اقرأ 𐴈𐴝𐴔𐴡𐴥𐴓𐴢 18

𐴈𐴝𐴔𐴡𐴥𐴓𐴢18

𐴑𐴡𐴥𐴌𐴞𐴕 𐴐𐴡𐴥𐴀𐴌𐴡𐴃𐴢 𐴂𐴝𐴥𐴀𐴟𐴓𐴢

¹𐴘𐴝𐴥𐴌𐴁𐴝𐴦𐴊𐴠 𐴂𐴝𐴥𐴀𐴟𐴓𐴢 𐴀𐴝𐴃𐴠𐴕 𐴐𐴡𐴥𐴀𐴌𐴡𐴃𐴧𐴟 𐴁𐴝𐴐𐴝𐴥 𐴓𐴡𐴥𐴘 𐴑𐴡𐴥𐴌𐴞𐴕 𐴐𐴡𐴥𐴀𐴌𐴡𐴃𐴢 𐴒𐴞𐴦𐴘𐴠𐴥.²𐴇𐴠𐴥𐴍𐴠 𐴀𐴞𐴥𐴁𐴝𐴘𐴠 𐴀𐴠𐴑𐴟𐴥𐴘𐴓𐴝 𐴕𐴝𐴔𐴡𐴌 𐴀𐴠𐴥𐴎𐴧𐴡𐴕 𐴘𐴡𐴇𐴟𐴥𐴊𐴞 𐴓𐴡𐴦𐴃𐴢 𐴉𐴝𐴘𐴧𐴠𐴥, 𐴎𐴞𐴁𐴝𐴤 𐴂𐴡𐴕𐴃𐴟𐴏𐴡𐴃𐴢 𐴎𐴡𐴌𐴔𐴡 𐴀𐴡𐴥𐴀𐴙𐴓𐴢. 𐴁𐴝𐴀𐴣𐴐𐴧𐴝 𐴑𐴝𐴓𐴠𐴊𐴞𐴘𐴟𐴏𐴠 𐴘𐴡𐴇𐴟𐴥𐴊𐴞 𐴁𐴠𐴒𐴧𐴟𐴥𐴕𐴡𐴌𐴠 𐴌𐴡𐴔 𐴏𐴝𐴥𐴌𐴞 𐴎𐴝𐴘𐴃𐴡𐴒𐴡𐴥𐴘 𐴇𐴡𐴥𐴑𐴟𐴔 𐴊𐴞𐴥𐴓𐴢 𐴊𐴠 𐴇𐴠𐴥𐴃𐴡𐴓𐴧𐴝, 𐴘𐴡𐴥𐴒𐴧𐴗𐴝 𐴑𐴠𐴏𐴧𐴟𐴥 𐴄𐴝𐴙𐴔 𐴀𐴝𐴒𐴠 𐴘𐴡𐴥𐴒𐴧𐴗𐴝𐴌 𐴁𐴡𐴖𐴢 𐴂𐴌𐴞𐴏𐴞𐴥𐴓𐴝𐴌𐴠 𐴓𐴡𐴦𐴘𐴢 𐴀𐴞𐴄𐴝𐴓𐴞𐴃𐴧𐴟 𐴀𐴝𐴀𐴘𐴒𐴞𐴥𐴓𐴒𐴡𐴘. 𐴂𐴝𐴥𐴀𐴟𐴓𐴠 𐴀𐴞𐴥𐴃𐴝𐴌𐴝𐴌𐴠 𐴏𐴝𐴘𐴃𐴡𐴥 𐴒𐴞𐴦𐴘𐴠𐴥,³𐴀𐴝𐴦𐴌 𐴀𐴞𐴥𐴁𐴝 𐴘𐴡𐴥 𐴎𐴠𐴃𐴧𐴡𐴥𐴃𐴢 𐴀𐴞𐴥𐴃𐴝𐴌𐴝𐴌 𐴋𐴡𐴥𐴙𐴓𐴧𐴝 𐴄𐴝𐴔𐴁𐴟-𐴄𐴝𐴑𐴡𐴘𐴝, 𐴀𐴞𐴥𐴁𐴝 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞 𐴈𐴝𐴔 𐴒𐴡𐴙𐴅𐴧𐴞𐴥𐴓𐴢.⁴𐴀𐴞𐴥𐴁𐴝𐴘𐴠 𐴉𐴡𐴃𐴧𐴞𐴥 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴃𐴡𐴏𐴑𐴝𐴌𐴝 𐴀𐴡𐴥𐴑𐴧𐴡𐴓𐴢 𐴒𐴡𐴌𐴞𐴥-𐴒𐴡𐴌𐴞𐴥 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴊𐴧𐴠 𐴒𐴞𐴌𐴞𐴥𐴑 𐴀𐴡𐴥𐴑𐴧𐴡𐴓𐴡𐴌𐴠 𐴁𐴡𐴍𐴝𐴘 𐴀𐴝𐴕𐴞𐴤𐴁𐴝𐴌 𐴑𐴟𐴐𐴞𐴥𐴐𐴢 𐴒𐴡𐴙𐴃𐴧𐴡𐴥.

