اقرأ 𐴈𐴝𐴔𐴡𐴥𐴓𐴢 23

𐴈𐴝𐴔𐴡𐴥𐴓𐴢23

¹𐴂𐴝𐴥𐴀𐴟𐴓𐴠 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴡𐴌 𐴔𐴠𐴔𐴁𐴡𐴥𐴌 𐴀𐴡𐴥𐴑𐴧𐴡𐴓𐴡𐴌 𐴀𐴟𐴎𐴟 𐴊𐴞𐴥𐴘𐴝𐴕 𐴊𐴡𐴥𐴌𐴞 𐴏𐴝𐴀𐴘𐴢 𐴈𐴡𐴀𐴌 𐴊𐴠, ”𐴁𐴝𐴥𐴘𐴧𐴝𐴙𐴕, 𐴀𐴝𐴀𐴛 𐴀𐴝𐴙𐴅 𐴉𐴡𐴙𐴅𐴧𐴡𐴕𐴃𐴡 𐴉𐴟𐴌𐴝𐴉𐴟𐴌𐴞 𐴏𐴝𐴥𐴉𐴢 𐴇𐴠𐴥𐴓𐴡𐴔𐴠 𐴀𐴝𐴓𐴧𐴝𐴌 𐴐𐴝𐴥𐴙𐴑𐴧𐴝𐴃𐴢 𐴎𐴞𐴕𐴊𐴞𐴒𐴞 𐴈𐴝𐴍𐴝𐴘𐴧𐴞𐴥.“²𐴇𐴠𐴥𐴃𐴟𐴕𐴡𐴃𐴢 𐴁𐴡𐴌𐴡 𐴀𐴞𐴔𐴝𐴔 𐴀𐴝𐴕𐴝𐴕𐴞𐴘𐴝𐴏𐴠 𐴔𐴝𐴕𐴟𐴥𐴙𐴐𐴢 𐴎𐴠𐴃𐴝𐴌𐴝𐴤 𐴂𐴝𐴥𐴀𐴟𐴓𐴡𐴌 𐴋𐴝𐴥𐴑𐴠 𐴃𐴞𐴥𐴘𐴝𐴘 𐴀𐴝𐴐𐴧𐴞𐴥𐴓𐴢 𐴀𐴞𐴥𐴃𐴝𐴌𐴝𐴌𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠, 𐴀𐴞𐴥𐴁𐴝𐴌𐴠 𐴒𐴝𐴓𐴢 𐴏𐴝𐴥𐴘 𐴔𐴝𐴙𐴃𐴧𐴡.³𐴔𐴡𐴕𐴃𐴡𐴌 𐴂𐴝𐴥𐴀𐴟𐴓𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴇𐴠𐴥𐴘 𐴔𐴟𐴕𐴝𐴉𐴠𐴥𐴑! 𐴀𐴝𐴓𐴧𐴝𐴘𐴠 𐴃𐴡𐴌𐴠𐴥 𐴔𐴝𐴌𐴞𐴁𐴡𐴥. 𐴃𐴟𐴘 𐴀𐴠𐴍𐴠𐴥 𐴐𐴡𐴥𐴌𐴞𐴘𐴡𐴃𐴢 𐴔𐴡𐴎𐴞𐴕 𐴀𐴠𐴥𐴕𐴝 𐴀𐴝𐴣𐴀𐴌 𐴁𐴞𐴏𐴝𐴌 𐴒𐴡𐴙𐴃𐴧𐴡𐴥 𐴁𐴡𐴙𐴐𐴧𐴡𐴥𐴏𐴢, 𐴔𐴡𐴕𐴃𐴡𐴌 𐴀𐴝𐴣𐴀𐴌𐴠𐴥 𐴔𐴝𐴌𐴞 𐴁𐴡𐴓𐴧𐴝 𐴇𐴡𐴥𐴑𐴟𐴔 𐴊𐴞𐴥 𐴃𐴟𐴘 𐴕𐴞𐴎𐴠 𐴃𐴡 𐴐𐴡𐴥𐴌𐴞𐴘𐴡𐴃𐴢 𐴁𐴝𐴥𐴚𐴒𐴡𐴌.“

⁴𐴎𐴠𐴃𐴝𐴌𐴝𐴤 𐴂𐴝𐴥𐴀𐴟𐴓𐴡𐴌 𐴋𐴝𐴥𐴑𐴠 𐴃𐴞𐴥𐴘𐴝𐴘 𐴀𐴝𐴐𐴧𐴞𐴥𐴓𐴢 𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴀𐴝𐴓𐴧𐴝𐴌 𐴁𐴡𐴌𐴡 𐴀𐴞𐴔𐴝𐴔𐴡𐴌𐴠 𐴁𐴠𐴀𐴞𐴎𐴧𐴡𐴃𐴞 𐴒𐴡𐴌𐴞𐴥 𐴁𐴡𐴓𐴧𐴝 𐴃𐴡𐴌 𐴑𐴞𐴦 𐴇𐴞𐴥𐴔𐴧𐴡𐴃𐴢!“

⁵𐴂𐴝𐴥𐴀𐴟𐴓𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴁𐴝𐴥𐴘𐴧𐴝𐴙𐴕, 𐴀𐴞𐴁𐴝𐴤 𐴁𐴡𐴌𐴡 𐴀𐴞𐴔𐴝𐴔 𐴊𐴠 𐴀𐴝𐴀𐴛 𐴕𐴡 𐴎𐴝𐴕𐴞, 𐴀𐴝𐴌𐴕𐴡𐴥𐴘𐴓𐴠 𐴀𐴠𐴕𐴊𐴞𐴓𐴧𐴝 𐴓𐴡𐴉𐴎𐴡𐴥 𐴀𐴠𐴏𐴃𐴠𐴔𐴝𐴓𐴢 𐴕𐴡 𐴒𐴡𐴙𐴃𐴧𐴝𐴥𐴔. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴃𐴡 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ’𐴕𐴞𐴎𐴡𐴌 𐴑𐴡𐴗𐴔𐴡𐴌 𐴏𐴡𐴥𐴊𐴧𐴝𐴌𐴡𐴌 𐴁𐴝𐴦𐴁𐴟𐴃𐴠 𐴁𐴟𐴌𐴝 𐴕𐴡 𐴈𐴡𐴘𐴧𐴡𐴥.‘ “

