2 Krungchakuüa6
1Nakhowk khe Sawlawmawn tek mih, “Aw CHAKRAMANG, ‘Uangnim atatma mih kowi ang uowi kown,’ padow en tek khai.2“Kawmat dow en vüi kowi kim klangiungma ang thawpta en lowk khowk. Mami kim dow chowngchowng saksakma en vüi uowi rah naown bowt kown,” pakhai.3Naiawng ki tek kung kowi dow mang Sawlawmawn mih aia ria kowi kowh iowng rimrim mih maru kawmuüa prakowi haitaplan hanow peah prasi khai.4Nami kung kowi dow aia tek mih, “CHAKRAMANG Israeluüa kowh Thurai dow akiow pauowi lah. Aia dow apa David tut-e kowh aiamat nawr hown takhamta mih uang pe tachiah khai bowt. Aia dow tek mih,5‘Aigupta pren hownia uang lawtla kung kowi nachupiiala ang kownkow ang kowh chup kim thawp rah Israeluüa pungmadawng hownia mia iawng mih krungchakuüa kowh marow paw ang ruiah dowi chekhai. Now ang maru Israeluüa luk kowi nachowng mang kown mih paw tawng iawng mih maru kowi paw ang ruiah dowi chekhai.6Nachenganchepaw kawmat dow ang nauowila kownkow Jerusalem marow kowi ang ruiah khai, now ang kowh maru Israeluüa kowi nakruitownla kownkow David kowi ang ruiah khai,’ pakhai,” pape khai.7CHAKRAMANG Israeluüa kowh Thurai vüi nathawp pe chup kim lowk kownkow apa David kowh sak kowi uowi chowdiah.8Nachenganchepaw apa David kowi CHAKRAMANG tek pe mih, “Ang vüi nathawp ang kim lowk kown en sak kowi uowi mih iung.9Tawkchedow ang vüi chup kim mih en nathawp kown nadowi; en matia kowh chapa chowtaih nathawp kown. Ang vüi chup kim dow aia chowtaih nathawp kown,” pape khai.10CHAKRAMANG dow aia kowh laikham uang pe tachiah khai bowt. Aia dow apa kowh mang rah pe ang khai, now CHAKRAMANG kowh laikham iawng Israel pren mang chowm rah kowi dow ang chowm khai bowt. Now CHAKRAMANG Israeluüa kowh Thurai vüi mami chup kim dow ang thawp pe khai.11Now nami chup kim kowi dow sangbowk laitawm tawkpla towk rah ang thawp pe khai. Nami sangbowk laitawm tawkpla lak kowi dow CHAKRAMANG kowh sangbowk laitawm laiklow uowi mih huapher uowi chekhai.12Nami kung kowi dow mang Sawlawmawn mih nakowi kowh takua talawm mih Israeluüa pur kowi CHAKRAMANG kowh phuchuara re-e iowng pah chawkla rut se chup Thurai khai.13(Mang Sawlawmawn mih kri hown areng klang tanga muk, adowng phia tanga muk hai akro sum muk mih prowng thawpah lowk hanow viadawng dawnglang kowi towah khai. Now aia dow nami prowng luk kowi kowphütah hanow Israeluüa maten pur kowi tua kung se rut pre pra trui kuang prakowi chawkla now chup Thurai khai).14Aia tek mih, “Aw CHAKRAMANG Israeluüa kowh Thurai, krawng hai mukuang kowi en iawng mih Thurai miapaw uowi dowi bowt. En dow en kowh sangbowk laitawm en townah reng. En dow plawng hown sak hown en tiama kowi mang mih en kowh naruüa luk kowi en kowh achur uowi dowi mih sakraura en tüng pe reng.15En kowh nar apa David tut-e kowh en takhamta mih en uang pe tachiah khai. En dow nawr hown kowh en tekta mih iawng en chang mih ani anging khi khai bowt.16“Aw CHAKRAMANG Israeluüa kowh Thurai, en kowh nar apa David tut-e kowh en takhamta mih laiklow townah diah. Aia kowi