दानियेल1
1यहुदाआ राजा यहोयाकीमोअ सालतीइ तिसरा वोरह्योम बाबेलोअ राजा नबुकदनेस्सरे येरुसालेमोहों केंडवारीत लेदोन लड़ाय कोइलोअ तियारी कोअयी.2ताहां प्रभु देवे यहुदाआ राजा यहोयाकीमोहों आन तियाआ होयरोहो नबुकदनेस्सरोअ आथोम होपी देदो. नबुकदनेस्सर यहोवा देवोअ मंदिरोअ थोड़हा सोका बासनोपोअ बी आधिकार लेत लेदू, आन तो तियां बासनोहों शिनार देसोमेर्याआ तियाआ देवताआ मंदिरोम लेत जातु रोयू. आन तियां बासनोहों तियां देवताआ कोअमेहें मिकी देदे.3ताहां तिये राजे इस्राएली राजपरिवारोम आन हाजा नावलाअला माट्योमेहें रोत एहेलाहा वार जुवान्याहां लेतावे तेहें काजे तियाआ आधिकाऱ्योअ मुख्या अश्पनजोहो आदेश आप्यु.4ते जुवान निर्दुस, देख्याम बाहरी होबात्लाहा आन आखी गोठीम कोड़ाअला, आन बुद्दी वाअहीं पोआला आन जाणकार रोअहूं जोवे. ते राजमाहालोमेहें सेवा कोअहूं जोगाहा जोवे, आन तियांहां खास्द्याआं शास्र आन बाशाआ हिकवण आपाअहूं जोवे.5ते पोहाअता रोअहूं जोवे काजे राजा तियाआ रोटू आन पीइलाआ दाराक्शाआ रोहो तियांहां तिन वोरह्ये जाआं आपीइलोअ आदेश आप्यु, तिहींइं फासाड़ी तियांहां राजाआ सामने हजर कोअहूं जोवे.6तियांमेहें यहुदाआ कुलोअ निवड़ीइल्या दानियेल, हनन्या, मिशाएल, आन अजऱ्या नावोअ यहुदी ओता.7मुख्य आधिकाऱ्योअ मुख्ये तियांआं नावे बिहीरे मिक्ये; मोन्ज्ये दानियेलोअ नाव बेलेतशेस्सर, हनन्याआ शद्रक, मिशाएलोअ मेशक, आन अजऱ्याआ नाव अबेदनगो मिक्यो.8पोन राजा जो रोटू खातुतो आन जो दाराक्शाआ रोहो पितुतो, तो खात-पित कोइत ने विट्लीइलोअ काजे दानियेले तियाआ मोनोम ठरवीत लेदो आन तियाहा काजे तिये आधिकाऱ्योअ मुख्याहा रावणी कोअयी.9देवे आधिकाऱ्योअ मुख्याआ मोनोम दानियेलोअ बाप्तिम मेर-माया पोई देदी.10आधिकाऱ्योअ मुख्ये दानियेलोहो कोयो, “आंय माआ मालख्योहो बिहो, काहाके तुमाआ खाअलो-पीइलोअ तियेज ठरव्योहो, एहेलोहो ने ओवुहूं जोवे के तु ताअरीइ बाकी जुवानोअ रोत जाअखु रेज्यालू आन नाराज देखाअही आन राजा माहूं माअतीज टाकी देय.”11ताहां आधिकाऱ्योअ मुख्याहा जियाहा दानियेल, हनन्या, मिशाएल, आन अजऱ्या याआं साकरी कोए तेहें मिक्युतो, तियाहा दानियेले कोयो,12“आंय ताहूं विनंती कोअहो, के ताआ सेवकोहों दोहो दिही जाआं तापास आन आमाआ खाअलाआ काजे पाजोपालो आन पीइलाअ काजे पाईं एतोज आपजी.13ताहरुउ दोहो दिहोअ फासाड़ी आमाआ सोब आन जे जुवान राजाआ खाणो खाताहा तियांआं सोब पालजी; आन ताहूं पोटे तेहेलोहो आमुहूं वागवीइजी.”14तियांआं ए रावणी तिये मानित लेदी, आन दोहो दिही जाआं तियांहां फारकीइतु रोयु.15दोहो दिहोअ फासाड़ी तियांआं सोब राजाअ खाणो खानारा जुवानोअ रोत वादार हाजी आन नेरी देखाअयी.16ताहां तो मुख्यू तियांआं खाणो आन तियांआं पीइलोअ काजे ठरवीइल्यु दाराक्शाआ रोहो सोड़ीत, तियांहां पाजोपालोज आपू वोल्यू.17यहोवा देवे तियां शारुहू आखी जातीइ हिकवोणीम आन शास्राआ आखी जातीइ विद्यामेहें समजदारी आन ओकल आप्यी; आन दानियेल आखी जातीइ दर्शन आन होपनाआ अर्थ जांअनारु ओत गोयु.18नबुकदनेस्सर राजे जुवानोहों राजमहालोम लेत आवीइलोअ काजे तिन वोरह्ये जाआं आदेश आप्युतो आन ते दिही सेका, तिहींइं फाटी आधिकाऱ्योंअ मुख्यू तियांहां राजाअ सामने लेत गोयु.19राजा तियांअरी गोठी कोउ वोल्यु; आन दानियेल, हनन्या, मिशाएल, आन अजऱ्या याआं बोराबर तियां आखामेहें कोडोज ने ठर्यो; तिहींइं काजे ते राजाआ सामने हजर रोना वोल्या.20बुद्दी आन हारेक जातीइ सोमोजोअ बाप्तिम जों किबी राजा तियांहां फुसतुतो, तियामेहें ते राज्यामेर्याआ आक्खा माहाराज आन जादूगार रोत दोहो भाग वादार समजदार निहींताते.21आन दानियेल कोरेश राजाआ सालतीइ पेलठे वोरह्ये जाआं तिहीं सेवा कोअतू रोयु.
The Word for the World International