Read NWOYO CIK 28

NWOYO CIK28

Gum mabino pi gwoko cik

¹Moses owaco bot lwak pa jo Icrael ni, “Ka wubiworo dog Rwot Lubangawu, ma wugwoke kun wulubu cike ducu ma acikowu kwede tin, ci Rwot Lubangawu bipilo wiwu makato rok ducu ma wi loboni.²Kace wuworo dog Rwot Lubangawu, ci en bimiyo gum man ducu bibedo mewu matwal:

³Wubibedo ki gum i taunwu madito ducu dok wubibedo ki gum i potiwu.

⁴Gum bibedo ikom lutino ma wubinywalogi, ki ikom cam ma bicek i potiwu; ikom lutino dyangiwu ki ikom lutino romiwu ki dyegiwu.

⁵Ci Lubanga bimiyo camwu bicek mapol dok wubibedo ki ginacama ma oromo.

⁶Wubibedo ki gum i kwowu, dok bene wubilimo gum i tic ducu ma wutiyo.

⁷Rwot bimiyo wuloyo lumerokwu ducu ma bibino kalweny ikomwu, miyo wubinekogi woko ki inyimwu. Gibimol kalweny ikomwu ki i yoo acel, ento gibiringowu ci gibiket woko ki inyimwu i yoo abiro mapatpat.

⁸Rwot Lubangawu bimiyowu gum ci cam bibedo ma opongo derowu ducu, ki ikom gin ducu ma wubitiyo; bimiyowu gum i lobo ma en bimiyo botwuni.

⁹Rwot bimokowu me bedo lwake maleng kit mayam okwongo kwede botwu, kace wumako cik pa Rwot Lubangawu, kun wulubu yone ducu.¹⁰Jo ma iwi lobo ducu gibineno ka kilwongowu ki nying Rwot, ci gibilworowu.¹¹Rwot bimiyo wulony ki lwak jami mapol; bimiyo wunywalo lutino mapol bimiyo limwu makwo nya madwong ma potiwu bene ceko cam mabup.¹²Rwot biyabo polo pirwu, ma en ot kano lime maber, ci miyo kot cwer i lobowu i karene, ci miyo gum ikom tic ducu ma wutiyo. Jo me rok mapol gibimako banya botwu ento wun pe wubimako banya mo.¹³Rwot bimiyo wubedo jo ma telo nyim, pe jo ma coko ter; wubibedo kacito anyim ma pe dong wudok cen, teke wubedo kalubu cik pa Rwot Lubangawu ma acikowu kwede tin kun wugwoke ka cobogi maber.¹⁴Ento wunen ni wugwoke ma pe wuloke me kwero lubu lok ducu ma acikowu kwede tin pi woro lubanga mukene ki pi tic pirgi.”

Can ma bino pi bedo ludingo

¹⁵“Kace pe wuworo dog Rwot Lubangawu nyo pe wugwoke kalubu lok ma en ociko ducu ki cike ma acikowu kwede tini, ci lwak cen magi ducu bipoto ikomwu ci moko ikomwu:

¹⁶Ci Rwot bimiyo cen bedo ikomwu ki i taunwu ducu wa i potiwu.

¹⁷Rwot bene bimiyo cen bibedo ikom camwu ducu ma i potiwu wa ikom otakowu me tedowu ducu.

¹⁸Cen bibedo ikom lutino ma wubinywalogi, ki ikom cam ma bicek i potiwu, ikom lutino dyangiwu ki ikom lutino romiwu ki dyegiwu.

¹⁹Cen bibedo ikomwu ka wudonyo i ot, ci cen bibedo ikomwu ka wukato woko.

²⁰Kace wubwoto Rwot, ma wubedo katiyo gin marac, ci Rwot bicwalo cen ikomwu ma bibangowu woko ci bijukuwu i gin ducu ma wutemo tiyone nio ka wuto wutum woko oyotoyot.²¹Rwot bimiyo two gemo marac poto ikomwu nio ka bityekowu woko ki i lobo ma wubicito iye ka camone.²²Rwot bipwodowu ki two mamato kom dano woko, two aburu, two akwota, ki lyeto madwong; dok bene bicwalo yamo mager labongo kot i lobowu, ci miyo camwu ma i poto bware dok two woko.²³Kot pe bicwer i lobowu, ki ngomwu bene bibedo ma otwo woko matek likang macalo nyonyo.²⁴Rwot bicwalo lapiro apulu ki apwa matego ma ka kot i lobowu kun a ki malo duny ikomwu nio ka otyekowu woko.

