اقرأ Laakkossiinka 31

Laakkossiinka31

Miidiyaamitote'n Halo fula

¹Duuchchi Woddik Gootti Muuse'e²«Isira'eelik mannixxee Midiyaamike manna'n halo fuli; ookkonechchi uduma atinna rertatton.»

³Tennexxe'e Muuse arda, «Midiyaamika manna lolate'e mareexxi Duuchchi Woddike Goottixxee halo insa'ne'n fulaaka manna ha'noo giddii'n bagedoke qophpheesse.⁴Mitte mittenge Isira'eelike gosatike mininaa'n mitte mitte kuma manna bagedo erge» hiyye.⁵Tennexxe'e Isira'eelixxe gosanaa'n fuleek, mitte mittende gosatike mininaa'n mitti kumi, duuching mitteba tommenna lami kumi manji bagedokee'e qophpheeseme.⁶Muusenna woyyichcha woyyitte bakkaka mi'uwwanna beesisakee ufuufemaaka malagata anga afe'eeka qeesichcho Ali'aazaarike belto Finihaasinni welti mitte mittenge gosatike mininaa'n mitte mitte kuma manna bagedo erge.⁷Insa'nenna Muuse'e Duuchchi Woddik Gootti ajajemmaxxe qixxe'n Midiyaamika manna lolle; labballo duuchchanna shinne birre.⁸Shiyemeeke manni giddo ondi Midiyaamik moyanjuwwi Ewwi, Roqeemi, Suuri, Huurinna Riiba he'nemman; Bi'oorika belto Bele'aamiinna wolaantichchik shinne.⁹Ookkonechchi uduma Isira'eelik manni Midiyaamike mannixxa melaallenna annoole booji'e; hore insa'neeka lalo, gedhebokanna re'e duuchcha saame; kara insa'neexxa duuchchanna adhdhine.¹⁰Midiyaamik manni hedhammaka qachchuwwa duuchchanna insa'nexxa kaambuwwa duuchcha gunbe.¹¹Hori manji gatebaang boojineechchonna saammeechcho duuchcha bukki assene adhdhine.¹²Boojineemmaka manna, oolfineemmaka horenna saammemmaxxa karra duuchcha Iyyaariko edi darre Yordaanoosi qarqara, Mo'aabike diida'n Muusenna qeesichchi Ali'aazaar ittanni Isira'eelxi tuuta duuchcha he'neexxe kaambe iyyedange.¹³Muuse, qeesichchi Ali'aazaarinna tuutatik akeekisanjuwwi duuchchi insa'ne'e qophedho'a kaambee'n gadhi'a fulle.¹⁴Muuse, bagedokenaa'n aagemmake loliinke mannike kumma akkeekisanjuwwa'ninna dhibba akkeeisanjuwwa'n mufateexxi,¹⁵Muusenna insa'ne'e, «Melaalle duuchcha hittanni shiyya gophphine?» Hiyye qore.¹⁶«Insa'ne Fegor kaddeexxe yaane'n Bele'aamika gorsa adhdhineexxi, Isira'eeli Duuchchi Woddike Goottinaa'n udumi'a higgaashsha assinekinna Duuchchi Woddik Goottinna tennexxe arda balati ganaashsha assineek insa'neten.¹⁷Tennexxe ta'atenna kaddoolelabbaxxa oose duuchcha, labballik diiphpheexxa melaalle duuchchanna shiwwe.¹⁸Yaane kinni labballo ege'nebaaka dubarra duuchcha ifi'a gatilse.

¹⁹«Ha'no giddii'n manjo shiyeek yookaan shiyemeeka tuqeek duuchchi kaambeti gadho torbaane barra turowwaal; sakkaxxe barra'ninna torbaxxe barra'n ha'no umo ifikanna boojitinemmaka manna luqqi asse.²⁰Hiini seemmanna iittanni gogiink, re'etixxe ordaak, yookaan hoone'e haqichiinka mi'uwwa duuchchanna luqqi asse.»

²¹Ookkonechchi uduma qeesichchi Ali'aazaar lola mare aagemmaka loliinka manna hiyyee qici, «Duuchchi Woddik Gootti Muuse'n uwweeke seerxi aada konnechchinni butti'a hexxeexxen:²²Worqe, birretik sibiljo, sageettotika sibljo, siblo, qorqoorotika sibiljo, irsaasetek sibljonna²³iittanni giirati gubatabaachchi huunichchi duuchchinna giira giddo sa'issiyyo hasissaan; ookkonechchi udumanna ca'a hiyyaan; kadomale kinni ca'a assatike wodi'inni ca'a hiyyo hasissaan. Giirati gubataachchi huunichchi duuchchinna konne ca'a assatike wodi'i giddo sa'issiyyo hasissaan.²⁴Torbaxxe barra'n seemma ha'nooxxa borcedhdhe; ca'a hitinaan; ookkonechchi uduma kaambe giddi'a e'ya dandeetinaan.»

