Exodus1
1Hezi aidungde Israel napeimedung Jacob de ngngwa nah pe kilungme rip de ngngwa Egypt ga kegwangmedung:2Reuben, Simeon, Levi, nah Judah,3Issachar, Zebulun, nah Benjamin,4Dan, Naphtali, Gad, nah Asher.5Jacob leuhme mina pelane seukelu riakhena ge. Joseph au ndaa de Egypt ga bam dida.6Cipau cai, Joseph, pe sinamedung pelane, nah penui ceheume pelane tsaidi.7Israelmedung penui leuh yisüt lu, mina kekiee ge lung silu, nah ngking süt petti; hangdeu penui ne lung puidi.8Cidau, Egypt reu ga hegwangpei keheci ge Joseph ha ci kemak kauge hegwang teilu.9Pa pe minadung dage rangdi, “Pielo, Israelme anui swade kiee nah ngking gwa dida.10Gwanglo, anui ningcing mriak süt delwe penui dage heta tei gai go, ciciu melie cai penui kiee reureu cu si zie, nah magade hereu ge petti cai, penui anui ngauraume de ncüt lwe anuide regi zie, nah hangdeu de pütti zie.”11Cine penui penuide peu heta kewhungdung tei eh tei keherei kerane hetampaumedung de nlum pwa penui reu gage kaigai. Israelme meitsi nah ma kedadung hekwa kera namdidung Pharaoh ziemne teilu: Pithom nah Rameses.12Dede Egyptme penuide tei keherei reuge, Israelme mina kiee reureu nah zangra reureu di. Cine Egyptme Israelme de hing cuhdi.13Egyptme Israelme de peu mtak mene mrisüt eh makam tei.14Penui tsuru nah tsukau ta kewhungdung nah luh ga heta leunedung lepwa penui teilung tei keherei süt gai. Penui tei kera tadung pelane de hungdi.15Ge Egypt hegwangpei Hebrewme hena tei kemnapui de mpau; hangge pui zi becai Shiphrah, nah kedage cai Puah.16Pa rangdi, “Nnai Hebrewme pui kemna ga kengha kecudau, mcet siakte lulo penui mna kecudau. Magade cide mipeina cai, nnai pecu teitset maisia; dede magade cide mipuina cai, peu pecu lunghlu.”17Dede hena teikemna pui kena Tinggwang mie hing nah Egypt hegwangpei penaide tei lo kebeu de nzwa tei ma; meliene, penai ngiena mipeinadung de peu ring bamdi.18Egypt hegwangpei hena teikemna pui kena de qu teugwang lwe penai dage rangdi, “Dai ziemne nnai aide tei bam no, nah peu ngiena mipeinadung de ring lano?”19Hena tei kemnapui kena Pharaoh sam keli, “Hebrewme puidung au Egyptme puidung nzwa ma. Penui au ngking nah heri kecune teikemna pui penui da gwang cang kemakne ge penui au mnalu.”20Tinggwang teikemna pui aidungde de gumlu. Mina kekiee ge lung silu nah ngking süt petlu.21Teikemna puidung Tinggwang mie hing kecu ziemne, pa penuide kilungmedung pwapeu.22Pharaoh pe minadung pelane dage aja kaigai, “Nnui mipeina nna kelu leune kereuki gage kelien gaidi maisia, dede nnui mipuina leune de peu ring luzie.”
Bridge Connectivity Solutions Pvt. Ltd.