Лекм40
1Господь Моисейлан каласен:2«Икымше тылзын икымше кечынже Юмо дене вашлийме омашым шогалте,3тушан ойпидыш шондыкым вераҥде да тудым пӱрдыш дене посна ойыро.4Омашыш ӱстелым пуртен шынде, ӱмбаланже мо кӱлешым чыла вераҥде, тыгак светильникым пуртен шынде да тушан лампаде-влакым шындыл.5Ойпидыш шондык ончылно тӱтыраш шӧртньӧ жертвенникым шогалте да [Юмо дене вашлийме] омашыш пурымо верыште пӱрдышым саке.6Юмо дене вашлийме омашыш пурымо вер ончылно надыр йӱлалтыме жертвенникым шогалте.7Омаш ден тиде жертвенник коклаш чаным шынде, тушко вӱдым теме.8Омаш йыр пӱрдыш дене кудывечым ойыро, тушко пурымо верышкат пӱрдышым саке.9Елейым нал да тиде скинийым, тушто чыла мо улым шӱрӧ – скиний ден тушто кучылтмо чыла арверым святитле. Тыге тудо святой лиеш.10Надыр йӱлалтыме жертвенникым, тудын пелен кучылтмо чыла арверым шӱрӧ да тыге жертвенникым святитле. Тунам тудо пеш чот святой лиеш.11Чаным да тудым шындыме негызым шӱрен святитле.12Аароным да эргыже-влакым Юмо дене вашлийме омашыш пурымо вер деке кондо да нуным вӱд дене муш.13Аарон Мыйын иереем лийже манын, тудлан святой вургемым чикте, тудым шӱрен святитле.14Эргыже-влакымат кондо да нунылан кужу тувырым чикте.15Мыйын иереем лийышт манын, ачаштым шӱрымӧ семын нунымат шӱрӧ. Тиде шӱрымаш нуным да ончыкылык тукымыштым курым-курымешлан иерей радамыш шогалтымым ончыкта».16Моисей чылажымат Господьын кӱштымыж семынак ыштен.17[Египет гыч кайыме деч вара] кокымшо ийын икымше тылзыжын икымше кечынже скиний шогалтыме лийын.18Моисей скинийым шогалтен: негызлам пыштен, брус ден вара-влакым вераҥден, меҥгылам шогалтен,19скиний ӱмбалан леведышым шарен, ӱмбакыже эше вес леведышым пыштен. Тыге ышташ Моисейлан Господь кӱштен.20Моисей возымо ойпидышым налын да шондыкыш пыштен, шондык колчалашке кок варам чыкен, шондык ӱмбаке комдышым пыштен.21Шондыкым скинийыш пуртен да, тушан пӱрдышым сакен, ойпидыш шондыкым посна ойырен. Тыге ышташ тудлан Господь кӱштен.22Юмо дене вашлийме омашын йӱдвел ужашыштыже, пӱрдыш деч тӱжвалныла, ӱстелым шынден.23Господь ончылан ӱстембалне радам дене киндым пыштен. Тыге ышташ Моисейлан Господь кӱштен.24Омашын кечывалвелныже, ӱстел ваштареш, светильникым,25тыгак [тудын] лампаде-влакшым Господь ончылан шынден. Тыге ышташ Моисейлан Господь кӱштен.26Юмо дене вашлийме омашыште пӱрдыш ончылан шӧртньӧ жертвенникым шогалтен.27Тудын ӱмбалан, Господьын кӱштымыж семынак, Моисей тамлыпушым йӱлалтен тӱтырен.28Омашыш пурымо верыште пӱрдышым сакен.29Господьын кӱштымыж семынак, Юмо дене вашлийме омашыш пурымо вер воктене Моисей надыр йӱлалтыме жертвенникым шогалтен, тушан йӱлалтен пуымо надыр ден кинде надырым конден.30Омаш ден жертвенник коклаш чаным шынден, мушкылташ вӱдым темен.31Моисей, Аарон да Ааронын эргыже-влак тушан кид-йолыштым мушкыныт.32Юмо дене вашлийме омашыш пурымо да жертвенник деке [служитлаш] лишемме деч ончыч, Господьын Моисейлан кӱштымыж семынак, нуно [тушан] мушкылтыныт.33Скиний ден жертвенник йыр тудо кудывечым ыштен да кудывечыш пурымо верыште пӱрдышым сакен. Тыге Моисей тиде пашам мучашлен.34Юмо дене вашлийме омашым пыл леведын, да Господьын йолгалтше чапше скинийым темен.35Моисей Юмо дене вашлийме омашыш пурен кертын огыл, вет тудыжым пыл леведын, скинийым Господьын йолгалтше чапше темен.36Кажне гана, кунам пыл скиний деч кӱшкӧ нӧлталтын, Израиль калык корныш тарванен. Израиль калыкын корнышто лиймыж годым эре тыге лийын.37Пыл нӧлталтын огыл гын, корныш тарванен огытыл, корнышко нуно пыл нӧлталтмеке веле лектыныт.38Кечывалым скиний ӱмбалне Господьын пылже шоген, а йӱдым тиде пылыште тул йӱлен – тидым уло израиль калык ужын. Нунын корнышто лийме чыла жапыште тыге лийын.
Institute for Bible Translation, Finland