en tek pe mih, ‘En kowh chapauüa che en iawng ang kowh ari aiang kowi uowi iawng mang hai pe ching khai hanow Israel pren mang chowm rah kowi nachowm kown mih en krungchak hownia maru nakhawr kown nadowi,’ pakhai.17Aw CHAKRAMANG Israeluüa kowh Thurai, en kowh nar David tut-e kowh en takhamta mih laiklow uang pe tachiah diah.18“Nachenganchepaw Aw CHAKRAMANG Thurai, lusa kowi maru-uüa hown en tawi uowi nowm kown bow? Kuang dawng hai mukuang pren kowi khowm padow en uowi rah takowi dowi mih tawng iawng chow ang thawp en mih mami kim kowi en natakowi kown chow?19Nachenganchepaw aw CHAKRAMANG ang kowh Thurai, en kowh nar awr lü awr leng mih hawt sünta ang diah.20Mami en kowh chup kim prakowi ni chut uar prowt chi uang iu müah reng diah. Tawngplawng kowchow panow mami arah dow nachupiiala en kownkow en lang kloah mih chekhai. Naiawng rakowi mami en kowh chup kim prakowi dang se ang uang lü mih khin khe hawt sünta ang diah.21Mami arah prakowi dang se en kowh nar hai en kowh maru Israeluüa uang lü uang leng mih khin khe hawt sünta pe diah. Naiawng uang lü uang leng mih dow en uowi rah mukuang pren hownia hawt sünta pe diah, now amatni kowh angak dow lawtta pe diah.22“Now maru lowk mih akeng mih maru luk kowi tawita mata mih aprek ka kowh aia tawi dowi ma dowi mih sawi natakham kownkow mami en kowh chup kim re-e phuchuara ria kowi uang chepaw naia kown.23Nakhowk khe en mih mukuang hownia nami maru kowh laiklow hawt sünta pe diah, now chet pe tara nowm diah. Now chang ngak mih maru kowi dow aia kowh angak sung peah ripra diah, now chang angak dowi mih maru kowi dow lawtta diah.24“En kowi kingküala mih angak changta rakowi en kowh maru Israeluüa mih ransu-uüa tut-e tasen sum khe amatni che en tut-e uang plan hai mami en kowh chup kim kowi rowsi en hai en tut-e uang lü uang leng khai hanow25nakhowk khe amatni awr lü awr leng mih dow en mih mukuang pren hownia hawt sünta pe diah, now en kowh maru Israeluüa kowi amatni kowh angak lawtta pe hanow amatni pipu-uüa kowi en peah mih pren kowi uang plan pawla iawk diah.26“En kowh maru-uüa mih en kowi kingküala mih angak changta rakowi mukuang hownia en peah uang dowi mih khin khe amatni che mami en kowh chup kim prakowi uang dang khai, rowsi en khai, en tut-e awr lü awr leng khai, now en hownia ka ripra kowh angak hownia uang plan büah khai hanow27amatni awr lü awr leng mih mukuang pren hownia en hawt sünta pe diah, now en kowh nar Israeluüa kowh angak lawtta pe diah. Amatni kowi dow chownglawng kowi anowmma naia mangla kownkow tüngsangah diah, now nachangla dawngthawnguan kownkow amatni kowi en peah mih pren luk kowi peah uang diah.28“Pren kowi che khown hai kowng hawi uang kla khai, luprak keula mih rawka phaw khai, luprak kowi plawng hai tuiselengkeng nammow hawmh krawi cha khai, amatni kowh tawngbak mih marow kowi chünchü ransu-uüa uang rumah khai, lowra mih phih hai rawka uang ting khai chepaw29en kowh maru Israeluüa mih nami khin khe tarip kowh sak kowi rauma hown mami en kowh chup