Faarotikaa Maxaafa51
Cubbotee Gattowwaalixxa Soodachcho
Faarsaleeyyetike Sooresi'a Daawwiti Bersaabeeyiba Maree Uduma Wabeekichchi Naataan Isibaa Dageema Wodda, Daawwitixxa Faaro
1Ee, Mageno atixxe jaalalaxxee'e ani'a maraar;atike lumoke o'wixxeenna sa'nee anxa filte hoyyi.2Balleessa anxa anenaa'n anshii;cubbo anxenaa'ninna anee ca'aa assi.3Sa'ne anxa ege'neennaxxee'e,cubbo anxinna duuchchi wodda anxe ille edo hexxeen.4Ani ate'n jallateenne; dhugaaten, atee calla balleessennen;ille atixxi eddonna fuggoxxa yaane asseennen;Tennexxee ane'n murte uwwa atixxinna,anee mura woxisa atixxi seeraken.5Reefi ama anxi anee'e siila'witee wodda cubbaaleessake,ilemenne woddanna balleessanjokeman.6Kunse, ati manjiinxe qalbe giddo dhuga'a uuddotaa halchitatton;tennexxee beekkumiinxa buqo yaane anee barachchiisi.7Hisoophike shafinni fiffixxe cubbotenaa'n anee luqqi assi,aninna qulloommannon;anee anshi aninna kaadeti calla gola'lannon.8Gammadokanna illilleete anee laqisi;anee enqite'e butuchchiteetek anki micinna gammaddowwal.9Cubbo anxa uuddoxxe'e;balleessa anxa duuchchanna anenaa'n fiyi.10Ee, Magenoo! Ca'itte qalbe ani'a dadi;addatendaaxxa qalbe ani'a uwwi.11Alba atik edii'n anee bayyissoxxe'e;woyyichcha atika Haafuuranna anenaa'n adhdhitoxxe'e.12Atixxe anjiraxxa gammashsho haaroba ani'a uuwwi;ishshi hiyye ati'a ajajemona'a anee gargaar.13Ookkonechchi uduma aninna seera atika sa'emmaka manna ora atika barachchiisannon;cubbaaleeyyetinna atibaa higgaan.14Ee, Mageno anke anjiralloomunde dhangalaasennexxee cubbonaa'n anee gatisi;afo'i ankinna qullumma atixxee'e illillisee faarsaannen.15Ee, Dada Duuchchike Goottaa! Afo'o arbo anee bani;aninna atee saadannon.16Tolcha eeta'eetele silaan ati'a shiqishe'eennan;ciincatik tolchi atee gammachchiisabaan.17Mageno eeyyisaak tolchi enqendeexxe qalben;Ee, Magenoo ati qalbe enqendeexxanna yaade'e aadde aaga manjo tuffattabexxon.18Tsiyooni'aa fedhi atixxenni eloxxa yaane assi;Iyyerusaalemika dalla'anna qammalchi.19Ookkone wodda qulummatik tolchi,ciincatik tolchinna wo'mi ciincatiki tolchii atee gammachchiisaan;ookko'n atike tolchmalcho'n korommee tolchendaan.The Word for the World International