⁶𐴔𐴡𐴕𐴃𐴡𐴌 𐴂𐴝𐴥𐴀𐴟𐴓𐴠 𐴎𐴠𐴃𐴧𐴡𐴥𐴃𐴢 𐴀𐴠𐴑 𐴋𐴝𐴀𐴘𐴢 𐴏𐴝𐴊𐴟𐴑𐴝𐴥𐴘 𐴊𐴠 𐴀𐴝𐴦𐴌 𐴀𐴝𐴌𐴀𐴠𐴑 𐴋𐴝𐴀𐴘𐴢 𐴉𐴠𐴥𐴌𐴡𐴐𐴞 𐴊𐴠 𐴀𐴡𐴥𐴃𐴢 𐴉𐴝𐴘𐴧𐴠𐴥, 𐴀𐴞𐴥𐴁𐴝𐴘𐴠 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴡𐴃𐴢 𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ”𐴀𐴡𐴥 𐴁𐴝𐴥𐴘𐴧𐴝𐴙𐴕, 𐴀𐴝𐴀𐴛 𐴀𐴠𐴥𐴎𐴧𐴡𐴕 𐴉𐴠𐴥𐴌𐴡𐴐𐴞 𐴀𐴝𐴦𐴌 𐴉𐴠𐴥𐴌𐴡𐴐𐴞𐴌 𐴉𐴟𐴖𐴝; 𐴀𐴝𐴣𐴀𐴌𐴠𐴥 𐴁𐴞𐴏𐴝𐴌 𐴒𐴡𐴌𐴝𐴥 𐴎𐴝𐴌 𐴊𐴠 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥, 𐴀𐴝𐴀𐴛 𐴀𐴝𐴐𐴝𐴤 𐴒𐴡𐴌𐴞𐴥 𐴊𐴠, 𐴔𐴡𐴌𐴝 𐴀𐴡𐴥𐴑𐴧𐴡𐴓𐴢 𐴎𐴞𐴕𐴊𐴝 𐴀𐴡𐴥𐴘 𐴀𐴟𐴍𐴞𐴤𐴁𐴡.“⁷𐴀𐴞𐴥𐴁𐴝𐴘𐴠 𐴇𐴠𐴥𐴕𐴊𐴞𐴓𐴧𐴝 𐴈𐴡𐴘𐴧𐴠𐴥 𐴔𐴡𐴃𐴧𐴡𐴌, 𐴉𐴠𐴥𐴌𐴡𐴐𐴞 𐴀𐴠𐴊𐴧𐴠 𐴏𐴝𐴊𐴟𐴑𐴝𐴥𐴘 𐴀𐴡𐴥𐴑𐴧𐴡𐴓𐴡𐴌 𐴁𐴟𐴥𐴃𐴡𐴌𐴠 𐴇𐴡𐴙𐴅𐴧𐴝 𐴐𐴟𐴥𐴌𐴟 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴔𐴟𐴅𐴞𐴓𐴞𐴥𐴐𐴢 𐴁𐴝𐴥𐴑 𐴀𐴡𐴥𐴘𐴒𐴞𐴘𐴡𐴘.⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴏𐴝𐴊𐴟𐴑𐴝𐴥𐴘 𐴀𐴡𐴥𐴑𐴧𐴡𐴓𐴠 𐴈𐴡𐴀 𐴊𐴠, 𐴔𐴡𐴌𐴝 𐴀𐴡𐴥𐴑𐴧𐴡𐴓𐴢 𐴎𐴞𐴕𐴊𐴝 𐴀𐴡𐴥𐴘 𐴕𐴡 𐴀𐴟𐴍𐴞𐴤𐴁𐴡, 𐴀𐴞𐴥𐴃𐴝𐴌𐴝 𐴀𐴝𐴌𐴡𐴤 𐴈𐴡𐴀 𐴊𐴠, 𐴉𐴞𐴥𐴌𐴞𐴏𐴃𐴝 𐴘𐴡𐴥 𐴕𐴝𐴥𐴘, 𐴌𐴟𐴀 𐴘𐴡𐴥 𐴕𐴝𐴥𐴘; 𐴔𐴡𐴕𐴃𐴡𐴌 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴝𐴏𐴠𐴤 𐴊𐴠 𐴁𐴞𐴐𐴧𐴝𐴥𐴐𐴢 𐴒𐴡𐴌𐴠𐴥.

