2 Krungchakuüa5
1Naiawng hai mang Sawlawmawn mih Thurai chup kim kowi kowh lup maten dow ki changta khai bowt. Nami kung kowi dow aia mih CHAKRAMANG vüi a-pa David lang kraah mih uanh maten Thurai chup kim kowi uang pawla khai. Naiawngün dow kuh, tai hai achap kawm uanh chekhai. Naiawngün dow Thurai chup kim kowi kowh dawngthawnguan towk rah kowi aia towah khai.2Now Thurai chup kim kowi kowh uanh ki thawpta bowk kung kowi dow Mang Sawlawmawn mih David marow (Zaiawn) kowi kowh towah mih sangbowk laitawm tawkpla Thurai chup kim kowi nauang pawla kownkow kamrüt khai. Aia dow Israel lawngtang aluchowuüa hai Israel kowh laipre krungchak kowi kowh aluchowuüa kowi Jerusalem marow kowi kuaah lawmah khai; amatni dow Israel kowh machak aluchowuüa chekhai.3Nami khin khe Israeluüa dow nasun Te Pawi kownkow nakowi uowi khai. Nami akhin dow Ethanim pami la ranit la khe chekhai.4Now aluchowuüa maten uang taküm kung kowi dow uamowuüa hai Leviuüa mih sangbowk laitawm tawkpla, taklowp taklangra te hai chimsaima mih uanh maten Thurai chup kim kowi kowpawla khai bowt.6Now mang Sawlawmawn hai aia hown kowh tawi mih maru kawmuüa maten dow sangbowk laitawm tawkpla pur kowi chia hai ruapur ahuma hown Thurai kowi phuchua khai. Amatni changla phuchua mih chia hai ruapur dow hu lai kowh nowng rüaah dowi chekhai.7Nami kung kowi dow sangbowk laitawm tawkpla mih Thurai chup kim lak kowi kowh Lang Chimsai Mih Towklak kowi uamowuüa uang pawla khai, now nami dow Cherup rup kowh lap krüa kowi towah büah khai.8Nahanow nami sangbowk laitawm tawkpla hai akawtlawng maten dow Cherup rup kowh lap hown tatung bowk khai.9Naiawngün akawtlawng dow klang lai rakowi naiawngün chem dow Thurai chup kim kowi kowh chimsaima mih towklak hownia ia khi khai. Nachenganchepaw chimsaima mih towklak uat hownia dow ia khi dowi chekhai. (Nami sangbowk laitawm tawkpla dow akawtlawng hailawm kawmat pat nami Thurai chup kim lak kowi uowi reng chekhai).10Nami sangbowk laitawm tawkpla lak kowi dow Mosi towah mih sangbowk laitawm huapher pre buk klen kowi tawngpaw uowi dowi chekhai. Nami sangbowk laitawm huapher dow Aigupta pren hownia Israeluüa uang lawt kung kowi Sinai hungh re-e uowi khe amatni kowi CHAKRAMANG peah mih chekhai.11Nami kung kowi uamowuüa dow chimsaima mih towklak hownia prang kowi uang lawt büah khai bowt. Nami dowi rawn amatni dow chowlowkkow kowi tachim tasai büah khai.12Levi krungchak kowi kowh tünteu hown tek meng reng mih Asaf, Heman, Jeduthun, amatni kowh chapauüa hai amatni kowh tainau-uüa dow adipükchow mih uan hown kowh kawngah mih kowrmow khupma hown phuchuara satlawt prakowi iowng büah khai, now klingchow, tingteng hai taraw tep büah khai. Nakhowk khe baw tum mih akeng mih uamowuüa 120 ia dow meng sarauüa hown tawi iowng khai.13Uamowuüa hai meng sarauüa baw tün hown, klingchow hai akeng mih tünteu hown akrowksang Thurai kowi tek awmrawm lai hai kiowah büah khai. Nakhowk khe amatni tek mih,“CHAKRAMANG dow aiungma chekhai,aia kowh achur uowi dowi mih sakraura dow chowngchowng saksakma anikma chekhai,” pakhai.Nami khin khe CHAKRAMANG chup kim lak kowi uangnim mih uang tek mawp khai.14Now naiawng hai CHAKRAMANG kowh kraingra dow Thurai chup kim lak kowi uangnim iawng atekma chekhai. Naiawng rakowi uamowuüa mih tawng lup paw nowng chang dowi bowt.
The Seed Company