阅读𐴈𐴝𐴔𐴡𐴥𐴓𐴢 24

𐴈𐴝𐴔𐴡𐴥𐴓𐴢24

𐴂𐴝𐴥𐴀𐴟𐴓𐴡𐴌 𐴀𐴟𐴓𐴋𐴝 𐴔𐴡𐴦𐴊𐴧𐴞𐴔𐴝

¹𐴉𐴝𐴣𐴏𐴢 𐴊𐴞𐴕 𐴁𐴝𐴦𐴊𐴠 𐴁𐴡𐴌𐴡 𐴀𐴞𐴔𐴝𐴔 𐴀𐴝𐴕𐴝𐴕𐴞𐴘𐴝𐴏𐴠 𐴇𐴡𐴦𐴎𐴧𐴡𐴕 𐴔𐴟𐴌𐴟𐴁𐴧𐴞 𐴓𐴡𐴦𐴘𐴢 𐴀𐴠𐴊𐴧𐴠 𐴃𐴝𐴌𐴃𐴟𐴓𐴞𐴘𐴝𐴏𐴢 𐴕𐴝𐴔𐴡𐴌 𐴀𐴠𐴎𐴧𐴡𐴕 𐴀𐴟𐴑𐴞𐴓𐴢 𐴓𐴡𐴦𐴘𐴢 𐴕𐴞𐴏𐴠 𐴑𐴝𐴘𐴏𐴝𐴥𐴌𐴞𐴘𐴝𐴃𐴢 𐴒𐴞𐴦𐴘𐴠𐴥, 𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴇𐴝𐴥𐴑𐴞𐴔𐴡𐴌 𐴇𐴝𐴣𐴏𐴠 𐴂𐴝𐴥𐴀𐴟𐴓𐴡𐴌 𐴀𐴟𐴓𐴋𐴝 𐴀𐴠𐴓𐴎𐴝𐴔 𐴀𐴡𐴥𐴑𐴧𐴡𐴓𐴢 𐴂𐴠𐴦𐴐𐴢 𐴒𐴡𐴙𐴅𐴧𐴞𐴥𐴓𐴢.²𐴂𐴝𐴥𐴀𐴟𐴓𐴡𐴌𐴠 𐴁𐴟𐴥𐴃𐴡𐴌𐴠 𐴔𐴝𐴃𐴝 𐴁𐴝𐴘 𐴁𐴝𐴦𐴊𐴠, 𐴃𐴝𐴌𐴃𐴟𐴓𐴞𐴘𐴝𐴏𐴠 𐴇𐴝𐴥𐴑𐴞𐴔𐴡𐴌 𐴇𐴝𐴣𐴏𐴠 𐴀𐴠𐴓𐴎𐴝𐴔 𐴀𐴡𐴥𐴑𐴧𐴡𐴓𐴢 𐴂𐴠𐴦𐴐𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠, 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴣𐴌 𐴇𐴡𐴥𐴑𐴟𐴔𐴡𐴌 𐴃𐴡𐴓𐴠 𐴀𐴝𐴣𐴀𐴌𐴝 𐴁𐴡𐴀𐴗𐴃𐴢 𐴊𐴠𐴌𐴞 𐴓𐴡𐴥𐴃𐴞 𐴁𐴞𐴐𐴞𐴤 𐴐𐴝𐴥𐴕𐴃𐴞𐴃𐴢 𐴀𐴝𐴏𐴞𐴤, 𐴀𐴝𐴦𐴌 𐴃𐴟𐴣𐴀𐴝𐴥𐴣𐴌 𐴁𐴝𐴥𐴓𐴝 𐴕𐴡𐴎𐴡𐴌𐴞𐴘𐴝𐴌 𐴎𐴡𐴌𐴞𐴘𐴝 𐴀𐴠 𐴑𐴡𐴗𐴔𐴡𐴌 𐴖𐴡𐴌𐴠 𐴁𐴡𐴀𐴗𐴃𐴢 𐴋𐴡𐴥𐴙𐴓𐴧𐴝 𐴃𐴡𐴌𐴑𐴞 𐴀𐴝𐴙𐴐𐴧𐴠𐴥.³𐴀𐴡𐴥 𐴀𐴞𐴎𐴧𐴡𐴃𐴊𐴝𐴥𐴌 𐴉𐴞𐴥𐴓𐴞𐴑𐴏, 𐴀𐴝𐴣𐴀𐴌𐴝 𐴇𐴞𐴥𐴘𐴝𐴕 𐴇𐴝𐴥𐴀𐴌 𐴋𐴡𐴥𐴙𐴓𐴧𐴝𐴃𐴢, 𐴇𐴝𐴥𐴀𐴌 𐴎𐴝𐴒𐴝𐴃𐴢 𐴉𐴟𐴌𐴝𐴉𐴟𐴌𐴞 𐴐𐴟𐴥𐴑𐴟𐴌𐴞𐴘𐴝𐴌 𐴏𐴝𐴥𐴀𐴣𐴃𐴠 𐴑𐴡𐴁𐴟𐴓𐴢 𐴒𐴡𐴌𐴞𐴥.⁴𐴔𐴡𐴕𐴃𐴡𐴌 𐴀𐴝𐴣𐴀𐴃𐴧𐴟 𐴃𐴟𐴣𐴀𐴝𐴥𐴣𐴌 𐴄𐴝𐴙𐴔 𐴀𐴝𐴌 𐴁𐴡𐴌𐴁𐴝𐴊𐴢 𐴊𐴞𐴃𐴡 𐴔𐴡𐴕𐴠 𐴕𐴡 𐴈𐴡𐴀𐴌, 𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴞𐴥𐴌, 𐴔𐴠𐴀𐴌𐴁𐴝𐴕𐴞 𐴒𐴡𐴥𐴌𐴞 𐴀𐴝𐴣𐴀𐴌𐴝𐴌 𐴈𐴡𐴃𐴝𐴤 𐴒𐴟𐴥𐴕 𐴉𐴟𐴥𐴕𐴡. 𐴀𐴝𐴣𐴀𐴌𐴝 𐴇𐴡𐴦𐴑𐴧𐴝𐴥𐴕 𐴈𐴡𐴃𐴝𐴤𐴃𐴢 𐴁𐴠𐴒𐴧𐴟𐴥𐴕 𐴉𐴟𐴥𐴌𐴝𐴘 𐴊𐴞𐴥𐴘𐴟𐴔.

