اقرأ Koreeg nà moog‑e 41

Koreeg nà moog‑e41

¹É gara duugu kuyjíigǐ dhaag‑e, Firuun e naamê caalg. E tall é deel Niil‑ɲiid,²tog eg ladaga deel‑ɲiid idig dhaag eg boyg eg wiəg e naam deel‑ɲiid.³É yaag ane taan togo biig e làdaga deel‑ɲiid idig dhaag eg əng e kooforg əndəg eg rag é golg beɲaag.⁴Togo nà kooforg əng‑i eg naam golg nà boyg wiəg‑i. Aneenda Firuun e fəi taw.⁵Firuun e nag naag e naamê caalge taan. E tur jerg iilgə idig dhaag eg ladaga é maan taman. Eg wiəg eg maŋg.⁶Taan é yaag ane, eg belaga jerg iilg idig dhaag idigə é jəŋəsəg é kora uu ná luusí ləzzǐ wəl‑uul‑i bəssiigǐ rəissíigǐ.⁷Jerg nà idig jəŋəsəg‑i e mud golgo nà idig dhaag maŋg wiəg‑i. Aneenda Firuun e fəi taw e gəmsə̌niigə e taa caalga.

⁸Wag fəissǐ‑i, Firuun jisə̌n e caggé wa, e cug é kaayg nà é Məsir iiŋg èg jag nà iilg taa kəgəərii‑ni. E birdĩgən caalga, war jaam man tu ná garsa ẽ rimdĩn caalg‑e wa.⁹Jen ná gafa feg‑e e bee Firuunun: “A tursu ä ŋalga a jis jam.¹⁰Ö bon ənsí dəəŋgə, o nagaaga é fol aan èg jen ná koyn buulg‑i é maag é jen ná gon jag nà paa ö maag‑e.¹¹É kaay man caalg e naamaaga ag dhaage, caalg man e bel kor iini dhog.¹²Ibrani ɲaa man taǎn èg dage ná taa dhəm é jen ná gon jag nà paa oon‑e. Ag birdĩn caalga e rimdí ə̃gən, jaam e rimdĩn cal iini asam ná kurəí.¹³É see jega assé ar ná rimsǐ ə̃gən‑i. U pəssaan é wag é kaam əənə, jen yaan u lada eel tuu u tifi guld‑əəŋ.”

¹⁴Aneenda Firuun e cug é Yusif iiŋ, e godáné tuu é raw. É gara səwsǐ eele e bədəgə goog nà yaag‑e e adaga é Firuun‑muu.¹⁵Firuun e bee Yusifən: “Caalg biig namsa. Jaam tu ná ê rimdi ə̃n‑i wa. Gəl a fiŋəssə beên e birdə̂nũn caalg‑e û rimdə̂n.”¹⁶Yusif e doos e pəd kor Firuunun e bee: “Aan rimdi wa. Tel eena ê rimdũn kor‑eelg‑e o eena ná ê cuund ö bon‑e.”

¹⁷Firuun e bee Yusifən: “Caalg namsaan a tall deel‑ɲiid.¹⁸Togo e ladaga deel‑eelg idig dhaag eg boyg è wiəg, eg naam deel‑ɲiid.¹⁹Taan biig e làdaga idig dhaag e koofarg e əngə əndəg. A tursu biig nà əng ar nee nee é Məsirə wa.²⁰Togo nà idig dhaag əng te eg naam tog nà idig dhaag boyg‑e.²¹Ma eg namsa golg‑e turəsə̌n ar namsa golg‑e wa, eg taa de təlldí jo e əng. Gəl a fəi taw.

²²Taan caalg biig e naama a tur jerg iilg idig dhaag eg kosso é maan taman e wiəg e maŋg.²³Taan é yaag a tur jerg iilg idig dhaag e belaga é maan taman idigə é jəŋəsəg é kora uu ná luusí ləzzǐ wəl‑uul‑i bəssiigi rəissíigi.²⁴Jerg nà idig jəŋəsəg nee e mud golgo nà idig dhaag wiəg maŋg‑e. A birsí caalg nee kaayg neen kay‑e, man tu ná garsa ẽ rimdí iilg wa‑e.”

²⁵Aneenda Yusif e bee Firuunun: “Caalg é Firuun na taman. Tel rimdə Firuunun jin ná ẽ jiddí.²⁶Togo nà idig dhaage boyg wiəg‑i rimdə duug idig dhaag, jerg nà idig dhaag iilg wiəg maŋg‑e, rimdə̂n duug idig dhaag, cal nii ná taman jo.²⁷Togo nà əng ləzǐ idig dhaag deel‑eelg‑e rimdə̂n duugu idig dhaag è jerg nà idig dhaag idig jəŋəsəg rəissí‑i basséegê uu ná lee wəl‑uul‑i rimdə duugu idig dhaag é kunu.

