Isai28
1Uh! Samari marow dow apuama miuüa kowh lukruk iawng chekhai,Israeluüa dow nami marow hown chang bawri khai.Nami marow dow asi uowima mih lawngrawi luk kowi uowi khai.Nachenganchepaw nami dow mata klangiungra mih pau iawng chekhai.Nami marow dow pua miuüa kowh bawrira chekhai.2Sünta, CHAKRAMANG kowh nowng changra uowima hai akürma mih maru uang lowk ia khowk.Nami maru dow Israeluüa kowh marow kowi ria hai liku hown uangchak mang iawng nauang kown,now nami pren kowi nauang piakta nak kown.3Israel kowi kowh apuama miuüa changla bawri mih lukruk nathuata nak kown;nami lukruk dow khawk hown nathuata nak kown.4Nami marow dow asi uowima mih lawngrawi luk kowi uowi khai;nami dow mata klangiungra mih pau iawng chekhai.Israeluüa kowh klangiungma mih marow dow rik min mih uidut uih iawng nakhowk kown.Nami dow khi mih srui rut hown lüngah hanow iawnta mih iawng naown kown.5Nami ni khe dow mukuang siphaiuüa kowh CHAKRAMANG mih aia kowh ta sing uowi mih maru-uüa vüikraingra uowima mih lukruk hai klangiungma mih keng iawng naphaw kown.6Aia mih tara chet mih kowh sak kowi nachet tara nowm kown mih saktuak natow pe kown.Tapplawt kowi iowng hanow hawt hen tasen mih siphaiuüa kowi dow aia mih napeah kür kown.7Nachenganchepaw Israel kowi kowh uamow hai risiuüa dow apuama uowi khai;amatni dow kham grep tui kowh kawmat apuama uowi khai,now kham arak kowh taiüa lutlut büah khai.Amatni dow apuama taiüa lutlut se khi mukmang khai,now apuama chet tara khai.8Amatni kowh pawitang maten kowi dow hük kangowh chekhai;hük klen kowi dow asaichow mih rah ditchow khowm uowi dowi chekhai.9Amatni dow tek mih, “Mia kowi chow aia tüngsang?Aia kowh laiklow mia tut-e chow krawi phuang?Le iawn khowk miuüa tut-e nami dow tawngpaw nadowi chekhai.10Nami dow, ‘Mami chang diah, paimi chang diah,mami rirow chün diah, paimi rirow chün diah,mami re-e uowi, now paimi re-e uowi,’ pami chekhai,” pakhai.11Naiawng rakowi kawmat mih naiawngün maru-uüa kowi maru tuk taah dowi mih laiklow hown CHAKRAMANG naklowpah kown,amatni kowi dow prenlang maru-uüa laiklow hown CHAKRAMANG naklowpah kown.12Amatni kowi CHAKRAMANG tek pe mih, “Mami chowbowt tanaira;kawm miuüa dow mami re-e pacham tanai lah,mami chowbowt asowrma mih uowira,” pakhai.Nachenganchepaw amatni dow sünta kown nau dowi chekhai.13Naiawngün laiklow dow amatni tut-e,“Mami chang diah, paimi chang diah,mami rirow chün diah, paimi rirow chün diah,now mami re-e uowi, paimi re-e paw uowi,” pami iawng chekhai.Naiawng rakowi amatni dow kung prakowi natim büah kown,now ka arau khe leng kowi natasowk büah kown.14Naiawng rakowi krawi prawngren maru miuüa low,Jerusalem kowi kowh maiawngün maru-uüa kowi kruitown miuüa low,CHAKRAMANG laiklow sünta büa diah.15Owrowma hown enni tek mih, “Makownguüa uowi rah hown ang tatow sangbowk laitawm khowk.Piakra müa akürma uang kla khe nami dow ang tut-e nauang ting kown nadowi.Tawngplawng kowchow panow dai lai kowi anging changla tatung tanimra khowk,now kuanra kowi dow anging changla tapetra khowk,” pakhai.16Naiawng rakowi CHAKRAMANG Thurai tek mih,“Sünta, chaingta khowk mih asung khakma mih hua ang ruita lowk khowk;nami dow Zaiawn kowi kowh achüng vüi hua iawng ang towta khowk chekhai.Aia luk kowi kowh owm mih srui dow atungma anikma nauowi kown.17Tara nowm kowi dow aklang khai müa leng iawng,now anowm kowi dow ateng khai müa leng iawng ang nachangah kown.Enni changla tatung tanimra mih dai lai kowi dow ria napiakta kown,now enni changla tapetra mih arah kowi dow tuikling mangma nanawmla kown.18Kowng hown enni tatowta sangbowk laitawm khowk mih dow natapiak kown;makownguüa uowi rah hown kowh enni towta sangbowk laitawm mih dow nanik kown nadowi.Piakla kown mih müa akürma uang kla mih khin khe nami hown nabawp enni kown.19Nami müa uang kla towng nabawp enni kown;rau towng rau towng, ni-e hai iak-e nami dow akürma nauang kla kown.Mami laiklow tukta hanow lainowmma enni nakram kown,” pakhai.20Atengma namawkla kownkow enni kowh phangbek town khai,now nakhupah kown mih uan paw sowm khai.21CHAKRAMANG mih Perazim hungh hai Gibeawn lawngrawi kowi kowhaia dowk tasen iawng nadowk tasen kown.Naiawng hown aia kowh lup dow aia nachurah kown;aia kowh awdara hai lakkhiara uowima mih lup dow naiawng aia nachurah kown.22Naiawng rakowi kawmat mih enni krawi prawngren maru mih rimta büa diah;nadowi now tawmla enni mih leng nasi ngamlam kown.Tawngplawng kowchow panow paprenma napiakta kown mih laiklow ang ta khowk.Nami laiklow dow mukuang siphaiuüa kowh CHAKRAMANG nawr hownia ang ta khowk chekhai.23Sünta, ang laiklow kowi pe param büa diah;ang tek mih sak hownia sünta büa diah.24Laih lup chang mih maru nasawt liu kownkowhing pawkta bawn hüah dowi chekhai.25Ki pawkta bawn khowk hanow aia mih krawi sawt pe liu reng;püm hai iakmow kowi atanma aia krawi sawtah reng chekhai.Nami kung kowi dow akeng mih kan nuk hap liu aia krawi sawt pe reng chekhai.26Aia kowi dow aia kowh Thurai peah tukra khai.Naiawng rakowi tawng iawng chow achang takla mih aia tuk chekhai.27Tingnuk aipra kowi dow adikma mih aküa müa hown küaah dowi;nami kowi dow khowt pat dih dowi mih aküa müa hown küaah reng chekhai.28Miapaw achur uowi dowi pat tung püm dowi chekhai,naiawng che tung hanow püm napiak kown chekhai.Maru tung püm khe napiak dowi kownkow lakke mowrchow taih tungah reng.29Naiawngün chanlaira maten dow mukuang siphaiuüa kowh CHAKRAMANG hownia uang ting mih chekhai.Aia kowh prengia hai aia kowh chanlaira dow lainowmma klangiung chekhai.
The Seed Company