लुका7
1ओरोः स्यान्टै मीरंलाई ओसठोयोरं पानाज़ येसु कफर्नहुमलं ओनाव।2टोबो रोमी कप्तानलो बनै उयुङ्का टोबो ओनौकर लेव, नो ठलिडे सिने ओपान्ज़्याव।3नोये येसुलो ओबारेलं ओठोयोपानाज़ ङानौकरलाई ससमड्याङ वार्डे नोये यहुडीरंला अगंवारंलाई बिन्ती डोव उपरिःङोरं।4नोरं येसुलेवकं राडे ऐ वार्डे येसुलाई बिन्ती डाडे हैयाडोव, “नो मी आव नडया डैने हाडङका ले,5कडालेकं नोये गे गेमीरंलाई मया डोवरंये, होकाम नोयेज़ गे आराढना गेडोने ज़ीःम झैडे ओयासिव।”6येसु नोरासं ओनाव। येसु कप्तानलो उज़ीःम छ्योकं उलिज़्याकं, कप्तानये ओनैरंलाई येसु लेवकं ऐवार्डे उपंरिःङोरं, “ए प्रभु, डुखं टाडो, कडालेकं ङा नङलाई ङाज़ीःमलं खुल्ने हाडङका ङाम्ले,7ङाज़ नङ लेवकं राने हाडङका पनि ङाम्ले। आबो पाङया मान्त्रा पाङड्याङ, होकाम ङानौकर सम्नेले।8कडालेकं ङा पनि हाकिमराई याढुङलं लेने मी ची, होकाम ङाढुङलं सिफाइँरं लेरं। ङा टोबोलाई ‘नान’ हैङाडोये, हो नाये, होकाम छुटंलाई ‘रान’ ङाडोये, होकाम नो राये। ङाकमारालाई ‘आव डो’ हैङाडोये, नोये हो डोवये।”9आव रोः ठैडे येसु नोलाई रःङडे अचम्बज़ ओटाव, होकाम वोल्डे ओल उझिन्ट राने भ्या मीरंलाई ऐ ओडोवरं, “ङा जेलाई हैङाडाच्यो, ङा इस्राएललं पनि आल्लुः घ्योव बिस्वास ङारोःङो माले।”10नो सोर रोयो मीरं वोल्डे ज़ीःमडे यानाव, होकाम नोराई हो नौकरलाई सम्डे उलिज़्याव याडैनाव।11नोलो ओपराटि छ्याम येसु नाइन वार्ने नाङखारलं ओनाव, होकाम येसुलो उसिसरं सोनो बनै भ्या माहुले मीरं येसुसं बोलोङ यानाव।12येसु नाङखारलो झला येमकं केनाडे उलिज़्याकं, टोबो रान्डिनिलो टोबो याज़ ओज़ालो ओमोरो यालाङज़्याव। नाङखारला बनै भ्या माहुले मीरं नोसं यालिज़्याव।13प्रभुये नोलाई ओरोःङो होकाम नोलाई उयुङ नाडे हैओडोव, “टाघर्ङन।”14होकाम येसु ओछ्योकं नाडे मोरो झासिव लो उछुव, होकाम मोरो घुर्नेरं ठन याअडिव। येसुये ऐओवारो, “ए ढापा मी, ङा नङलाई हैङाडान्ज़्या, ‘गोसोङनके।’”15होकाम नो सिव मी सोडे चुङडे ओपाङो। होकाम येसुये नोलाई वामालो उजिम्मालं ओयोव।16होकाम स्यान्टै याछेव, होसोनो परमेस्वरलो ओमहिमा याडोव होकाम ऐ यावारो, “टोबो बनै घ्योव अगमबक्ता गे गेखार्ल राडेले,” होकाम “परमेस्वरये ओल उमीरंलाई छुटैने राडेले।”17येसुलो ओबारेला आव रोः स्यान्टै यहुडिया प्रडेस सोनो ओछ्योयाला स्यान्टै छेत्रयालं ओफैलिव।18युहन्नालो उसिसराई आव स्यान्टै रोःलो ओबारेलं युहन्नालाई हैयाडोव। युहन्नाये ओल उसिसरंलाम नेबऱ्याङनिलाई उखुलोनि,19होकाम युहन्नाये होनिलाई ऐ डाडे प्रभु लेवकं उपरिःङोनि, “जो रानेले हो, नङ ज़ रो? सै गे उरु छुटंलाई गेकेन?”20नो मीनि येसु लेवकं नेराव, होकाम नोनि ऐ नेवारो, “बप्तिस्मा याने युहन्नाये गिनलाई ऐटाव रोः पजैने नङ लेवकं परिःङडे नैसिव, जो रारिज़्याव होकाम हो नङज़ रो? सै गे टोबो छुटंलो ओयेम गेरःङ?”21नो बेलाकं येसुये भ्यारंलाई रोगो, बेठा सोनो माचाव आत्मारंङाम उछुटोयोरं, होकाम भ्या अन्डलारंलाई यामि रःङने ओझोयोरं,22होकाम येसुये नोनिलाई ऐ ओडोवनि, “गनाचिनके होकाम जो जेरोःङो होसोनो जेठोयो, नाडे युहन्नालाई हैडाचिन, अन्डलारं रःङज़्यारं, लङ्गरारं बाज़्यारं, कुःरिरं सम्ज़्यारं भैरारं ठैज़्यारं सिव मीरं उन्जिज़्यारं, गरिबरंलाई चाव सोर सठैज़्यारं।