दानियेल2
1नबुकदनेस्सर राजाआ सालतीइ दुसरो वोरिही ओतो. तेहलामेहें एहेलोहो होपनो तिये देख्यो के जिहींवाअहीं तो उत्क्राअयु आन तियाआ डोआम रोत निंद उडीत गोयी.2ताहां राजे आदेश आप्यू, के माहाराज, बोड़वा, जादूगार आन खास्द्यां यां आखाहा हादा के राजाहा तियाआ होपनो कोत आपीत सेके; तिहींइं काजे ते आवया आन राजाआ सामने हजर ओवा.3ताहां राजे तियांहां कोयो, “मी एक होपनो पाल्योहो, आन माआ मोन जास्ती फिकरेम होय, के आंय या होपनाहां कि कोइत समजो?”4ताहां खास्द्यां राजाहा अरामी बाशामेहें कोयो, “राजा, तु कायम जिवतू रोअहूं जोवे! तू आमुहूं ताआ होपनो को, आन आमू तियाआ अर्थ कोहूं.”5राजे तियां खास्द्याहां उत्तर आप्यो, “ओ आदेश आंय आपीत सुकुहू के जर तुमू माआ होपनो आन तियाआ अर्थ माहूं ने कोत आपहा, ताहां तुमू पाक्का जाईंत ल्या के आंय तुमाआं पुकरान पुकरा कोई देहीं आन तुमाआं कोएं पेटाड़ी देहीं.6पोन जर तुमू माआ होपनो आन तियाआ अर्थ बी कोत देहा, ताहां आंय तुमुहूं जुदा-जुदा इलाम, भेट आन वोडू मानपान आपहीं. तिहींइं काजे ओमे तुमू माहूं होपनो आन तियाआ अर्थ बी कोत आपा.”7तियां बिहीरी वारी राजाहा कोयो, “राजा, ताआ होपनो आमुहूं कोत आपेए, ताहां आमू तियाआ अर्थ समजाड़ी देहूं.”8राजे तियांहां उत्तर आप्यो, “माहूं पाक्कू मुंदू होय के तुमू ए गोठी निस्ती वेल जावाड़ीइलोअ काजे कोया कोअताहा, काहाके माआ गोठ पाक्की ओत गोयीही ओं तुमुहूं मुंदू पोड़ीत गोयुहू एहलोहो माहूं लागेहे.9तियाहा काजे जर तुमू माहूं होपनो ने कोहा, ताहां तुमाआ काजे मोतोअ डोंड ठरवीइल्युज होय. काहाके तुमू तुमातुमाआज एक गोठ कोइत रोया ओय, के जाअहूं जांआं वेल ने बोदलाय, ताअहूं जाआं आपू राजाआ सामने ठोगोअ आन बोणावटी गोठी कोया कोअहूं. तियाहा काजे तुमू माहूं होपनो कोवा, ताहां माहूं मुंदू जाय के तुमू तियाआ अर्थ बी समजाड़ीत सेकहा.”10तियां खास्द्यां जाणकारो राजाहा कोयो, “धरतीपोअ एहेलोहो कोडोज नाहां ओवो, जों राजाआ मोनोमेर्यीइ गोठ कोत सेके; आन याआ सारकू कोडू बिहीरु राजा, मंत्री आन आधिकारी नाहां जी ओवू, जिये माहाराज, बोड़वा आन खास्द्याहां एहेलिही गोठ फुशीये.11जे गोठ राजा फुसेहे ते जास्ती कठीण होय, एहेलिही गोठ ते देवेज कोत सेकतेहे, पोन देवे ताम मोनव्योम नाहां रोते.”12ए गोठ उनात कोइत राजा हाजीक खिजवाअयू, आन खोतेए बाल्लायी आखा बाबेलोवाला जाणकारोहों माइत टाकीइलोअ आदेश आप्यू.13आखा बाबेलवाला जाणकारोहों माइत टाकीइलोअ आदेश निहील्यू देखीत राजाआ माअहें दानियेल आन तियाआ हात्योहों बी माइत टाकीइलोअ काजे होदीत फिरतेते.14बाबेलोवाला जाणकारोहों माइलोअ काजे निहींनारा तिया राजाआ राखवाली कोअनारा मुख्या आर्योकोहो दानियेले वारुहूं विसार कोइत ओकले वाअहीं समजाड़ीत देखाड़्यो;15तिये आर्योकोहो फुशो, “एतू कठीण आदेश राजाआ जिबानीम रोत काहा निहींयू?” ताहां आर्योके दानियेलोहो उंडे रोत कोत देखाड़्यो.16ताहरुउ दानियेले राजाहा होपनाआ अर्थ कोत देखाड़ीइलोअ काजे एखू वेल ठरवुहूं जोवे कोत मांय जात कोइत राजाहा रावणी कोअयी.17ताहां