⁹𐴇𐴠𐴥𐴃𐴟𐴕𐴡𐴃𐴢 𐴇𐴠𐴥𐴍𐴠 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴇𐴝𐴥𐴚𐴒𐴝𐴔𐴝 𐴀𐴡𐴥𐴘𐴧𐴠. 𐴉𐴠𐴥𐴌𐴡𐴐𐴞 𐴉𐴞𐴥𐴌𐴑𐴝𐴌 𐴇𐴡𐴦𐴎𐴧𐴡𐴕 𐴀𐴝𐴓𐴠𐴔𐴠 𐴃𐴞𐴥𐴘𐴝𐴘 𐴒𐴟𐴐𐴧𐴝𐴤𐴌 𐴏𐴝𐴥𐴀𐴣𐴃𐴠 𐴀𐴠𐴀𐴕 𐴈𐴡𐴀𐴘𐴢 𐴁𐴝𐴌𐴝𐴤𐴁𐴝𐴌𐴞 𐴊𐴞𐴥𐴘𐴝𐴃𐴢 𐴊𐴡𐴙𐴅𐴧𐴠, ”𐴀𐴝𐴣𐴀𐴌𐴝 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴃𐴧𐴟 𐴇𐴡𐴕𐴡𐴤 𐴈𐴡𐴏𐴟𐴥𐴌𐴞 𐴕𐴡𐴥 𐴉𐴝𐴘. 𐴇𐴡𐴕𐴡𐴤 𐴌𐴟𐴀𐴘𐴠 𐴘𐴝𐴥 𐴉𐴞𐴥𐴌𐴞𐴏𐴃𐴝𐴘𐴠 𐴀𐴞𐴁𐴝𐴤 𐴓𐴧𐴡𐴥𐴘 𐴈𐴡𐴃𐴝𐴤 𐴈𐴡𐴘𐴓𐴠𐴥 𐴘𐴡 𐴑𐴞𐴥 𐴕𐴡 𐴉𐴝𐴌𐴠 𐴕𐴠𐴥؟“¹⁰𐴇𐴡𐴙𐴅𐴧𐴝 𐴎𐴠𐴃𐴧𐴡𐴥𐴃𐴢 𐴁𐴞𐴐𐴞𐴤 𐴋𐴡𐴣𐴀𐴌 𐴀𐴡𐴥𐴘𐴒𐴞𐴘𐴡𐴘, 𐴀𐴞𐴥𐴃𐴝𐴌𐴝 𐴂𐴝𐴥𐴀𐴟𐴓𐴡𐴌𐴠 𐴄𐴟𐴑𐴟𐴍𐴝-𐴄𐴟𐴑𐴟𐴍𐴝 𐴒𐴡𐴌𐴞𐴥𐴉𐴠𐴓𐴝𐴘𐴁𐴡 𐴁𐴡𐴓𐴞 𐴎𐴡𐴕𐴧𐴝𐴓𐴢 𐴓𐴗𐴝𐴥𐴘𐴠 𐴋𐴡𐴦𐴌𐴝𐴘𐴧𐴠𐴥, 𐴇𐴠𐴥𐴃𐴡𐴓𐴧𐴝 𐴘𐴡𐴥𐴒𐴧𐴗𐴝𐴘𐴠 𐴉𐴡𐴥𐴗𐴏𐴢 𐴀𐴡𐴥𐴑𐴧𐴡𐴓𐴡𐴌𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠, 𐴕𐴞𐴏𐴠 𐴎𐴝𐴘 𐴂𐴝𐴥𐴀𐴟𐴓𐴡𐴌𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴃𐴧𐴟 𐴁𐴡𐴓𐴝𐴎𐴟𐴌𐴞 𐴒𐴝𐴥𐴣𐴄𐴞𐴃𐴢 𐴓𐴡𐴘𐴀𐴝𐴕𐴞𐴤 𐴁𐴡𐴓𐴧𐴝.

¹¹𐴃𐴝𐴌𐴉𐴡𐴌 𐴊𐴞𐴕 𐴌𐴝𐴙𐴃𐴧𐴝 𐴔𐴝𐴓𐴞𐴑𐴠 𐴂𐴝𐴥𐴀𐴟𐴓𐴡𐴌 𐴋𐴝𐴥𐴑𐴠 𐴃𐴞𐴥𐴘𐴝𐴘 𐴈𐴡𐴀𐴌 𐴊𐴠, ”𐴇𐴞𐴥𐴔𐴧𐴡𐴃𐴢 𐴒𐴡𐴥𐴌; 𐴃𐴟𐴘 𐴎𐴠𐴕𐴊𐴞𐴓𐴧𐴝 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴝𐴣𐴀𐴌 𐴁𐴝𐴦𐴁𐴟𐴃𐴠 𐴒𐴡𐴁𐴝𐴤 𐴊𐴞𐴥𐴘𐴡𐴏𐴢, 𐴇𐴠𐴥𐴕𐴊𐴞𐴓𐴧𐴝 𐴃𐴡𐴌𐴃𐴧𐴟 𐴌𐴡𐴔 𐴐𐴡𐴥𐴀𐴌𐴡𐴃𐴢 𐴀𐴡𐴥 𐴒𐴡𐴁𐴝𐴤 𐴊𐴞𐴥𐴘𐴝 𐴉𐴡𐴌𐴞𐴁𐴡𐴥.“