²⁸Ar ná a korsě Firuunun‑i, Tel rimsə Firuunun jen ná ê jisǐ é naag nà leeŋee‑ne.²⁹É duugu nà idig dhaag leeŋ‑e namas ê aa é mada é Məsirə.³⁰Duug nà leeŋ diiɲg idig dhaag‑e ê aa é kuni. Aneenda jag ê jer duug nà idig dhaag bilə̌níigǐ namas é Məsir‑i. Kun ê naam gaam Məsir kay.³¹Jaga ê jer duugu nà idig dhaag taa namees é mad‑e é kora duug nà leeŋ diiɲg‑i kun ê nəəmǐ əndəg‑i.³²Caalg naamsa Firuun og dhaag é kora kor liinǐ gar é Tel‑e. Aneenda Tel naa jisi é raw.

³³Bare bii Firuun ẽ loorro jaam ná eel taa kəgəər‑i ẽ goddo gaam Məsirə.³⁴Bii Firuun ẽ gawda məŋid jag biig ẽ ladda jeg nà suun‑i iilgə garg asaman ẽ warda fand taman é duugu nà idig dhaag é beranda.³⁵Ê mùdu namees ë muun kay é duug é beranda nà leeŋ‑e ẽ maldâna namees tad gaamg‑iilg é dende Firuun.³⁶Namasa niin ẽ goddo Məsirə é duug é kunu nà leeŋ idig dhaag‑e jag ẽ naamdê kuniigə wa gaamg kay.”

³⁷Firuun èg jag inəgin nà deeɲee‑ne eg tur asam ná kor é Yusif wiidǐ.³⁸Gəl Firuun e tisiigə e bii'ĩgən: “Agâ gəmsə̂n jaam ná iiŋ taa Kuuz é Tel ar jeniin‑i a?”³⁹Aneenda Firuun e bee Yusifən: “Oon Tel bijí oon u tur jisig nee kay. Jaam een tu ná eel taa kəgəər ar oon‑e wa.⁴⁰A talda oon ũ guu məŋid é maag ənəg é seene. Jaam een tu ná e bəidun‑i wa, aana jo jaa é məŋid‑i.”

⁴¹Firuun e bee Yusifən: “A taldoon jaa fande, û bəgə aldan ná é Məsir‑i.”⁴²Aneenda Firuun e god kitim ná gunǐ dë aas‑e e bədí é Yusif ees. E bədí ĩnə goog nà wiəg é seenaag e bədí ĩnə misə é param dë ŋalg.⁴³E 'əwdin é karo é mas ar ná əssí jen ná deeɲj‑e. Jag é Firuun e bàa kor e bèe: “Təldə teed‑eelga fəəzg Yusifən!” De taldanen jaa fande é Məsir.⁴⁴Aneenda Firuun e bee Yusifən: “Aan Firuunu. Aan məligə. Jaam een tu é Məsir te ná e war ë aas taw‑e wa war ê juru ë ludu bara e kurũní wa.”

⁴⁵Firuun e nag Yusifə Safnat Fani, e jəldí ĩnə Asnaat ɲaa é Foti Faara, seen ná jisə hayg‑e é On, e ada od iini. Yusifə e caam Məsir kay.⁴⁶Duugu é Yusif taǎn 30 é gara pəlldǐ kazaam‑eelg èg Firuun məlig é Məsir‑i. Yusif e waj tui é Firuun‑muu, e ada caam é wageeg kay é Məsirə.⁴⁷Jerg e koo əndəg é duug nà idig dhaag é beranda.⁴⁸Yusif e mud jerg nà sugsə́nə é duug nà idig dhaag jer kussí e məliigə gaamg‑iilg é Məsir. Gaam man e nəgí jerg inəgin nà lee gafa‑eelg dëg maad‑e.⁴⁹Yusif e mal jerg e talg əndəg ar sasaan é deel‑e, e bijiigə ẽ birdiigə é kora təlgə̌níigǐ əndəg‑i.

⁵⁰Bara mun é kun e ad‑e, Asnaat ɲaa é Foti Faara seen ná jisə hayg‑e é On, e koo jaalgeen dhaag Yusifən.⁵¹Yusif e nag jaa é moog iini Manasa e bee: “Məi Tel bij aan ã jer dawrg ənəg kay è maag nà dä baaw.”⁵²E nag yaan Afrayim e bee: “É kora Tel rəgsí èg daane a bel jaalge é gaam ná a dawrsé nii.”

⁵³Duug é beranda nà é Məsir‑i e cèe.⁵⁴Duug é kun nà idig dhaag‑e e àdaga, ar ná Yusif kursiní. Kun e naam é gaamg edaga kay. Gəl Məsirə kay e bel namees.⁵⁵É gara kun bəzǐ é Məsir‑i, jag kay e bad kor é Firuun iiŋ ẽ gəwdĩgən namees. Firuun e kor Məsiriigən kay: “Wəidə é Yusif iiŋ ũ jiddə jin ná kursí ũgun ũ jidd‑i.”⁵⁶É gara kun bəgsǐ gaam Məsir kay‑e, Yusif e god lewg ë muugu e mərd jerga Məsiriigən é kora kun nəəmsǐ əndəg Məsir kay‑e.⁵⁷Jag e adaga gaamg kay é Məsir ẽ marda jerg gar é Yusif é kora kun naamǎn əndəg addeeg‑ool kay‑e.

Pioneer Bible Translators

https://app.library.bible/content/a230cccfbf4362be