⁵𐴎𐴠𐴣𐴃𐴧𐴠𐴥 𐴏𐴞𐴥𐴓𐴝𐴏𐴢 𐴀𐴠𐴊𐴧𐴠 𐴃𐴞𐴔𐴡𐴥𐴃𐴞 𐴔𐴝𐴑𐴠𐴊𐴡𐴥𐴕𐴞𐴘𐴝𐴃𐴧𐴟 𐴀𐴝𐴙𐴐𐴧𐴠𐴥, 𐴂𐴝𐴥𐴀𐴟𐴓𐴠 𐴑𐴝𐴓𐴝𐴔 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴃𐴢 𐴉𐴟𐴌𐴝𐴉𐴟𐴌𐴞 𐴓𐴝𐴒𐴞 𐴃𐴝𐴥𐴑𐴝 𐴐𐴟𐴥𐴌𐴟 𐴒𐴡𐴙𐴅𐴧𐴠𐴥. 𐴀𐴞𐴥𐴁𐴝𐴘𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴒𐴡𐴁𐴝𐴤 𐴊𐴞𐴥𐴃𐴡 𐴊𐴠, 𐴀𐴞𐴏𐴝𐴤 𐴀𐴡𐴥𐴙𐴓𐴊𐴠 𐴔𐴡𐴀𐴏𐴞𐴤.⁶𐴔𐴡𐴕𐴃𐴡𐴌 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴎𐴠𐴃𐴧𐴡𐴥𐴃𐴢 𐴂𐴝𐴥𐴀𐴟𐴓𐴡𐴌 𐴔𐴟𐴈𐴝𐴥𐴓𐴠𐴉𐴞 𐴀𐴠𐴊𐴧𐴠 𐴁𐴠𐴀𐴞𐴎𐴧𐴡𐴃𐴞 𐴒𐴡𐴌𐴠𐴥𐴌, 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌 𐴀𐴟𐴓𐴋𐴝 𐴕𐴞𐴎𐴡𐴌 𐴒𐴝𐴙𐴌𐴡𐴌 𐴇𐴡𐴦𐴌 𐴎𐴝𐴥𐴌𐴞𐴉𐴠𐴓𐴝𐴘 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝𐴌 𐴓𐴡𐴖𐴢 𐴖𐴡𐴥𐴌 𐴎𐴞𐴔𐴧𐴝 𐴃𐴟𐴣𐴀𐴝𐴥𐴌𐴝𐴌 𐴔𐴝𐴃𐴝𐴥𐴌 𐴖𐴡𐴌𐴠 𐴀𐴡𐴥𐴑! 𐴀𐴝𐴀𐴛 𐴁𐴠𐴈𐴡𐴏𐴟𐴥𐴌. 𐴀𐴝𐴀𐴛 𐴀𐴠𐴇𐴡𐴥𐴕𐴡𐴃𐴧𐴟 𐴓𐴡𐴥𐴃𐴞 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴇𐴠𐴥𐴍𐴠 𐴎𐴝𐴘𐴧𐴟𐴔𐴁𐴡𐴥𐴘.“

