Efeso5
Nyɛɛ sa Mawu hɛ mi
1Nyɛɛ pee Mawu kaseli ngɛ nɔ́ fɛɛ nɔ mi, kaa bɔ nɛ bi nɛ e tsɛ suɔ lɛ kaseɔ e tsɛ ɔ.2Nyɛɛ suɔ nyɛ he kaa bɔ nɛ Kristo hu suɔ nyɛ nɛ e ngɔ lɛ nitsɛ e he kɛ ha Mawu kaa bɔ sami nɔ́ kɛ je nyɛ he yayami ɔmɛ ɔ. Nɛ Mawu na he bua jɔmi, ejakaa suɔmi nɛ Kristo ngɛ kɛ ha nyɛ ɔ ngɛ kaa nu je via kɛ ha lɛ.3Nyɛ ko ha nɛ ajuama bɔmi, mu ni tsumi loo hɛ kɔ nɛ hi nyɛ kpɛti. Nyɛ ko ha nɛ a tu nyɛ he munyu kaa nyɛ ngɛ enɛ ɔmɛ eko pee.4Jehanɛ ɔ hu, zo ni tsumi kɛ yakayaka ni sɛɛmi kɛ fɛu yemi nɛ sɛ ɔ, e ko hi nyɛ kpɛti; se mohu nyɛ kai nyɛ he ngɛ ni kpakpahi nɛ Mawu pee kɛ ha nyɛ ɔ he, nɛ nyɛɛ ngɔ sina kɛ ha lɛ.5Nɛ nyɛɛ le enɛ ɔ kaa, ajuama bɔlɔ ko loo mu ni tsulɔ ko loo hɛ tsulɔ ko be blɔ nya ngɛ Kristo kɛ Mawu Matsɛyemi ɔ mi. Hɛ tsulɔ ɔ, e ji wɔ jalɔ, ejakaa e suɔ je nɛ ɔ mi ni kpakpa amɛ, nɛ e jaa mɛ pe Mawu.6Nyɛ ko ha nɛ nɔ ko nɛ mlɔɔ nyɛ ngɛ yayami nɛ ɔmɛ a he, ejakaa Mawu muklii mi fumi baa nihi nɛ gboɔ ni nɛ ɔmɛ a nɔ tue ɔmɛ a nɔ.7Nyɛɛ kɛ mɛ nɛ ko bɔ.8Ejakaa sa a, nyɛ tsui mi wo diblii kanikani; se amlɔ nɛ ɔ, Nutsɔ ɔ la ngɛ nyɛ tsui mi, nɛ e sa kaa a na ngɛ nyɛ je mi bami mi.9Ngɛ la nɛ ɔ nɛ ngɛ nyɛ mi ɔ he je ɔ, e sa nɛ nyɛɛ pee nɔ́ nɛ da, kɛ nɔ́ nɛ hi nɛ ji anɔkuale.10Nɛ nyɛɛ kase nɔ́ nɛ sa Nutsɔ ɔ hɛ mi.11Nyɛɛ kɛ nyɛ he nɛ ko wo diblii mi ni tsumi ɔmɛ nɛ wui yiblii kpakpa amɛ a mi, nɛ nyɛ ko laa a nɔ.12E ji hɛ mi si puemi kaa ma wo diblii mi ni tsumi ɔmɛ a ta, nɛ ji níhi nɛ nihi nɛ li Mawu ɔ a tsuɔ ɔ.13Se ke nyɛ je mɛ kpo ɔ, la a kpɛɔ ngɛ a yayami ɔ nɔ, nɛ ke a na bɔ nɛ a ngɛ ha kaa a hí anɔkuale mi ɔ, a ti nihi tsakeɔ nɛ a plɛɔ la bimɛ.14Enɛ ɔ he je nɛ Mawu de ngɛ Ngmami ɔmɛ a mi ke, “O he nɛ tsiɛ, mo mahe hwɔlɔ, nɛ o te si kɛ je gbeje, nɛ Kristo maa tso ha mo” ɔ nɛ.15Enɛ ɔ he je ɔ, nyɛɛ hyɛ nyɛ he saminya ngɛ bɔ nɛ nyɛ maa hi si kɛ ha a he, ejakaa be yobuhi ji enɛ ɔmɛ. Nyɛ ko pee nyɛ he kuasiahi. Nyɛ hɛ mi nɛ tɛ. Nɛ ke nyɛ na kpakpa peemi he blɔ ɔ, nyɛ gbo he dengme.17Nyɛ ko pee nyɛ he nihi nɛ susuu we yi