Meng Klo5
1Aw ang kowh manau, ang kowh masi, ang kowh bakan kowi ang uang kup khowk,now nam iungma mih sau hai nam iungma mih chap ang krawi kua khowk.Kuaiba hai kuai tui ang cha khowk,grep tui hai iawn tui paw ang kham khowk.Jerusalem malauüa hawm kowh laiklow:Aw malauüa hai klanguüa, cha iüah kham iüa diah,enchi kowh tasakraura asowrma sunah iüa diah.2Ang müi chepaw ang kowh sak dow achingma chekhai.Nakhowk khe ang kowh klanguüa klow hai uang khik ang kimbüng mih klow ang ta khai.Aia tek ang mih, “Ang kowh masi, ang kowh manau, en dow ang kowh uatur chekhai,en dow angak uowi dowi mih ang kowh malauüa chekhai.Uang ho ang kimbüng diah;nang tui hown ang kowh lu sik khai bowt,iak-e kowh mai hown ang kowh sam sik khai bowt,” pakhai.3Nakhowk khe sakdawng kowi ang tatek mih, “Ang dow klüpta dawnguan khai bowt,tawng iawng chow ang naplan khupah iawk kown?Ang sauta khawk khai bowt,tawng iawng chow ang naplan lawiah iawk kown?” pakhai.4Ang kowh klanguüa dow uang klowt kimbüng kownkow kimbüng kua hownia uai suang rut khai,aia kowi prüa lai bowt kowh ang kowh sak mih ngawi prang towbowt.5Ang dow ang kowh klanguüa kowi kowuow pe kimbüng kownkow awr rü khai;nakhowk khe ang kowh rut dow nam iungma mih sau hown sikklawpma chekhai,now ang rut kowi kowh sau hown dow kimbüng klia müa sik khai.6Ang kowh klanguüa vüi ang uow pe kim chowdiah.Tawkche aia dow powt khai bowt.Naiawng rakowi lainowmma ang sak nga khai.Aia kowi ang krawi chamah chowdiah.Tawkche aia kowi ang krum dowi chekhai.Aia kowi ang krawi hawah chowdiah.Tawkche aia dow klang ang dowi chekhai.7Kangchawng miuüa marow kowi krawi chawng kang mih khin khe khita ang khai,now amatni dow nüla ang chawkkrawma kowh bawpta ang nak khai.Marow kowi kowh tap chawng miuüa paw ang kowh lumowr khu müa uan rupta ang khai.8Aw Jerusalem masiuüa, enni che ang kowh klanguüa kowi khi hanow,“Ang naukhi en lai bowt kowh ang kowh kow uak khai bowt,” pape diah.9Aw lang klangiung mih malauüa, akeng mih klanguüa lak-e en kowh klanguüa tawng iawng chow lang klangiung?Tawngplawng kowchow maiawng en krawi tukma anging laiklow khai?10Ang kowh klanguüa kowh lumowr dow klangiung krang sat iawng tawk khai,now aia kowh pik mia dow asüama chekhai.Aia dow 10,000 ia klanguüa pungmadawng kowi kowh lang klangiung mih chekhai.11Aia kowh lu dow achangma mih kuh iawng klangiungma chekhai,aia kowh sam dow akünma panow uaak iawng aingma chekhai.12Aia kowh mik dow aw pang kowi kaurawng uatur uowi achum mih iawng chekhai;aia kowh mik dow iawn tui kowi sauah mih asung khakma mih hua iawng chekhai.13Aia kowh awm dow nam iungma mih bakan iawng,nami hownia dow nam iung uang tauet reng chekhai.Aia kowh ve dow anam krawi tauet khai,nami nam dow lili pau nam iawng chekhai.14Aia kowh rut dow kuh raitua iawng chekhai.Nami dow tow pe Oniks hua mih raitua iawng chekhai.Aia kowh kow dow asung khakma mih hua hown kowh tawngah mih iawng chekhai,nami kow klangiung krang dow sawkta hüah mih ngasai sa iawng chekhai.15Aia kowh thung dow asung khakma mih hua chüng iawng chekhai.Nami dow achangma mih kuh chüng luk kowi kowh chowkta hüah mih hua iawng chekhai.Aia kowh powm dow Lebanawn hungh kowi kowh sidar singh iawng chekhai.Nami dow lang klangiung mih sidar singh iawng chekhai.16Aia kowh nawr dow lainowmma ding chekhai,aia dow pabuk pakowma klangiungma kangowh chekhai.Aw Jerusalem masiuüa, aia dow ang kowh klanguüa chekhai,aia dow ang kowh auiua chekhai.
The Seed Company