²⁵Rwot bimiyo lumerokwu giloyowu woko. Wubilubu yo acel ka wucito kalweny ikomgi, ento wubiket woko ata kun wuringo woko ki inyimgi i yoo abiro mapatpat. Lworo bimako ker ducu ma wi lobo pi gin ma bitime ikomwu.²⁶Komwu ma otoni bibedo cam pa winyo ducu me polo, ki pa lee timgu; dok bene dano mo bibedo peke ma ryemogi.²⁷Rwot bipwodowu ki odeke kit mayam otimo ikom jo Ejipt, ki bur adola ki nyac ki gwenyo, ma cangone biloyowu woko.²⁸Rwot bipwodowu ki two apoya ki to wangwu, dok bene bibango tamwu woko.²⁹Wubipange apanga ata i dyeceng macalo lawange oto pange i colpiny, pe wubilimo gum mo i gin ducu ma wubitiyo. Kibibedo ka unuwu kun kiyako jamiwu jwijwi, dok lakonywu bene bibedo peke.

³⁰Ibitongo keny ikom nyako, ento ngat mukene aye bibutu kwede. Ibigero ot ento pe i bibedo iye. Ibipito poto olok ento pe ibicamo nyige.³¹Kibineko twonini inyimi ma ineno ento pe ibibilo ringone kadi ki acel. Kibimayo kanani ci kibiterogi woko ki tek ki inyimi, dok bene pe kibidwokone boti. Kibimiyo romini bot lumeroki, dok bene ngat mo ma bikonyi bibedo peke.³²Kibimiyo awobeni ki anyirani me bedo opii bot jo me rok mukene i wangi kit man ento pe i bibedo ki twero me gengogi wot. Ibibedo kakuru nino me dwogogi cen kwe ci piny biloyi woko.³³Rok mo mayam pe ingeyo aye bicamo cam ma ocek i potoni ducu ma iyele iye ki tic matek dok bene gibiuni ki kit auna madwong malit.³⁴Can ma ibikato ki iye bimiyo ibibange woko pi gin ma ibineno ki wangi.³⁵Rwot bipwodi ki odeke ma odet i congi ki i tyeni ma pe cang; odeke bimwono komi woko liweng kun cake ki i wii nio wa i tyeni.

³⁶Rwot biterowu kacel ki rwotwu ma wuketo me loyowu i rok mukene mayam peya wungeyo kadi wa kwariwu bene peya gungeyo; wubiworo lwak lubanga mukene kunu ma kipayo calgi ki bao nyo ki got.³⁷Wubidoko gin makelo lworo ikin rok ducu kama Rwot biterowu iye, ci kibitic ki nyingwu macalo ginanywara ki me lok abola.

³⁸Ibipito lwak kodi madwong i potoni, ento ibikayo cam manok keken, pien bonyo bicamo potoni woko.³⁹Ibipito poti olok, ibiyubugi maber, ento pe ibimato kongo bwinone, dok pe ibicoko nyige, pien kwidi bicamogi woko ducu.⁴⁰Yadi jeituni bidongo kaducu i dye loboni, ento pe ibinongo moo kadi ki acel, pien nyig olok ducu bio woko piny.⁴¹Ibinywalo awobe ki anyira, ento pe gibibedo joni, pien kibiterogi woko i opii.⁴²Yadini ducu ki cam ma i potoni ducu bonyo bicamone woko.⁴³Lubedo ma gibedo ikinwu gibidoko wegi twero dok rwomgi biyito malo maloyowu, ento wun wubimede ameda ki rwenyo twerowu wa rwomwu ducu.⁴⁴Gin aye dok bimiyo wumako banya botgi, wun pe wubimiyo gimako banya ki botwu. Gin aye gibibedo jo ma telo nyim, wun wubicoko ter.

⁴⁵Lwak atwom magi ducu bipoto ikomwu dok bibedo kwedwu nio ka bityekowu woko, pien wukwero winyo dog Rwot Lubangawu, dok bene pe wulubu cike ki gin mayam ocikowu kwede ducu.⁴⁶Can magi bibedo lanyut ikomwu kacel ki ikom likwayowu matwal pi kop ma Lubanga ongolo ikomwu.⁴⁷Yam Rwot Lubanga omiyowu lwak gum ento wun pe wutiyo bote ki yomcwiny.⁴⁸Pieno wun dong wubitic pi lumerokwu ma Rwot bicwalo kalweny ikomwu. Kec ki orwo pii binekowu, wubibedo munero ma can jami ducu omakowu, ci Rwot biriyo okol i ngutwu nio ka otyekowu woko ducu.⁴⁹Rwot bikelo rok mo ma gua ki kamabor ikomwu kamonyowu, ma pe wuniang lebgi, ci gin bipoto ikomwu macalo ocur ma tuk.⁵⁰Gin rok ma ger ma pe biparo pi jo ma otii, kadi wa pi timo kica ikom jo matino.⁵¹Gibitero leewu woko ducu liweng, ki cam ducu ma ocek i potiwu nio ka kec bityekowu woko liweng. Gin pe biweko ngano mo, kongo bwino mo, ki moo jeituni mo. Dok dyangi, romi ki dyegiwu mo pe bidong botwu; piman wun wubito woko liweng.⁵²Lumerokwu bimonyo taunwu ducu ma oromo dye lobowu ma Rwot Lubangawu bimiyowu nio ka cel maboco ki gogo ma wugenoni bigwokowu ducu bipoto woko piny ki i lobowu.