23नो मी के ओरेङकं जोये ङासं ओलेकं डुखं माडोयो।”24युहन्नाये उपरिःङो उसिसरं यावोलो झिन्डे, येसुये युहन्नालो ओबारेलं माहुले मीरंलाई हैओडोवरं “जे कडिज़ मालेव बनलं कडि रःङने जेनाव? सै बतासंये ओहल्लैज़्याव ज़िःङलाई?25होकाम जे कडि रःङने जिपुलुव? सै चाव क्वा क्वाइसिव मीलाई रःङने? रःङच्यो, झिलिमिलि क्वा क्वाइसिनेरं, चावसं ज़्यानेरं सोनो चाव पोलं लेने मीरं के राजालो ओडरबारयालं ची लेरंये।26होकाम जे कडि रःङने जेनाव? सै अगमबक्तालाई? हो ङा हैङावार, जे अगमबक्ता भन्डा पनि घ्योवलाई जेरोःङो।27आव नोज़, जोलो ओबारेलं सर्सिव ले, ‘रःङच्यो, ङा ङाकटंवाललाई नङाः-नङाः ङापरिःङ, नोये नङाःडे नयेम तयार झैनेले।’28ङा जेलाई हैङाडाच्यो, ‘मेमाङाम जर्मिवरंकाम युहन्ना भन्डा घ्योव काङ्काज़ माले, होटानि पनि जो परमेस्वरलो ओराज्यलं आलिज़ा भन्डा आलिज़ाले, हो युहन्ना भन्डा अजं घ्योव टा।’”29स्यान्टै मीरं सोनो सिरमा डुप्नेरं आव ठैडे परमेस्वरलो ओसत्यलाई बिस्वास याडोव, कडावार्क नोराई युहन्नालेवङाम बप्तिस्मा रैडेयानैज़्याव।30फरिसीरं सोनो न्याम पैने घ्योव मीरं युहन्नालेवङाम बप्तिस्मा यामरोयो कारनये परमेस्वरलो उबिचारलाई या यालागिटं मामानिरंये।31येसुये हैओवारो, “आव पुस्ताला मीरंलाई ङा कडिसं ङामेडैरं के? नोरं कडि स्याव लेरं?32नोरं के बजारला लिज़्याव बाल्खरं स्यानाव लेरं, नोरं टोबोये छुटंलाई ऐ लेडे हक्लैरंये,‘गे जेलागिटं बाङसुलि गेटपो,जे जेमस्याःये।गे डुखंला गीतं गेगैकं,जे जेमघरये।’33बप्तिस्मा याने युहन्ना ओराव, होकाम नो उउपासिव, होसोनो मड्ड माओँवये। जे ‘नोलाई भुत लागिडेले’ वार्डे हैजेवार्ये।34मानवालो ओज़ा ओराव, होकाम होये ओज़्योव, सोनो ओओँव, होकाम जे हैजेवारये, ‘रःङच्यो, टोबो ज़्यावखानच्या सोनो मःङग्या, सिरमा डुप्नेराई सोनो पापीराई यानै!’35परमेस्वरलो उबुड्डिला रोःलो ओप्रमान नोराई योरंये जो मीरं सत्यलं बारंये।”36फरिसीरंलामटा टोबोये येसुलाई काङ ज़्याने उखुलो, होकाम येसु नो फरिसीलो उज़ीःमकं नाडे काङ ज़्याने उचुङो।37नो नाङखारलं टोबो पापी मेमा लेव। फरिसीलो उज़ीःमकं येसु काङ ज़्याने राडेले वार्ने ठैडे, टोबो सिङ्गमरमरलो बोतललं अत्तर रैडे नो मेमा नलं ओराव,38येसुलो उझिनङाम ओखङ ठिनकं च्याङसिडे, घर्ये-घर्ये येसुलो ओखङ उपीःलये ओसंछिमो, होकाम ओङैःटा ओचेमये सिवग्यान येसुलो ओखङलाई म्वाइ डाडे नो अत्तर येसुलो ओखङटं ठिडे ओयोव।39येसुलाई खुल्ने फरिसीये आव रःङडे उयुङ-उयुङलं ऐ ओवारो, “आव अगमबक्ता ओटाखिन के आवलाई छुने काङ्का होसोनो खैटाव मेमा वार्डे यासोनो हो, कडावार्क आव के पापीनि ची।”40येसुये नो फरिसीलाई हैओडोव, “ए सिमोन, नङलाई टोबो रोः हैडानेले।”