𐴂𐴝𐴥𐴀𐴟𐴓𐴡𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴁𐴝𐴌 𐴏𐴝𐴙𐴓𐴢

¹²𐴃𐴝𐴌𐴉𐴡𐴌 𐴊𐴞𐴕 𐴁𐴞𐴀𐴕𐴧𐴝 𐴇𐴡𐴊𐴟𐴥𐴕 𐴘𐴡𐴇𐴟𐴥𐴊𐴞𐴘𐴠 𐴀𐴠𐴑𐴧𐴝𐴥𐴕 𐴏𐴝𐴙𐴓𐴢 𐴒𐴟𐴥𐴌𐴝𐴘 𐴈𐴡𐴏𐴡𐴥𐴔 𐴇𐴝𐴥𐴘𐴧𐴠 𐴊𐴠, 𐴀𐴞𐴥𐴃𐴝𐴌𐴝 𐴎𐴠𐴃𐴡𐴥𐴊𐴞𐴕 𐴂𐴝𐴥𐴀𐴟𐴓𐴡𐴌𐴠 𐴔𐴝𐴌𐴞𐴉𐴠𐴥𐴓𐴝𐴘 𐴕𐴡𐴥 𐴉𐴝𐴌𐴠 𐴇𐴠𐴥𐴃𐴡𐴊𐴞𐴕 𐴈𐴝𐴥𐴕𐴝-𐴉𐴞𐴕𐴝 𐴕𐴝 𐴈𐴝𐴥𐴘𐴁𐴡.¹³𐴏𐴝𐴙𐴓𐴢 𐴇𐴞𐴥𐴘𐴝𐴕𐴡𐴃𐴢 𐴏𐴝𐴓𐴞𐴐𐴢 𐴎𐴡𐴕𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴁𐴠𐴍𐴝𐴀𐴙𐴕 𐴐𐴝𐴥𐴔𐴞𐴓𐴢 𐴀𐴝𐴐𐴧𐴞𐴥𐴓𐴢.¹⁴𐴀𐴞𐴥𐴃𐴝𐴌𐴝 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴡𐴌 𐴀𐴠𐴊𐴧𐴠 𐴔𐴟𐴌𐴟𐴁𐴧𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴎𐴝𐴘 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝 𐴂𐴝𐴥𐴀𐴟𐴓𐴡𐴌𐴠 𐴔𐴝𐴌𐴞𐴉𐴠𐴥𐴓𐴝𐴘 𐴕𐴡𐴥 𐴉𐴝𐴌𐴞 𐴉𐴡𐴙𐴅𐴧𐴡𐴕𐴃𐴡 𐴈𐴝𐴥𐴕𐴝-𐴉𐴞𐴕𐴝 𐴕𐴝 𐴈𐴝𐴥𐴘𐴧𐴟𐴔 𐴈𐴡𐴀𐴘𐴢 𐴊𐴡𐴌𐴡𐴤𐴔𐴡𐴌𐴡 𐴈𐴡𐴏𐴡𐴥𐴔 𐴇𐴝𐴥𐴘𐴧𐴞.¹⁵𐴇𐴠𐴥𐴃𐴡𐴓𐴧𐴝 𐴘𐴝𐴓𐴝, 𐴃𐴟𐴣𐴀𐴝𐴥𐴌𐴝 𐴀𐴠𐴊𐴧𐴠 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴠 𐴀𐴞𐴥𐴁𐴝𐴌 𐴔𐴡𐴦𐴊𐴧𐴞𐴔𐴝 𐴀𐴝𐴌𐴡𐴤 𐴁𐴝𐴥𐴓𐴝𐴒𐴡𐴌𐴞 𐴃𐴝𐴇𐴝𐴥𐴑𐴞𐴃𐴢 𐴒𐴡𐴌𐴝𐴥 𐴉𐴡𐴌𐴠𐴌 𐴈𐴡𐴀𐴘𐴢 𐴀𐴞𐴥𐴁𐴝𐴌𐴠 𐴕𐴞𐴏𐴠 𐴃𐴟𐴣𐴀𐴝𐴥𐴌𐴝𐴌 𐴔𐴟𐴀𐴕𐴃𐴟 𐴀𐴝𐴕𐴞𐴤 𐴁𐴡𐴓𐴧𐴝 𐴎𐴡𐴕𐴧𐴝𐴓𐴡𐴌𐴠 𐴈𐴡𐴥𐴁𐴡𐴌 𐴊𐴡𐴥. 𐴀𐴝𐴣𐴀𐴌𐴝 𐴀𐴞𐴥𐴁𐴝 𐴀𐴠𐴍𐴠𐴥 𐴉𐴡𐴀𐴣𐴏𐴞𐴁𐴝𐴌 𐴀𐴝𐴒𐴠 𐴔𐴝𐴌𐴞𐴉𐴠𐴥𐴓𐴝𐴘 𐴁𐴡𐴓𐴧𐴝 𐴃𐴡𐴘𐴧𐴝𐴌 𐴀𐴝𐴏𐴞𐴤.“

¹⁶𐴔𐴡𐴕𐴃𐴡𐴌 𐴂𐴝𐴥𐴀𐴟𐴓𐴡𐴌 𐴁𐴝𐴥𐴀𐴘𐴕𐴝𐴘𐴠 𐴀𐴞𐴥𐴃𐴝𐴌𐴝𐴌 𐴏𐴝𐴙𐴓𐴡𐴌 𐴁𐴝𐴦𐴁𐴟𐴃𐴠 𐴉𐴟𐴥𐴙𐴕𐴧𐴠 𐴌𐴝𐴥𐴌, 𐴒𐴝𐴥𐴣𐴄𐴞𐴌 𐴁𐴟𐴥𐴃𐴡𐴌𐴠 𐴒𐴡𐴥𐴓𐴞 𐴂𐴝𐴥𐴀𐴟𐴓𐴡𐴌𐴠 𐴇𐴞𐴥𐴀𐴕 𐴎𐴝𐴕𐴝𐴘𐴧𐴠𐴥.

¹⁷𐴇𐴠𐴥𐴃𐴟𐴕𐴡𐴃𐴢 𐴂𐴝𐴥𐴀𐴟𐴓𐴠 𐴌𐴡𐴔𐴞 𐴐𐴝𐴥𐴀𐴂𐴢 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴠𐴎𐴧𐴡𐴕𐴡𐴌𐴠 𐴔𐴝𐴃𐴝𐴘 𐴈𐴡𐴀𐴌 𐴊𐴠, ”𐴀𐴠 𐴅𐴟𐴖𐴝𐴕 𐴉𐴟𐴖𐴝 𐴖𐴝𐴌𐴠 𐴎𐴡𐴕𐴧𐴝𐴓𐴢 𐴓𐴗𐴝𐴥𐴌 𐴇𐴝𐴣𐴏𐴠 𐴓𐴡𐴘𐴎𐴡, 𐴀𐴞𐴃𐴝𐴃𐴧𐴟 𐴘𐴡𐴥𐴒𐴧𐴗𐴝𐴌𐴠 𐴑𐴠𐴏𐴧𐴟𐴥 𐴈𐴡𐴘𐴁𐴝𐴥𐴌 𐴀𐴝𐴏𐴠𐴤.“

