1 KORINTIYAWA12
1Kuzukam, yayuwa na nsubiya Yesu ni ma so ku mani rishi shina a kiya kyawuta ni Aworo nsuseki ba.2Ku shina Kwanki de kuma nsubiya Yesu ba, ntani su shishirigye ku de ku biya boka de man leyi ba.3Nkayomu mma gye ku, ba nsude Aworo Mirikisi ma nja shi de yaa buruta nkye, <<Yesu ma lalasheshe,>> nja ba nsude yaa buruta nkye, <<Yesu e ma Obagizi la,>> sede nsude Aworo nsuseki ma nja shi.4Yomuna kyawuta Mirikisi ma mbombom, sede Aworo ma yiri daa la de ba su.5Yomuna mu man turiki mbombom ni anki Mirikisi, sede Obagizi ma daa la.6Omu nsubiya Yesu mu man anki mbombom de mua yi, sede Mirikisi daa la de ema ba mu sori ni yi anki ni guru a siki ntani.7Mirikisi ba nsubiya Yesu Aworo yi, de mu sua kiya mu nto.8Worosu Mirikisi ba su kyawuta ni beyi manki Mirikisi ni simi yiride ntani sua gane te anya Aworo nsuseki, worosu Mirikisi ba su kyawuta ni kokoyi kyakyawu de ntani su shina te anya ni Aworo yiri daa,9worosu Mirikisi ba su kyawuta ni beigaskye te anya ni Aworo daa, nseda Mirikisi ba su kyawuta ni worikye worede mayi suwo te anya Aworo daa,10nseda Mirikisi ba su kyawuta ni yi mbo mamanki, nseda kyawuta ni pala mbode yaa paru a geba, nseda kyawuta ni shina aworo bombom, nseda kyawuta ni yi beta ni arishiya bombom, nseda de pala maana arishiya mu.11Guru anki mu Aworo daa na mayi su, ema beyi ba guru nsude ema so.12Kiristi ema kankye nki ndandaa, de e man gaba nki nyowa; nzun yomu ema nki daa, ko de nkye ema gaba nki bombom.13Guru amu su yi mu tunkwasa a siki ni Aworo daa a siki nki daa, ko Yawudawa ko worede su ma Yawudawa ba, ko bunwa ko worede su ma bunwa ba, guru amu mu sha dege siki Aworo daa.14Sobon nki nsebeki mani gaba daa na ba sede gaba nki nyowa.15Nde seni yaa nkye, <<Sobon ni ma nani naba, ba mbo de dama ni nja nki ba,>> da mu yaa taba sa seni yaa butu bila nki ba.16Nja nde kuni nkye, <<Sobon ni ma ndani naba, ba mbo de dama ni nja nki,>> da mu yaa taba sa kuni de butu bila nki ba.17Nde guru nki ma ndani ni mina mua zi beta nshi? Nde guru nki ma kuni ni mina mua zi royi mbo nshi?18Sede Mirikisi shiriya gaba nki nsebeki kyakya yiride e so de ma.19Nde guru nki nsebeki e ma gaba nki daa la, angana ririgye gaba nki sua ma?20Sede gaba nki nsebeki su man yowa, ganga nki kwa ma daa la.21Ndani yaa taba gye nani nkye, <<Mbodaa dama ni nja ke ba!>> Kiya yaa taba gye seni nkye, <<Mbodaa dama ni nja ke ba!>>22Yomuna, gaba nki de mua geni su kankye su ma mbodaa ba, osu na su pi moriya,23nja gaba nki de mua geni su kankye su ma ni ampani ba osu na mua ba su girima; gaba nki amu de su mani kyawu geni ba osu su ba su dereja,24gaba nki amu de su man kyawu kone ba se mu kula nsu ba. Sede Mirikisi shiriya nki nsebeki kyakya yiride e la gaba nki de e mani moriya ba e la yi ma nsu moriya a siki asu guru,25Mirikisi yi yomuna de gaba nki su yi ANKI gabada kede su nana bombom ba, sede gaba nki su kula nkiasu.26Sobon yomu nde gaba nki daa yi suwo, guru gaba nki sua zi zapi suwo ni; yomuna nde ntani su yobo gaba nki daa, guru gaba nki sua yi peri siki gabada.27Kuzukam guru aku kuma kankye nki Kiristi la, kuma kowoni nse e ma kankye gaba nki Yesu la.28A siki ntani nsubiya Yesu Mirikisi sa yayamanki su ma ni pari, anebi su ma ni bi, ntani nsu male beta Mirikisi su ma ni wuku, se nsu anki beyi mamanki, nja kuma worede su ma worikye worede su ma yi suwo, nja nsu sua ntani nto ni yi mbo, nja worede su ma sua ntani nsubiya Yesu nto anki, nja nsu yi beta ni arishiya mbombom.29Guru asu na su ma yayamanki? Guru asu na su ma anebi? Guru asu na su ma nsu male beta Mirikisi? Ko guru asu na su ma nsu anki beyi mamanki?30Guru asu na su ma ni kyawuta ni worikye nsu suwo? Guru asu na su ma nsu yi beta ni arishiya mbombom? Ko guru asu na su mayi pasara beta ni arishiya?31Sede ku yi memeri ni kyawuta Mirikisi de pi girima.
Kuzukam na nana ku turiki de pi kowoni mbo kyawu.
Kuzukam na nana ku turiki de pi kowoni mbo kyawu.
The Word for the World International