NWOYO CIK27
Cik pa Lubanga ma kigoro ikom got
1Ka Moses, kacel ki ludongo pa jo Icrael, ociko lwak kun waco botgi ni, “Wumak cik ducu ma acikowu kwede tin.2Dok ikom nino ma wungolo iye kulu Jordan pi donyo i lobo ma Rwot Lubangawu bimiyowu, wubicibo iye kidi madito ci wubimwono komgi ki lobo laim matar.3Wubicoyo lok me cik magi ducu ka wukato me donyo i lobo ma Rwot Lubangawu bimiyowu, en aye lobo ma miu maceko cam mapol, kit ma Rwot, Lubanga pa kwariwu, yam ocikowu kwedeni.4Ka wungolo loka Jordan, wubicibo kidinu gicung ikom got Ebal, kit ma tin acikowu kwede, dok wubimwono komgi ki lobo laim matar.5Wubicano keno tyer kunu pi Rwot Lubangawu, keno tyer ma kicano ki got; pe kiting nyonyo mo me payo komgi.6Wubitic ki got ma pe kipayo komgi, en aye wubitumu gitum awanga iye bot Rwot Lubangawu,7ka dok wubityero iye gityer lakwecwiny ma wubicamone ki kunu, ci cwinywu bibedo yom inyim Rwot Lubangawu.8Wubicoyo lok me cik man ducu ikom kidi ma wubicibogi kunu maber ma kwanone yot.”9Moses ki ajwaki ma Lulevi guwaco ki jo Icrael ducu ni, “Wuling mot, wuwiny, wun jo Icrael. Inino ma tin aye wudoko iye lwak pa Rwot Lubangawu.10Piman dong wuwor dog Rwot Lubangawu kun wumako cik mere ki gin ma en ociko ducu ma acikowu kwede tin.”Acena mabino pi kwero gwoko Cik
11Moses ociko lwak inino meno kikome kun waco ni,12“Ka dong wutyeko kato loka Jordan, jo magi gibicung iwi got Gerijim ka kilamo gum ikom lwak: jo pa Cimeon, Levi, Juda, Icakar, Yucepu ki Benjamin.13Jo pa Reuben, Gad, Acer, Jabulon, Dan ki Naputali, gibicung iwi got Ebal kama gibiwinyo iye lok me acena ma bipoto ikom dano pi kwero gwoko Cik.14Ci Lulevi gibiwaco lok man bot jo Icrael ducu ki dwon malongo ni:15Cen opot ikom dano ma tiyo cal jok apaya mo nyo cal jok nyonyo ma kiliyo aliya matye gin me kwer bot Rwot, ma ladiro tiyo ki cinge ci cibo me awora i mung.Ci lwak ducu gibigamo ni, ‘Amen!’16Cen opot ikom dano ma pe woro wone ki mine.
Ci lwak ducu gibigamo ni, ‘Amen!’17Cen opot ikom dano ma kobo got ma poko wang lobo pa lawote woko.
Ci lwak ducu gibigamo ni, ‘Amen!’18Cen opot ikom dano ma pango wi lawange oto miyo weko yoo ma atir woko.
Ci lwak ducu gibigamo ni, ‘Amen!’19Cen opot ikom dano ma balo te pido pa labedo, nyo pa latin kic, nyo pa dato weko lok loye.
Ci lwak ducu gibigamo ni, ‘Amen!’20Cen opot ikom dano ma butu ki ciwone, pien keto lewic ikom wone.
Ci lwak ducu gibigamo ni, ‘Amen!’21Cen opot ikom dano ma butu ki lee mo.
Ci lwak ducu gibigamo ni, ‘Amen!’22Cen opot ikom dano ma butu ki lamine, kadi nya pa wone, kadi nya pa mine.
Ci lwak ducu gibigamo ni, ‘Amen!’23Cen opot ikom dano ma butu ki marone.
Ci lwak ducu gibigamo ni, ‘Amen!’24Cen opot ikom dano ma neko lawote alii i mung.
Ci lwak ducu gibigamo ni, ‘Amen!’25Cen opot ikom dano ma ki wilo ki lim pi neko dano.
Ci lwak ducu gibigamo ni, ‘Amen!’26Cen opot ikom dano ma pe mako lok ducu me cik man dok pe bene lubugi.
Ci lwak ducu gibigamo ni, ‘Amen!’”
Bible Society of Uganda