¹⁸𐴃𐴡𐴥𐴘 𐴇𐴠𐴥 𐴐𐴝𐴥𐴀𐴂𐴢 𐴂𐴗𐴝𐴥𐴘𐴠 𐴀𐴞𐴥𐴃𐴝𐴌𐴠 𐴎𐴡𐴕𐴧𐴝𐴓𐴡𐴌 𐴇𐴠𐴥𐴍𐴠 𐴀𐴝𐴕𐴞𐴤 𐴈𐴡𐴀𐴌 𐴊𐴠, ”𐴇𐴡𐴊𐴞 𐴂𐴝𐴥𐴀𐴟𐴓𐴠 𐴀𐴝𐴣𐴀𐴌𐴠𐴥 𐴔𐴝𐴃𐴝𐴘 𐴀𐴠 𐴅𐴟𐴖𐴝𐴕 𐴉𐴟𐴖𐴝 𐴖𐴝𐴌𐴠 𐴃𐴟𐴣𐴀𐴝𐴥𐴣𐴌 𐴇𐴠𐴥𐴍𐴠 𐴀𐴝𐴕𐴞𐴤 𐴁𐴡𐴓𐴧𐴝 𐴈𐴡𐴘𐴧𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴃𐴝𐴃𐴧𐴟 𐴁𐴡𐴥𐴓𐴠 𐴃𐴟𐴣𐴀𐴝𐴥𐴣𐴌𐴠 𐴑𐴠𐴏𐴧𐴟𐴥 𐴈𐴡𐴘𐴁𐴝𐴥𐴌 𐴀𐴝𐴏𐴠𐴤.“

¹⁹𐴇𐴠𐴥𐴃𐴟𐴕𐴡𐴃𐴢 𐴎𐴡𐴕𐴧𐴝𐴓𐴠 𐴀𐴞𐴥𐴃𐴝𐴌𐴠 𐴀𐴝𐴥𐴃𐴡𐴃𐴢 𐴊𐴡𐴥𐴌𐴞 𐴀𐴠𐴑𐴧𐴞𐴕𐴝𐴌𐴠 𐴓𐴡𐴘𐴎𐴝𐴘 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴡𐴌𐴃𐴧𐴟 𐴀𐴝𐴣𐴀𐴌𐴠𐴥 𐴑𐴞𐴦 𐴈𐴡𐴘𐴁𐴝𐴥𐴌 𐴀𐴝𐴏𐴠𐴤 𐴊𐴠𐴥؟“

²⁰𐴀𐴞𐴥𐴃𐴠 𐴈𐴡𐴀𐴌 𐴊𐴠, ”𐴇𐴡𐴊𐴟𐴥𐴕 𐴘𐴡𐴇𐴟𐴥𐴊𐴞𐴘𐴠 𐴂𐴝𐴥𐴀𐴟𐴓𐴡𐴌 𐴁𐴝𐴦𐴁𐴟𐴃𐴠 𐴀𐴝𐴌𐴡𐴤 𐴁𐴝𐴥𐴓𐴝𐴒𐴡𐴌𐴞 𐴃𐴝𐴇𐴝𐴥𐴑𐴞𐴃𐴢 𐴒𐴡𐴌𐴝𐴥 𐴉𐴡𐴌𐴠𐴌 𐴈𐴡𐴀𐴘𐴢 𐴇𐴝𐴙𐴓𐴧𐴝 𐴀𐴞𐴥𐴁𐴝𐴌𐴠 𐴕𐴞𐴏𐴠 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴡𐴃𐴢 𐴀𐴝𐴕𐴞𐴤 𐴁𐴡𐴓𐴧𐴝 𐴃𐴟𐴣𐴀𐴝𐴥𐴣𐴌𐴠 𐴀𐴝𐴌𐴡𐴏𐴢 𐴒𐴡𐴙𐴃𐴧𐴡𐴥 𐴀𐴠𐴑 𐴀𐴡𐴥𐴘𐴧𐴠.²¹𐴔𐴡𐴕𐴃𐴡𐴌 𐴃𐴟𐴀𐴛 𐴀𐴞𐴥𐴃𐴝𐴌𐴝𐴌 𐴈𐴡𐴃𐴝𐴤 𐴕𐴡 𐴉𐴟𐴥𐴙𐴕𐴧𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴏𐴝𐴓𐴞𐴐𐴢 𐴎𐴡𐴕𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴔𐴝𐴕𐴟𐴥𐴙𐴐𐴢 𐴓𐴟𐴑𐴞 𐴃𐴝𐴥𐴑𐴞 𐴂𐴝𐴥𐴀𐴟𐴓𐴡𐴌 𐴀𐴠𐴕𐴃𐴠𐴎𐴝𐴌 𐴒𐴡𐴌𐴠𐴥𐴌; 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴎𐴠𐴃𐴡𐴥𐴊𐴞𐴕 𐴔𐴝𐴌𐴞𐴉𐴠𐴥𐴓𐴝𐴘 𐴕𐴡𐴥 𐴉𐴝𐴌𐴠 𐴇𐴠𐴥𐴃𐴡𐴊𐴞𐴕 𐴈𐴝𐴥𐴕𐴝-𐴉𐴞𐴕𐴝 𐴕𐴝 𐴈𐴝𐴥𐴘𐴁𐴡 𐴈𐴡𐴀𐴘𐴢 𐴈𐴡𐴏𐴡𐴥𐴔 𐴇𐴝𐴥𐴘𐴧𐴠. 𐴘𐴝𐴓𐴝 𐴀𐴞𐴥𐴃𐴝𐴌𐴝 𐴃𐴡𐴘𐴧𐴝𐴌 𐴀𐴡𐴥𐴘𐴧𐴠, 𐴏𐴞𐴌𐴞𐴥𐴉𐴢 𐴃𐴟𐴣𐴀𐴝𐴥𐴣𐴌 𐴌𐴝𐴎𐴞𐴌𐴡𐴁𐴧𐴡𐴃𐴡𐴓𐴧𐴝 𐴀𐴠𐴕𐴃𐴠𐴎𐴝𐴌 𐴒𐴡𐴌𐴠𐴥𐴌 𐴊𐴠.“