⁵”𐴀𐴝𐴣𐴀𐴌𐴝 𐴓𐴡𐴦𐴃𐴢 𐴉𐴝𐴘𐴧𐴞𐴥 𐴊𐴠, 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝 𐴀𐴡𐴥𐴙𐴓𐴊𐴠 𐴀𐴠𐴑𐴧𐴝𐴥𐴕 𐴁𐴞𐴉𐴡𐴃𐴢; 𐴀𐴞𐴁𐴝𐴤𐴘𐴠 𐴉𐴟𐴌𐴝 𐴊𐴟𐴕𐴞𐴘𐴝𐴙𐴌 𐴘𐴡𐴇𐴟𐴥𐴊𐴞 𐴁𐴠𐴒𐴧𐴟𐴥𐴕𐴡𐴌 𐴁𐴟𐴥𐴃𐴡𐴌𐴠 𐴇𐴝𐴥𐴚𐴒𐴝𐴔𐴝 𐴉𐴡𐴘𐴊𐴝 𐴒𐴡𐴌𐴠𐴥. 𐴀𐴞𐴁𐴝𐴤 𐴀𐴡𐴥𐴙𐴓𐴊𐴠 𐴕𐴝𐴏𐴝𐴥𐴌𐴞 𐴕𐴝𐴔𐴡𐴌 𐴊𐴡𐴓𐴡𐴌 𐴀𐴠𐴒𐴧𐴗𐴝𐴤 𐴏𐴡𐴥𐴊𐴧𐴝𐴌.⁶𐴀𐴞𐴁𐴝𐴤𐴘𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴢 𐴀𐴟𐴥𐴊𐴧𐴗𐴝 𐴕𐴝𐴉𐴝𐴑 𐴒𐴡𐴙𐴃𐴧𐴡𐴥 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴠𐴥, 𐴀𐴝𐴣𐴀𐴌𐴝 𐴀𐴞𐴁𐴝𐴤𐴌𐴠 𐴇𐴠𐴥𐴃𐴡𐴓𐴧𐴝 𐴒𐴠𐴌𐴠𐴉𐴃𐴝𐴌 𐴒𐴡𐴙𐴅𐴧𐴞𐴥 𐴊𐴠.⁷𐴔𐴡𐴕𐴃𐴡𐴌 𐴎𐴡𐴕𐴧𐴝𐴓𐴢 𐴓𐴝𐴘𐴏𐴞𐴥𐴘𐴝𐴏𐴢 𐴀𐴝𐴀𐴘𐴧𐴡𐴌𐴠 𐴀𐴞𐴁𐴝𐴤𐴌𐴠 𐴀𐴝𐴥𐴊𐴡𐴔𐴝 𐴒𐴡𐴌𐴞𐴥 𐴀𐴝𐴣𐴀𐴌𐴝𐴌 𐴀𐴝𐴥𐴃𐴡𐴃𐴧𐴟 𐴓𐴡𐴘𐴒𐴞𐴘𐴠𐴥𐴒𐴡𐴘,⁸𐴀𐴝𐴌𐴡𐴤 𐴀𐴞𐴁𐴝𐴤𐴌 𐴔𐴡𐴦𐴊𐴧𐴞𐴔𐴝-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴡𐴌𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠, 𐴃𐴟𐴣𐴀𐴝𐴥𐴣𐴌 𐴔𐴟𐴀𐴕𐴃𐴟 𐴀𐴝𐴘 𐴁𐴡𐴓𐴧𐴝. 𐴃𐴟𐴀𐴛 𐴕𐴞𐴎𐴠𐴁𐴝𐴎𐴠 𐴀𐴞𐴁𐴝𐴤𐴌𐴠 𐴀𐴞𐴀𐴕 𐴁𐴠𐴒𐴧𐴟𐴥𐴕𐴡𐴌 𐴁𐴝𐴦𐴁𐴟𐴃𐴠 𐴎𐴠𐴌𐴝𐴥 𐴒𐴡𐴙𐴓𐴧𐴠𐴥 𐴎𐴝𐴕𐴞 𐴉𐴝𐴌𐴞𐴁𐴝𐴥, 𐴀𐴝𐴣𐴀𐴌𐴝 𐴀𐴞𐴁𐴝𐴤𐴌𐴠 𐴑𐴞𐴘𐴡𐴥𐴓𐴧𐴝 𐴈𐴡𐴏𐴟𐴥𐴌 𐴊𐴞𐴥𐴌.“