⁷𐴘𐴝𐴥𐴌𐴁𐴝𐴦𐴊𐴠 𐴂𐴝𐴥𐴀𐴟𐴓𐴢 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴏𐴝𐴥𐴌𐴞 𐴀𐴠𐴑 𐴔𐴝𐴕𐴟𐴥𐴙𐴐𐴡𐴌 𐴒𐴡𐴥𐴌𐴡𐴃𐴢 𐴒𐴞𐴦𐴘𐴠𐴥, 𐴎𐴞𐴁𐴝𐴤𐴌 𐴕𐴝𐴔 𐴃𐴞𐴃𐴟𐴏𐴢 𐴘𐴟𐴏𐴃𐴟𐴏𐴢. 𐴘𐴡𐴥𐴒𐴧𐴗𐴝 𐴀𐴝𐴓𐴧𐴝𐴌 𐴀𐴠𐴁𐴝𐴦𐴊𐴡𐴃𐴒𐴝𐴥𐴌 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴘𐴡𐴥𐴒𐴧𐴗𐴝𐴌 𐴒𐴡𐴥𐴌 𐴒𐴝𐴥𐴕 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴌 𐴋𐴝𐴥𐴑𐴠 𐴀𐴝𐴐𐴧𐴞𐴥𐴓𐴢.⁸𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴌 𐴏𐴡𐴥𐴊𐴧𐴝𐴌 𐴑𐴌𐴞𐴏𐴂𐴟𐴏𐴠 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴒𐴡𐴥𐴌 𐴄𐴞𐴥𐴘𐴝𐴘𐴠 𐴔𐴝𐴓𐴞𐴑𐴡𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴞𐴤𐴓𐴢, 𐴇𐴠𐴥𐴕𐴊𐴞𐴓𐴧𐴝 𐴂𐴝𐴥𐴀𐴟𐴓𐴡𐴌 𐴁𐴡𐴘𐴧𐴝𐴕 𐴉𐴟𐴥𐴕𐴞 𐴁𐴡𐴀𐴗𐴃𐴢 𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴠 𐴘𐴡𐴥 𐴀𐴞𐴔𐴝𐴕 𐴀𐴝𐴙𐴕𐴧𐴞𐴤𐴓𐴢 𐴀𐴝𐴦𐴌 𐴁𐴝𐴥𐴂𐴄𐴞𐴏𐴔𐴝 𐴓𐴡𐴥𐴙𐴓𐴢.

⁹𐴀𐴠𐴑 𐴊𐴞𐴕 𐴌𐴝𐴙𐴃𐴧𐴝 𐴔𐴝𐴓𐴞𐴑𐴠 𐴂𐴝𐴥𐴀𐴟𐴓𐴡𐴌𐴠 𐴀𐴠𐴑𐴧𐴝𐴥𐴕 𐴊𐴡𐴌𐴐𐴡𐴥𐴕𐴡𐴃𐴢 𐴈𐴡𐴀𐴌 𐴊𐴠, ”𐴕𐴡 𐴋𐴡𐴦𐴌𐴝𐴙𐴐𐴢, 𐴁𐴡𐴥𐴓𐴑𐴠 𐴈𐴡𐴖𐴝𐴤𐴃𐴢 𐴃𐴝𐴥𐴑, 𐴕𐴞𐴎𐴝𐴥𐴔 𐴀𐴡𐴥𐴘 𐴕𐴡 𐴃𐴝𐴥𐴑𐴞𐴐𐴢,¹⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴡𐴌 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴀𐴝𐴏𐴞𐴤. 𐴃𐴡𐴌 𐴇𐴡𐴥𐴃𐴞 𐴒𐴡𐴌𐴞𐴥 𐴁𐴡𐴓𐴧𐴝 𐴃𐴡𐴌𐴠𐴥 𐴇𐴡𐴕𐴡𐴤𐴑𐴞𐴘𐴠 𐴇𐴝𐴥𐴔𐴓𐴝 𐴕𐴡 𐴒𐴡𐴌𐴞𐴥𐴁𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴠 𐴐𐴡𐴥𐴀𐴌𐴡𐴃𐴢 𐴀𐴝𐴣𐴀𐴃𐴧𐴟 𐴁𐴞𐴐𐴞𐴤 𐴔𐴝𐴕𐴟𐴥𐴙𐴐𐴢 𐴀𐴝𐴏𐴠𐴤.“¹¹𐴃𐴡𐴥𐴘 𐴂𐴝𐴥𐴀𐴟𐴓𐴢 𐴊𐴠𐴌-𐴁𐴡𐴏𐴡𐴥𐴌 𐴉𐴡𐴙𐴅𐴧𐴡𐴕𐴃𐴡 𐴑𐴡𐴥𐴌𐴞𐴕𐴡𐴃𐴢 𐴃𐴝𐴥𐴑𐴞 𐴔𐴝𐴙𐴕𐴐𐴡𐴥𐴌𐴠 𐴀𐴝𐴓𐴧𐴝𐴌 𐴑𐴝𐴓𐴝𐴔𐴡𐴌 𐴃𐴝𐴦𐴓𐴞𐴔 𐴊𐴞𐴀𐴓𐴢.