Booji'o Qoodema

²⁵Duuchchi Woddik Gootti Muuse'e hiyyee qici,²⁶«Ati, qeesichchi Ali'aazaarinna tuuti giddo hedheek mini mini hadik akeekisanjuwwin welti booji'eme dageeka ardanna hore duuchcha laakko'we.²⁷Booji'o lameba hissitineexxi bagedo dulemmake loliinke manni'anna wele gatemmake tuutatike ardi'a qoodde.²⁸Bagedo duuleeke loliinke mannika qoobbonaa'n, manjokee'n kadi gateeke horenaa'n laliinke, harretike gedhebiinke yookaan re'etike onde onde dhibbinaa'n mitte mitte Duuchchi Woddike Gootti'a hirbo fulche.²⁹Tennee hirbo insa'neeke qoobbinaa'n aaxxettexxi Duuchchi Woddike Goottike qoobbi'a qeesichcho Ali'aazaari'n uwwi.³⁰Isira'eelitota geyemmake gamisa qoobbonaa'n, manjokee'n kadi geteeke horiinkee'n, laliinke harretike gedhebiinke yookaan re'etike onde onde tomminaa'n mitte mitte fildettexxi Duuchchi Woddike Goottike Taaboti galdumika duunkaana erigatema uuddaake Leewwitote uwwi.»³¹Muusenna qeesichchi Ali'aazaar Duuchchi Woddik Gootti Muuse'e ajajemmashshanni assine.³²Loliink manni boji'eexxi adhdhemmaxxe boji'onaa'n gate'emachchi: jaane dhibbanna torbaane tommenna onde kumi gedhebi,³³torbaan tomminna lami kumi lali,³⁴jaane tomminna mitti kumi harrenna³⁵sasi tomminna lami kumi labballik diiphphebaaxxi melaalle.

³⁶Ookkone bagedo duulemmake loliinke mannik gamisi qoobbi 337,500 gedhebomman.³⁷Konne gedhebi giddii'n Duuchchi Woddike Gootti'a hirbo uune'emmak jaane dhibbanna torbaane tommenna ondekemman.³⁸Sase tommenna jaane kuma lalo; konne giddii'n Duuchchi Woddike Gootti'a uwwendeexxi hirbo, torbaane tommenna lame lalomman.³⁹Sase tomme kumanna onde dhibba harre, konne giddii'n Duuchchi Woddike Gootti'a uwwendeexxi hirbo jaane tommenna mitte harremman.⁴⁰Tommenna jaane kumi manni, konne giddii'n Duuchchi Woddike Gootti'a uwwendeexxi hirbo sase tommenna lame mannamman.

⁴¹Duuchchi Woddik Gootti Muuse ajajemashanni Muse Duuchchi Woddike Goottike qoobbo kaddeexxa hirbo qeesichcho Ali'aazaari'n uwwe.⁴²Muuse bagedo duulemmake mannii'n gargar hiseek Isira'eelitota geyeek gamisi qoobbi,⁴³tuutatike qoobbo kadeek: sase dhibbanna sase tommenna torbaan kuminna ondi dhibbi gedhebi,⁴⁴sase tommenna jaane kumi lali,⁴⁵sase tomme kumanna onde dhibba harrenna,⁴⁶tommenna jaani kuma mannamman.⁴⁷Isira'eelitota geyemmake gamisa qoobbinaa'n Muuse Duuchchi Woddik Gootti ajajemmashanni onde tomme manjinaa'ninna horinaa'n mitte mitte fila'n Duuchchi Woddik Goottike Taabotiinke galdumika duunkaana erigatema uuddaaxxe Leewwito'a uwwe.⁴⁸Okkonechchi uduma loliinke mannixxe kutuwwa'n kumi akeekisajuwwinna dhibbi akeekisanjuwwi Muuseba'a dangeexxi,⁴⁹Muuse'ni hinee qici, «No'o atik erganjuwwi no'oke ajaja hunda hedhemmaka loliinka manna lakkonneena'a mittikinna xe'yeek hedhebaan.⁵⁰Tennexxe'e no'o mitti mitting anfenneka worqetika seesuwwa, lekkatika hirbooruwwa, angatixxa sageettuwwa, qubbatixxa qubuwwa, manshatika gutichchuwwanna goobiinxa marxuwwa Duuchchi Woddike Gootti edo cubbo no'oxxa biratike tolcha kado'a Duuchchi Woddike Gootti'a uune'ennen» hine.⁵¹Muusenna qeesichchi Ali'aazaar worqetixxe bifa'n hujemeeka seesuwwa insa'nenaa'n aa'ne.⁵²Muusenna Ali'azaar kuma akeeksanjuwinaa'ninna dhibba akkeesanjuwwinaa'n aaneexxi worqe Duuchchi Woddike Gootti'a uuneexi worqek ha'urri dhibbanna sallane tomme kiiloqicamman.⁵³Mitti mittingi loliink manni booji'o ifi ifi'a gatilse'emman.⁵⁴Muusenna qeesichchi Ali'aazaar kuma akeeksanjuwwinaa'inna dhibba akeekisanjuwinaa'n aa'nemmaxxa worqe Duuchchi Woddike Gootti edo Isira'eelike mannixxe qaabbe kaddaashsha Afenshatike Duunkaani giddi'a idange.

The Word for the World International

https://app.library.bible/content/2b894378475c6aea