⁵³Ikare ma lumerokwu birumu taunwu woko, kec ki can madit bipoto ikomwu miyo wubicamo ringo kom lutinowu; ringo kom awobewu ki anyirawu ma Rwot Lubangawu omiyo botwu.⁵⁴Ikare ma lumerok bimonyo taunwu ducu, kadi wa co mayam kinywalogi i gang lonyo ma gudongo ki kuc, kec bicido wanggi woko miyo gibicamo lutinogi pien gin mo mudong botgi me acamo mapat dong pe tye. Dok bene gibitwono omegigi woko, ki mon gi ma gimaro, ki lutinogi mogo ma pud gudong; pe gibiye ni ngat mo ikin gi onywak camo kwedgi, en ringo kom lutinogi ma gitye kacamoneni.⁵⁶Mon mayam kinywalogi i gang lonyo ma gudongo ki kuc, mayam gilworo wot ki tyen gi nono i ngom pien yam gigwoke mada bene gibitimo lakit tic acelu. Kec bicido wanggi woko ikare ma lumerok bimonyo taunwu ducu,⁵⁷miyo gibicamo byero me nywalgi imung ki ringo kom lutino ma gunywalo, dok bene gibitwono coggi wa ki awobegi ki anyiragi ma gimaro.

⁵⁸Ka pe wugwoke kun wulubu lok ducu ma i cik man ma kicoyo i buk man wek wubed kalworo nying me deyo ki mapek pa Rwot Lubangawu,⁵⁹ci Rwot dok bikelo atwom madit ikomwu ki ikom likwayowu, en atwom malik ma bedo nakanaka, ki two magwa ma pe juke.⁶⁰En bikelo ikomwu kit two ducu pa jo Ejipt mayam wubedo kalworogi; twone biniang ikomwu matek dok pe bicang.⁶¹Dok kit two ducu ki kit atwom ducu ma pe kicoyogi i buk man me cik Rwot aye bikelogi ikomwu, nio ka otyekowu woko liweng.⁶²Kadi onongo yam wunya mapol macalo lwak lakalatwe me polo, kibiweko welwu dong manok mo, pien pe wubedo ka woro dog Rwot Lubangawu.⁶³Kit mayam cwiny Rwot obedo yom ikomwu omiyo otimowu maber dok omiyo wunya mapol, kitmeno bene cwiny Rwot dok bibedo yom pi kelowu to piny ma bityekowu woko liweng; ci bikwanyowu woko ki i lobo ma dong wucok donyo iye kacamone.

⁶⁴Rwot bikeyowu woko ata ikin rok ducu, cake i agiki lobo tung cel o kwede i agikine mukene tung cel. Wubiworo lwak lubanga mukene kunu ma kipayo calgi ki bao nyo ki got, mayam pe wungeyo kadi wa kwariwu bene pe gungeyo.⁶⁵Ikin lurok magi pe wubinongo iye kuc mo, dok pe wubinongo iye kayweyo tyenwu, ento Rwot bimiyo cwinywu myel kunu, wangwu bimyeno, tipu komwu bito woko lirut.⁶⁶Cwinywu bingabe angaba pi kwowu me anyim; wubibedo ki lworo madwong dyewor ki dyeceng, ma pe wutye ki gen mo i kwowu.⁶⁷Odiko wubiwaco ni, ‘Kono nene obedo otyeno!’ dok otyeno wubiwaco ni, ‘Kono nene obedo odiko!’ pi lworo madwong i cwinywu pi gin matye anyim ma wangwu bineno.⁶⁸Dok Rwot bidwokowu cen i Ejipt kun kiterowu i mel, wubidok i wot mayam aciko ni pe dok wubinwoyoneni. Wubimine kekenwu kunu bot lumerokwu kun wucate ni kiwilwu wubed opiigi ki angecagi, ento dano mo pe ma biwilowu.”

Bible Society of Uganda

https://app.library.bible/content/1618808970a5a3ca