दानियेल कोअ जात कोइत तियाआ हाती हनन्या, मिशाएल, आन अजऱ्या यांहां खबर कोई देदी.18यी गोठीइ बाप्तिम होरगामेर्याआ देवोअ दया जोड़े तेहें प्रार्थना कोआ, बाबेलोवाला आखा जाणकारोअरी दानियेल आन तियाआ हात्योहों बी ने माअहूं जोवे.19तेहेलाम ए दोड़ाअली गोठी दानियेलोहो राती दर्शनोमेहें होरगामेर्येए देवे प्रगट कोअयी. ताहां दानियेले होरगामेर्याआ देवोअ धन्यवाद कोअयो.20“देवोअ नावोहो हादाफल धन्यवाद;काहाके बुद्धी आन ताकत तियाआ होय!21वेल आन दिहोहो तोज बोदलीइत्लू;राजहांहां बोहाड़ीलोअ आन उतारीइलो तियाआज काम होय;ओकल्याहां ओकल आन हानालाहां हान तोज आपत्लू;22दोड़ाअली गोठी तोज उखरीत काड्त्लू;तियाहा आंदारामेऱ्यीइ गोठी मुंदू होय;आन उजालो हादाफल तियाअरी रोहे.23ए माआं डायहांआं देव, आंय ताआ धन्यवाद आन स्तुती कोअहो,काहाके तुमे माहूं बुद्दी आन सेक्ती आप्यीही,आन ओमे तुमे ते उंडेए गोठी माहूं कोत देखाड़्यी, जे आमू तापोअ माग्यीते;तुमे आमुहूं राजाआ गोठ कोत आप्यीही.”24ताहां राजा बाबेलोअ जाणकारोहों आरवीइलाअ कोअते निवड़ कोअयीते, जियाहा आर्योकोअ जागे मायते जात कोइत दानियेले कोयो, “बाबेलोमेर्याआ जाणकारोहो मा आरवीही, पोन माहूं राजवाड़ामेहें राजाआ जागे लेत साल, आंय राजाहा तियाआ होपनाआ अर्थ कोहीं.”25ताहरुउ आर्योक दानियेलोहो ताबुड़ राजमहालोम लेत गोयु, आन तिये राजाहा एहें कोयो, “राजा माहूं यहुदी गुलामोमेहें एक माटी सापड़्युहू, जो ताआ होपनो आन तियाआ अर्थ ताहूं कोत सेकेहे.”26राजा दानियेलोहो फुशो, जियाआ नाव बेलतशस्सर बी ओतो, “केहें जों होपनो आंय पाल्योहो, तियाआ अर्थ कोअलोअ तामेहें एतिही सेक्ती होय के?”27दानियेले राजाहा उत्तर आप्यो, “राजा, जे उंडेए गोठ तुमे फुशीही, तियीही नाहां जादूगार, नाहां माहाराज, नाहां खास्द्यां, आन नाहां बोड़वा कोत सेकता,28पोन उंडेए गोठीइ अर्थ कोत आपनारु होरगामेऱ्युउ देवुज होय; आन तियेज नबुकदनेस्सर राजा ताहूं सेवट्याआ दिहोमेहें कि कि ओवनारो होय तों कोयोहो. तु हुवत्लु तेहेलाम जों होपनो देखाअयोहो, तों ओं होय:29“राजा, जेहेलाम लोटलोटू भविश्यामेहें कि कि ओवनारोहो यीं गोठीइ विसार कोअया कोअतुतो, तेहेलाम उंडेए गोठीइ अर्थ कोत आपनारे देवे ताहूं कि कि ओवनारो होय तों कोयो.30आंय आखा माअहोंम रोत हुशार होंव काजे ए गोठ माहूं नाहां कोयी, पोन ताहूं समजाअहूं जोवे काजे या होपनाआ अर्थ राजाहा कोत आपोहो, ताहां तु ताआ मोनोअ विसार समजीत सेकही.31“राजा, जेहेलाम तु होपनो पालतुतो, तेहेलाम ताहूं एक वोडी मुर्ती देखाअयी जे ताआ आगाड़ी उबी ओती. ते नांबीन पोली ओती; ते जुदी समकीइतीते, आन तियी मुर्तीइ रुप जुदू ओतु.32तियी मुर्तीइ मुनको सोका होनाआ ओतो, तियीइ सातिन आथ सांदीइ ओता, तियीइ पोटू आन कंबर तांबाआ ओती.33तियीइ टोसणे लोड़ाआ आन तियीइ गुडा थोड़ाक लोड़ाआ आन थोड़ाक कादवोअ ओता.34फाशोअ पालता पालतामेहें ताहूं एहलोहो देखाअयो के एक डोण कोडोज ने लुड़वीइता, तो तिया तियाआज मुर्तीइ गुडापोअ आवीत पोड़्यु, आन तियी मुर्तीही सुउवीत उडाड़्यी.35जेहेलोहो उनालामेहें