¹²𐴔𐴡𐴕𐴃𐴡𐴌 𐴒𐴝𐴓𐴞𐴘𐴡 𐴎𐴠𐴣𐴃𐴧𐴠𐴥 𐴀𐴝𐴑𐴝𐴘𐴝 𐴀𐴠𐴓𐴝𐴑𐴝𐴌 𐴇𐴡𐴥𐴑𐴟𐴔𐴡𐴃𐴢-𐴒𐴡𐴌𐴡𐴤𐴘𐴝 𐴀𐴝𐴐𐴧𐴞𐴥𐴓𐴢, 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴀𐴠𐴑𐴃𐴡𐴉𐴝𐴥𐴑 𐴀𐴡𐴥𐴘 𐴂𐴝𐴥𐴀𐴟𐴓𐴡𐴌 𐴇𐴠𐴥𐴓𐴝𐴉𐴢 𐴃𐴞𐴥𐴘𐴝𐴘𐴧𐴠 𐴀𐴝𐴦𐴌 𐴀𐴞𐴥𐴁𐴝𐴌𐴠 𐴀𐴝𐴊𐴝𐴓𐴡𐴃𐴡𐴃𐴢 𐴀𐴝𐴙𐴕𐴧𐴠𐴤.¹³𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴔𐴝𐴕𐴟𐴥𐴙𐴐𐴢 𐴀𐴞𐴁𐴝𐴤𐴘𐴠 𐴔𐴝𐴙𐴕𐴐𐴡𐴥𐴌𐴠 𐴀𐴝𐴓𐴧𐴝𐴌 𐴀𐴠𐴁𐴝𐴦𐴊𐴡𐴃𐴢 𐴀𐴠𐴕𐴊𐴞𐴓𐴧𐴝 𐴃𐴡𐴌𐴞𐴑𐴝𐴘𐴠 𐴒𐴡𐴙𐴃𐴧𐴡𐴥 𐴀𐴟𐴏𐴑𐴝𐴘𐴊𐴠𐴌, 𐴎𐴞𐴘𐴝𐴥𐴕 𐴐𐴡𐴥𐴌𐴞𐴘𐴡𐴃𐴡𐴌 𐴀𐴟𐴓𐴋𐴝.“

