Лекм39
1Господьын Моисейлан кӱштымыж семынак, святой верыште служитлаш шемалге-канде, шемалге-йошкар да йошкар меж дене иерей вургемым да Ааронлан святой вургемым ыштеныт.2Шӧртньӧ шӱртӧ да шемалге-канде, шемалге-йошкар, йошкар меж да чапле йытын шӱртӧ дене ефодым ыштеныт.3Шӧртньым лышташ гайым таптеныт да шӱртӧ гайым пӱчкеденыт, вара шемалге-канде, шемалге-йошкар, йошкар меж шӱртӧ да йытын шӱртӧ коклашке устан куэн шынденыт.4Ефодлан вачӱмбал ластыкым ыштеныт да нуным ефодын кок кӱшыл лукышкыжо кылден шынденыт.5Ефод ӱмбалысе ӱштӧ, ефод семынак, шӧртньӧ дене ыштыме шӱртӧ, шемалге-канде, шемалге-йошкар, йошкар меж да чапле йытын шӱртӧ дене ыштыме лийын. Тыге Господь Моисейлан кӱштен.6Кок оникс кӱм ямдылен, тушан Израиль эрге-влакын лӱмыштым туге пӱчкын луктыныт, кузе кӱм пӱчкедыше мастар печатьым пӱчкын луктеш. Вара кок оникс кӱм узоран шӧртньӧ рамылашке вераҥденыт.7Нуныжым ефодысо вачӱмбал ластык-влакеш пижыктеныт – тидыже Израиль эрге-влак нерген шарныктыш лийын. Тыге Господь Моисейлан кӱштен.8Ефодым ыштыме семынак пеш устан оҥсакышым ыштеныт. Тудым ышташ шӧртньӧ шӱртым, шемалге-канде, шемалге-йошкар, йошкар меж шӱртым да чапле йытын шӱртым кучылтыныт.9Оҥсакыш ныл лукан, пелыгыч тодыл пыштыме, шеч кутышан да шеч лопкытан лийын.10Оҥсакышыш ныл рат дене кӱ-влакым пеҥгыдемден шынденыт. Икымше ратыште – рубин, топаз, изумруд;11кокымшо ратыште – карбункул, сапфир да алмаз;12кумшо ратыште – яхонт, агат да аметист;13нылымше ратыште – хризолит, оникс да яспис. Нуным узоран шӧртньӧ рамылашке пижыктен шынденыт.14Кӱ чылаже латкокыт лийын. Тиде чот Израиль эрге-влакын чотышт дене келшен толын: кажне лӱмлан – ик кӱ. Кажне кӱэш латкок тукым гыч иктыжын лӱмжӧ, печатьысе семынак, пӱчкын лукмо лийын.15Оҥсакышлан яндар шӧртньӧ дене кок вичкыж шинчырым пуненыт,16узоран кок шӧртньӧ рамым да кок шӧртньӧ колчам ыштеныт. Колча-влакым оҥсакышын кок кӱшыл лукешыже пижыктеныт,17а пунымо кок шӧртньӧ шинчырым нине кок колчаш чыкеныт.18Шинчыр-влакын ик мучашыштым узоран рамылашке, а вес мучашыштым ефодын вачӱмбал ластыклажын ончыл могырешышт пеҥгыдемден шынденыт.19Тыгак кок шӧртньӧ колчам ыштеныт да нуным оҥсакышын ефод деке тӱкнышӧ шеҥгел могырешыже, вес кок лукешыже, пеҥгыдемден шынденыт.20Эше кок шӧртньӧ колчам ыштеныт да ефодын кок вачӱмбал ластыкшын ончыл могырысо ӱлыл тӱрешыже, ефод деке урген шындыме вереш, ефодын ӱштыж деч кӱшнырак пеҥгыдемден шынденыт.21Господьын Моисейлан каласымыж семынак, оҥсакышым колчашт дене ефод колчалашке шемалге-канде меж шӱртӧ дене кылденыт. Тыге оҥсакыш ефод ӱштӧ деч кӱшнырак лийын, ефод