खोलामेऱ्योअ पुहूटो वाराअरी उडीत जाहे, तेहेलोहो तों लोड़ाआ, कादुउ, तांबाआ, सांदीइ आन होनाआं आखो जों ओतो तों उडीत गोयो आन तियी मुर्तीइ वाहीं पात्तु ने साल्यु, आन जो डोण मुर्तीपोअ पोड़्युतो, तो डोण वोडू डोगोअ बोणीत कोइत पुरी धरतीपोअ पसरीत गोयु.36“राजाआ होपनो ओंज होय; आन ओमे आंय राजाहा होपनाआ अर्थ समजाड़ीत कोहीं.37राजा, तु ताम आखा राजामेहें रोत वोडू राजा होय, ताहूं होरगामेर्येए देवे राज्य, सेक्ती, सालती आन महिमा आप्यीही.38देव ताआ आथोम धरतीपोर्येए आक्खे माअहें, जंगलोमेर्येए जनवारे आन जुगोमेर्येए सिड़े होप्येहे; आन राजा, देवुज ताहूं तियांपोअ आधिकार सालवीइलोअ सेक्ती आप्यीही आन ओं होनाअ मुनको तुज होय.39ताआ फासाड़ी फाशोअ दुसरो राज उबो रोय, तों ताआ राजो रोत हानो रोय; फाशोअ एक तिसरो राज इसत्लेए होस उबो रोय, जों पुरी धरतीपोअ राज कोए.40ताहां शोवथो राज्य उबो रोय जों लोड़ाआ होस मजबुत रोय; जेहेलोहो लोड़ो आखी वस्तुहू सुउवीत टाकेहे, तेहेंज कोइत ओं राज बी यां आखाहा सुउवीत टाके.41राजा, तुमे जे मुर्तीइ गुडा आन इंगाअठ्यी पाल्यी, ते थोड़ही कुंबारोअ कादवोअ आन थोड़ही लोड़ाआ ओती, तेहेलोहो ओं शोवथो राज बी वाटाअलो रोय; तेबी कादवोम पेलाअलो लोड़ो जेहेलोहो वातड़ो रोहे तेहेलोहो तों राज बी वातड़ो रोय.42जेहेलीही गुडाआ इंगाअठ्यी थोड़ही लोड़ाआ आन थोड़ही कादवोअ ओती, तेहेंज कोइत तों राज बी थोड़क मजबुत आन थोड़क लुलो रोय.43राजा, जेहेलोहो लोड़ो कादवोमेहें पेलाइत रोल्यो तुमे देख्यो तियाआ अर्थ ओं होय, के तियाआ राजोअ माअहें एकमेकाअरी मिलीत ते रोय, पोन जेहेलोहो लोड़ो कादवोअरी नाहां पेलाअतो, तेहलेज तें माअहें बी ने पेलाय.44तियां राजहांआं दिहोमेहें होरगाअ देव, एक एहलोहो राज उबो कोए जों केदिहीं ने आरवाय, आन तों कोडा बिहीराअ आथोम ने पोड़े, पोन तों राज बिहीरा आखा राजोहों सुउवी देय, तियांहां नावासट आरवी देय; आन तों राज हादाफल टिकीत रोय.45राजा, जेहेलोहो तुमे देख्यो के एक डोण बिगर लुड़व्येज डोगोपोअ रोत निसे आवीत पोड़्यु, आन तिये आखो जो लोड़ो, इस्तल, तांबो, कादुउ, सांदी, आन होनो तिया आखाहा सुउवीत टाक्यो, एहें कोइत देवे राजाहा होपनो देखाड़्यो.”46ओं उनाइत कोइत नबुकदनेस्सर राजा उबडू पोड़ीत कोइत दानियेलोअ पागे पोड़्यू, आन दानियेलोअ काजे गाराहा सोढ़वे आन तियाआ सामने हाजी गुंदाअनारी वस्तु पेटाड़े तेहें काजे आदेश आप्यू.47फाशोअ राजे दानियेलोहो कोयो, “हुदाअलीज तुमाआं देवुज आखा देवोअ देव होय, तोज यीं निकाअली गोठीइ अर्थ प्रगट कोअहे. ओं काम निस्तु तुज कोइत सेकू.”48ताहां राजे दानियेलोहो राजवाड़ामेहें एका वोडा पदोपोअ नेमी देदू, आन तियाहा जाअखीलीही वोडी वोडी भेट आप्यी; आन ओ आदेश आप्यू के तो बाबेलोअ पुरा देसोपोअ अधिकारी आन बाबेलोअ आखा ग्यानीपोअ मुख्य बोणावी देदू.49ताहां दानियेलोअ रावणी वाअहीं राजे शद्रक, मेशक, आन अबेदनगोहो बाबेल देसोअ कामकाजोअ कोअते निवड़ कोइ देदी; पोन दानियेल सोताहा राजाआ राजवाड़ामेहें रोतुतो.
The Word for the World International