¹⁴𐴂𐴝𐴥𐴀𐴟𐴓𐴠 𐴈𐴡𐴃𐴝𐴤 𐴈𐴡𐴖𐴝𐴤 𐴐𐴟𐴥𐴌𐴟 𐴒𐴡𐴙𐴃𐴧𐴠𐴤, 𐴒𐴝𐴓𐴞𐴘𐴡𐴘𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴀𐴌 𐴊𐴠, ”𐴀𐴡𐴥 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢, 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝𐴌 𐴀𐴠𐴓𐴎𐴝𐴔 𐴘𐴝𐴀𐴕 𐴇𐴡𐴕𐴡𐴤 𐴏𐴡𐴥𐴘𐴧𐴞 𐴈𐴡𐴏𐴟𐴥𐴌𐴞𐴌 𐴘𐴝𐴥 𐴒𐴡𐴓𐴧𐴡𐴃𐴢 𐴈𐴝𐴔𐴡𐴌 𐴁𐴝𐴦𐴁𐴟𐴃𐴠 𐴀𐴡𐴥𐴘𐴃𐴡, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝𐴌 𐴈𐴡𐴃𐴝𐴤 𐴉𐴟𐴥𐴕𐴡𐴕 𐴀𐴝𐴣𐴀𐴌 𐴓𐴧𐴝 𐴇𐴝𐴎𐴡𐴌 𐴀𐴡𐴥𐴘𐴃𐴡.¹⁵𐴔𐴡𐴕𐴃𐴡𐴌 𐴘𐴝𐴀𐴕𐴡𐴃𐴢 𐴎𐴠𐴃𐴧𐴡𐴥𐴃𐴢 𐴃𐴝𐴦𐴓𐴞𐴔, 𐴕𐴝𐴔 𐴀𐴠𐴊𐴧𐴠 𐴃𐴟𐴣𐴀𐴝𐴥𐴌𐴝𐴌 𐴕𐴞𐴎𐴡𐴌 𐴐𐴡𐴥𐴌𐴞𐴘𐴡𐴃𐴡𐴌 𐴁𐴝𐴦𐴁𐴟𐴃𐴠 𐴏𐴟𐴥𐴖𐴝𐴓𐴢 𐴒𐴡𐴥𐴓𐴝𐴘𐴧𐴝 𐴀𐴝𐴏𐴠𐴤, 𐴘𐴝𐴀𐴕𐴡𐴌𐴠 𐴃𐴟𐴣𐴀𐴝𐴥𐴌𐴝 𐴕𐴞𐴎𐴠𐴁𐴝𐴎𐴠 𐴇𐴡𐴥𐴓𐴢 𐴒𐴡𐴌𐴡𐴤𐴒𐴡𐴘; 𐴀𐴝𐴀𐴛 𐴀𐴠𐴕𐴊𐴞𐴓𐴧𐴝 𐴔𐴝𐴦𐴔𐴠𐴓𐴝𐴌 𐴁𐴞𐴏𐴝𐴌𐴇𐴝𐴌 𐴀𐴡𐴥𐴘𐴃𐴡 𐴕𐴡 𐴏𐴝𐴀𐴙𐴌.“¹⁶𐴇𐴠𐴥𐴀𐴕 𐴈𐴡𐴀𐴘𐴢 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴝𐴊𐴝𐴓𐴡𐴃𐴡𐴃𐴧𐴟 𐴊𐴟𐴣𐴌𐴝𐴘𐴊𐴞𐴘𐴠𐴥.¹⁷𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴌 𐴏𐴡𐴥𐴊𐴧𐴝𐴌 𐴏𐴡𐴏𐴃𐴞𐴕𐴡𐴌𐴠 𐴊𐴡𐴥𐴌𐴞𐴘𐴡𐴌𐴠 𐴀𐴝𐴊𐴝𐴓𐴡𐴃𐴡𐴌 𐴔𐴟𐴀𐴕𐴃𐴟 𐴔𐴝𐴌𐴝-𐴊𐴡𐴥𐴌𐴝 𐴒𐴡𐴙𐴅𐴧𐴠𐴥. 𐴔𐴡𐴕𐴃𐴡𐴌 𐴒𐴝𐴓𐴞𐴘𐴡𐴘𐴠 𐴇𐴞𐴥𐴀𐴕𐴡𐴌 𐴇𐴞𐴥𐴑𐴧𐴝 𐴇𐴡𐴕𐴡𐴤 𐴊𐴞𐴥𐴘𐴝𐴕 𐴕𐴡𐴥 𐴊𐴠.