⁹𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴀𐴠𐴓𐴎𐴝𐴔 𐴓𐴝𐴒𐴝𐴃𐴢 𐴐𐴡𐴥𐴌𐴞𐴑 𐴀𐴡𐴥𐴘 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴏𐴡𐴥𐴘𐴧𐴞 𐴁𐴡𐴥𐴓𐴞 𐴈𐴡𐴘𐴧𐴠𐴥.

𐴉𐴞𐴥𐴓𐴞𐴑𐴏𐴡𐴌 𐴔𐴟𐴀𐴕𐴃𐴟 𐴂𐴝𐴥𐴀𐴟𐴓𐴠 𐴕𐴞𐴎𐴡𐴌 𐴏𐴡𐴥𐴉𐴝𐴘 𐴊𐴞𐴥𐴘𐴠

¹⁰𐴁𐴝𐴦𐴊𐴠 𐴇𐴝𐴥𐴑𐴞𐴔𐴠 𐴂𐴝𐴥𐴀𐴟𐴓𐴡𐴌𐴠 𐴈𐴡𐴃𐴝𐴤 𐴈𐴡𐴘𐴃𐴡𐴤 𐴀𐴞𐴐𐴝𐴥𐴌𐴝 𐴒𐴡𐴙𐴅𐴧𐴠𐴥 𐴌𐴝𐴥𐴌, 𐴂𐴝𐴥𐴀𐴟𐴓𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴎𐴝𐴕𐴞, 𐴃𐴟𐴀𐴛 𐴁𐴡𐴀𐴗𐴃𐴢 𐴁𐴡𐴏𐴡𐴥𐴌 𐴓𐴡𐴥𐴃𐴞 𐴀𐴠 𐴑𐴡𐴗𐴔𐴡𐴌 𐴅𐴡𐴐𐴢. 𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴀𐴝𐴣𐴀𐴌 𐴏𐴡𐴥𐴉𐴝𐴘 𐴊𐴞𐴥𐴌.¹¹𐴃𐴟𐴀𐴛 𐴎𐴝𐴏𐴝𐴘 𐴒𐴡𐴙𐴓𐴧𐴠𐴥 𐴏𐴡𐴥𐴘𐴧𐴞𐴒𐴡𐴌𐴞 𐴎𐴝𐴕𐴞 𐴉𐴝𐴌𐴞𐴁𐴝𐴥, 𐴀𐴝𐴀𐴛 𐴖𐴡𐴌𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴠𐴁𐴝𐴦𐴊𐴡𐴃𐴢 𐴒𐴡𐴙𐴃𐴧𐴡𐴥 𐴒𐴞𐴦𐴘𐴞𐴥 𐴊𐴠 𐴀𐴝𐴙𐴅𐴧𐴡𐴤 𐴁𐴝𐴌𐴡𐴥 𐴊𐴞𐴕𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴕𐴡𐴥 𐴀𐴡𐴥𐴘𐴧𐴡.¹²𐴀𐴝𐴣𐴀𐴌 𐴖𐴡𐴌𐴠 𐴎𐴠𐴃𐴝𐴌𐴝𐴤 𐴀𐴠𐴓𐴎𐴝𐴔 𐴓𐴝𐴒𐴝𐴌 𐴀𐴞𐴥𐴃𐴝𐴌𐴝 𐴀𐴝𐴣𐴀𐴌𐴠𐴥 𐴕𐴡 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴇𐴡𐴕𐴡𐴤 𐴔𐴝𐴕𐴟𐴥𐴙𐴐𐴢 𐴓𐴡𐴥𐴘 𐴁𐴝𐴌𐴝𐴤𐴁𐴝𐴌𐴞 𐴊𐴞𐴥𐴌 𐴊𐴠 𐴓𐴡𐴦𐴃𐴢 𐴉𐴝𐴘𐴧𐴠𐴥, 𐴀𐴝𐴦𐴌 𐴕𐴡 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴘𐴝𐴥 𐴐𐴡𐴥𐴀𐴌𐴡𐴌 𐴇𐴡𐴕𐴡𐴤 𐴔𐴞𐴑𐴧𐴝𐴥 𐴇𐴝𐴥𐴚𐴒𐴝𐴔𐴝 𐴉𐴡𐴘𐴊𐴝 𐴒𐴡𐴌𐴞𐴥𐴌 𐴊𐴠 𐴓𐴡𐴦𐴃𐴢 𐴉𐴝𐴘𐴧𐴠𐴥.