नोये हैओवारो, “गुरबा, हैगवार्ङनके।”41“कोइ साहुलो नेबऱ्याङ ओआसामीनि लेवनि, टोबोये पाँस सय चान्डीलो ढ्याक सोनो होका टोबोये पचास चान्डीलो ढ्याक रिन लाङडे नेनैज़्याव।42होकाम नोनिसं रिन फोने कडिज़ ओमलेकं नो साहुये नेबऱ्याङलाई माफ ओयोवनि। हैजैडे हैगवार्ङनके, आव नेबऱ्याङकाम नो साहुलाई भ्या मया काङ्काये डोनिये?”43सिमोनये हैओवारो, “ङाबिचारलं, जोये भ्या छेमा ओडोयो।” येसुये नोलाई हैओडोव, “नङ ठीकंज़ बिचार नडोव।”44होकाम नो मेमा लेवडे न्याःडे येसुये सिमोनलाई हैओडोव, “आव मेमालाई नरःङज़्यारो? ङा नज़ीःमलं ङाराखे, नङ ङालाई ङाखङ हुर्ने रीः नमयाङये, आवये के ङाखङ उपीःलये ओसंछिमो, होकाम ओचेमये उसिव।45नङ ङालाई म्वाइ नम्डाङये, आवये के, ङा आकं ङारावकाम, ङाखङ म्वाइ डाने माराःवये।46नङ ङाङैःटं ठी ठिडे नमयाङये, आवये के ङाखङटं अत्तर ठिड्याङज़्याव।47हैजैडे ङा नङलाई हैङाडान्ज़्या, आवलो ओपाप जो बनै भ्या लिज़्या, छेमा टाडेले, कडावार्क आव मेमाये भ्या मया सटन्डेनोयो। जोलाई टिगिडा छेमा यासि, होये टिगिडाज़ मया डोवये।”48होकाम येसुये नो मेमालाई हैओडोव, “नपाप छेमा टाडेले।”49नला ज़्याव ज़्योज़्यावरं या-याज़ हैयावारो, “पाप छेमा याने आव काङ्का?”50येसुये नो मेमालाई हैओडोव, “नबिस्वासये नङलाई जोगैडेनैसोनो, चावसं नान।”
नोये हैओवारो, “गुरबा, हैगवार्ङनके।”41“कोइ साहुलो नेबऱ्याङ ओआसामीनि लेवनि, टोबोये पाँस सय चान्डीलो ढ्याक सोनो होका टोबोये पचास चान्डीलो ढ्याक रिन लाङडे नेनैज़्याव।42होकाम नोनिसं रिन फोने कडिज़ ओमलेकं नो साहुये नेबऱ्याङलाई माफ ओयोवनि। हैजैडे हैगवार्ङनके, आव नेबऱ्याङकाम नो साहुलाई भ्या मया काङ्काये डोनिये?”43सिमोनये हैओवारो, “ङाबिचारलं, जोये भ्या छेमा ओडोयो।” येसुये नोलाई हैओडोव, “नङ ठीकंज़ बिचार नडोव।”44होकाम नो मेमा लेवडे न्याःडे येसुये सिमोनलाई हैओडोव, “आव मेमालाई नरःङज़्यारो? ङा नज़ीःमलं ङाराखे, नङ ङालाई ङाखङ हुर्ने रीः नमयाङये, आवये के ङाखङ उपीःलये ओसंछिमो, होकाम ओचेमये उसिव।45नङ ङालाई म्वाइ नम्डाङये, आवये के, ङा आकं ङारावकाम, ङाखङ म्वाइ डाने माराःवये।46नङ ङाङैःटं ठी ठिडे नमयाङये, आवये के ङाखङटं अत्तर ठिड्याङज़्याव।47हैजैडे ङा नङलाई हैङाडान्ज़्या, आवलो ओपाप जो बनै भ्या लिज़्या, छेमा टाडेले, कडावार्क आव मेमाये भ्या मया सटन्डेनोयो। जोलाई टिगिडा छेमा यासि, होये टिगिडाज़ मया डोवये।”48होकाम येसुये नो मेमालाई हैओडोव, “नपाप छेमा टाडेले।”49नला ज़्याव ज़्योज़्यावरं या-याज़ हैयावारो, “पाप छेमा याने आव काङ्का?”50येसुये नो मेमालाई हैओडोव, “नबिस्वासये नङलाई जोगैडेनैसोनो, चावसं नान।”
The Word for the World International