𐴀𐴠𐴕𐴄𐴞𐴘𐴡𐴑𐴡𐴃𐴢 𐴂𐴝𐴥𐴀𐴟𐴓𐴡𐴌 𐴖𐴝𐴦𐴉𐴠𐴏𐴞

¹⁸𐴂𐴝𐴥𐴀𐴟𐴓𐴢 𐴑𐴡𐴥𐴌𐴞𐴕𐴡𐴃𐴢 𐴁𐴡𐴀𐴗𐴃𐴢 𐴊𐴞𐴕 𐴃𐴝𐴥𐴑𐴞 𐴁𐴝𐴦𐴊𐴠, 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴊𐴡𐴃𐴧𐴟 𐴁𐴞𐴊𐴝𐴘 𐴓𐴡𐴘 𐴎𐴝𐴀𐴣𐴏𐴡𐴃𐴢 𐴒𐴡𐴥𐴌𐴞 𐴏𐴞𐴀𐴌𐴞𐴘𐴝 𐴔𐴟𐴓𐴧𐴟𐴑𐴡𐴃𐴢 𐴎𐴝𐴘 𐴁𐴡𐴓𐴧𐴝 𐴌𐴡𐴖𐴝𐴕𐴝 𐴀𐴡𐴥𐴘𐴧𐴠; 𐴉𐴟𐴥𐴖𐴝𐴣𐴃𐴞 𐴂𐴌𐴞𐴏𐴞𐴥𐴓𐴝 𐴀𐴠𐴊𐴧𐴠 𐴀𐴠𐴑𐴟𐴥𐴘𐴓𐴝 𐴘𐴡𐴥 𐴀𐴝𐴐𐴧𐴞𐴥𐴓𐴢. 𐴑𐴞𐴕𐴑𐴞𐴥𐴌𐴞𐴘𐴝 𐴐𐴡𐴥𐴀𐴌𐴡𐴃𐴢 𐴃𐴝𐴥𐴘𐴃𐴠 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴏𐴟𐴓𐴢 𐴈𐴝𐴍𐴞𐴉𐴠𐴓𐴝𐴙𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝 𐴀𐴠𐴑𐴧𐴝𐴥𐴕 𐴔𐴝𐴕𐴡𐴐𐴡𐴌 𐴃𐴡𐴓𐴠 𐴀𐴝𐴐𐴧𐴞𐴥𐴓𐴢.¹⁹𐴃𐴝𐴌𐴝𐴥 𐴀𐴞𐴥𐴉𐴞𐴏𐴝𐴏𐴢 𐴐𐴡𐴥𐴀𐴌𐴡𐴃𐴢 𐴉𐴡𐴀𐴣𐴏𐴞 𐴁𐴝𐴦𐴊𐴠 𐴂𐴝𐴥𐴀𐴟𐴓𐴠 𐴂𐴌𐴞𐴏𐴞𐴥𐴓𐴝 𐴀𐴠𐴊𐴧𐴠 𐴀𐴠𐴑𐴟𐴥𐴘𐴓𐴝𐴌𐴠 𐴇𐴠𐴥𐴍𐴠 𐴌𐴝𐴙𐴑𐴧𐴠𐴥. 𐴁𐴝𐴦𐴊𐴠 𐴀𐴞𐴥𐴁𐴝 𐴕𐴞𐴎𐴠 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴎𐴝𐴘𐴧𐴡𐴌𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴃𐴡𐴏𐴑𐴝𐴌𐴝 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠.²⁰𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴀𐴝𐴌𐴡𐴤 𐴇𐴡𐴦𐴊𐴧𐴞𐴕 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞 𐴁𐴡𐴓𐴧𐴝 𐴀𐴝𐴌𐴡𐴏𐴢 𐴒𐴡𐴙𐴅𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴀𐴞𐴥𐴁𐴝 𐴌𐴝𐴎𐴞 𐴕𐴡𐴥.²¹𐴁𐴡𐴥𐴓𐴑𐴠 𐴎𐴝𐴘𐴁𐴝𐴐𐴧𐴡𐴥𐴃𐴢 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴓𐴧𐴝𐴘𐴠 𐴏𐴝𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴝𐴁𐴝𐴌 𐴀𐴝𐴙𐴐𐴧𐴟𐴤𐴔.“ 𐴁𐴝𐴦𐴊𐴠 𐴀𐴞𐴥𐴁𐴝 𐴎𐴝𐴀𐴣𐴏𐴡𐴃𐴢 𐴒𐴡𐴥𐴌𐴞 𐴀𐴞𐴥𐴉𐴞𐴏𐴝𐴏𐴡𐴃𐴧𐴟 𐴌𐴡𐴖𐴝𐴕𐴝 𐴀𐴡𐴥𐴘𐴧𐴠,²²𐴀𐴝𐴦𐴌 𐴑𐴝𐴘𐴏𐴝𐴥𐴌𐴞𐴘𐴝𐴃𐴢 𐴓𐴝𐴔𐴞 𐴁𐴝𐴦𐴊𐴠 𐴖𐴡𐴌𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴒𐴞𐴦𐴘𐴠𐴥. 𐴃𐴝𐴌𐴉𐴡𐴌𐴠 𐴇𐴠𐴥𐴍𐴞𐴘𐴝𐴌 𐴎𐴡𐴔𐴝𐴥𐴃𐴡𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴏𐴡𐴥𐴓𐴝𐴔 𐴎𐴝𐴕𐴝𐴘 𐴀𐴠𐴕𐴄𐴞𐴘𐴡𐴑𐴡𐴃𐴢 𐴒𐴞𐴦𐴘𐴠𐴥𐴒𐴡𐴘.