¹³𐴀𐴞𐴃𐴝𐴌𐴝𐴤 𐴀𐴝𐴣𐴀𐴌 𐴖𐴡𐴌𐴠 𐴎𐴠 𐴀𐴠𐴓𐴎𐴝𐴔 𐴀𐴡𐴥𐴑𐴧𐴡𐴓𐴢 𐴓𐴝𐴒𐴝𐴌, 𐴇𐴞𐴥𐴀𐴕𐴡𐴌 𐴃𐴟𐴣𐴀𐴝𐴥𐴣𐴌𐴠 𐴇𐴡𐴕𐴡𐴤 𐴏𐴝𐴥𐴁𐴟𐴃𐴢 𐴊𐴞𐴥 𐴕𐴡 𐴉𐴝𐴌𐴞𐴁𐴡𐴥.¹⁴𐴔𐴡𐴕𐴃𐴡𐴌 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌 𐴇𐴝𐴣𐴏𐴠 𐴘𐴝𐴀𐴕 𐴐𐴞𐴥𐴑𐴝𐴌 𐴒𐴡𐴌𐴞𐴥𐴌, 𐴑𐴞 𐴈𐴡𐴘𐴓𐴠𐴥, 𐴎𐴠 𐴃𐴡𐴌𐴞𐴑𐴝𐴌𐴠 𐴀𐴞𐴃𐴝𐴌𐴝𐴤 𐴒𐴡𐴓𐴧𐴡𐴃𐴢 𐴊𐴡𐴓𐴢 𐴁𐴡𐴓𐴞 𐴈𐴡𐴀𐴌, 𐴇𐴠𐴥 𐴃𐴡𐴌𐴞𐴑𐴝𐴌𐴠 𐴔𐴝𐴕𐴞 𐴀𐴝𐴀𐴛 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴡𐴌 𐴀𐴝𐴓𐴧𐴝𐴌 𐴀𐴠𐴁𐴝𐴦𐴊𐴡𐴃𐴢 𐴒𐴡𐴌𐴞𐴥. 𐴀𐴝𐴀𐴛 𐴎𐴠 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴃𐴡𐴌𐴝𐴃𐴡𐴃𐴢 𐴀𐴠𐴊𐴧𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴑𐴞𐴃𐴝𐴁𐴡𐴃𐴢 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴠𐴑𐴞𐴕 𐴒𐴡𐴌𐴞𐴥.¹⁵𐴀𐴝𐴣𐴀𐴃𐴧𐴟 𐴀𐴝𐴓𐴧𐴝𐴌 𐴖𐴡𐴌𐴠 𐴀𐴝𐴐𐴝𐴤 𐴀𐴝𐴏𐴠𐴤, 𐴎𐴠𐴕𐴊𐴞𐴓𐴧𐴝 𐴀𐴞𐴃𐴝𐴌𐴝𐴤𐴃𐴧𐴟 𐴘𐴡𐴥 𐴀𐴝𐴏𐴠𐴤, 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠, 𐴉𐴡𐴌𐴇𐴠𐴥𐴏𐴒𐴝𐴌 𐴀𐴠𐴊𐴧𐴠 𐴈𐴡𐴥𐴌𐴝𐴉𐴢 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴌𐴝𐴥 𐴎𐴝𐴘𐴁𐴡.¹⁶𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴉𐴟𐴌𐴝𐴉𐴟𐴌𐴞 𐴑𐴟𐴐𐴞𐴥𐴐𐴢 𐴒𐴡𐴌𐴞𐴥 𐴊𐴠, 𐴀𐴝𐴓𐴧𐴝𐴌 𐴀𐴠𐴊𐴧𐴠 𐴀𐴞𐴕𐴏𐴝𐴥𐴕𐴡𐴌 𐴔𐴟𐴀𐴕𐴃𐴟 𐴇𐴝𐴥𐴔𐴞𐴐𐴝 𐴏𐴡𐴥𐴘𐴧𐴞 𐴇𐴠𐴥𐴓𐴡𐴔𐴠 𐴃𐴝𐴥𐴑𐴞 𐴁𐴡𐴓𐴧𐴝.

