Uown Lawt3
Mosi kowi Thurai hawah mih
1Akat khe Mosi mih a-pu Jethraw kowi cham thing pe rua hai ruapur hawmh khai. Jethraw dow Midian pren kowi kowh uamow chekhai. Naiawng aia cham thing rua hai ruapur mih khin khe Mosi mih süngrüp süngkangma paipra pown kowi kowh Sinai pape mih Thurai hungh re-e kowting khai.2Nakowi mih singh plum dawng kowi maih lün pluplup mih hownia CHAKRAMANG kowh kramamu aia tut-e uang tatüng khai. Nami singh plum dow maih lün pluplup chepaw kam dowi mih Mosi khi khai.3Nami khita hanow Mosi ka tuak mih, “Aria kowi kowkowiah hanow nami awdara sia ang kowsam mü matak. Tawngplawng kowchow singh plum kam dowi mih ang kowmü tak,” pakhai.4Nakowmü kownkow Mosi haimang mih khin khe nami singh plum hownia CHAKRAMANG Thurai hawah mih, “Mosi, Mosi,” pakhai.Mosi klangah mih, “Mami re-e chaw ang uowi,” pakhai.5CHAKRAMANG tek pe mih, “Hauang tatawn tham bowt. En iowngah mih arah dow chimsaima chekhai. En kowh phanaikhawk klüpta diah.6Ang dow en pa kowh Thurai; ang dow Abraham, Isak hai Jakawb kowh Thurai chekhai,” pakhai. Nakhowk khe Mosi mih Thurai kowi khi kown kram kowh mumta lumowr khai.7CHAKRAMANG tek pe mih, “Ang maru-uüa luk kowi Aigupta maru-uüa changah anowng apowng mih ang khi. Aigupta aluchowuüa changah anowng apowng rakowi Israeluüa kar mih klow ang ta chekhai. Amatni kowh akawm akrat lawnguan mih ang tuk.8Aigupta maru-uüa rut hownia amatni kowi nalawngah kownkow ang uang dowm mih chowbowt. Amatni kowi mih Aigupta pren hownia nalawtla hanow Kananuüa, Hituüa, Amawruüa, Perizuüa, Hivuüa hai Jebusuüa pren kowi ang napawla kown. Naiawngün pren dow aiukma hai klangiungma chekhai. Nakowi dow iawn tui, kuai tui hai tawng chap paw akhawr uowi dowi.9Israeluüa kowh kar klow mih ang tut-e uang towm khai bowt. Matawng iawng chow amatni kowi Aigupta maru-uüa changah anowng apowng mih paw ang khi khowk.10Naiawng rakowi kawmat mih Faraw tut-e ang kowchin en kown, en mih kowkowi diah. Nakowi kowkowiah hanow ang maru Israeluüa kowi Aigupta pren hownia uang lawtla diah,” pape khai.11Nachenganchepaw Mosi tek pe mih, “Ang dow tawngpaw nadowi mih maru chowtaih. Tawng iawng chow Faraw tut-e kowkowiah now Aigupta pren hownia Israeluüa kowi ang uang nowng lawtla chow?” pape khai.12Thurai tek pe mih, “Ang natawi uowila en kown taih. Aigupta pren hownia Israeluüa kowi en nauang lawtla hanow mami hungh kowi enni nauang chupiia ang kown. Enni uang chupiia ang mih dow ang kowchin en mih chekhai pami amatra naown kown,” pakhai.13Nakhowk khe Mosi tek pe Thurai mih, “Ang kowkowiah now Israeluüa kowi, ‘Enni pipu-uüa kowh Thurai uang chin ang mih chowbowt,’ pahai ang kowtek pe kown. Nachenganchepaw nakhowk khe amatni mih, ‘Aming tawng chow?’ padow nalünta ang büah kown. Nami khin khe amatni kowi tawng iawng chow ang natek pe kown?” pape khai.14Thurai tek pe Mosi mih, “IAWNGUOWI. Israeluüa kowi en natek pe kown mih, ‘IAWNGUOWI pami enni tut-e uang chin ang mih chowbowt,’ pape diah.15Nami klen kowi CHAKRAMANG , amatni kowh pipu Abraham, Isak hai Jakawb büah kowh Thurai, amatni tut-e uang chin en mih pami paw tek pe diah. Chowngchowng saksakma ang kowh ming dow CHAKRAMANG chekhai. Chowngchowng saksakma mami ming hown maru natuk ang kown.16Kowkowiah hanow Israel lawngtang aluchowuüa kowi arasang kowkuaah diah, now amatni pipu Abraham, Isak hai Jakawb büah kowh CHAKRAMANG Thurai uang tatüng en mih tek pe diah. Aigupta pren kowi tawng ngai chow amatni kowi maru changah mih ang khi reng chekhai.17Naiawng rakowi ang takham khowk. Aiguptauüa nowng chang powng changra hownia amatni kowi mih ang nalawtla bowt kown. Now Kananuüa, Hituüa, Amawruüa, Perizuüa, Hivuüa hai Jebusuüa pren kowi amatni kowi ang napawla kown. Nakowi dow iawn tui, kuai tui hai tawng chap paw akhawr uowi dowi chekhai pami tek pe diah.18“En kowh lai dow Israel aluchowuüa nasünta en kown taih. Now en hai amatni hailawm Aigupta mang tut-e nakowkowi kown. Enni tek pe kown mih, ‘Hebraiuüa kowh CHAKRAMANG Thurai uang tatüng anging khai. Süngrüp süngkangma kowi sum ni mang rawng mangah hanow anging kowh CHAKRAMANG Thurai vüi tawncher hown nachang phuchua kownkow uang tek anging khai. Naiawng rakowi sakrauma hown pe kowi anging diah,’ pape diah.19Nachenganchepaw mün khowt chow ang kür mih ang tüng pe dowi matchang Aigupta mang mih nape kowi enni kown nadowi.20Naiawng rakowi ang kowh kür hown awdara uowima mih lup ang natüng pe kown. Awdara uowima hown Aigupta pren kowi ang naripah kown, nahanow Faraw mih nalawt enni kown taih.21Aigupta maru-uüa kowi mih nasanala enni kown mih saktuak ang napeah kown. Nahanow Aigupta pren hownia enni uang lawt mih khin khe rut khawma hown enni nalawt kown nadowi bowt.22Hebrai masiuüa maten amatni klowkchak Aigupta masiuüa hownia hai naiawngünuüa kim kowi kowh uowi mih akeng chenchap masiuüa hownia nalüla uanh kown. Amatni dow kuh hai tai hown kowh uanh ün, tawnguat ün nalüla kown. Now naiawngün uanh hown enni kowh chauüa kowi enni natawngah kown. Naiawng hown Aiguptauüa kowh uanh mih Israeluüa nakhuowila pe bun kown,” pakhai.
The Seed Company