²³𐴇𐴠𐴥𐴍𐴠 𐴇𐴡𐴦𐴊𐴧𐴞𐴕 𐴃𐴝𐴥𐴑𐴞 𐴁𐴝𐴦𐴊𐴠 𐴀𐴞𐴥𐴁𐴝 𐴒𐴝𐴓𐴝𐴃𐴞𐴥𐴘𐴝 𐴀𐴠𐴊𐴧𐴠 𐴉𐴠𐴌𐴒𐴞𐴘𐴝 𐴀𐴠𐴓𐴝𐴑𐴝𐴌 𐴀𐴝𐴒𐴝𐴒𐴟𐴌𐴝𐴃𐴢 𐴎𐴝𐴘-𐴎𐴝𐴘 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌 𐴀𐴞𐴔𐴝𐴕 𐴔𐴡𐴎𐴁𐴟𐴃𐴢 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.

𐴀𐴞𐴥𐴉𐴞𐴏𐴝𐴏𐴡𐴃𐴢 𐴀𐴝𐴂𐴡𐴥𐴓𐴡𐴏𐴡𐴌 𐴃𐴡𐴁𐴡𐴓𐴞𐴑

²⁴𐴇𐴠𐴥 𐴀𐴡𐴑𐴃𐴡𐴥𐴃𐴢 𐴀𐴝𐴂𐴡𐴥𐴓𐴡𐴏𐴢 𐴕𐴝𐴔𐴡𐴌 𐴀𐴠𐴥𐴎𐴧𐴡𐴕 𐴘𐴡𐴇𐴟𐴥𐴊𐴞 𐴀𐴞𐴥𐴉𐴞𐴏𐴝𐴏𐴡𐴃𐴢 𐴀𐴝𐴙𐴐𐴧𐴞𐴤𐴓𐴢, 𐴎𐴞𐴁𐴝𐴤 𐴀𐴝𐴓𐴠𐴑𐴏𐴎𐴠𐴕𐴊𐴝𐴌𐴞𐴘𐴝 𐴐𐴡𐴥𐴀𐴌𐴡𐴃𐴢 𐴎𐴡𐴌𐴔𐴡 𐴀𐴡𐴥𐴀𐴙𐴓𐴢. 𐴘𐴡𐴥𐴒𐴧𐴗𐴝𐴘𐴠 𐴐𐴟𐴥𐴕𐴊𐴡𐴌𐴒𐴡𐴌𐴞 𐴖𐴝𐴀𐴎𐴢 𐴒𐴡𐴙𐴃𐴧𐴡𐴥, 𐴀𐴝𐴦𐴌 𐴂𐴝𐴑-𐴑𐴝𐴓𐴝𐴔 𐴉𐴟𐴌𐴝𐴉𐴟𐴌𐴞 𐴎𐴝𐴙𐴕𐴃𐴡.²⁵𐴘𐴡𐴥𐴒𐴧𐴗𐴝𐴘𐴠 𐴔𐴝𐴓𐴞𐴑𐴡𐴌 𐴃𐴡𐴌𐴞𐴑𐴝𐴌 𐴁𐴝𐴦𐴁𐴟𐴃𐴠 𐴃𐴝𐴦𐴓𐴞𐴔 𐴉𐴝𐴀𐴙𐴓𐴢, 𐴀𐴝𐴦𐴌 𐴁𐴞𐴐𐴞𐴤 𐴅𐴡𐴏𐴁𐴝𐴌 𐴏𐴝𐴥𐴀𐴣𐴃𐴠 𐴀𐴞𐴏𐴝𐴤𐴌 𐴁𐴝𐴦𐴁𐴟𐴃𐴠 𐴏𐴡𐴥𐴘𐴧𐴞𐴒𐴡𐴌𐴞 𐴃𐴝𐴦𐴓𐴞𐴔 𐴊𐴞𐴃𐴡 𐴀𐴠𐴊𐴧𐴠 𐴐𐴞𐴥𐴑𐴧𐴝 𐴊𐴞𐴥𐴃𐴡, 𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝𐴘𐴠 𐴎𐴝𐴙𐴕𐴃𐴡 𐴊𐴠 𐴏𐴞𐴌𐴞𐴥𐴉𐴢 𐴘𐴝𐴇𐴝𐴥𐴘𐴝𐴌 𐴁𐴝𐴥𐴂𐴄𐴞𐴏𐴔𐴝𐴌 𐴁𐴝𐴦𐴁𐴟𐴃𐴠.²⁶𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴔𐴧𐴡𐴃𐴡𐴌 𐴏𐴝𐴥𐴀𐴣𐴃𐴠 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴖𐴝𐴀𐴎𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠, 𐴔𐴡𐴕𐴃𐴡𐴌 𐴂𐴌𐴞𐴏𐴞𐴥𐴓𐴝𐴘𐴠 𐴀𐴠𐴊𐴧𐴠 𐴀𐴠𐴑𐴟𐴥𐴘𐴓𐴝𐴘𐴠 𐴎𐴠𐴣𐴃𐴧𐴠𐴥 𐴘𐴡𐴥𐴒𐴧𐴗𐴝𐴌 𐴈𐴡𐴃𐴝𐴤 𐴉𐴟𐴥𐴙𐴕𐴧𐴠, 𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴌𐴠 𐴀𐴞𐴥𐴃𐴝𐴌𐴝𐴌 𐴒𐴡𐴥𐴌𐴡𐴃𐴢 𐴓𐴡𐴘𐴎𐴝𐴘 𐴀𐴝𐴓𐴧𐴝𐴌 𐴌𐴝𐴏𐴃𐴝𐴌 𐴁𐴝𐴦𐴁𐴟𐴃𐴠 𐴀𐴝𐴌𐴡𐴤 𐴐𐴟𐴥𐴕𐴊𐴡𐴌𐴒𐴡𐴌𐴞 𐴁𐴟𐴎𐴝𐴥𐴘𐴧𐴠.