kim prakowi chawk rut se awr lü awr leng khai hanow30nami dow en kowh uowi rah mukuang pren hownia hawt sünta pe diah. Amatni kowi dow en mih lawtta diah. Amatni kowi dow amatni changah mih lup iawng chet pe tara diah. (Tawngplawng kowchow panow maru maten kowh sak kowi tawng chow uowi mih tuk mih dow en chowtaih chekhai).31Nahanow anging pipu-uüa kowi en peah mih pren kowi chownglawng prat en kowh maru-uüa nakram en hai en tiama kowi namang kown towbowt.32“Nami klen kowi en kowh maru Israeluüa nadowi mih prenlang maru-uüa paw en kowh ming kri kraingma mih hai en kowh akürma mih rut hown en kowh ransu-uüa kowi en ripah mih laiklow tawi ta chepaw naia. Nahanow nachupiia en kownkow pren lakma hownia uangah now mami en kowh chup kim prakowi dang se naawr lü naawr leng chepaw naia.33Nakhowk khe en kowh uowi rah mukuang pren hownia en mih hawt sünta pe diah. Lusa kowi kowh maru maten naia tukla en kownkow, en kowh maru Israeluüa iawng amatni paw ringkawma hown nakram en kownkow hai ang thawpah mih mami kim dow en kowh kim chekhai pami naia tukla kownkow amatni awr lü mih iawng chang pe diah.34“Ransu-uüa hown nacham tasen kownkow en cham chinah mih khin uowi chepaw naia. Nakhowk khe amatni cham uowi rah hownia en lang kloah mih marow prakowi hai en vüi kowi kowh ang thawpah mih en kowh chup kim prakowi dang se awr lü awr leng büah chepaw naia.35Nakhowk khe amatni awr lü awr leng mih dow mukuang pren hownia hawt sünta pe diah, now amatni kowi tawi tangila diah.36“Chang angak dowi mih maru dow miapaw uowi dowi chekhai. Naiawng rakowi en kowh maru-uüa changta angak mih khin khe amatni luk kowi en sak-ih dowi kowh ransu-uüa rut kowi en nacham ap-ah chepaw naia, now amatni kowi dow atawnchow rah kowi lah, alakma rah kowi lah nachangla nar kownkow ransu-uüa nacham pawla chepaw naia.37Now amatni cham takhangra pren kowi tarip kowh, ‘Anging changta angak khai, anging tawita mata khai bowt,’ pahai en tut-e awr taphuang chepaw naia.38Now nami pren kowi plawng hown sak hown en prakowi uang dang hai amatni pipu-uüa kowi en peah mih pren pra, en lang kloah mih marow pra, en vüi kowi kowh ang thawpah mih chup kim prakowi dang se en tut-e awr lü awr leng büah chepaw naia.39Nakhowk khe en uowi rah mukuang pren hownia amatni awr lü mih dow hawt sünta pe diah, en kowi kingküala mih angak changta mih en kowh maru-uüa kowi lawtta diah.40“Aw ang kowh Thurai, mami arah kowi kowh uang lü uang leng kown mih prakowi en kowh mik hai param mih kawmat hownia pacham uowi reng lah.41“Aw CHAKRAMANG Thurai, en kowh tanaira kowi uang uowi bowt,en kowh kür amatra, en kowh sangbowk laitawm tawkpla kowi uang kupla bowt.Aw CHAKRAMANG Thurai, en kowh uamowuüa mih lawngra tawnguat pacham khup bowt lah,en chang anging aiung mih maten rakowi en kowh naruüa pacham piaw bowt lah.42Aw CHAKRAMANG Thurai, en nümnapta khowk mih mang kowi hangkow nuata diah,en kowh nar David kowi en kowh achur uowi dowi mih sakraura en tüng pe mih ka tuakah diah,” pakhai.
The Seed Company