¹⁷”𐴘𐴝𐴓𐴝 𐴁𐴡𐴀𐴗𐴃𐴢 𐴁𐴡𐴏𐴡𐴥𐴌 𐴁𐴝𐴦𐴊𐴠, 𐴀𐴝𐴀𐴛 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴝𐴣𐴀𐴌 𐴑𐴡𐴗𐴔𐴡𐴌 𐴇𐴝𐴣𐴏𐴠 𐴇𐴡𐴥𐴌𐴝𐴃𐴢 𐴉𐴡𐴀𐴣𐴏𐴝𐴘 𐴁𐴡𐴓𐴧𐴝 𐴀𐴠𐴊𐴧𐴠 𐴅𐴝𐴕𐴟𐴖𐴝𐴌 𐴑𐴟𐴌𐴁𐴝𐴕𐴞 𐴊𐴞 𐴁𐴡𐴓𐴧𐴝 𐴀𐴝𐴙𐴐𐴧𐴞𐴤.¹⁸𐴃𐴡𐴥𐴘 𐴀𐴠𐴐𐴞𐴥𐴘𐴝𐴌 𐴇𐴡𐴦𐴎𐴧𐴡𐴕 𐴘𐴡𐴇𐴟𐴥𐴊𐴞𐴘𐴠 𐴀𐴝𐴣𐴀𐴌𐴠𐴥 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘 𐴀𐴝𐴀𐴛 𐴇𐴠𐴥 𐴈𐴝𐴔 𐴒𐴡𐴌𐴞𐴥𐴌 𐴊𐴠 𐴓𐴡𐴦𐴃𐴢 𐴉𐴝𐴘𐴧𐴠𐴥. 𐴇𐴠𐴥𐴍𐴠 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴕𐴡 𐴔𐴝𐴕𐴟𐴥𐴙𐴐𐴡𐴌 𐴊𐴡𐴓𐴢 𐴀𐴝𐴐𐴧𐴞𐴥𐴓𐴢 𐴀𐴝𐴦𐴌 𐴕𐴡 𐴀𐴝𐴀𐴛 𐴇𐴡𐴕𐴡𐴤 𐴇𐴝𐴥𐴚𐴒𐴝𐴔𐴝𐴃𐴢 𐴐𐴝𐴥𐴔𐴞𐴓𐴢 𐴀𐴝𐴐𐴧𐴞𐴥𐴓𐴝𐴔.¹⁹𐴔𐴡𐴕𐴃𐴡𐴌 𐴎𐴡𐴊𐴞 𐴀𐴞𐴥𐴃𐴝𐴌𐴝𐴃𐴧𐴟 𐴀𐴝𐴣𐴀𐴌 𐴀𐴟𐴓𐴋𐴝 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴈𐴡𐴘𐴁𐴝𐴥𐴌 𐴃𐴝𐴥𐴑𐴠, 𐴃𐴡𐴥𐴀𐴘𐴓𐴠 𐴀𐴞𐴥𐴃𐴝𐴌𐴝𐴃𐴧𐴟 𐴃𐴟𐴣𐴀𐴝𐴥𐴣𐴌 𐴔𐴟𐴀𐴕𐴃𐴟 𐴀𐴝𐴘𐴧𐴡𐴤𐴕 𐴀𐴝𐴐𐴧𐴞𐴥𐴓𐴢.²⁰𐴀𐴝𐴌𐴕𐴡𐴥𐴘𐴓𐴠 𐴀𐴠𐴍𐴠𐴥 𐴀𐴝𐴏𐴠𐴤 𐴊𐴠 𐴀𐴞𐴃𐴝𐴌𐴝𐴤 𐴕𐴞𐴎𐴠 𐴈𐴡𐴀𐴗𐴑, 𐴀𐴝𐴀𐴛 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴡𐴌 𐴔𐴟𐴀𐴕𐴃𐴟 𐴃𐴞𐴥𐴘𐴝𐴘 𐴀𐴝𐴐𐴧𐴞𐴥𐴓𐴝𐴔 𐴊𐴠 𐴇𐴞𐴥𐴘𐴝𐴓𐴝 𐴀𐴝𐴣𐴀𐴃𐴧𐴟 𐴑𐴞𐴦 𐴈𐴡𐴏𐴟𐴥𐴌𐴞 𐴉𐴝𐴘𐴧𐴠𐴥 𐴊𐴠.²¹𐴀𐴞𐴃𐴝𐴌𐴝𐴤 𐴀𐴝𐴣𐴀𐴌𐴠𐴥 𐴏𐴞𐴌𐴞𐴥𐴉𐴢 𐴘𐴝𐴀𐴕 𐴀𐴠𐴑𐴧𐴝𐴥𐴕𐴡𐴌 𐴈𐴡𐴏𐴟𐴥𐴌 𐴊𐴞𐴥 𐴉𐴝𐴌𐴞𐴁𐴡𐴥, 𐴎𐴞𐴘𐴝𐴥𐴕 𐴀𐴝𐴀𐴛 𐴀𐴞𐴥𐴃𐴝𐴌𐴝𐴌 𐴔𐴟𐴀𐴕𐴃𐴟 𐴃𐴞𐴥𐴘𐴝𐴘 𐴀𐴝𐴐𐴧𐴞𐴥𐴓𐴝𐴔 𐴊𐴠 𐴇𐴞𐴥𐴘𐴝𐴓𐴝 𐴒𐴟𐴎𐴡𐴌𐴞 𐴈𐴡𐴀𐴘𐴓𐴝𐴔, 𐴑𐴞 𐴈𐴡𐴘𐴓𐴠𐴥, ’𐴔𐴡𐴌𐴝 𐴀𐴡𐴥𐴑𐴧𐴡𐴓𐴢 𐴎𐴞𐴕𐴊𐴝 𐴀𐴡𐴥𐴘 𐴀𐴟𐴍𐴝𐴥𐴌 𐴔𐴡𐴏𐴡𐴥𐴓𐴝 𐴓𐴡𐴘 𐴁𐴠 𐴀𐴝𐴙𐴅𐴧𐴝 𐴀𐴝𐴣𐴀𐴌𐴠𐴥 𐴁𐴞𐴏𐴝𐴌 𐴒𐴡𐴌𐴝𐴥 𐴎𐴝𐴌.‘ “