²²𐴎𐴡𐴕𐴧𐴝𐴓𐴠 𐴅𐴟𐴖𐴝𐴕 𐴉𐴟𐴖𐴝 𐴖𐴝𐴌𐴠 𐴀𐴠𐴕𐴊𐴞𐴓𐴧𐴝 𐴇𐴡𐴥𐴑𐴟𐴔 𐴊𐴞𐴥 𐴊𐴟𐴣𐴌𐴝𐴘𐴊𐴞𐴘𐴠𐴥, ”𐴃𐴟𐴘 𐴀𐴝𐴣𐴀𐴌𐴠𐴥 𐴀𐴞𐴀𐴕 𐴎𐴝𐴕𐴝𐴘𐴊𐴞𐴘𐴡𐴥𐴏𐴢 𐴁𐴡𐴥𐴓𐴞 𐴇𐴡𐴕𐴡𐴤𐴑𐴞𐴘𐴡𐴌𐴠 𐴕𐴡 𐴈𐴡𐴀𐴙𐴐𐴢.“

𐴂𐴝𐴥𐴀𐴟𐴓𐴡𐴌𐴠 𐴇𐴝𐴥𐴑𐴞𐴔 𐴉𐴞𐴥𐴓𐴞𐴑𐴏𐴡𐴌 𐴇𐴠𐴥𐴍𐴠 𐴊𐴞𐴉𐴠𐴍𐴝𐴥𐴘𐴧𐴠

²³𐴁𐴝𐴦𐴊𐴠 𐴇𐴠𐴥 𐴎𐴡𐴕𐴧𐴝𐴓𐴢 𐴓𐴗𐴝𐴥𐴘𐴠 𐴐𐴝𐴥𐴀𐴂𐴢 𐴀𐴡𐴥𐴑𐴧𐴡𐴓𐴡𐴃𐴧𐴟 𐴊𐴟𐴘 𐴎𐴡𐴕𐴡𐴌𐴠 𐴔𐴝𐴃𐴝𐴘 𐴈𐴡𐴀𐴌 𐴊𐴠, ”𐴌𐴝𐴙𐴃𐴡𐴌 𐴕𐴡𐴖 𐴖𐴝 𐴁𐴝𐴥𐴎𐴠 𐴑𐴝𐴘𐴏𐴝𐴥𐴌𐴞𐴘𐴝𐴃𐴢 𐴎𐴝𐴘 𐴁𐴡𐴓𐴧𐴝 𐴊𐴟𐴘 𐴐𐴡𐴥𐴃𐴢 𐴉𐴡𐴥𐴗𐴏𐴢, 𐴇𐴡𐴥𐴙𐴃𐴧𐴡𐴌 𐴎𐴡𐴕 𐴒𐴟𐴥𐴌𐴝-𐴏𐴡𐴓𐴡𐴙𐴕𐴧𐴝 𐴉𐴡𐴥𐴗𐴏𐴢 𐴀𐴠𐴊𐴧𐴠 𐴊𐴟𐴘 𐴐𐴡𐴥𐴃𐴢 𐴉𐴡𐴓𐴡𐴥𐴖𐴝𐴕 𐴃𐴡𐴘𐴧𐴝𐴌 𐴒𐴡𐴌𐴞𐴥 𐴌𐴝𐴙𐴑𐴧𐴡𐴥.²⁴𐴂𐴝𐴥𐴀𐴟𐴓𐴡𐴓𐴧𐴝 𐴘𐴡𐴥 𐴒𐴟𐴥𐴌𐴝 𐴀𐴡𐴥𐴑𐴧𐴡𐴓𐴢 𐴃𐴡𐴘𐴧𐴝𐴌 𐴌𐴝𐴙𐴑𐴧𐴡𐴥, 𐴎𐴠𐴀𐴕𐴠 𐴀𐴞𐴥𐴁𐴝 𐴏𐴡𐴥𐴘𐴧𐴞 𐴏𐴡𐴥𐴓𐴝𐴔𐴡𐴃𐴠 𐴇𐴝𐴥𐴑𐴞𐴔 𐴉𐴞𐴥𐴓𐴞𐴑𐴏𐴡𐴌 𐴇𐴠𐴥𐴍𐴠 𐴉𐴡𐴀𐴣𐴏𐴠𐴒𐴡𐴘.“

