsa pi nimli adesahi nɛ waa kɛ ngɛ ta hwue ɔ, se mohu mumi yayamihi kɛ nɔ yeli kpanakuhi nɛ a hɛɛ Abosiami he wami, nɛ a ji je nɛ ɔ nɔ yeli ngɛ diblii mi.13Enɛ ɔ he je ɔ, nyɛ kpla Mawu ta hwumi ni ɔmɛ eko fɛɛ eko konɛ ke he nyɛlɔ ɔ ba tua nyɛ ɔ, nyɛ nyɛ e nya nɛ nyɛɛ da, nɛ lɔ ɔ se hu nyɛ nyɛ si nɛ nyɛɛ da kpɛii.14Se loko ji nyɛ ma nyɛ enɛ ɔ maa pee ɔ, ja nyɛ pee nyɛ he anɔkuale yeli kɛ dali. Nɛ lɔ ɔmɛ maa pee nyɛ mlɛmi kpa kɛ nyɛ gugue mi dama.15Nɛ nyɛɛ wo tokota nɛ ma ha nyɛ nyɛɛmi maa sɔ kɛ fiɛ Mawu kɛ Nɔmlɔ kpɛti he jɔmi Manye Munyu ɔ.16Nyɛɛ hɛɛ hemi kɛ yemi mi kpɛii, nɛ lɔ ɔ hu ji dama nɛ nyɛ ma kɛ nyɛ Abosiami ka amɛ a nɔ maa ye.17Nyɛɛ bɔ nyɛ yi wami hemi he mɔde, nɛ nyɛɛ hɛɛ Mawu Munyu ɔ mi wawɛɛ, ejakaa e ji nyɛ mumi mi klaate.18Nyɛɛ sɔle be tsuaa be nɛ nyɛ bi Mawu níhi nɛ Mumi Klɔuklɔu ɔ suɔ ɔ. Nyɛ kpa nyɛ hiami nɔ́ ɔmɛ a he pɛɛ be fɛɛ be, nɛ nyɛɛ sɔle wawɛɛ be tsuaa be kɛ ha Kristo se nyɛɛli ngɛ he fɛɛ he.19Nyɛɛ sɔle kɛ ha ami hulɔ, nɛ nyɛ bi Mawu nɛ e ha mi nya nɛ ma kɛ fiɛ Nutsɔ ɔ he sane kɛ tsɔɔ ni kpahi, nɛ ma nyɛ ma de mɛ anɔkuale ɔ kaa ma je li ɔmɛ hu ma na yi wami hemi.20Amlɔ nɛ ɔ, a wo mi kɔsɔkɔsɔ ngɛ Mawu Munyu ɔ nɛ i ngɛ fiɛe ɔ he. Se i ngɛ pɛɛ kpae kaa e ha mi he wami nɛ ma ya nɔ ma fiɛ kɛ kã ngɛ tsu ɔ mi ngɛ hiɛ ɔ bɔ nɛ sa kaa ma pee ɔ.21Wa suɔlɔ nyɛmi kpakpa Tihiko nɛ ji anɔkuale yemi kɛ bualɔ ngɛ Nutsɔ ɔ ni tsumi ɔ mi ɔ, maa bɔ nyɛ bɔ nɛ i ngɛ nɔ yae ha.22Enɛ ɔ he titli nɛ i tsɔ lɛ nyɛ ngɔ ngɛ, bɔ nɛ pee nɛ nyɛɛ le bɔ nɛ wa ngɛ ha, konɛ e ha nɛ nyɛ he nɛ wa nyɛ.23Ye nyɛmimɛ Kristo se nyɛɛli, he jɔmi kɛ suɔmi kɛ hemi kɛ yemi nɛ je Tsɛ Mawu kɛ Nutsɔ Yesu Kristo dɛ mi ɔ ha nyɛ.24Mawu dloomi kɛ jɔɔmi ɔ nɛ kɛ nihi kulaa nɛ suɔ wa Nutsɔ Yesu Kristo anɔkuale mi ɔ nɛ hi si.Biblica, Inc.