²²𐴔𐴡𐴕𐴃𐴡𐴌 𐴉𐴞𐴥𐴓𐴞𐴑𐴏𐴡𐴃𐴧𐴟 𐴇𐴠𐴥 𐴃𐴡𐴌𐴞𐴑𐴝𐴌 𐴁𐴝𐴦𐴁𐴟𐴃𐴠 𐴏𐴡𐴥𐴘𐴧𐴞 𐴎𐴝𐴕𐴝 𐴀𐴝𐴏𐴠𐴤 𐴊𐴠 𐴇𐴠𐴥𐴃𐴡𐴓𐴧𐴝, 𐴘𐴡𐴥𐴒𐴧𐴗𐴝𐴘𐴠 𐴁𐴞𐴏𐴝𐴌 𐴒𐴡𐴌𐴝𐴥 𐴁𐴡𐴕 𐴒𐴡𐴌𐴞𐴥 𐴈𐴡𐴀𐴌 𐴊𐴠, ”𐴎𐴡𐴕𐴧𐴝𐴓𐴢 𐴓𐴝𐴘𐴏𐴞𐴥𐴘𐴝𐴏𐴢 𐴕𐴞𐴏𐴠 𐴀𐴝𐴘𐴓𐴠𐴤, 𐴀𐴝𐴀𐴛 𐴃𐴡𐴌 𐴔𐴡𐴦𐴊𐴧𐴞𐴔𐴝𐴌 𐴉𐴝𐴥𐴘𐴏𐴠𐴓𐴝 𐴒𐴡𐴙𐴅𐴧𐴟𐴥𐴔.“²³𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴐𐴝𐴥𐴀𐴂𐴡𐴌𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠, 𐴂𐴝𐴥𐴀𐴟𐴓𐴡𐴌𐴠 𐴒𐴝𐴣𐴌𐴝𐴃𐴡𐴃𐴢 𐴌𐴝𐴑𐴞𐴥 𐴁𐴡𐴓𐴧𐴝, 𐴑𐴠𐴏𐴧𐴟𐴥 𐴀𐴝𐴎𐴝𐴊𐴞 𐴊𐴞 𐴁𐴡𐴓𐴧𐴝, 𐴀𐴝𐴦𐴌 𐴂𐴝𐴥𐴀𐴟𐴓𐴡𐴌 𐴊𐴟𐴏𐴃𐴡𐴥 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴇𐴠𐴥𐴊𐴔𐴡𐴃𐴢 𐴒𐴡𐴙𐴃𐴧𐴡𐴥 𐴀𐴝𐴘𐴓𐴠𐴤 𐴀𐴞𐴥𐴃𐴝𐴌𐴝𐴌𐴠 𐴔𐴝𐴕𐴝𐴥 𐴕𐴡 𐴒𐴡𐴌𐴞𐴥 𐴁𐴡𐴓𐴧𐴝.