²⁵𐴃𐴝𐴌𐴉𐴡𐴌𐴠 𐴘𐴡𐴥𐴒𐴧𐴗𐴝𐴘𐴠 𐴀𐴠𐴕𐴊𐴞𐴓𐴧𐴝 𐴀𐴠𐴑𐴧𐴝𐴥𐴕 𐴐𐴠𐴣𐴍𐴞𐴥 𐴓𐴠𐴙𐴑𐴧𐴠𐴥:²⁶”𐴀𐴝𐴀𐴛 𐴑𐴝𐴓𐴠𐴊𐴞𐴘𐴝 𐴓𐴝𐴘𐴏𐴞𐴥𐴘𐴝𐴏𐴡𐴌 𐴃𐴡𐴌𐴉𐴡𐴥𐴃𐴧𐴟 𐴁𐴞𐴐𐴞𐴤 𐴀𐴞𐴎𐴧𐴡𐴃𐴊𐴝𐴥𐴌 𐴇𐴝𐴥𐴑𐴞𐴔 𐴉𐴞𐴥𐴓𐴞𐴑𐴏𐴡𐴌𐴠 𐴏𐴡𐴥𐴓𐴝𐴔. ²⁷𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴊𐴡𐴥𐴌𐴞𐴉𐴠𐴓𐴝𐴙𐴓𐴢 𐴀𐴝𐴌 𐴔𐴝𐴌𐴞𐴉𐴠𐴥𐴓𐴝𐴘𐴃𐴡 𐴏𐴝𐴀𐴙𐴓𐴢, 𐴔𐴡𐴕𐴃𐴡𐴌 𐴀𐴝𐴀𐴛 𐴎𐴠𐴣𐴃𐴧𐴠𐴥 𐴀𐴞𐴁𐴝𐴤 𐴀𐴠𐴥𐴎𐴧𐴡𐴕 𐴌𐴡𐴔𐴞 𐴔𐴝𐴕𐴟𐴥𐴙𐴐𐴢 𐴊𐴠 𐴎𐴝𐴕𐴞 𐴉𐴝𐴙𐴅𐴧𐴞𐴥, 𐴀𐴝𐴀𐴛 𐴀𐴝𐴣𐴀𐴌 𐴉𐴡𐴥𐴗𐴏𐴢 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴎𐴝𐴘 𐴀𐴞𐴁𐴝𐴤𐴌𐴠 𐴁𐴝𐴏𐴝𐴘𐴓𐴡𐴘𐴧𐴞𐴥.²⁸𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴞𐴁𐴝𐴤𐴌𐴠 𐴑𐴞𐴘𐴡𐴥𐴓𐴧𐴝 𐴀𐴠𐴓𐴎𐴝𐴔 𐴊𐴠𐴌 𐴊𐴠 𐴇𐴞𐴥𐴘𐴝𐴕 𐴀𐴝𐴣𐴀𐴃𐴧𐴟 𐴎𐴝𐴙𐴕𐴃𐴡 𐴔𐴡𐴕𐴠𐴈𐴡𐴘𐴧𐴠𐴥 𐴌𐴝𐴥𐴌, 𐴀𐴝𐴀𐴛 𐴀𐴞𐴁𐴝𐴤𐴌𐴠 𐴀𐴞𐴥𐴃𐴝𐴌𐴝𐴌 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴡𐴃𐴢 𐴓𐴡𐴘𐴒𐴞𐴘𐴞𐴥;²⁹𐴁𐴝𐴦𐴊𐴠 𐴀𐴝𐴀𐴛 𐴎𐴝𐴕𐴞 𐴉𐴝𐴙𐴅𐴧𐴞𐴥 𐴊𐴠, 𐴀𐴞𐴥𐴃𐴝𐴌𐴝 𐴀𐴞𐴁𐴝𐴤𐴌𐴠 𐴀𐴞𐴥𐴃𐴝𐴌𐴝𐴌 𐴐𐴡𐴥𐴌𐴞𐴘𐴡𐴃𐴡𐴌 𐴁𐴝𐴦𐴁𐴟𐴃𐴠 𐴀𐴠𐴓𐴎𐴝𐴔 𐴓𐴝𐴒𐴝𐴌 𐴊𐴠; 𐴔𐴡𐴕𐴃𐴡𐴌 𐴀𐴞𐴁𐴝𐴤𐴃𐴧𐴟 𐴔𐴡𐴌𐴝 𐴉𐴡𐴌𐴠 𐴊𐴠 𐴘𐴝𐴥𐴃𐴡 𐴎𐴞𐴘𐴡𐴥𐴓𐴢 𐴈𐴝𐴍𐴝 𐴉𐴡𐴌𐴠 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴇𐴡𐴕𐴡𐴤 𐴈𐴡𐴏𐴟𐴥𐴌𐴞 𐴕𐴝𐴥𐴘.³⁰𐴎𐴠𐴣𐴃𐴧𐴠𐴥 𐴀𐴝𐴣𐴀𐴌𐴠𐴥 𐴈𐴡𐴥𐴁𐴡𐴌 𐴊𐴞𐴥𐴘𐴝 𐴒𐴞𐴥𐴘𐴠 𐴊𐴠 𐴑𐴞, 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴁𐴝𐴌 𐴏𐴝𐴙𐴓𐴢 𐴒𐴟𐴥𐴌𐴝𐴘𐴧𐴠; 𐴀𐴝𐴀𐴛 𐴀𐴞𐴁𐴝𐴤𐴌𐴠 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴃𐴟𐴣𐴀𐴝𐴥𐴣𐴌 𐴇𐴝𐴣𐴏𐴠 𐴊𐴞𐴉𐴠𐴍𐴝𐴥𐴘𐴧𐴞 𐴊𐴠. 𐴎𐴠𐴃𐴝𐴌𐴝𐴤 𐴀𐴞𐴁𐴝𐴤𐴌𐴠 𐴀𐴠𐴓𐴎𐴝𐴔 𐴓𐴝𐴒𐴝𐴌, 𐴀𐴝𐴀𐴛 𐴀𐴞𐴥𐴃𐴝𐴌𐴝𐴌𐴠 𐴇𐴡𐴥𐴑𐴟𐴔 𐴊𐴞𐴥𐴘𐴞 𐴊𐴠, 𐴀𐴞𐴥𐴃𐴝𐴌𐴝𐴃𐴧𐴟 𐴀𐴞𐴁𐴝𐴤𐴌 𐴀𐴟𐴓𐴋𐴝 𐴎𐴠 𐴀𐴠𐴓𐴎𐴝𐴔 𐴀𐴡𐴥𐴑𐴧𐴡𐴓𐴢 𐴀𐴝𐴏𐴠𐴤 𐴇𐴞𐴥𐴀𐴕 𐴃𐴟𐴣𐴀𐴝𐴥𐴣𐴌 𐴔𐴟𐴀𐴕𐴃𐴟 𐴂𐴠𐴦𐴐𐴢 𐴒𐴡𐴌𐴞𐴥 𐴁𐴡𐴓𐴧𐴝.“

