Exodus2
1Aipau tingdau Levime leuh gade mipei hangge Levime pui de ngngwa lunglu.2Cipau puide tetlaklu nah mipeina ge mnalu. Pa mipeina cide pe luilung yi eh ngau kelu dau, pa pecu keicum ge kebai. 3Dede pa pecu kebai si gailak dige, pa heku le tei kelu rak ge keulu nah cide teikapdi kehania nah hetsam le. Pecai pa ngiena de cika ge kailu nah kereuki kungga cehei kakgage kaizeudi.4Ge pecu daitei di ziebi de ngiena tipui kemdei gade sap eh piebam.5Pecai Pharaoh napui duipia zielie kereuki ga hung cidau pe kilame kereuki kungga terwala. Pharaoh napui marak cide cehei kakga bam eh ngaulu ge pa pe kilame de cide keu kera langgai.6Pa cide let kegai dau, pa ngiena de ngaulu. Ngiena hap bam. Pa pecu ngau pelungsia di eh rangdi, “Aide Hebrewme na hangge bi zie da.”7Iciu eh ngiena tipui Pharaoh napui dage ranggai, “N ziemne ngiena nkwet beulu kerane Ih Hebrewme pui gede peei beu zie mi?”8Pharaoh napui pe dage ranggai, “Miecu nah ngngwa gwanglu.” Cine releipuina cide mie delwe ngiena pui de ngngwa gwang beu.9Pharaoh napui ngiena pui dage ranggai, “Ngiena aide pwalwe a ziemne pecu nkwet beulo, nah Ih ncu n ziehidung teibeu zie.” Cine mipui be ngiena de pwalwe pecu nkwetlu.10Ngiena ngking cuh luge, pa pecu Pharaoh napui da ngngwa gwang beu, nah pa pecu pe napei teilu. Pa pezi Moses lie msiaklu delwe rang eh, “Kedanemene Ih pecu dui gade teu mpet kelune.”11Moses ngking cuhlu ge, pa pe minadung da tetpet eh penui bata kehung tei kebam ngaulu. Pa pekatei pe leuhme Hebrewme gede Egyptme pei gene dap bam eh ngaulu.12Moses lule ailam nreu pie twagwagai, nah pa migede cika bam eh ngaulu mege, pa Egyptme pei de teitsetti, delwe pe paau heciang gage kebaidi.13Pa pecai benai tetpet ge, ainie, Hebrewme pei kena kenggi bam. Pa kemaube pei dage ranggai, “Daitei lugu nang n zangpei de tei bamno?”14Dede Hebrewme pei hangge be Moses de keligai, “Caune ncu anai muiteube nah tutiakpe teibeu no? Nang acu de teitsetti zielie riem lani nang Egyptme pei de teitset kedi nzwa?” Ge Moses ngngi di nah rang, “Ih daitei di bi cide mi kedame cibam dida.”15Pharaoh cide siulu ge, pa Moses de teitset kera teidi. Dede Moses Pharaoh dade pakpwa Midiame deu ga lunghdi. Cika pa tekwa ge taiga ntum bam.16Cidau Midiame cingkube pe napuidung hang hena bamla. Penui gwang eh dui twaklu, penui pei kauruine sak kerane penui dui bungdung twak puilu.17Dede meurün kekwame kangge gwang eh penuide gwadi kera tei, dede Moses pet eh penuide ngha beu. Iciu eh pa penui kauruinedung de dui sak kera ha beu.18Releimedung penui pei Reuel da gwang keludau, pa keteu, “Daitei nnui henai kilung gwang zi süt lano?”19Penui keligai, “Egyptme ge ne meurün kekwamedung dade anuide kelibeu. Pa anui ziemne dui de twak beu nah kauruine de de dui sak kera peu.”20Ge pa pe napuimedung dage rangdi, “Iciude pa daiga lano? Daitei eh nnui minabe de gidi no? Pecu qu gailo iciu eh pa anuide ngngwa ma tyeilu kerane.”21Moses mipei cide de ngngwa lungh bam kera kesamdaulu, iciu eh pa pe napui Zipporah de kelak tei kera pwapeu.22Pa mipeina ge nnalu, nah Moses pezi Gershom msiaklu; pa rang eh, “Ih sangme deu ga lungh kebam ziemne.”23Peting ketie ge kedicai, Egypt ga hegwangpei tsaidi. Israelme kila baang tei eh pumtsi tah tei kebam ziemne mrabamla. Penui kengha sah eh kie gai, nah penui kekie Tinggwang da hang cangdi kedanemene penui hebaang tei kelane.24Tinggwang penui mra kwa siu keludau, Tinggwang Abraham dage, Isaac dage, nah Jacob dage samkak tei kelude nsung gwanglu.25Tinggwang Israelme keherei kebam de ngaulu, nah pa penui reidung cicanglu.
Bridge Connectivity Solutions Pvt. Ltd.