²⁷𐴀𐴝𐴂𐴡𐴥𐴓𐴡𐴏𐴡𐴃𐴧𐴟 𐴀𐴝𐴑𐴝𐴘𐴝 𐴀𐴠𐴓𐴝𐴑𐴝𐴃𐴢 𐴎𐴝𐴘𐴃𐴡 𐴔𐴡𐴕𐴠𐴈𐴡𐴘𐴧𐴠𐴥 𐴌𐴝𐴥𐴌, 𐴀𐴞𐴥𐴉𐴞𐴏𐴝𐴏𐴡𐴌 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴠 𐴘𐴡𐴥𐴒𐴧𐴗𐴝𐴌𐴠 𐴇𐴞𐴥𐴔𐴧𐴡𐴃𐴢 𐴊𐴞𐴥𐴘𐴠, 𐴀𐴝𐴦𐴌 𐴘𐴡𐴥𐴒𐴧𐴗𐴝𐴌𐴠 𐴀𐴠𐴏𐴃𐴠𐴑𐴁𐴝𐴓𐴢 𐴒𐴡𐴌𐴞𐴥 𐴁𐴡𐴓𐴧𐴝 𐴇𐴠𐴥𐴍𐴞𐴘𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴀𐴠𐴑𐴧𐴝𐴥𐴕 𐴐𐴠𐴣𐴍𐴞𐴥 𐴓𐴠𐴙𐴑𐴧𐴠𐴥. 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴀𐴝𐴓𐴧𐴝𐴌 𐴌𐴝𐴇𐴝𐴥𐴔𐴡𐴃𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤 𐴀𐴞𐴥𐴃𐴝𐴌𐴝𐴌𐴠 𐴘𐴡𐴥𐴒𐴧𐴗𐴝𐴘𐴠 𐴇𐴠𐴥𐴍𐴠 𐴉𐴡𐴀𐴣𐴏𐴞 𐴁𐴝𐴦𐴊𐴠 𐴁𐴞𐴐𐴞𐴤 𐴔𐴡𐴊𐴡𐴃𐴢 𐴒𐴡𐴙𐴅𐴧𐴠𐴥.²⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴘𐴠 𐴀𐴞𐴏𐴝𐴤 𐴀𐴡𐴥𐴙𐴓𐴊𐴠 𐴔𐴡𐴀𐴏𐴞𐴤 𐴊𐴠 𐴇𐴞𐴥𐴘𐴝𐴕 𐴂𐴝𐴑-𐴑𐴝𐴓𐴝𐴔𐴡𐴃𐴧𐴟 𐴊𐴡𐴓𐴞𐴓𐴢 𐴊𐴞𐴘𐴝𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴞𐴥 𐴘𐴡𐴥𐴒𐴧𐴗𐴝𐴘𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴔𐴟𐴀𐴕𐴃𐴟 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴎𐴟𐴌𐴠𐴏𐴟𐴥𐴌𐴠 𐴒𐴡𐴓𐴧𐴡𐴃𐴢 𐴏𐴝𐴥𐴁𐴟𐴃𐴢 𐴒𐴡𐴙𐴅𐴧𐴞𐴥𐴓𐴢.

The Word for the World International

https://app.library.bible/content/87faca8b51c22590