деч ойырлен шоген огыл.22Ефод дене пырля чияш ӱмбал вургемым, тӱрыснек шемалге-канде меж дене куымым, ыштеныт.23Ӱмбал вургемын покшелныже – вуйлан рож, кӱртньӧ тувырышто улшо гай, а ынже кушкедле манын, рож йыр чоткыдо куэмым ургымо.24Ӱмбал вургем урвалте мучко шемалге-канде, шемалге-йошкар да йошкар меж дене гранат саска-влакым ыштеныт.25Яндар шӧртньӧ дене изоҥгыр-влакым ыштеныт да нуным ӱмбал вургем урвалте йыр гранат саска коклашке сакаленыт.26Служитлыме годым чийышаш ӱмбал вургем урвалте йыр изоҥгыр ден гранат саска-влак почела кеченыт. Тыге Господь Моисейлан кӱштен.27Ааронлан да тудын эргыж-влаклан чапле йытын гыч куымо вынер дене кужу тувырым,28кидарым, вуйчиемым да вичкыж йытын вынер дене йымалвургемым ыштеныт.29Вара эше чапле йытын да шемалге-канде, шемалге-йошкар, йошкар меж шӱртӧ дене тӱрлыман ӱштым ыштеныт. Тыге Господь Моисейлан кӱштен.30Вара яндар шӧртньӧ дене изоҥам, святой сӧрастарыш оҥам, ыштеныт. Тушан печатеш пӱчкын лукмо семынак «Господьлан святитлен ойырымо» манын пӱчкын луктыныт.31Тудым кидар ӱмбаке кылден шындаш манын, тушко шемалге-канде меж шӱртым кылденыт. Тыге ышташ Господь Моисейлан кӱштен.32Тыге Юмо дене вашлийме омашлан ыштыме паша мучашлалтын – Израиль эрге-влак чылажымат Господьын Моисейлан кӱштымыж семын ыштеныт.33Скиний ден леведышыжым, тушто кучылтшаш чыла арверым – руалтышлам, брус ден вара-влакым, меҥге ден негыз-влакым,34йошкар тӱсан тага коваште дене ыштыме леведышым, чапле вичкыж коваште дене ыштыме вес леведышым, петырыше пӱрдышым,35ойпидыш шондыкым, тудын вараже-влакым, комдышыжым,36ӱстелым да тудын пелен кучылтмо чыла арверым, надыр киндым,37яндар шӧртньӧ дене ыштыме светильникым, тушко рат дене шындылме лампаде-влакым, светильник пелен кучылтмо чыла ӱзгарым, волгалтарашлан олив ӱйым,38шӧртньӧ жертвенникым да елейым, тамлыпушан тӱтыртышым, скинийыш пурымо верым петыраш пӱрдышым,39той жертвенникым, тудын той решоткажым, кок варажым да жертвенник пелен кучылтшаш чыла ӱзгарым, чаным да тудым шындашлан негызым,40кудывече пӱрдыш-влакым, меҥге ден негызлажым, кудывечыш пурымо верлан пӱрдышым, кандыра ден кошар пашкар-влакым, Юмо дене вашлийме омашыште служитлашлан кӱлшӧ чыла ӱзгарым,41святой верыште служитлаш вургемым – иерей Ааронлан святой вургемым, тудын эргыж-влаклан служитлышаш вургемым – Моисей деке конденыт.42Тыгеракын, израиль эрге-влак чылажымат Господьын Моисейлан кӱштымыж семынак ыштеныт.43Моисей чыла ыштыме пашам ужын. Чылажат Господьын кӱштымыж семын ыштыме лийын, да Моисей нунылан Юмын суапшым тыланен.
Institute for Bible Translation, Finland