LATIT LOK12
1Ikare me tinoni, ber ipo ikom Lacwec ma ocweyo in, ma pud peya kare ma opong ki gin marac oo, ma mwaka bene peya onyiko cok, en aye ikare ma ibiwaco ni, “Pe atye ki yomcwiny mo ikomgi.” Ber ipo ikom Lacwec i kare me tinoni2ma pud peya ceng ki derone, dwe ki lakalatwe gucido woko, dok pol ma kelo kot bene pe biware woko ka dong kot otyeko cwer.3Ikare meno badi mayam teki, bimyel, ki congi mayam teki dong gibidoko goro, ki laki mayam icamo kwedeni ticgi bigik pien guo woko gudoko nok mo, ki wangi mayam gineno piny ki iwang dirica pe dok gibimede ki neno piny.4Dok iti bene bidoko nok ma nongo dong pe winyo woo ma igudu; ma nongo kidi rego pe winye matek tutwal, kadi wa winyo dwon luwer bene pe ibiwinyo, ento koko pa winyo aye bicoyo in woko ki iwang nino.5Ikare meno ibibedo ki lworo pi gin ma tye malo, ki wot bene bibedo tek ki tung boti; yer wi bene biluk lwar; ibiyele ayela wek iywane kanyiko, ci pe dong ibibedo tye ki miti mo icwinyi. Dong watye kawot me cito gire i gangwa kama wabibedo iye matwal, ci kumu dong bibedo tye i yoo gudu.6Dong myero inen ni itamo matut ikom Lubanga, pien kwowa dong cok gik woko, calo nyor me ryal onyo atabo me jabu ma to nginye woko oyotoyot, onyo calo agulu pii ma to woko iwang it, nyo tol latel latwom pii ma cot woko ki wang pii.7Ci komwa bene bitop dok ingom, apwa bene dok ikom ngom ka mayam oa ki iye, ki cwiny dano dok bot Lubanga mayam omiyo botwa.8Latit lok owaco ni; konye peke, konye peke adada, man ducu konye peke.
Lok me agiki
9Medo ikom lok me ryeko, Latit lok bene opwonyo lwak ki gin ma en ngeyo, ma opimo dok ongiyo matut, ka dong ocano carolok ducu kikore kun gwoke matek.10Latit lok otemo nongo lok ma kweyo cwiny dano, ci en ocoyo lok me ada ki cwiny ma tye atir.11Lok ma dano ma ryek waco ducu obedo macalo dim, dok calo cumar ma kiguro odonyo matek, en aye lok ma Lubanga, ma en aye Lakwat acel loko.12Latina, tye dok gin mukene ma myero igwoke iye. Coyo buk mapol pe gik, dok kwan tutwal ma okato kare olo kom dano nono.13Inge lok magi ducu; dong atye ki lok acel keken ma amito wacone: lwor Lubanga dok ilub cike ducu, pien man aye obedo gin acel ma omiyo kicweyo dano ducu.14Lubanga bingolokop pi kit tim ducu ma watiyo, wa ki gin ducu ma watimo i mung, kadi ber nyo rac.Bible Society of Uganda