³¹𐴃𐴡𐴥𐴘 𐴇𐴡𐴥𐴑𐴟𐴔 𐴔𐴡𐴎𐴞𐴕 𐴉𐴡𐴥𐴗𐴏𐴢 𐴀𐴡𐴥𐴑𐴧𐴡𐴓𐴠 𐴇𐴠𐴥 𐴌𐴝𐴙𐴃𐴧𐴝 𐴂𐴝𐴥𐴀𐴟𐴓𐴡𐴌𐴠 𐴀𐴠𐴕𐴃𐴞𐴂𐴝𐴃𐴠𐴌𐴞𐴏𐴢 𐴐𐴡𐴥𐴀𐴌𐴡𐴃𐴢 𐴓𐴡𐴘𐴒𐴞𐴘𐴠𐴥.³²𐴃𐴝𐴌𐴉𐴡𐴌 𐴊𐴞𐴕، 𐴀𐴞𐴥𐴃𐴝𐴌𐴝 𐴒𐴟𐴥𐴌𐴝-𐴏𐴡𐴓𐴡𐴙𐴕𐴧𐴝 𐴉𐴡𐴥𐴗𐴏𐴢 𐴏𐴟𐴕𐴡𐴌𐴠 𐴂𐴝𐴥𐴀𐴟𐴓𐴡𐴌 𐴉𐴟𐴥𐴖𐴝𐴣𐴃𐴞 𐴊𐴟𐴣𐴌𐴝𐴘𐴊𐴞 𐴒𐴝𐴥𐴣𐴄𐴞𐴃𐴢 𐴖𐴝𐴦𐴉𐴠𐴏𐴢 𐴀𐴝𐴀𐴘𐴒𐴞𐴘𐴡𐴘.³³𐴒𐴟𐴥𐴌𐴝-𐴏𐴡𐴓𐴡𐴙𐴕𐴧𐴝 𐴉𐴡𐴥𐴗𐴏𐴢 𐴏𐴟𐴕 𐴑𐴝𐴘𐴏𐴝𐴥𐴌𐴞𐴘𐴝𐴃𐴢 𐴉𐴡𐴀𐴣𐴙𐴐𐴧𐴠 𐴌𐴝𐴥𐴌, 𐴇𐴝𐴥𐴑𐴞𐴔𐴡𐴌𐴠 𐴐𐴠𐴣𐴍𐴞𐴥 𐴒𐴝𐴥𐴕 𐴊𐴞𐴦𐴘𐴠𐴥, 𐴀𐴝𐴦𐴌 𐴂𐴝𐴥𐴀𐴟𐴓𐴡𐴌𐴠 𐴘𐴡𐴥 𐴀𐴞𐴥𐴁𐴝𐴌 𐴀𐴝𐴥𐴃𐴡𐴃𐴢 𐴒𐴡𐴏𐴝𐴥𐴘𐴊𐴞𐴘𐴠.³⁴𐴇𐴝𐴥𐴑𐴞𐴔𐴠 𐴐𐴠𐴣𐴍𐴞𐴥 𐴒𐴝𐴥𐴕 𐴉𐴡𐴌𐴞𐴥, 𐴂𐴝𐴥𐴀𐴟𐴓𐴡𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴘 𐴇𐴡𐴕 𐴎𐴝𐴒𐴝𐴌؟“ 𐴂𐴝𐴥𐴀𐴟𐴓𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴑𐴞𐴓𐴞𐴐𐴞𐴥𐴘𐴝𐴌.“³⁵𐴇𐴝𐴥𐴑𐴞𐴔𐴠 𐴈𐴡𐴀𐴌 𐴊𐴠, ”𐴃𐴡𐴌 𐴀𐴠𐴓𐴎𐴝𐴔 𐴓𐴝𐴒𐴡𐴘𐴝 𐴀𐴡𐴥𐴑𐴧𐴡𐴓𐴢 𐴀𐴠𐴍𐴠𐴥 𐴉𐴡𐴀𐴣𐴏𐴞𐴓𐴠 𐴀𐴝𐴀𐴛 𐴃𐴡𐴌 𐴔𐴡𐴦𐴊𐴧𐴞𐴔𐴝𐴌 𐴁𐴝𐴦𐴁𐴟𐴃𐴠 𐴉𐴟𐴥𐴕𐴞𐴘𐴟𐴔.“ 𐴁𐴝𐴦𐴊𐴠 𐴘𐴡𐴥𐴒𐴧𐴗𐴝𐴘𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠, 𐴂𐴝𐴥𐴀𐴟𐴓𐴡𐴌𐴠 𐴈𐴠𐴥𐴌𐴟𐴊𐴡𐴌 𐴌𐴝𐴎𐴔𐴡𐴇𐴡𐴥𐴓𐴡𐴃𐴢 𐴉𐴝𐴀𐴌𐴝 𐴊𐴞𐴥 𐴌𐴝𐴑𐴝𐴤 𐴎𐴝𐴘 𐴁𐴡𐴓𐴧𐴝.

The Word for the World International

https://app.library.bible/content/87faca8b51c22590