mi, se mohu nyɛ hla nɛ nyɛ di níhi nɛ ji Nutsɔ ɔ suɔmi nya ni ɔmɛ a se nɛ nyɛɛ pee.18Nyɛ ko de da, ejakaa yakayaka ni peemi kɛ da demi nɛ nyɛɔ, se mohu nyɛ hyi banebane kɛ Mumi Klɔuklɔu ɔ konɛ e kpaka nyɛ.19Nyɛɛ sɛɛ Nutsɔ ɔ he ni ngɛ nyɛ kpɛti nɛ nyɛ je e yi kɛ yi jemi lahi kɛ mumi mi lahi, nɛ nyɛɛ fia saku, nɛ nyɛɛ je nyɛ tsui mi kɛ la kɛ ha Nutsɔ ɔ.20Nyɛɛ na wa Mawu kɛ wa Tsɛ ɔ si daa ngɛ nɔ́ tsuaa nɔ he be fɛɛ be ngɛ wa Nutsɔ Yesu Kristo biɛ mi.21Nyɛɛ ba nyɛ he si kɛ ha nyɛ bi nɛ nyɛ kɛ wo Kristo hɛ mi nyami.22Nyɛ yigbayi ɔmɛ, nyɛɛ ba nyɛ he si ha nyɛ nitsɛmɛ nyɛ huno ɔmɛ, kaa bɔ nɛ nyɛ baa nyɛ he si kɛ haa Nutsɔ ɔ.23Ejakaa nyumu ɔ ji yo ɔ e nɔ hyɛlɔ kaa bɔ nɛ Kristo hu ji asafo ɔ nɔ hyɛlɔ ɔ. Nɛ e ngɔ lɛ nitsɛ e wami kɛ ha asafo ɔ nɔ hyɛmi nɛ e pee e Kpɔlɔ.24Nɛ kaa bɔ nɛ asafo ɔ baa e he si kɛ haa Kristo ɔ, ja a nɔuu e sa nɛ nyɛ yigbayi ɔmɛ hu nyɛɛ pee kɛ ha nyɛ nitsɛmɛ nyɛ huno ɔmɛ ngɛ nɔ́ tsuaa nɔ mi.25Nyɛ nyumu ɔmɛ hu nyɛɛ suɔ nyɛ nitsɛmɛ nyɛ yi ɔmɛ kaa bɔ nɛ Kristo hu suɔ asafo ɔ nɛ e gbo kɛ ha lɛ ɔ,26konɛ e wo baptisimi kɛ Mawu Munyu ɔ kɛ tsukɔ e he nɛ e pee lɛ klɔuklɔu ɔ.27Nɛ e ngɔ lɛ kɛ ha lɛ nitsɛ e he kaa anunyami asafo klɔuklɔu nɛ mu ko loo tɔtɔmi ko kulaa be e he.28Kikɛ ɔ nɛ e sa kaa nyumu ɔmɛ a suɔ a yi ɔmɛ kaa bɔ nɛ a suɔ mɛ nitsɛmɛ a nɔmlɔ tsohi. Ejakaa akɛnɛ nyumu kɛ e yo plɛ nɔmlɔ kake jehanɛ ɔ he je ɔ, ke nyumu ɔ suɔ e yo ɔ, lɛ nitsɛ e he nɛ e suɔ, nɛ e ngɛ e he kpakpa pee.29Nɔ ko nyɛ́ lɛ nitsɛ e nɔmlɔ tso, se mohu e hyɛɔ e nɔ saminya nɛ e lɛ ɔ lɛ, kaa bɔ nɛ Kristo hyɛɔ e nɔmlɔ tso nɛ ji asafo ɔ nɔ ɔ. Nɛ e Nɔmlɔ tso ɔ he níhi ji wɔ.31Enɛ ɔ he je nɛ nyumu ma si e tsɛ kɛ e nyɛ, nɛ e maa pɛtɛ e yo he, nɛ mɛ ni enyɔ ɔmɛ kulaa a ma plɛ he lo kake.32I le kaa kikɛmɛ a munyu nɛ ɔ sisi numi wa, se e tsɔɔ Kristo Nɔmlɔ tso he níhi nɛ wa ji ɔ nya.33Lɔ ɔ he je ɔ, i ngɛ dee ekohu ke, e sa kaa nyɛ ti nɔ tsuaa nɔ nɛ suɔ e yo kaa lɛ nitsɛ e he, konɛ yo ɔ hu nɛ bu e huno ɔ saminya nɛ e je e yi, nɛ e wo e hɛ mi nyami.Biblica, Inc.