𐴂𐴝𐴥𐴀𐴟𐴓𐴡𐴌𐴠 𐴒𐴝𐴣𐴌𐴝𐴃𐴡𐴃𐴢 𐴌𐴝𐴙𐴑𐴧𐴠𐴥

²⁴𐴇𐴡𐴦𐴊𐴧𐴞𐴕 𐴁𐴝𐴦𐴊𐴠, 𐴉𐴞𐴥𐴓𐴞𐴑𐴏𐴠 𐴕𐴞𐴎𐴡𐴌 𐴁𐴡𐴖𐴢 𐴊𐴟𐴌𐴟𐴏𐴞𐴓𐴝𐴌𐴠 𐴉𐴟𐴥𐴖𐴝𐴣𐴃𐴞 𐴓𐴡𐴦𐴘𐴢 𐴀𐴝𐴙𐴐𐴧𐴠𐴥, 𐴇𐴞𐴥𐴁𐴝 𐴀𐴠𐴥𐴎𐴧𐴡𐴕 𐴘𐴡𐴇𐴟𐴥𐴊𐴞 𐴀𐴝𐴐𐴧𐴞𐴥𐴓𐴢. 𐴘𐴡𐴥𐴒𐴧𐴗𐴝𐴘𐴠 𐴂𐴝𐴥𐴀𐴟𐴓𐴡𐴌𐴠 𐴔𐴝𐴃𐴝𐴘𐴃𐴡𐴥 𐴊𐴞𐴉𐴠𐴍𐴝𐴥𐴘𐴧𐴠, 𐴁𐴝𐴦𐴊𐴠 𐴂𐴝𐴥𐴀𐴟𐴓𐴡𐴃𐴧𐴟 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕𐴡𐴌 𐴁𐴝𐴦𐴁𐴟𐴃𐴠 𐴁𐴡𐴘𐴧𐴝𐴕 𐴉𐴟𐴥𐴙𐴕𐴧𐴠.

