Uown Thawp40
Josef phuang mang mih
1Naiawngün kung kowi akat khe Aigupta pren mang kowh kawm thawp mih aluchow hai grep tui pek mih aluchow dow mang naukhi dowi iawng changta lup khai.2Naiawng rakowi Aigupta mang mih nami maru pre ia luk kowi lainowmma kunmarau khai.3Nami maru pre ia kowi dow Josef uowiah mih thawngrum lak kowi mang kowtowah thawng khai. Nami dow thawngrum chawng mih aluchow kowh kim kowi chekhai.4Now thawngrum chawng mih aluchow dow nami maru pre ia kowi naming nakhet kown mih kurdik Josef kowi peah khai. Naiawng hai amatni dow khin krama thawngrum kowi taiua uowi büah khai.5Akat khe dow mang kowh kawm thawp mih aluchow hai grep tui pek mih aluchow mih uar-e taiua khi mang iüah lowk chi khai. Nachenganchepaw amatchi kowh mang uan dow alangma kangowh chekhai.6Now auai rau amatchi tut-e Josef kowkowi mih khin khe amatchi dow mawnchürüchow kangowh hawt uowi iüah mih Josef kowkhi khai.7Nami khita now Josef lüntaah mih, “Tawngplawng kowchow arau dow enchi mawn lai kowbow?” pape khai.8Amatchi tek pe mih, “Angching pre ia dow khi mang lowk chi khai. Nachenganchepaw nami mang uan naphuang angching kown mih maru miapaw uowi dowi,” pakhai.Josef tek pe mih, “Mang uan nowng phuang mih Thurai uowi nadowi bow? Enchi khi-ah mih mang phat ang iüah madiah,” pape khai.9Naiawng rakowi nami grep tui pek mih aluchow dow aia mangah mih Josef kowi phat pe khai. Aia tek pe mih, “Mang lak kowi dow ang pur kowi ang khi grep ruih atut.10Nami grep ruih kowi mih aprek uowi sum buk. Nami aprek kowi dow aram awr thawn hown krowksang awr pau khai, now apawt apawtma awr uih hanow awr min khai.11Nami khin khe Faraw kowh bia mih ang rut kowi chekhai. Now ang krawi klek grep uih hanow nami bia kowi ang pet pe atui khai, now nami dow Faraw kowi ang peah khai,” pakhai.12Josef tek pe mih, “Nami mang uan dow maiawng: Aprek uowi sum buk mih uan dow sum ni pami chekhai.13Ani hownia sum ni kowh ni khe mami hownia Faraw nalawtla en hanow en changla mih lup naplan pe chang en iawk kown. Now alai kowh iawng dow Faraw kowh grep tui pek mih en nachowng iawk kown.14Nachenganchepaw thawngrum hownia en khalat mih khin khe tuakla ang dit ba. En rakowi mami thawngrum hownia ang nowng lawtla kownkow sakrauma hown ang lawnguan Faraw kowi tek pe dit.15Lainowm che tek now Hebraiuüa pren hownia khümla ang now kür hown uang pawla ang mih chekhai. Nami klen kowi mami pren kowi ang uang uowi mih khin khe paw mami thawngrum kowi naklala pat mih angak tawngpaw ang chang dowi chekhai,” pape khai.16Faraw kowh kawm thawp mih aluchow dow a-auiua kowh mang uan aiungma chekhai mih tuk hanow aia paw aia kowh mang Josef kowi phat pe khai. Josef kowi tek pe mih, “Ang paw khi mang lowk. Ang khi mih dow ang lu luk kowi kawm kharang uowi sum buk.17Now aluk kowi kowh kharang kowi dow kawm chap ahuma uowi khai. Naiawngün kawm dow Faraw vüi chekhai. Tawkchedow uaklinguüa uang mownah now nami ang lu luk kowi kowh kawm mih uang chawtta khai,” pakhai.18Josef tek pe mih, “En kowh mang uan dow maiawng: Kharang sum buk mih auan dow sum ni pami chekhai.19Kawmat hownia sum ni kowh ni khe Faraw nadungta en lu hanow en kowh buk dow singh kowi natarta en hüah kown, now uaklinguüa uangah hanow en buk kowi kowh nga mih nauang chawt en kown,” pape khai.20Now sum ni kowh ni khe dow Faraw kowh dia ni chekhai bowt. Nami ni dow aia nimkrüa kowi kowh lup chang miuüa maten kowi Faraw chang pe pawi lowk khai. Nami ni khe aia kowh kawm thawp mih aluchow hai grep tui pek mih aluchow kowi thawngrum hownia uang lawtla now maru kawmuüa pur kowi uang pawla khai.21Now aia kowh grep tui pek mih aluchow kowi dow auown khe kowh lup Faraw plan pe changah khai. Nami hownia now nami maru dow Faraw kowh grep tui pek mih lup plan chang khai iawk.22Tawkche kawm thawp mih aluchow kowh buk dow singh kowi tarta hüah khai. Amatchi kowi Josef phuang pe mang mih auan powm iawng amatchi luk kowi uang ting khai.23Nachenganchepaw nami grep tui pek mih aluchow dow Josef kowh laimak tamata khai, Josef lawnguan kowi aia dow mapaw hing ka tuak dowi chekhai.
The Seed Company