²⁵𐴂𐴝𐴥𐴀𐴟𐴓𐴠 𐴎𐴠𐴃𐴧𐴡𐴥𐴃𐴢 𐴉𐴡𐴌𐴇𐴠𐴥𐴏𐴒𐴝𐴌𐴞𐴌, 𐴕𐴞𐴎𐴡𐴌𐴠𐴥 𐴏𐴡𐴥𐴣𐴓𐴞 𐴌𐴝𐴑𐴝𐴤𐴌, 𐴀𐴠𐴊𐴧𐴠 𐴀𐴝𐴘𐴁𐴡𐴤 𐴊𐴠 𐴑𐴞𐴘𐴝𐴔𐴡𐴃𐴡𐴌 𐴁𐴝𐴦𐴁𐴟𐴃𐴠 𐴁𐴡𐴘𐴧𐴝𐴕 𐴒𐴡𐴌𐴠𐴥𐴌, 𐴉𐴞𐴥𐴓𐴞𐴑𐴏 𐴋𐴡𐴦𐴌𐴝𐴘𐴒𐴞𐴘𐴡𐴥𐴘, 𐴀𐴝𐴦𐴌 𐴈𐴡𐴀𐴌 𐴊𐴠, ”𐴃𐴟𐴘 𐴀𐴠𐴃𐴧𐴝𐴌 𐴎𐴝𐴦𐴒𐴡𐴥𐴘, 𐴀𐴡𐴕𐴠 𐴔𐴡𐴑𐴝 𐴉𐴝𐴘𐴓𐴠 𐴀𐴝𐴀𐴛 𐴃𐴡𐴌𐴠𐴥 𐴔𐴝𐴃𐴝𐴘𐴃𐴡𐴥 𐴊𐴞𐴉𐴠𐴍𐴝𐴥𐴘𐴧𐴟𐴔.“²⁶𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴘𐴡𐴥𐴒𐴧𐴗𐴝𐴘𐴠 𐴂𐴝𐴥𐴀𐴟𐴓𐴡𐴃𐴧𐴟 𐴒𐴟𐴥𐴐𐴢 𐴉𐴝𐴘𐴁𐴝𐴌 𐴀𐴡𐴥 𐴀𐴝𐴐𐴝𐴤 𐴒𐴡𐴙𐴅𐴧𐴞𐴥𐴓𐴢, 𐴇𐴠𐴥𐴃𐴡𐴓𐴧𐴝 𐴘𐴡𐴥𐴒𐴧𐴗𐴝𐴘𐴠 𐴂𐴝𐴥𐴀𐴟𐴓𐴡𐴌𐴠 𐴀𐴠𐴒𐴝𐴎𐴝𐴥-𐴀𐴠𐴒𐴝𐴎𐴝𐴥 𐴔𐴝𐴃𐴝𐴘 𐴀𐴞𐴥𐴁𐴝 𐴓𐴧𐴡𐴥𐴘 𐴈𐴡𐴃𐴝𐴤 𐴈𐴡𐴘𐴃𐴡𐴤.

²⁷𐴊𐴟𐴘 𐴁𐴡𐴏𐴡𐴥𐴌 𐴒𐴟𐴎𐴡𐴌𐴞 𐴎𐴝𐴘𐴒𐴡𐴥𐴘 𐴁𐴝𐴦𐴊𐴠, 𐴉𐴞𐴥𐴓𐴞𐴑𐴏𐴡𐴌 𐴎𐴝𐴒𐴝𐴃𐴢 𐴉𐴡𐴌𐴑𐴞𐴘𐴟𐴏𐴢 𐴉𐴞𐴏𐴃𐴝𐴏𐴢 𐴀𐴝𐴙𐴐𐴧𐴠𐴥. 𐴔𐴡𐴕𐴃𐴡𐴌 𐴉𐴞𐴥𐴓𐴞𐴑𐴏𐴡𐴃𐴧𐴟 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴕𐴡𐴎𐴡𐴌𐴡𐴃𐴢 𐴁𐴝𐴥𐴓𐴝 𐴄𐴡𐴥𐴀𐴙𐴃𐴧𐴡 𐴔𐴡𐴕𐴠𐴈𐴡𐴘𐴧𐴠𐴥 𐴊𐴠 𐴇𐴠𐴥𐴃𐴡𐴓𐴧𐴝, 𐴘𐴡𐴥𐴒𐴧𐴗𐴝𐴘𐴠 𐴂𐴝𐴥𐴀𐴟𐴓𐴡𐴌𐴠 𐴎𐴞𐴘𐴡𐴥𐴓𐴡𐴃𐴢 𐴌𐴝𐴑𐴞𐴥𐴒𐴞𐴓𐴒𐴡𐴘.

The Word for the World International

https://app.library.bible/content/87faca8b51c22590